Masolo ya Kulandana Yina Ke Sadisa Beto na Kisalu ya Kusamuna
1. Inki kele balukanu zole ya masolo ya kulandana yina kele na ntu-diambu: “Disolo ti Mfinangani Mosi”?
1 Mbala na mbala, nimero ya bantu yonso ya Nzozulu ya Nkengi ke vandaka ti masolo ya kulandana na ntu-diambu: “Disolo ti Mfinangani Mosi.” Masolo yai ya kulandana ke vandaka ti balukanu zole—kulonga malongi ya Biblia na mutindu ya ke benda dikebi mpi kumonisa beto mutindu beto lenda yindula ti bantu na mayele yonso na masolo mosi buna. (1 Pie. 3:15) Inki mutindu beto lenda sadila mbote-mbote masolo yai?
2. Inki mutindu beto lenda sadila masolo yai ya kulandana na kisalu na beto ya kusamuna?
2 Sadila Yo na Kisalu ya Kusamuna: Nge lenda bumba bakopi ya ngika ya Nzozulu ya Nkengi yina kele ti disolo mosi na kati ya masolo yai ya kulandana. Kana muwi, muntu yina ke monisa mpusa, to longoki ya Biblia me yula ngiufula to me basisa ntembe yina me tala disolo mosi na kati ya masolo yango, pesa yandi kopi ya disolo mosi mpi beno tadila yo. Kana nge kele ve ti kopi ya Nzozulu ya Nkengi ya kuniema, ziku nge lenda baka yo na jw.org.
3. Inki mutindu nge lenda tubila disolo mosi na kati ya masolo yai ti muwi?
3 Inki mutindu nge lenda tubila disolo mosi na kati ya masolo yai ti muwi? Bampangi ya nkaka me lombaka muntu na kutanga bangogo ya mfinangani na ndinga ya ngolo ntangu bo ke tanga bangogo ya Mbangi. Metode yai ya kusolula ti muntu na nsadisa ya mukanda ya kuniema ke vandaka mbote mingi, sambu yo ke sadisaka bantu na kufimpa balukwikilu na beto na mutindu yina lenda sala nde bantu kubendana ve.—Kul. 32:2.
4. Inki mutindu beto lenda sadila masolo yai ya kulandana sambu na kudilonga?
4 Kudilonga mpi Longa Bankaka: Ntangu nge ke tanga masolo yai, tula dikebi na baverse, bifwanisu mpi mambu ya mfunu. Tula mpi dikebi na mutindu bo ke ta disolo. Na nima, meka na kusadila metode yina mosi na kisalu ya kusamuna. (Bing. 1:5; 9:9) Mpangi-nkento mosi tubaka nde: “Kutanga masolo yai kele bonso kulonguka na mpangi mosi ya mupasudi-nzila ‘ya kele ti makuki’—yina ke zabaka ntangu yonso mambu ya kutuba na ntangu ya mbote!”
5. Inki mutindu beto lenda sadisa balongoki na beto ya Biblia na kudibongisa sambu na kisalu ya kusamuna?
5 Beno lenda sadila mpi bangogo yai ya kusonika sambu na kusadisa balongoki ya Biblia na kudibongisa sambu na kisalu ya kusamuna. Beno tanga disolo yango kumosi, lomba longoki ya Biblia na kusadila bangogo ya nsamuni. Mpidina, balongoki ya Biblia lenda longa balukwikilu na bo na mayele yonso. (Bakol. 4:6) Ya kieleka, masolo yai kele mutindu mosi yina Yehowa ke sadisa beto na ‘kulungisa mbote-mbote kisalu’ na beto ya kusamuna.—2 Tim. 4:5.