Sadisa Bantu na Kuwidikila Nzambi
1. Inki tumikanda kubasikaka na lukutakanu ya distrike “Bika Kimfumu ya Nzambi Kukwisa!” mpi sambu na nki yo kele bisadilu ya mfunu?
1 Na lukutakanu ya distrike “Bika Kimfumu ya Nzambi Kukwisa!” tumikanda zole kubasikaka, Widikila Nzambi mpi Zinga Kimakulu mpi mbalula na yo ya pete, Widikila Nzambi. Sambu yo kele ve na bisono mingi, bo lenda balula yo nswalu mpi kukonda mpasi. Yo yina bo pesaka nswa ya kubalula Widikila Nzambi mpi Zinga Kimakulu na bandinga 431 na nima ya kubasika na yo na kingelesi.
2. Banani tabakila tumikanda yai mambote?
2 Banani mpenza tabakila tumikanda yai mambote? Tala mambu yai kesalamaka mingi na nsi-ntoto ya mvimba:
• Nsamuni mosi kesolula ti muntu; yo lenda vanda na mbala ya ntete to na mvutukilu ya mpa; yandi mebakisa nde muwi na yandi mezaba ve kutanga to ketanga mbote ve.
• Nsamuni mosi kesamuna na bantu yina ketubaka ndinga yina beto mebalulaka mikanda fyoti mpamba to beto mebalulaka ata mukanda mosi ve. To bantu mingi na teritware kekukaka ve kutanga ndinga yina bo ketubaka mbote.
• Nsamuni ketuba na ndinga ya bidimbu sambu na kusamuna na bababa na teritware na yandi.
• Kibuti mosi kezola kulonga mwana na yandi ya fyoti yina mezaba ve kutanga.
3. Inki mambu nge takuta na balutiti ya Widikila Nzambi?
3 Mutindu Bo me Yidika Malongi na Tumikanda yai: Widikila Nzambi kele kaka na nsa mosi ya pete mpi bangogo ya Verse mosi na nsi ya konso lutiti sambu na kumonisa ngindu ya mfunu. Sambu na nki? Yindula nde muntu mosi mepesa nge kamukanda mosi ya bo mesonikaka na ndinga yina nge lenda tanga ve, ziku nge kebakisa mpi ve bisono yina kele na kati. Keti nge tasepela na yo, ata yo kele na bifwanisu ya kitoko? Bantu mingi tasepela na yo ve. Mutindu mosi, bantu yina kezabaka kutanga ve kelembaka nitu kana bo memona mukanda mosi ya kele ti bisono mingi. Yo yina na konso lutiti, bo meyidika bifwanisu ya mbote mpenza ti kamwa tolotolo ya fyoti ya ketwadisa na kifwanisu ya kelanda.
4. Inki mambu nge takuta na balutiti ya Widikila Nzambi mpi Zinga Kimakulu?
4 Widikila Nzambi mpi Zinga Kimakulu kele na bifwanisu ya mutindu mosi ti Widikila Nzambi. Bo salaka yo sambu na kulonguka ti bantu yina kuzaba kutanga mbote ve to bayina kelonguka kutanga. Longi lenda sadila mpi kamukanda yai ntangu yandi kelonguka Biblia ti muntu na kamukanda Widikila Nzambi. Konso dilongi kele ngyufula mpi yo kele na zulu na diboko ya kimama mpi yo mebaka balutiti zole. Bo metula mpi bakomantere ti baverse ya ketendula bifwanisu. Na nsi ya balutiti mingi kele ti lupangu mosi ya mukubu yankaka yina bo metula mwa mambu ya ngika mpi baverse yina beno lenda tadila, na kutadilaka makuki ya longoki.
5. Inki ntangu mpi inki mutindu beto lenda kabula tumikanda yai?
5 Mutindu ya Kusadila Yo: Nge lenda pesa kamukanda yai na kisalu ya nzo na nzo konso ntangu yina nge kemona nde yo mefwana, ata yo kele ve kamukanda ya kukabula na ngonda yina. (Tala lupangu “Mutindu Beto Lenda Kabula Yo.”) Na mvutukilu ya mpa, nge lenda songa yo muntu yina memonisa mpusa na kuzabisaka yandi nde nge kele ti kima mosi ya kumonisa yandi, mpi pesa yandi kamukanda.
