ZINGA MUTINDU BAKRISTU FWETE ZINGA

Keti Nge Kele ya Kuyilama Sambu na Mpasi ya Mbongo?

Yo ke yitukisaka beto ve ntangu beto ke monaka mambu yina ke salama na nsi-ntoto ya ke sala nde mbongo kukuma mpasi na ntoto ya mvimba. Sambu na nki? Sambu beto ke zinga na bilumbu ya nsuka mpi Biblia ke lomba beto na kutula ve kivuvu na beto na “bimvwama ya ke zingaka mingi ve.” (1Tm 6:17; 2Tm 3:1) Mbandu ya ntotila Yehoshafati ke longa beto nki na mutindu ya kudibongisa sambu na mpasi ya mbongo?

Yehoshafati tulaka ntima na Yehowa ntangu bantu ya bansi ya nkaka sosaka kunwanisa yandi. (2Bs 20:9-12) Yandi yilamaka mpi na ntwala. Mu mbandu, yandi tungaka bambanza ya ngolo mpi yandi tulaka bimvuka ya basoda na insi. (2Bs 17:1, 2, 12, 13) Bonso Yehoshafati beto fwete tula ntima na Yehowa mpi kudibongisa na ntwala nde beto kutana ti bampasi.

INKI MAMBU BETO FWETE SALA NA NTWALA SAMBU YO SADISA BETO NA NSUNGI YA MPASI YA MBONGO?

Kumisa ngolo kinduku na nge ti Yehowa: Sepela ti bima yina nge kele ti yo mpi tula kivuvu na Yehowa nde yandi ta sadisa nge na kuzwa bima yina nge kele ti yo mfunu. (Mat 6:26; 1Tm 6:8) Kuyambula ve kusadila minsiku ya Biblia sambu na kulungisa bampusa na nge. (Bar 2:21) Yindula na ntwala mutindu nge ta landa kuzwa madia ya kimpeve ata kura to Internet me zengana. Kana mpila kele nge lenda bumba mwa mikanda ya bapapie mpi kubaka na ntwala mikanda ya nkaka na Internet.

Yidika na ntwala bima ya kinsuni: Futa bamfuka mpi kusumba ve bima ya ntalu yina nge kele ve ti yo mfunu mingi sambu kana nge sala mutindu yina, yo ta sadisa nge na nsungi ya mpasi ya mbongo. (Bin 22:7) Kana mpila kele, bumba madia yina ke polaka ve mpi bima ya nkaka ya mfunu. Bantu ya nkaka ke salaka masamba na lupangu sambu yo sadisa bo na kubasisa ve mbongo mingi.

SONGA VIDEO KETI NGE KELE YA KUYILAMA SAMBU NA KISUMBULA? MPI NA NIMA BENO PESA BAMVUTU NA BANGIUFULA YAI:

Biblia, saki ya kele ti bima ya mfunu, telefone mpi bantu yina ke salaka kisalu ya kutunga kele na video, “Keti nge kele ya kuyilama sambu na kisumbula?”

Inki mambu beto fwete sala sambu na kuyilama na ntwala nde kisumbula kusalama?

Your answer

Kifwanisu ya kele na video “Keti nge kele ya kuyilama sambu na kisumbula?” Bampangi ke sala kisalu ya kutunga sambu na kusadisa bampangi yina me bwila kisumbula mpi bo ke basisa bima na kamio.

Inki mutindu beto lenda yilama sambu na kusadisa bantu ya nkaka?

Your answer