ZINGA MUTINDU BAKRISTU FWETE ZINGA | BAKA LUKANU YA KUSALA MINGI NA MVULA YAI YA MPA YA KISALU
Kisalu ya Kimupasudi-Nzila
Beto ke sadilaka mbote ngolo na beto ntangu beto ke bakaka balukanu sambu na kusala mingi na kisalu ya Yehowa. (1Bk 9:26) Balukanu ya kimpeve ta sadisa beto na kusadila mbote ntangu na beto na ntwala nde nsuka ya nsi-ntoto kukwisa. (Efe 5:15, 16) Ntangu beno ke sala lusambu ya dibuta, beno lenda tubila balukanu ya kimpeve yina beno lenda baka na mvula yai ya mpa ya kisalu. Mukanda yai kele ti bambandu ya balukanu mingi yina beto lenda baka. Beto lenda samba ntete na ntwala ya kubaka balukanu yango.—Yak 1:5.
Mu mbandu, bantu yonso ya dibuta lenda sala kumosi sambu na kusadisa muntu mosi ya dibuta na kukuma mupasudi-nzila ya ntangu yonso. Kana nge me mona nde nge ta kuka ve kulungisa bangunga yina bo ke lombaka, solula ti bapasudi-nzila yina me kutanaka mpi ti diambu ya mutindu yai. (Bin 15:22) To bingisa mupasudi-nzila mosi na lusambu ya dibuta mpi yula yandi mambu yina sadisaka yandi na kununga diambu yai ya nge ke kutana ti yo. Sala manaka ya mbote. Kana nge vandaka mupasudi-nzila na bamvula yina me luta, tadila mambu ya luzingu na nge mbote sambu na kuzaba kana yo ta pesa nge nzila ya kukuma diaka mupasudi-nzila na mvula yai.
Keti na dibuta na beno kele ti bantu yina ta zola kukuma bapasudi-nzila nsadisi sambu na ngonda mosi to sambu na bangonda mingi? Kana mambu ya luzingu na nge ke pesa nge ve nswa nge lenda kuma ata mupasudi-nzila nsadisi. Konso kilumbu nge lenda lutisa bantangu fioti na kisalu ya kulonga nsangu ya mbote. Kana nge ke zwaka ve ntangu ya kulonga nsangu ya mbote na kati-kati ya mposo sambu nge ke salaka kisalu kilumbu ya mvimba to nge kele mwana ya nzo-nkanda, nge lenda samuna na ngonda yina nge kele na konzie to na ngonda yina kele ti bamposo tanu. Sonika na kalandrie na nge bangonda yina nge ta vanda mupasudi-nzila nsadisi mpi sala manaka ya mbote.—Bin 21:5.
SONGA VIDEO VANDA . . . MUPASUDI-NZILA YA KIKESA MPI NA NIMA BENO PESA MVUTU NA NGIUFULA YAI:
Mambu yina mpangi-nkento Aamand kutanaka ti yo ke longa beto nki na yina me tala mutindu Yehowa ke zolaka mpi ke sadisaka bapasudi-nzila yina ke kudipesaka na luzolo yonso?