Sadila jw.org na Kisalu ya Kusamuna
Site Internet na beto kele kisadilu mosi ya mfunu ya ke sadisaka beto na kumwanga nsangu “tii na kisika ya kuluta ntama ya ntoto.” (Bis. 1:8) Bawi mingi ke zabaka ve jw.org, kansi bo lenda zaba yo kaka kana bansamuni me zabisa bo yo.
Nkengi-ntambudi mosi sadilaka telefone na yandi sambu na kubaka video Sambu na Nki Beto Fwete Longuka Biblia? na Internet mpi yandi ke songaka yo bantu konso ntangu ya dibaku me monana. Mu mbandu, ntangu yandi ke samunaka nzo na nzo, yandi ke tubaka nde: “Mono ke tala bantu ntangu fioti sambu na kusadisa bo na kubaka bamvutu na bangiufula yai tatu ya mfunu: Sambu na nki nsi-ntoto me fuluka ti bampasi? Inki mutindu Nzambi ta manisa bampasi yango? Mpi nki mutindu beto lenda nwana ti yo bubu yai? Video yai ya nkufi ke pesa bamvutu na bangiufula yai.” Yandi ke tulaka video mpi ke talaka mambu yina muwi ke sala ntangu yandi ke tala video. Bantu mingi ke sepelaka kutala video yai tii na nsuka sambu yo ke bendaka kibeni dikebi na bo. Na nima, nkengi-ntambudi ke tubaka nde: “Mutindu nge me landa, video yai ke siamisa nge na kusadila Internet sambu na kulomba nde muntu kulonguka Biblia ti nge. Ata sesepi yai, mono lenda songa nge mutindu beto ke longukaka Biblia ti bantu.” Kana muwi me ndima, yandi ke sadilaka kamukanda Nsangu ya Mbote sambu na kusonga muntu mutindu ya kulonguka. Kana muwi kele ve ti ntangu, yandi ke bakaka bangidika ya kusala yo na mbala ya nima. Ntangu yandi ke kwendaka na restora na ntangu ya kupema, yandi ke zabisaka muntu yina bo ke bula ti yandi masolo mambu ya mutindu mosi. Keti nge ke sadilaka mpi jw.org na kisalu ya kusamuna?