Sala Kikesa Sambu na Kusala Mingi na Kisalu na Beto ya Kusamuna
1 Ntumwa Polo kulongisilaka Bakristu na kutambula na nzila ya Nzambi mpi na kulanda ‘kusala diaka ngolo kuluta.’ (1 Tes. 4:1) Inki yo ketendula sambu na beto? Ntetentete, beto fwete landa na kusosa mitindu ya kusala mingi na kisalu ya kimpeve, mpi kusala ntangu yonso ngolo sambu na kulungisa mbotembote kisalu na beto ya kusamuna.—2 Tim. 4:5.
2 Kikuma: Kikuma ya kepusaka beto na kusala kikesa sambu na kusala mingi na kisalu na beto ya kusamuna kele mpusa na beto ya ngolo ya kusadila Ngangi na beto. Beto kezola kuyela na kimpeve mpi kusosa mitindu ya kutomisa kisalu na beto. Kuvanda ti bikalulu ya mbote mpi kikuma ya mefwana tasadisa beto na kulungisa balukanu na beto ya metala kisalu ya Nzambi.—Nk. 1:1, 2; Filp. 4:6; Baeb. 10:24, 25.
3 Kusala kikesa sambu na kusala mingi na kisalu na beto kelombaka nde beto yedisa kikalulu ya kukaba ti ya kudipesa. Beto lenda yedisa kikalulu yai na nzila ya kisambu mpi kana beto keyindulula mbandu ya mbote ya Yezu. (Mat. 20:28) Yezu kubakaka kyese mingi na kusadila bankaka na kisalu ya kusamuna. (Bis. 20:35) Beto lenda landa mbandu na yandi kana beto kemonisa dikebi na bantu yankaka mpi kele ya kuyilama sambu na kusadila mabaku ya kusala mingi na kisalu na beto.—Yez. 6:8.
4 Mukumba ya Bibuti: Bibuti lenda pesa bana mpusa ya kusadila bankaka mpi kusala mingi na kisalu ya kusamuna banda kileki. Baleke kemonaka kikesa yina bantu ya dibuta na bo kesalaka sambu na kusala mingi na kisalu ya kusamuna. Mpangi bakala mosi kuzwaka kikesa ya kusala mingi na kileki na yandi sambu yandi vandaka kusala bisalu ya dibundu ti nkaka na yandi. Ntangu yandi vandaka kumona kikesa mpi kyese ya nkaka na yandi, yo pusaka yandi na kusosa mabaku ya kusadila bampangi yankaka. Ntangu yai yandi kele nsadi ya kisalu.
5 Mfunu ya Bampangi: ‘Kana muntu ke zola kusala mingi zaba nde yandi me sola kisalu mosi ya mbote.’ (1 Tim. 3:1) Bangogo yai kesyamisa bampangi babakala na kusala mingi sambu na kulungisa mambu ya bo kelombaka sambu na kubaka mikumba mingi na organizasio ya Yehowa. Yo kelombaka ve kuvanda ti mayele mingi kuluta sambu na kusala mutindu yai. Mpangi yina kesala kikesa sambu na kusala mingi, tasosa ntete Kimfumu mpi tavanda kikesa na kisalu. (Mat. 6:33; 2 Tim. 4:5) Yandi tasala yonso na kuvanda mbandu mosi ya mbote sambu na bankaka.
6 Nsi-Ntoto ya Mvimba: Yehowa kesala nswalu sambu na kuvukisa bantu. (Yez. 60:22) Yo kelomba mpenza nde bantu yonso yina kelanda mbandu ya Yezu kusukinina ve na kusala kisalu ya kusamuna mbotembote. Rapore ya ntoto ya mvimba ya mvula ya kisalu ya mvu 2006 kemonisa nde bantu 248327 kubakaka mbotika. Ntalu yai kemonisa nde kiteso ya bantu 680 kebaka mbotika konso kilumbu! Bika beto yonso kulanda na kusosa mitindu ya kusala kisalu na beto ya kusamuna mbotembote.