Masolo ya Mpa ya Melandana Sambu na Kuyantika Kulonguka Biblia ti Bantu
1. Inki masolo ya mpa ya melandana tabasikaka na Nzozulu ya Nkengi, mpi bo meyidika yo ti nki lukanu?
1 Yantika na ngonda kekwisa, masolo ya mpa ya melandana tabasikaka na Nzozulu ya Nkengi sambu na kusadisa beto na kuyantika kulonguka Biblia ti bantu. Yo kele ti ntu-dyambu: “Longuka na Ndinga ya Nzambi.” Ntembe kele ve nde bantu yankaka na teritware tasepela kutanga konso disolo ya masolo yina, bo meyidika masolo yango mpenza sambu beto tadila yo ti bawi na kisalu ya kusamuna.
2. Tanga mwa mambu ya kele na masolo yai.
2 Mambu Yina Yo Ketubila: Bo mesonika ntu-dyambu mpi ba kantu-dyambu bonso bangyufula ya kuyula muwi na ntangu beno kesolula. Bo mesonika baverse ya mfunu, kansi bo mevutukila ve bangogo na yo, na mpila nde muwi kulonguka mambu mbala mosi na balutiti ya Ndinga ya Nzambi. Baparagrafe kele nkufi na mpila nde beno lenda tadila yo kaka na mbala ya ntete ya beno mekutana ti muntu. Konso disolo ketubila mambu yina kele na mukanda Biblia Kelongaka sambu na kusadisa nge na kutwadisa kulonguka na mukanda yango na ntangu yina mefwana.
3. Na ntangu beto kekwenda na nzo na nzo, inki mutindu beto lenda sadila masolo yai ya melandana sambu na kuyantika kulonguka Biblia ti muntu na mbala ya ntete ya beto mekutana ti yandi?
3 Mutindu ya Kusadila Yo: Ntangu nge kepesa bazulunalu, nge lenda yula ngyufula mosi ya kebenda dikebi na dyambu mosi ya ketadila bantu mingi yina disolo ketubila. Mu mbandu, nimero ya Februari 1 ketubila mfunu ya Biblia. Nge lenda yula nde: “Keti nge ketadilaka Biblia bonso Ndinga ya Nzambi to kaka bonso mukanda mosi ya mbote? [Bika muntu yango kupesa mvutu.] Mu kele ti kima mosi ya mbote ya ketubila disolo yai.” Songa ngyufula ya ntete, tanga paragrafe ya ntete, mpi tanga verse yina bo mepesa. Tanga dyaka ngyufula, mpi lomba muwi na kupesa bakomantere. Beno tadila mambu mingi mpenza kana yo mefwana, na kusadilaka bangyufula yina bo mesonika ti banimero, mutindu disolo kemonisa. Na ntwala ya kukwenda, benda dikebi na nimero ya ngyufula yina melanda mpi baka bangidika ya mbote sambu na kuvutuka mpi kutadila yo. Sala yonso na kuvutuka sambu na kutadila dyaka disolo yango konso mposo tii kuna nge lenda nata nimero yankaka. Ngindu yankaka kele ya kusadila metode ya mbala mosi mpi kulomba muwi na kulonguka Biblia ti nge. Na nima, sadila disolo yina kele na zulunalu sambu na kumonisa mutindu ya kuyantika kulonguka.
4. Inki mutindu beto lenda sadila masolo yai ntangu beto kesala bamvutukilu ya mpa?
4 Nge lenda sadila mpi mbotembote masolo yai ya mpa ya melandana na bantu yina nge kebikilaka bazulunalu mbala na mbala mpi na bamvutukilu yankaka ya mpa. Nge lenda tuba kaka nde: “Kele ti disolo mosi ya mpa na Nzozulu ya Nkengi. Bika mu songa nge mutindu ya kusadila yo.” Beto kesamba nde masolo yai ya mpa ya melandana tasadisa bantu mingi na kuzaba nzayilu ya sikisiki “ya kieleka.”—1 Tim. 2:4.