Bamvutu na Bangiufula na Beno

◼ Keti nsamuni ya nkento fwete lwata kitambala ntangu yandi ke longuka Biblia ti muntu na ntwala ya kielo kana yandi ke samuna ti nsamuni ya bakala?

Kana nsamuni mosi ya nkento ke longukaka Biblia ti muntu mbala na mbala mpi ke samuna ti mpangi-bakala, yandi fwete lwata kitambala. (1 Bak. 11:3-10) Nzozulu ya Nkengi ya Kifalansa ya Yuli 15, 2002, lutiti 27 ke tendula nde: “Yai kele ngidika mosi ya kulonga, yina longi kele mpi ntwadisi. Na bantangu yai, kulonguka yina ke kumaka ngidika ya kulonga na dibundu, ata yo ke salama na kisika ya nkaka. Kana mpangi-nkento yina me bakaka mbotika muntu ke twadisa kulonguka ya mutindu yai, mpi mpangi-bakala mosi kele pana, yandi fwete lwata kitambala.” Yandi fwete sala yo ata kulonguka yango ke salama na nzo, na ntwala ya kielo to na bisika ya nkaka.

Kansi, kana bo me yantika ntete ve kulonguka mpenza ti muntu yango, mpangi-nkento fwete lwata ve kitambala kana yandi ke samuna ti mpangi mosi ya bakala, ata yandi ke vutukila muntu yango sambu na kuyantika kulonguka Biblia ti yandi to kutadila disolo mosi na nsadisa ya mikanda yina beto ke longukaka ti bantu. Sambu mbala mingi yo ke lombaka kuvutukila muntu mbala na mbala sambu na kuyantika mpenza kulonguka Biblia ti yandi, bansamuni fwete tadila mambu mbote mpi na bukati-kati sambu na kuzaba ntangu yina mpangi-nkento fwete fika ntu.