Inki Mutindu Nge Lenda Katula Badute?

1-2. (a) Inki kele mwa badute yina bansadi ya Yehowa lenda vanda ti yo? (b) Inki beto ta mona na disolo yai?

YO VANDA bambuta to baleke, beto yonso ke vandaka ti badutea bantangu ya nkaka. Mu mbandu mpangi mosi ya leke lenda kudiyula kana Yehowa ke tudilaka yandi mpenza dikebi. Yo lenda sala nde yandi kuka ve kubaka lukanu ya kubaka mbotika. To yindula mpangi-bakala mosi yina bakaka lukanu ya kutula mambote ya Kimfumu na kisika ya ntete ntangu yandi vandaka toko na kisika ya kusosa mbongo mingi na nsi-ntoto yai. Ntangu yai yandi me kuma mbuta, yandi kele ve ti mbongo mingi ya kusansa dibuta na yandi. Yandi lenda kudiyula kana yandi bakaka kibeni lukanu ya mbote. Yindula diaka mpangi-nkento mosi ya mununu yina kele diaka ve ti ngolo mingi. Yandi lenda lemba nitu sambu yandi ke kuka diaka ve kusala mambu yina yandi vandaka kusala ntete. Keti nge me kudiyulaka dezia bangiufula yai: ‘Keti Yehowa ke tudilaka mono mpenza dikebi? Keti bibansa yonso yina mono salaka sambu na Yehowa vandaka kibeni mfunu? Keti mono kele kaka mfunu na meso ya Yehowa?’

² Kana beto ke sosa ve bamvutu na bangiufula yina, yo lenda lembisa kibeni lukwikilu na beto na Yehowa mpi nkutu, yo lenda sala nde beto yambula kusadila yandi. Na disolo yai, beto ta mona inki mutindu minsiku ya Biblia lenda sadisa beto kana beto kele ti badute nde (1) Yehowa ke tudilaka beto dikebi, (2) nde beto bakaka balukanu ya mbote to (3) nde beto kele kaka mfunu sambu na Yehowa.

INKI MUTINDU NGE LENDA KATULA BADUTE?

3. Inki lenda sadisa beto na kukatula badute?

³ Beto lenda katula badute kana beto ke sosa bamvutu ya bangiufula na beto na ndinga ya Nzambi. Yo ta sala nde beto vanda ngolo, beto yela na kimpeve mpi beto “telama ngolo na lukwikilu.”​—1 Bak. 16:13.

4. Inki mutindu beto lenda “zikisa mambu yonso”? (1 Batesalonika 5:21)

⁴ Tanga 1 Batesalonika 5:21. Biblia ke lomba beto na kuzikisa mambu yonso. Inki mutindu beto lenda sala yo? Kana beto kele ti badute na diambu mosi, beto fwete sosa kuzaba mambu yina Biblia ke tuba sambu na diambu yango. Mu mbandu, yindula nde leke mosi ya bakala ke kudiyula kana Yehowa ke tudilaka yandi kibeni dikebi. Keti yandi fwete ndima kaka nde mutindu yandi ke yindula mpidina, yo ke tendula nde Yehowa ke tudilaka yandi ve dikebi? Ve. Yandi fwete “zikisa mambu yonso” sambu na kuzaba mutindu Yehowa ke tadilaka yandi kibeni.

5. Inki mutindu Yehowa lenda pesa mvutu na bangiufula na beto?

⁵ Ntangu beto ke tangaka Ndinga ya Nzambi, beto “ke waka” Yehowa ke tubila beto. Kansi kana beto kele ti mfunu ya kuzaba bangindu ya Yehowa na ngiufula mosi ya beto ke kudiyula, beto fwete sala kima ya nkaka. Beto lenda tanga mpi kulonguka baverse ya Biblia ya ke tubila diambu yina ke tadila beto. Beto lenda sadila diambu yango bansosa mpi kusadila bisadilu yina organizasio ya Yehowa me basisaka. (Bing. 2:3-6) Beto fwete samba Yehowa mpi kulomba yandi na kusadisa beto sambu beto zwa mvutu na ngiufula na beto. Beto lenda sosa mpi minsiku ya Biblia mpi mambu ya nkaka ya ke tadila diambu na beto. Beto lenda tanga mpi masolo ya Biblia ya ke tubila bansadi ya Yehowa ya kwikama yina kutanaka mpi ti diambu ya mutindu mosi ti beto.

