Mutindu Bitumba mpi Mubulu Ta Mana

NZAMBI TA FWA BALUYALU YA BANTU

Nzambi ta fwa baluyalu yonso ya bantu ntangu bitumba yina Biblia ke bingaka Armagedonia ta salama. (Kusonga 16:16) Na ntangu yina, “bantotila ya ntoto ya mvimba” ta vukana kisika mosi sambu na “bitumba ya kilumbu ya nene ya Nzambi Nkwa-Ngolo Yonso.” (Kusonga 16:14) Armagedoni ta vanda bitumba ya nsuka yina ta salama na ntoto.

Nzambi ta katula baluyalu yonso ya bantu mpi yandi ta tula Kimfumu na yandi to luyalu na yandi na kisika na yo. Kimfumu na yandi ta yala katuka na zulu mpi ata kimfumu mosi ve ta fwa yo. (Daniele 2:44) Nzambi me ponaka Mwana na yandi Yezu Kristu na kuvanda Ntotila ya Kimfumu yina. (Yezaya 9:6, 7; Matayo 28:18) Luyalu yango kele Kimfumub yina Yezu longaka balongoki na yandi na kusamba sambu na yo. (Matayo 6:9, 10) Bantu yonso ta vanda na bumosi na nsi ya luyalu mosi ya ntoto ya mvimba yina Yezu ta vanda Ntwadisi.

Yezu kele ve bonso bantwadisi ya bantu. Yandi ta sadila ve kimfumu na yandi sambu na mambote na yandi mosi. Yandi kele ntwadisi ya kutudila ntima mpi ya ke pona-ponaka ve. Yo yina ata muntu mosi ve lenda vanda ti badute nde yandi ta kipe ve bantu ya nkaka to yandi ta sadila bantu ya nkaka mambu na mutindu ya mbi sambu na mpusu na bo ya nitu, insi na bo to dikanda na bo. (Yezaya 11:3, 4) Diaka, bantu ta nwanaka diaka ve sambu na banswa na bo. Sambu na nki? Sambu Yezu ta sala mambu sambu na mambote ya konso muntu. “Yandi ta gulusa nsukami yina ke dila sambu na kulomba lusadisu, mpi muntu ya kukonda mfunu ti konso muntu yina me konda nsadisi. . . . Yandi ta gulusa bo na bampasi mpi na mubulu.”​—Nkunga 72:12-14.

Kimfumu ya Nzambi ta katula minduki yonso yina ke fwaka bantu na ntoto. (Mika 4:3) Yo ta katula mpi bantu ya mbi yina ke buya kubika kunwana to ke katula ngemba ya bantu ya nkaka. (Nkunga 37:9, 10) Konso bakala, konso nkento, mpi konso mwana ta vanda na lutaninu na konso kisika yina bo ta vanda na ntoto.​—Ezekiele 34:28.

Ntangu luyalu ya Nzambi ta yala ntoto ya mvimba, bantu yonso ta vanda ti luzingu ya mbote kibeni. Luyalu yina ta manisa bampasi yina ke pusaka bantu na kunwana mu mbandu kinsukami, nzala, mpi kukonda nzo. Konso muntu ta vanda ti madia mingi ya mbote mpi yandi ta vanda ti kisika ya mbote ya kuzinga.​—Nkunga 72:16; Yezaya 65:21-23.

Kimfumu ya Nzambi ta katula mambu yonso ya mbi yina bitumba me nataka. Na kati ya mambu yango, beto lenda tanga bampasi yina mambu ya me salamaka na bitumba me natilaka bantu na nitu mpi na mabanza. Yo vanda bantu yina me fwaka, bo ta futumuka mpi bo ta zinga diaka na ntoto. (Yezaya 25:8; 26:19; 35:5, 6) Mabuta ta vukana diaka mpi mambu ya mbi yina bantu ke vandaka ti yo na mabanza sambu na bitumba ta kuma ‘mambu ya ntama yina ta vila.’​—Kusonga 21:4.

NZAMBI TA KATULA DISUMU

Ntangu Kimfumu ya Nzambi ta yala ntoto ya mvimba, bantu yonso ta sambilaka Nzambi mosi kaka ya kieleka Yehowac, “Nzambi ya zola mpi ya ngemba.” (2 Bakorinto 13:11) Bantu ta longuka mutindu ya kuzinga na ngemba ti bantu ya nkaka. (Yezaya 2:3, 4; 11:9) Bantu yonso yina ke lemfukilaka Nzambi ta vanda diaka ve bantu ya masumu, kansi bo ta kuma bantu ya kukuka.​—Baroma 8:20, 21.

NZAMBI TA FWA SATANA TI BADEMO NA YANDI

Kimfumu ya Nzambi ta fwa bantu yina ke pusaka bantu na kunwana disongidila Satana ti bademo na yandi. (Kusonga 20:1-3, 10) Mutindu bupusi na bo ya mbi ta vanda diaka ve, “ngemba ta kuma mingi.”​—Nkunga 72:7.

Nge lenda ndima kibeni nde mambu yina Nzambi me tuba nde yandi ta manisa bitumba mpi mavwanga, ta salama kibeni. Yandi kele ti ngolo mpi nzala ya kumanisa bitumba.

• Nzambi kele ti mayele mpi ngolo ya kufwana sambu na kumanisa bitumba mpi mavwanga. (Yobi 9:4) Yo kele ve ti kima yina yandi lenda kuka ve kusala.​—Yobi 42:2.

• Nzambi ke zolaka ve ata fioti nde bantu kumona mpasi. (Yezaya 63:9) Yandi ke zolaka mpi ve ata fioti bantu yina ke zolaka mubulu.​—Nkunga 11:5.

• Nzambi ke lungisaka ntangu yonso mambu ya yandi ke tubaka; yandi ke kusaka ve.​—Yezaya 55:10, 11; Tito 1:2.