Kudibongisa Bubu yai Sambu na Maladi Yina Yo Ta Lomba nde Bo Sansa Nge Nswalu

Sambu na nki beto fwete kudibongisa? Kukonda kukana, beto lenda bela maladi yina ke lomba nde bo sansa beto nswalu. Yo yina, sala yonso sambu na kuyidika mambu yonso na ntwala sambu yo sadisa nge na kubaka lusansu ya mbote kana nge bela mpi yo ke lomba nde bo sansa nge nswalu. Kana nge sala mpidina, nge ta monisa nde nge ke zitisaka luzingu mpi nsiku ya Yehowa ya me tala menga.​—Bis 15:28, 29.

Inki nge lenda sala sambu na kudibongisa?

• Samba mpi sonika mbote-mbote mambu yina bo ke lomba nge na Karte Bantuma Sambu na Lusansu/Kupona Muntu ya Nge Ke Tudilaka Ntima (DPA).a Bansamuni yina me bakaka mbotika lenda baka karti (DPA) na mpangi yina ke salaka na mikanda mpi bo lenda baka bakarti ya identité (ic) sambu na bana na bo yina me lungisa ntete ve bamvula 18

• Kana nge kele ti divumu, lomba bankuluntu mukanda, Informations pour les femmes enceintes (S-401). Yo ta sadisa nge na kubaka balukanu ya mbote na mambu ya lusansu yina lenda salama ntangu nge kele ti divumu mpi ntangu nge ke buta

• Kana bo ke sansa nge mpi yo ke tadila mambu ya menga to kana nge ke zola kukota opitale, songa bankuluntu na beno na ntwala mpi songa minganga nde Mbangi mosi ya Yehowa ta kwisa kutala nge

Inki mutindu bankuluntu lenda sadisa nge? Bo lenda sadisa nge na kufulusa karti DPA. Ata mpidina, bankuluntu ta baka ve balukanu ya me tala lusansu na kisika na nge mpi bo ta pesa ve bangindu na bo na mambu yina yo ke lomba nde nge mosi kubaka lukanu. (Bar 14:12; Bag 6:5) Kana nge songa bankuluntu na beno nde minganga ke tuba nde bo vutula nge menga, bo ta solula kukonda kusukinina ti mpangi ya Komite ya Kuwakana ti Balupitalu sambu na nge.

Inki mutindu Komite ya Kuwakana ti Balupitalu lenda sadisa nge? Bo ke pesaka bampangi yina ke salaka na Komite ya Kuwakana ti Balupitalu formasio sambu na kusadisa minganga mpi bantu ya nkaka na kubakisa mutindu beto ke tadilaka menga. Bo lenda tubila mambu yina minganga yina ke sansa nge lenda sala sambu bo sansa nge kukonda nde bo vutula nge menga. Bo lenda sadisa nge na kusolula ti doktere yina ta ndima kusansa nge kukonda nde bo vutula nge menga.

TALA VIDEO MUTINDU YA KUBAKA BALUKANU NA MAMBU YA ME TALA MENGA MPI NA NIMA PESA MVUTU NA NGIUFULA YAI:

• Inki mambu nge me longuka na video, ya ta sadisa nge na kudibongisa kana nge bela mpi minganga ke zola nde bo vutula nge menga?

  Your answer