6. Inki mutindu balukutakanu lenda sadisa beto?

⁶ Balukutakanu na beto kele mpi nzila ya nkaka yina beto “ke waka” Yehowa ke tubila beto. Kana beto ke kwenda na balukutakanu mbala na mbala, beto lenda wa kima mosi na diskure to na komantere yina mpangi mosi lenda pesa mpi yo lenda sadisa beto na kukatula badute. (Bing. 27:17) Beto tadila ntangu yai mambu yina beto lenda sala sambu na kukatula badute.

KANA NGE KE NDIMA VE NDE YEHOWA KE TUDILAKA NGE DIKEBI

7. Inki ngiufula bantu ya nkaka lenda kudiyula?

⁷ Keti nge me kudiyulaka dezia nde: ‘Keti Yehowa ke tudilaka mono kibeni dikebi?’ Kana nge ke yindula nde nge kele ve mfunu, nge lenda mona bonso nde nge ta kuka ve kukuma nduku ya Muntu Yina Salaka Zulu ti Ntoto. Mbala ya nkaka, Ntotila Davidi yindulaka mpi mutindu yina. Yo yitukisaka yandi kibeni na kumona nde Yehowa ke tudilaka bantu dikebi. Yo yina yandi tubaka nde: “O Yehowa, muntu kele nani sambu nge mona yandi, mwana ya muntu kele nani sambu nge tudila yandi dikebi?” (Nk. 144:3) Na wapi nge lenda zwa mvutu na ngiufula yina?

8. Mutindu 1 Samuele 16:6, 7, 10-12 ke monisa yo, inki Yehowa ke monaka na bantu?

⁸ Biblia ke tuba nde Yehowa ke tudilaka bantu yina bantu ya nkaka ke monaka bonso bantu ya kukonda mfunu dikebi. Mu mbandu, Yehowa tindaka Samuele sambu na kutula mwana mosi ya Yese mafuta sambu na kukuma ntotila ya Izraele. Yese bingaka bana na yandi ya babakala 7 sambu na kukutana ti Samuele. Kansi yandi bingaka ve Davidi, mwana na yandi ya nsuka.b Kansi Davidi vandaka muntu yina Yehowa ponaka. (Tanga 1 Samuele 16:6, 7, 10-12.) Yehowa monaka mambu yina vandaka kibeni na ntima ya Davidi. Yandi vandaka kuzola mambu ya kimpeve mingi.

9. Sambu na nki nge fwete ndima nde Yehowa ke tudilaka nge dikebi? (Tala mpi kifwanisu.)

⁹ Yindula mutindu Yehowa me monisaka dezia nde yandi ke tudilaka nge dikebi. Yandi ke pesaka nge bandongisila yina ke wakana kibeni ti bampusa na nge. (Nk. 32:8) Yandi lenda sala ve mutindu yina kana yandi me zaba nge ve mbote-mbote. (Nk. 139:1) Kana nge ke sadila bandongisila ya Yehowa mpi nge ke mona mutindu yo ke sadisa nge, nge ta ndima kibeni nde Yehowa ke tudilaka nge dikebi. (1 Bans. 28:9; Bis. 17:26, 27) Yehowa ke monaka bikesa yonso yina nge ke salaka. Yandi ke monaka bikalulu na nge ya mbote mpi yandi ke zola nde nge vanda nduku na yandi. (Yer. 17:10) Yandi ta wa kiese mingi kana nge ndima mpi kuvanda nduku na yandi.​—1 Yoa. 4:19.

KANA NGE KE NDIMA VE NDE NGE BAKAKA BALUKANU YA MBOTE

10. Ntangu beto ke yindula balukanu yina beto bakaka, inki bangiufula beto lenda kudiyula?

¹⁰ Bantangu ya nkaka, bantu ya nkaka lenda kudiyula kana balukanu yina bo bakaka vandaka kibeni ya mbote. Mbala ya nkaka bo yambulaka kisalu mosi ya mbote to bo buyaka kusala mumbongo sambu na kusadila Yehowa mingi. Kansi ntangu yai, bamvula mingi kibeni me luta. Bo lenda mona bantu yina bo zabanaka ti bo bayina bakaka balukanu ya nkaka me kuma ti mbongo mingi mpi me kuma ti luzingu ya mbote. Yo lenda pusa bo na kudiyula nde: ‘Keti bibansa yonso yina mono salaka sambu na Yehowa vandaka kibeni mfunu? Keti yo lombaka ve nde mono sala ngolo sambu mono vanda ti mbongo mingi bubu yai?’