6. Inki mutindu beto tatwadisa kulonguka ya Biblia na kusadilaka tumikanda yai?
6 Mutindu Widikila Nzambi kele ve na bangyufula ya bo menyema, disolo tavanda ve na bangyufula mpi bamvutu mutindu nge kesalaka ntangu nge kelonguka Biblia ti muntu na mukanda Biblia Kelongaka. Na babwala mingi bantu kezolaka kuwa masolo. Yo yina, sadila bifwanisu sambu na kutela bantu masolo ya kupemama yina kele na Biblia. Tendula mambu yina bifwanisu kemonisa. Vanda tiya-tiya. Lomba longoki na kuzabisa nge mambu yina yandi kemona mpi keyindula. Tanga baverse yina kele na nsi ya lutiti, mpi tadila ti yandi mambu yina baverse yango ketuba. Yula bangyufula sambu na kukotisa yandi na disolo mpi na kuzikisa kana yandi kebakisa. Kana beno kesadila Widikila Nzambi mpi Zinga Kimakulu, beno tanga bangogo mpi baverse ya mefwana ntangu beno ketubila konso kifwanisu.
7. Inki mutindu beto lenda sadisa longoki na beto ya Biblia na kuyela?
7 Sadisa Longoki na Kuyela: Ntembe kele ve nde masolo na beno tapesa longoki mpusa ya kulonguka kutanga na mpila nde yandi mosi kubaka nzayilu ya Yehowa. (Mat. 5:3; Yoa. 17:3) Yo yina kana beno kelonguka na Widikila Nzambi, bantangu yankaka nge lenda yula yandi kana yandi tandima nde nge longa yandi mutindu ya kutanga, na nima nge lenda kotisa yandi na kamukanda Widikila Nzambi mpi Zinga Kimakulu. Yo vanda nge kesadila kamukanda Widikila Nzambi to Widikila Nzambi mpi Zinga Kimakulu, kana beno memanisa, longoki tavanda ve ya kuyilama sambu na mbotika. Nge fwete kotisa yandi na mukanda Biblia Kelongaka to na mukanda yankaka ya mefwana, yina tasadisa yandi na kubaka nzayilu ya mingi ya Biblia.
8. Sambu na nki nge kele na ntonda sambu na bisadilu yai ya mpa ya kisalu ya kusamuna?
8 Kana bantu kezola kuzinga mvula na mvula, bo fwete widikila Mfumu ya luyalanganu. (Yez. 55:3) Luzolo ya Yehowa kele nde “bantu yonso,” tanga mpi bayina mezaba ve kutanga, kulonguka mutindu ya kuwidikila yandi. (1 Tim. 2:3, 4) Beto kele na ntonda mingi sambu na bisadilu yai ya mpa, ya beto lenda sadila sambu na kulonga bantu mutindu ya kuwidikila Nzambi!
[Lupangu ya kele na lutiti 3]
Mutindu Beto Lenda Kabula Yo
Monisa muwi balutiti 2-3, mpi tuba nde: “Keti nge tazola kuzinga na nsi-ntoto mosi ya kele bonso yai? [Bika muntu yango kupesa mvutu.] Masonuku kesila nde [to, mukanda yai ya santu kesila nde] ntama mingi ve Nzambi takumisa ntoto kisika mosi ya kitoko mpi ya ngemba, yina ata muntu mosi ve tavanda nsukami to kubela. Tala mambu ya beto fwete sala sambu na kuzinga kuna. [Tanga Yezaya 55:3, yina kele na lutiti 3 na zulu.] Masonuku yai kezabisa beto na ‘kukwisa na’ Nzambi mpi ‘kuwidikila’ yandi. Kansi inki mutindu beto tawidikila Nzambi?” Balula na balutiti 4-5 mpi tadila mvutu ti yandi. Kana muwi kele ve ti ntangu, bikisila yandi kamukanda mpi baka bangidika sambu na kuvutukila yandi mpi kutadila mvutu.