Sambu na Nki Bitumba mpi Mubulu Ke Mana Ve?

DISUMU

Nzambi salaka bibuti na beto ya ntete Adami ti Eva na kifwani na yandi. (Kuyantika 1:27) Yo ke tendula nde Nzambi salaka bo ti makuki ya kuvanda ti bikalulu bonso ya yandi kele ti yo mu mbandu, ngemba mpi zola. (1 Bakorinto 14:33; 1 Yoane 4:8) Kansi Adami ti Eva lemfukilaka ve Nzambi mpi bo salaka disumu. Yo yina beto yonso, beto me bakaka disumu mpi beto ke fwaka. (Baroma 5:12) Bo me bikilaka beto disumu, yo yina mbala mingi beto ke vandaka ti bangindu ya mbi. Ebuna yo ke sakala nde bantu mingi kusala mambu ya mbi.​—Kuyantika 6:5; Marko 7:21, 22.

LUYALU YA BANTU

Nzambi salaka ve bantu ti makuki ya kudiyala. Biblia ke tuba nde: “Muntu yina ke tambula kele ve ti kiyeka ya kutwadisa kitambi na yandi mosi.” (Yeremia 10:23) Yo yina, baluyalu ya bantu lenda kuka ve kumanisa bitumba mpi mubulu.

SATANA TI BADEMO NA YANDI

Biblia ke tuba nde “nsi-ntoto ya mvimba kele na nsi ya kiyeka ya muntu ya mbi.” (1 Yoane 5:19) Biblia ke bingaka ‘muntu yango yina ya mbi’ nde Satana Diabulu, mpi yandi kele muntu mosi ya nku mpi ya ke fwaka bantu. (Yoane 8:44) Yandi ti bademo na yandi, bo ke pusaka bantu na kunwana bitumba mpi na kusala mubulu.​—Kusonga 12:9, 12.