MUTINDU YA KUBUYA KUMENGA BANTU YA NKAKA
4 | Nzambi Lenda Sadisa Nge na Kukatula Kikalulu ya Kumenga Bantu ya Nkaka
Biblia Ke Tuba Nde:
“Mbuma ya mpeve kele zola, kiese, ngemba, ntima ya nda, ntima ya mbote, bumbote, lukwikilu, mawete, kudiyala. Ata nsiku mosi ve ke buyisaka mambu yai.”—BAGALATIA 5:22, 23.
Mambu Yina Yo Ke Tendula:
Beto lenda katula bangindu ya kumenga bantu ya nkaka ti lusadisu ya Nzambi. Mpeve-Santu lenda sadisa beto na kukuma ti bikalulu yina beto lenda kuma ve ti yo beto mosi. Yo yina, na kisika ya kusosa kumanisa kikalulu yai ya mbi na ngolo na beto mosi, beto fwete tula ntima na lusadisu yina Nzambi ke pesa beto. Kana beto sala mutindu yina, beto ta kudiwa bonso ntumwa Polo yina sonikaka nde: “Sambu na mambu yonso, mono kele ti ngolo na nzila ya muntu yina ke pesaka mono ngolo.” (Bafilipi 4:13) Diaka, beto ta tuba nde: “Lusadisu na mono ke katukaka na Yehowa.”—Nkunga 121:2.
Mambu ya Nge Lenda Sala:
“Yehowa sadisaka mono na kuvanda diaka ve muntu ya mawvanga.”—WALDO
Samba Yehowa na masonga yonso sambu na kulomba yandi mpeve-santu. (Luka 11:13) Lomba yandi na kusadisa nge na kukuma ti bikalulu ya mbote. Longuka bikalulu yina kele na Biblia ya ke katulaka mpeve ya kumenga bantu ya nkaka. Mu mbandu: zola, ngemba, kukanga-ntima mpi kudiyala. Sosa mitindu ya kumonisa bikalulu yango na luzingu na nge. Sosa banduku yina ke salaka yonso sambu na kukuma ti bikalulu yai. Mu mbandu bantu yina lenda ‘pusa nge na kuzola mpi na kusala bisalu ya mbote.’—Baebreo 10:24; noti na nsi ya lutiti.