Sosa Bimvwama ya Kimpeve ya Nge Lenda Sadila

Ntangu beto ke tanga Biblia, beto fwete sala bansosa sambu na kuzwa bimvwama ya kimpeve. Kansi, nki mutindu beto lenda bakila yo mambote mingi?

Tula dikebi na mambu ya fioti-fioti yina kele na masolo ya Biblia. Mu mbandu, sosa kuzaba muntu yina sonikaka disolo yango, yandi sonikilaka nani to banani mpi nki ntangu yandi sonikaka yo. Inki mambu vandaka kusalama ntangu yandi sonikaka yo? Inki salamaka na ntwala mpi nki salamaka na nima?

Sosa bamvutu na bangiufula yai sambu na kuzaba malongi yina nge lenda baka: ‘Bantu yina bo ke tubila vandaka kudiwa nki mutindu? Inki bikalulu bo monisaka? Sambu na nki mono fwete landa mbandu ya bikalulu yina to kubuya kulanda yo?’

Sadila malongi ya nge me baka na kisalu ya kulonga nsangu ya mbote to na mambu ya nge ke sala ti bantu ya nkaka. Kana nge ke sala mambu yina, nge ta monisa nde nge kele ti mayele ya ke katukaka na Nzambi sambu Biblia ke tuba nde: “Bantu yonso yina ke zitisaka bantuma na yandi ke monisaka mayele ya mbote ya kubakisa mambu.”​—Nk. 111:10.

• Ndongisila: Tala mutindu malongi ya beto ke bakaka na lukutakanu ya kati-kati ya mposo na kitini Bimvwama ya Ndinga ya Nzambi ke sadisaka beto na kuyindula mutindu beto lenda sadila mambu ya beto ke longuka. Kitini yina ke vandaka mbala mingi ti bangiufula yina beto lenda kudiyula, mambu yina beto lenda yindula na mudindu, mpi bifwanisu yina beto lenda tadila.