Songa Bantu Mambu ya Nge Ke Longuka

Kulonguka Biblia ke sadisaka beto na kudiwa mbote, kansi beto ke kudiwaka diaka mbote mingi ntangu beto ke songaka bantu ya nkaka mambu ya ke pesa kikesa yina beto me longuka. Bingana 11:25 ke tuba nde: “Muntu yina ke pesaka bankaka kikesa, bo ta pesa yandi kikesa.”

Kana beto ke songa bantu ya nkaka mambu yina beto ke longuka, yo ta sadisa beto mosi mpi na kuyibuka kukonda mpasi mambu yina beto ke longuka mpi na kubakisa yo diaka mbote. Mpi beto ke vandaka na kiese ya kusonga bantu ya nkaka malongi yina beto me baka na kulonguka na beto sambu yo lenda natila bo mpi mambote.​—Bis. 20:35.

Meka diambu yai: Na mposo ya ke kwisa, sosa dibaku ya kusonga muntu mosi mambu yina nge me longuka. Nge lenda songa yo na muntu mosi ya dibuta na beno, na mpangi mosi na dibundu na beno, na muntu mosi ya nge ke salaka ti yandi kisalu, na muntu mosi ya ke zingaka pene-pene ti nge to na muntu mosi ya nge me kutana ti yandi na kisalu ya kulonga nsangu ya mbote. Meka kusonga yandi na bangogo na nge mosi mpi na mutindu ya pete mpi ya pwelele mambu yango ya nge longukaka.

Simba mambu yai: Songa bantu mambu yina nge me longuka sambu na kupesa bo kikesa kansi ve sambu na kuyitukisa bo.​—1 Bak. 8:1.