11. Inki vandaka kuyangisa muntu yina sonikaka Nkunga 73?

¹¹ Kana mambu ya mutindu yina ke yangisa nge, tadila mutindu muntu yina sonikaka Nkunga 73 kudiwaka. Yandi monaka mutindu bantu ya nkaka yina vandaka ve kusadila Yehowa vandaka kumonana bonso nde bo kele ti sante ya mbote, bo kele ti mbongo mingi mpi bo kele ve ti basusi. (Nk. 73:3-5, 12) Yo yina ntangu yandi vandaka kumona mutindu yina, yo pusaka yandi na kuyindula nde bikesa yina yandi vandaka kusala sambu na kusadila Yehowa vandaka ve mfunu. Yandi vandaka “kudiyangisa kilumbu ya mvimba” sambu na mambu yina vandaka kulembisa yandi nitu. (Nk. 73:13, 14) Inki yandi salaka sambu na kukatula bangindu yina ya mbi?

12. Mutindu Nkunga 73:16-18 ke monisa yo, inki sadisaka muyimbi-bankunga yina na kukatula bangindu yina yandi vandaka ti yo?

¹² Tanga Nkunga 73:16-18. Muyimbi-bankunga yina kwendaka na kisika ya ngemba mpi ya santu ya Yehowa. Yo vandaka kisika yina yandi lendaka kuyindula mbote-mbote. Yandi bakisaka nde ata bantu ya nkaka yina vandaka kusambila ve Yehowa vandaka ti luzingu ya mbote, bo vandaka ve ti kivuvu sambu na bilumbu ke kwisa. Yo sadisaka yandi na kukuma ti ngemba ya mabanza sambu yandi zabaka nde, kutula mambu ya kimpeve na kisika ya ntete, vandaka lukanu ya mbote yina yandi bakaka. Yo yina yandi bakaka lukanu ya kulanda kaka kusadila Yehowa.​—Nk. 73:23-28.

13. Inki mutindu nge lenda zwa ngemba ya mabanza kana nge ke kudiyangisa sambu na balukanu yina nge bakaka? (Tala mpi kifwanisu.)

¹³ Ndinga ya Nzambi lenda sadisa nge mpi na kukuma ti ngemba ya mabanza. Inki mutindu? Yibuka mambu ya mbote yina nge kele ti yo mu mbandu, balusakumunu ya Yehowa mpi kuvila ve nde bantu yina ke sambilaka yandi ve ke bakaka ve balusakumunu yina. Kuvanda ti luzingu ya mbote bubu yai kele kima ya kuluta mfunu sambu na bo, sambu bo kele ve ti kivuvu sambu na bilumbu ke kwisa. Kansi nge, Yehowa me sila nge mambu mingi ya mbote sambu na bilumbu ke kwisa kuluta yina nge lenda yindula. (Nk. 145:16) Diaka yindula diambu yai: Nge ke zaba ve kibeni mutindu luzingu na nge zolaka kuvanda bubu yai kana nge bakaka balukanu ya nkaka. Kansi diambu ya kieleka kele nde, kana nge ke baka balukanu sambu na zola na nge sambu na Nzambi mpi sambu na bantu ya nkaka, nge ta vanda kaka ti mambu yina ta sala nde nge vanda na kiese mingi na luzingu.

KANA NGE KE NDIMA VE NDE NGE KELE MFUNU NA MESO YA YEHOWA

14. Inki mambu bampangi ya nkaka ke kutanaka ti yo mpi inki ngiufula bo lenda kudiyula?

¹⁴ Bansadi ya nkaka ya Yehowa ke salaka diaka ve mingi na kisalu na yandi sambu bo me kuma minunu, sambu bo ke bela, to sambu bo ke kuka ve. Yo lenda pusa bo na kuyindula nde bo kele ve mfunu na meso ya Yehowa. Bo lenda kudiyula nde, ‘Keti mono kele kaka mfunu na meso ya Yehowa?’

