Benda Dikebi na Ngidika ya Kuyantika Kulonguka Biblia ti Muntu na Sabala ya Ntete

Banda na Mayi 2011, bo ke siamisaka bansamuni na kumeka kuyantika kulonguka Biblia ti bantu na Sabala ya ntete ya konso ngonda. Sambu na kusadisa beto na kusala yo, bo me yidikaka disolo mosi na nimero ya bantu yonso ya Nzozulu ya Nkengi, yina kele na ntu-diambu, “Bamvutu na Bangiufula ya Biblia.” Yo yina, na lukutakanu sambu na kisalu ya bilanga yina ke salamaka na Sabala ya ntete, beno fwete tendula mutindu ya kusadila disolo yai sambu na kuyantika kulonguka Biblia ti bantu; beno fwete sala mpi nsonga.

Bankuluntu lenda wakana nde konso kimvuka ya kisalu ya bilanga kuvukana yo mosi na Sabala ya ntete, to kuvukisa bimvuka yonso kisika mosi, mu mbandu na Nzo ya Kimfumu. Kansi, kana mabundu mingi ke sadilaka Nzo ya Kimfumu mosi, ata dibundu mosi ve fwete soba kilumbu yai ya sipesiali ya kuyantika kulonguka Biblia ti bantu mpi kusala yo kilumbu ya nkaka, kaka sambu na kuvukisa bimvuka yonso na lukutakanu ya kisalu ya bilanga.