Mutindu ya Kusadila Mbandu ya Disolo ti Muntu

Banda na Yanuari 2018, mbandu ya disolo ti muntu ke vandaka na lutiti ya ntete ya Mukanda ya Lukutakanu Luzingu mpi Kisalu na Beto ya Bukristu. Inki mutindu beto lenda sadila yo?

Kana bo me pesa nge devware ya mwana nzo-nkanda: Nge fwete sadila ngiufula, verse mpi ngiufula ya kutadila na mbala ya nima ya kele na mbandu ya disolo ti muntu. Kansi, yo ke tendula ve nde nge fwete sadila kaka bangogo ya mutindu mosi ti yina ya bo me sadila na video ya mbandu ya disolo ti muntu. Nge lenda sadila mbandu ya nkaka, mutindu ya nkaka ya kuyantika disolo, ya kuyindula ti muntu to konso mutindu yina nge ta sepela kusadila. Nge lenda pesa mpi muwi mukanda ya kele na kati ya Bisadilu Sambu na Kulonga ata bo me tubila yo ve na bantuma yina bo me pesa sambu na kitini yina nge ta sala.

Kana Nge Kele na Kisalu ya Kusamuna: Mbandu ya disolo ti muntu ke pesaka beto bangindu ya mfunu. Kana muwi me monisa mpusa mpi ke zola kuzaba mambu mingi, nge lenda landa kusolula ti yandi, ziku nge lenda sadila disolo ya kele na mvutukilu ya mpa. Nge lenda soba mbandu ya disolo ti muntu to kusadila disolo ya nkaka. Keti disolo mosi ya ngonda ya me luta to verse mosi ya nkaka ta sepedisa bantu ya teritware na beno? Keti na kisika yina nge ke zingaka, bantu ke sepela ti diambu yina me katuka kusalama to bansangu ya mpa yina me basika na kisika yango? Nge lenda sadila mbandu ya disolo ti muntu konso mutindu yina nge me zola. Kansi, lukanu na nge fwete vanda ya ‘kusala mambu yonso sambu na nsangu ya mbote, sambu na kuzabisa yo na bantu ya nkaka.’—1Bk 9:22, 23.