Sadisa Bifwa-Meso na Kulonguka Mambu ya Me Tala Yehowa

1. Inki mutindu Yezu monisilaka bifwa-meso mawa?

¹ Bilumbu fioti na ntwala ya lufwa ya Yezu, yandi vandaka kukwenda na mbanza ya Yeriko mpi bifwa-meso zole bokaka na ndinga ya ngolo nde: “Mfumu, wila beto mawa!” Ata Yezu vandaka kuyindula mpasi yina vandaka kuvingila yandi, yandi telamaka, bingaka bifwa-meso yina mpi belulaka bo. (Mat. 20:29-34) Inki mutindu beto lenda landa mbandu ya Yezu na yina me tala kumonisila bifwa-meso mawa?

2. Inki mutindu beto lenda ta kimbangi na kifwa-meso kana beto me kutana ti yandi na kisika ya bantu mingi?

² Sadisa Bifwa-Meso: Kana nge me kutana ti kifwa-meso, ziku na kisika ya bantu mingi, zabisa yandi zina na nge mpi songa yandi nde nge ke zola kusadisa yandi. Mbala mingi, bantu ke moninaka bifwa-meso. Yo yina, yandi lenda bakila nge ntete bangindu ya mbi. Kansi, kana nge me sadila yandi mambu na mawete mpi me tudila yandi dikebi na masonga yonso, yandi lenda kudiwa mbote. Diaka, kuvila ve nde bifwa-meso yonso ke vandaka ve ti makuki ya mutindu mosi. Yo yina, kubakisa diambu yai lenda sadisa nge na kuzaba mutindu ya kusadisa bo. Na nima ya kusadisa yandi, ziku nge lenda songa yandi nde nge ke longaka bantu Biblia. Na nima, monisa yandi nde nge ke zola kutangila yandi baverse ya Biblia, mu mbandu Nkunga 146:8 to Yezaya 35:5, 6. Kana yandi ke tangaka bisono ya bifwa-meso, yula yandi kana yandi ta sepela na kubaka mikanda na bisono yango sambu yo sadisa yandi na kulonguka mambu mingi ya Biblia. Nge lenda sadisa yandi mpi na kubaka mukanda ya bo me kotisa ndinga na jw.org. Kana yandi kele ti ordinatere ya kele ti programe mosi (lecteur d’écran) ya ke tangaka bisono na ndinga ya ngolo, yandi lenda sepela na kubaka na Jw.org masolo ya bo me niema mpi mikanda ya bo me tula na format mosi buna (Rich Text Format).—Tala lupangu “Ntangu Nge Ke Sadisa Kifwa-Meso . . .”

3. Inki mutindu beto lenda sosa bifwa-meso na teritware na beto?

³ Sosa Bifwa-Meso: Ntangu beto ke samunaka nzo na nzo, beto ke kutanaka mpenza ve ti bifwa-meso sambu bifwa-meso mingi ke vandaka ve na kiese ya kusolula ti bantu ya bo me zaba ve. Yo yina, yo ke lombaka bikesa na ‘kusosa’ bantu ya mutindu yai sambu na kulonga bo nsangu ya mbote. (Mat. 10:11) Keti nge kele ti nduku mosi ya kisalu to ya nzo-nkanda ya kele kifwa-meso? Sosa mutindu ya kusolula ti yandi. Kana teritware na beno ke vandaka ti nzo-nkanda ya bifwa-meso, pesa mikanda ya bifwa-meso na nzo-nkanda yango sambu bo tula yo na biblioteke. Keti nge ke zaba muntu mosi ya kele ti mpangi na yandi ya kifwa-meso? Na teritware na beno, keti beno kele ti banzo ya bo me tulaka bifwa-meso to kimvuka mosi ya ke pesaka lusadisu na bifwa-meso? Zabisa mpangi ya dibuta ya kifwa-meso, muntu ya ke yambaka bantu mpi ntwadisi ya nzo yango nde Bambangi ya Yehowa ke tudilaka bifwa-meso dikebi ya ngolo sambu na kusadisa bo mpi ke pesaka bo mikanda ya bifwa-meso to ya bo me kotisa ndinga. Songa bantu yango lusilu ya Biblia ya ke monisa nde kubika fioti Nzambi ta belula bifwa-meso kimakulu. Nge lenda songa bo mpi video mosi na jw.org, ya kele na ntu-diambu: “Kana Biblia Ve, Luzingu na Mono Zolaka Kuvanda Mfunu Ve (Sans elle, je serais perdu).” Video yai ke monisa mutindu kifwa-meso mosi bakaka mambote ya kulonguka Biblia na bisono ya bifwa-meso. Kana nge zabisa bo kikuma ya nge me kwenda kutala bifwa-meso, ziku bo ta pesa nge nzila ya kusolula ti bo.

4. Inki malongi beto ke baka na mbandu ya Janet?

⁴ Janet, mpangi-nkento mosi ya kifwa-meso kwendaka kusamuna na nzo yina bifwa-meso ke zingaka. Yandi solulaka ti mwana-nkento mosi ya kifwa-meso. Janet zabisaka yandi nde: “Yezu belulaka bifwa-meso sambu na kumonisa mambu yina yandi ta sala sambu na bantu yonso yina ke monaka ve.” Bo tangaka Kusonga 21:3, 4, mpi Janet tendudilaka yandi mutindu Kimfumu ya Nzambi ta lungisa lusilu yai. Mwana-nkento yai vandaka mpima, na nima yandi tubaka nde: “Mono me waka ntete ve kifwa-meso ke tuba mambu ya mutindu yai. Bantu mingi ya ke monaka ke kwikilaka nde bantu ke kumaka bifwa-meso sambu na diambu mosi ya mbi yina bo to bankaka na bo salaka.” Janet tindilaka nkento yango mukanda Biblia Kelongaka na Internet, mpi bubu yai bo ke longukaka mbala zole na mposo.

5. Ata beto lenda belula ve bifwa-meso mutindu Yezu salaka, nki balusakumunu beto ta baka kana beto ke tudila bifwa-meso dikebi?

⁵ Ya kieleka, beto lenda belula ve bifwa-meso mutindu Yezu salaka, kansi beto lenda sadisa bifwa-meso mpi bantu yonso yina nzambi ya ngidika yai ya bima me fwaka meso ya mabanza na bo. Beto lenda sadisa bo na kubakisa kieleka ya Ndinga ya Nzambi. (2 Bak. 4:4) Yezu belulaka babakala zole yina vandaka pene-pene ya Yeriko sambu yandi “wilaka bo mawa.” (Mat. 20:34) Kana beto ke tudila bifwa-meso dikebi ya mutindu mosi, beto lenda sepela ti dibaku ya kusadisa bifwa-meso ya nkaka na kulonguka mambu ya me tala Yehowa, muntu yina ta belula bifwa-meso kimakulu.