Samuna na “Bantu ya Mitindu Yonso”
1. Inki mutindu bansamuni ya mbote kevandaka bonso bantu ya mayele ya kisalu ya maboko?
1 Muntu ya mayele ya kesalaka kisalu ya maboko kevandaka ti bisadilu mingi, mpi yandi kezabaka ntangu mpi mutindu ya kusadila konso kisadilu. Mutindu mosi beto kevandaka ti bisadilu ya mitindu na mitindu yina kesadisaka beto na kusala kisalu na beto ya kusamuna. Mu mbandu, bo mebasisaka tumikanda ya kele ti masolo ya mitindu na mitindu sambu na kusadisa beto na kusamuna na “bantu ya mitindu yonso.” (1 Kor. 9:22, NW) Ngika ya Kisalu na Beto ya Kimfumu ya ngonda yai kele ti lisiti ya tumikanda yankaka na kati na yo; yo kemonisa bantu yina bo mesadilaka tumikanda yango, mpi yo kesonga mutindu beto lenda kabula yo.
2. Inki ntangu beto lenda sadila tumikanda na kisalu ya kusamuna?
2 Ntangu ya Kusadila Tumikanda: Muntu ya kisalu ya maboko kesadilaka bisadilu na yandi konso ntangu yina yo kevandaka mfunu. Mutindu mosi, beto lenda pesa muntu kamukanda konso ntangu yina beto kemona nde yandi tabakila yo mambote, kansi ve kaka na bangonda yina bo kelombaka beto na kukabula tumikanda. Mu mbandu, kana beto fwete kabula mukanda Biblia Kelongaka mpi beto kesamuna na nsi mosi ya Bukristu ve, yina bantu ketudilaka ve Biblia dikebi ya mingi, yo lenda vanda mbote na kupesa bo kamukanda mosi ya mefwana mpi kana beto metedimisa mpusa na bo, beto lenda lomba bo na kulonguka mukanda Biblia Kelongaka.
3. Sambu na nki beto fwete kuma mayele na yina metala kusadila bisadilu yina kesadisaka beto na kuta kimbangi?
3 Biblia kesikisaka bantu yina kesalaka mbote-mbote kisalu na bo. (Bing. 22:29) Ya kyeleka, Ata kisalu mosi ve kele mfunu mingi bubu yai kuluta ‘kisalu ya santu ya kulonga nsangu ya mbote.’ (Roma 15:16) Sambu na kuvanda “muntu ya kisalu yina kele ve ti kima ya kuwila nsoni,” beto fwete sala ngolo sambu na kukuma mayele na yina metala kusadila bisadilu na beto.—2 Tim. 2:15.