Batoko, Keti Beno Ke Zola Kubaka Mikumba?
1. Inki ntangu toko yina me bakaka mbotika fwete yantika kusadila lutwadisu yina kele na 1 Timoteo 3:1?
1 ‘Kana muntu ke zola kubaka mikumba, yandi ke zola kisalu mosi ya mbote.’ (1 Tim. 3:1) Bangogo yai ya kupemama ke siamisa bampangi-babakala na kulungisa mambu yina Biblia ke lombaka sambu na kubaka mikumba na dibundu. Keti nge fwete kuma ntete mbuta sambu na kusala yo? Yo kele mbote mingi na kuyantika kuzola mikumba ntangu nge kele ntete leke. Mpidina, nge lenda baka formasio mpi kumonisa nde nge me fwana na kuponama bonso nsadi ya kisalu ntangu nge ta yela. (1 Tim. 3:10) Kana nge kele toko yina me bakaka mbotika, nki nge lenda sala sambu na kubaka mikumba?
2. Inki mutindu nge lenda yedisa mpeve ya kuditambika mpi kumonisa yo?
2 Kuditambika: Yibuka nde, nge ke zola kubaka mikumba sambu na kisalu mosi ya mbote, kansi ve sambu na lukumu. Yo yina, yedisa mpusa ya kusadisa bampangi na nge ya babakala ti ya bankento. Mutindu mosi ya kusala yo kele kuyindulula mbandu ya mbote ya Yezu. (Mat. 20:28; Yoa. 4:6, 7; 13:4, 5) Lomba Yehowa na kusadisa nge na kutudilaka bantu ya nkaka dikebi. (1 Bak. 10:24) Keti nge lenda sadisa bampangi yina kele minunu to bayina kele ti bifu na nitu? Keti nge lenda kudipesa sambu na kusakula to kuyidika kibansala ya Nzo ya Kimfumu to kusala bisalu ya nkaka sambu na kutula yo bunkete? Keti nge lenda sala disolo mosi bonso volontere na Nzo-Nkanda ya Kisalu ya Teokrasi kana munkwa na yo kele ve? Nge ta mona nde kudipesa sambu na kusadisa bantu ya nkaka ta pesa nge kiese.—Bis. 20:35.
3. Sambu na nki kimpeve kele mfunu, mpi nki mutindu muntu lenda yedisa yo?
3 Kimpeve: Yo kele mfunu mpenza nde nsadi ya kisalu na dibundu kuvanda ti kimpeve ya mbote na kisika ya kuvanda ti makuki ya kubutukila ya sipesiali. Muntu ya kimpeve ke monaka mambu mutindu Yehowa ti Yezu ke monaka yo. (1 Bak. 2:15, 16) Yandi ke monisaka “mbuma ya mpeve.” (Bag. 5:22, 23) Yandi ke vandaka nsamuni ya kikesa mpi ke tulaka mambote ya Kimfumu na kisika ya ntete. (Mat. 6:33) Kana nge kele ti manaka ya kulonguka nge mosi, nge lenda yedisa bikalulu ya kimpeve. Yo ke tadila mpi kutanga Biblia konso kilumbu, kutanga konso nimero ya Nzozulu ya Nkengi ti ya Réveillez-vous !, kukwenda na balukutakanu ya dibundu mpi kuyidika yo na ntwala. (Nk. 1:1, 2; Baeb. 10:24, 25) Ntangu Polo siamisaka Timoteo na kuyela na kimpeve, yandi sonikaka nde: “Keba ntangu yonso . . . na malongi na nge.” (1 Tim. 4:15, 16) Yo yina, bongisaka mbote-mbote masolo ya bo ke pesa nge na Nzo-Nkanda ya Kisalu ya Teokrasi. Kudibongisaka sambu na kisalu ya kusamuna mpi samunaka mbala na mbala. Kuditudila balukanu ya kimpeve mpi sosa kulungisa yo; mu mbandu, kusala kisalu ya kimupasudi-nzila, kisalu na Betele, kukota Nzo-Nkanda ya Biblia Sambu na Bampangi-Babakala Yina Mekwelaka Ve. Kimpeve ta sadisa nge na ‘kutina banzala ya kileke.’—2 Tim. 2:22.
4. Sambu na nki kuvanda muntu ya kwikama mpi ya kutudila ntima kele mfunu?
4 Muntu ya Kwikama mpi ya Kutudila Ntima: Sambu bampangi yina bo ponaka na kukabula madia na Bakristu ya bansukami na mvu-nkama ya ntete vandaka “ti lukumu ya mbote,” mpi bo zabanaka mbote bonso bantu ya kwikama ti ya kutudila ntima, bantumwa kudiyangisaka ve na mutindu kisalu zolaka kusalama. Yo sadisaka bo na kutula dikebi na mambu ya nkaka ya mfunu. (Bis 6:1-4) Yo yina, ntangu bo me pesa nge mukumba mosi na dibundu, sala yonso sambu na kulungisa yo mbote. Landa mbandu ya Noa, yina landaka mbote-mbote bantuma ya bo pesaka yandi sambu na kutunga maswa. (Kuy 6:22) Yehowa ke bakaka kwikama na mbalu, mpi monisa nde nge ke yela na kimpeve.—1 Bak. 4:2; tala lupangu “Mambote ya Formasio.”
5. Sambu na nki batoko fwete zola kubaka mikumba?
5 Mutindu Yehowa bikulaka, yandi ke sala nswalu kisalu ya kuvukisa bantu. (Yez. 60:22) Na mwayene, bantu 250 000 ke baka mbotika konso mvula. Sambu bantu mingi ya mpa ke ndima kieleka, beto kele na mfunu ya babakala ya kimpeve mpi ya kufwana sambu na kulungisa mikumba na dibundu. Beto kele ti mambu mingi ya kusala na kisalu ya Yehowa bubu yai kuluta bantangu ya nkaka. (1 Bak. 15:58) Batoko, keti beno ke zola kubaka mikumba? Kana mpidina, beno ke zola kisalu mosi ya mbote!
[Bangogo sambu na kubenda dikebi ya kele na lutiti 2]
Sambu bantu mingi ya mpa ke ndima kieleka, beto kele na mfunu ya babakala ya kimpeve mpi ya kufwana sambu na kulungisa mikumba na dibundu
[Lupangu ya kele na lutiti 3]
Mambote ya Formasio
Batoko yina me fwana ke bakaka mambote ntangu bankuluntu ke pesaka bo bisalu mpi formasio. Nkengi ya nziunga mosi vandaka ya kuvanda ti nsamuni mosi na estrade sambu na kupesa yandi kikesa na nima ya lukutakanu. Yandi monaka toko mosi ya bakala me telema mwa ntama; ebuna yandi yulaka toko yango kana yandi ke vingila nde bo solula. Toko yai vutulaka nde bo me pesaka yandi mukumba ya kutula bunkete na estrade na nima ya konso lukutakanu. Bibuti na yandi zolaka nde bo vutuka na nzo, kansi yandi zolaka ve kuvutuka na ntwala ya kulungisa mukumba na yandi. Nkengi ya nziunga katukaka na estrade na kiese yonso. Yandi tubaka nde: “Bankuluntu ya dibundu yina vandaka kupesa batoko ya me fwana formasio na kupesaka bo mikumba na dibundu. Yo sadisaka bo na kupesaka mbala na mbala zina ya toko mosi sambu yandi kuma nsadi ya kisalu ntangu mu vandaka kutala dibundu na bo.”