15. Muntu yina sonikaka Nkunga 71 ndimaka kibeni nki?

¹⁵ Muntu yina sonikaka Nkunga 71 vandaka mpi kudiyangisa sambu yandi vandaka ve ngolo. Yandi sambaka nde: “Kuyambula mono ve ntangu ngolo na mono me mana.” (Nk. 71:9, 18) Kansi muyimbi-bankunga yina vandaka kuyindula nde kana yandi ke landa kusadila Yehowa mbote, yandi ta landa kutwadisa yandi mpi kusadisa yandi. Mutindu muyimbi-bankunga yina bakisaka yo, Yehowa ke sepelaka ti bantu yina ke salaka yonso sambu na kulanda kusadila Yandi ata mambu ya nkaka ke kanga bo nzila ya kusala mingi.​—Nk. 37:23-25.

16. Inki mutindu bampangi ya minunu kele mfunu na meso ya Yehowa? (Nk. 92:12-15)

¹⁶ Bampangi ya minunu, beno kuditadila mutindu Yehowa ke tadilaka beno. Yandi ta sadisa beno na kulanda kusadila yandi na mutindu ya mbote ata beno kele diaka ve ngolo mingi. (Tanga Nkunga 92:12-15.) Na kisika ya kutula dikebi na mambu yina beno ta kuka ve kusala, beno tula dikebi na mambu yina beno ta kuka kusala. Mu mbandu, nge lenda pesa bantu ya nkaka kikesa na mbandu na nge ya kwikama mpi kana nge ke tudila bo dikebi. Nge lenda songa bo mutindu Yehowa me sadisaka nge na nsungi ya bamvula mpi kivuvu ya ngolo yina nge ke vandaka ti yo sambu na balusilu ya Yehowa yina ta lungana na bilumbu ke kwisa. Diaka, kuvila ve nde Yehowa ta wa bisambu yina nge ke samba na ntima ya mvimba sambu na bantu ya nkaka. (1 Pie. 3:12) Yo vanda beto ke kutana ti mambu ya nkaka, beto yonso, beto kele ti kima yina beto lenda pesa Yehowa mpi bantu ya nkaka.

17. Sambu na nki beto fwete telemina mpeve ya kudifwanisa ti bantu ya nkaka?

¹⁷ Kana nge ke kudiyangisa sambu nge lenda sala ve mingi na kisalu ya Yehowa, ndima kibeni nde yandi ke bakaka na valere konso kima yina nge ke salaka sambu na yandi. Kudifwanisa ve ti bantu ya nkaka, telemina mpeve yina. Sambu na nki? Sambu Yehowa ke fwanisaka nge ve ti bantu ya nkaka. (Bag. 6:4) Mu mbandu Maria pesaka Yezu kado ya mafuta ya nsudi ya kitoko ya ntalu mingi. (Yoa. 12:3-5) Kansi nkento ya mufwidi ya nsukami tulaka na tempelo mbongo zole ya fioti ya bibende yina vandaka ve ti valere mingi. (Luka 21:1-4) Kansi sambu na Yezu, makabu yina yonso zole vandaka kumonisa lukwikilu. Yo yina, ndima kibeni nde Yehowa tata na yandi ke monaka mambu yonso yina nge ke salaka sambu na lukwikilu mpi zola yina nge ke vandaka ti yo sambu na yandi, mpi yandi ke bakaka yo na valere mingi ata nge ke yindula nde yo kele fioti kibeni.

18. Inki ta sadisa beto na kukatula badute? (Tala mpi lupangu “Ndinga ya Yehowa Lenda Sadisa Nge na Kukatula Badute.”)

¹⁸ Bantangu ya nkaka, beto yonso ke vandaka ti badute. Kansi mutindu beto me mona yo, Biblia Ndinga ya Nzambi lenda sadisa beto na kukatula yo. Yo yina sala yonso sambu na kusosa bamvutu na bangiufula yina ke yangisa nge sambu na kukatula badute yina. Yo ta sala nde nge kudiyangisa diaka ve kansi nge tula ntima na Yehowa. Yehowa me zaba nge mbote-mbote kibeni. Yandi ke sepelaka ti bibansa yina nge ke salaka sambu na yandi mpi yandi ta sakumuna nge sambu na yo. Ndima kibeni nde Yehowa ke zolaka bansadi na yandi yonso ya kwikama, yandi ke bakaka bo na valere mpi yandi ke tudilaka bo dikebi.