Zola ke pusaka beto na kutula mambote ya bantu ya nkaka na kisika ya ntete
Mutindu Beto Fwete Monisila Bampangi na Beto Zola
Mutindu beto kele bana ya muntu ya ntete Adami, beto yonso kele na dibuta mosi. Ata yo ke lombaka nde bantu ya dibuta mosi kuzolana mpi kuzitisana, na bilumbu na beto yo ke vandaka mpasi na kumonisa zola. Kansi Nzambi na beto ya zola ke zolaka ve mutindu yai.
MAMBU YINA MASONUKU YA SANTU KE TUBAKA SAMBU NA ZOLA
“Nge fwete zola nkweno na nge bonso nge mosi.”—LEVI 19:18.
“Beno landa na kuzola bambeni na beno.”—MATAYO 5:44.
KUZOLA BANTU YA NKAKA KE TENDULA NKI?
Mukanda ya 1 Bakorinto 13:4-7 kele ti mambu yina Nzambi ke tuba sambu na zola. Yo ke tuba nde:
“Zola kele ntima-nda mpi ntima-mbote.”
Yindula fioti: Inki mutindu nge ke kudiwaka kana bantu ke monisila nge ntima-nda, ntima-mbote mpi ke wa ve makasi sambu na bifu yina nge ke sala?
“Zola kele na kimpala ve.”
Yindula fioti: Inki mutindu nge ke kudiwaka kana bantu ya nkaka kele ti bangindu ya mbi sambu na nge?
Zola “ke sosaka ve mambote na yo mosi.”
Yindula fioti: Inki mutindu nge ke kudiwaka kana bantu ya nkaka ke ndima bangindu na nge mpi ke ndima ve ntangu yonso bangindu na bo?
Zola “ke bumbaka ve mbi yina bo me sala yo.”
Yindula fioti: Nzambi kele ya kuyilama na kulolula bantu yina me balula ntima sambu na mambu ya mbi yina bo salaka. Ndinga ya Nzambi ke tuba nde: “Yandi ta monisa ve bifu na beto ntangu yonso, Yandi ta vandaka mpi ve na makasi.” (Nkunga 103:9) Beto ke sepelaka kana muntu yina beto sadilaka mambu ya mbi me lolula beto. Yo yina, beto fwete vanda ya kuyilama na kulolula bantu yina me sadila beto diambu ya mbi.—Nkunga 86:5.
Zola “ke waka ve kiese sambu na kukonda lunungu.”
Yindula fioti: Kana diambu ya mbi me kumina beto, beto ke zolaka ve nde bantu ya nkaka kusepela ntangu beto kele na mpasi. Yo yina beto fwete sepela ve ntangu bantu ya nkaka ke mona mpasi, ata bantu yango me sadilaka beto mambu ya mbi.
Sambu na kubaka balusakumunu ya Nzambi, beto fwete zola bantu ya nkaka kukonda kutadila mutindu bo kele. Mutindu mosi ya mbote ya kusala yo kele ya kusadisa bantu yina kele na mfunu ya lusadisu.