DISOLO YA KULONGUKA 15
NKUNGA 30 Tata, Nzambi, mpi Nduku
“Kupusana Pene-pene ya Nzambi Kele Mbote” Sambu na Beto!
“Sambu na mono, kupusana pene-pene ya Nzambi kele mbote.”—NK. 73:28.
NA BUNKUFI
Mutindu beto lenda pusana pene-pene ya Nzambi mpi mambote yina beto ta baka kana beto sala yo.
1-2. (a) Inki yo ke lombaka sambu na kuta kinduku ya ngolo ti muntu? (b) Inki beto ta longuka na disolo yai?
KETI nge kele ti nduku mosi ya ngolo? Inki mambu nge salaka sambu na kukuma nduku na yandi? Mbala ya nkaka nge vandaka kulutisa ntangu ti yandi, nge zabaka mambu ya luzingu na yandi mpi nge zabaka mambu yina yandi ke zolaka mpi yina yandi ke zolaka ve. Nge monaka bikalulu na yandi ya mbote yina nge lenda landa. Yo yina, nge kumaka kuzola yandi.
2 Yo ke lombaka ntangu mpi bikesa mingi sambu na kuta kinduku ya ngolo ti muntu. Yo kele mpi mutindu mosi sambu na kuta kinduku ya ngolo ti Yehowa. Disolo yai ta sadisa beto na kuzaba mutindu beto lenda ta kinduku ya ngolo ti Nzambi na beto mpi mambote yina yo ta natila beto. Ntete, beto tadila sambu na nki yo kele mbote na kupusana pene-pene ti Yehowa, Nduku yina me luta banduku na beto yonso.
3. Sambu na nki beto fwete yindula mambote yina kupusana pene-pene ya Nzambi ke natilaka beto? Pesa mbandu.
3 Ntembe kele ve nde nge ke ndimaka mpi nde yo kele mbote na kupusana pene-pene na Yehowa. Kansi, kana beto ke yindula mingi sambu na nki kupusana pene-pene ya Nzambi kele mbote, yo ta sadisa beto na kulanda kupusana pene-pene na yandi. (Nk. 63:6-8) Mu mbandu, beto ke zabaka nde kudia mbote, kusala ngalasisi, kupema mbote mpi kunwa masa mingi, ke sadisaka beto na kuvanda ti sante ya mbote. Kansi, bantu mingi ke tudilaka ve mambu yai dikebi, yo yina, bo ke bebisaka sante na bo. Kana beto ke yindula mingi mambote yina beto ta baka kana beto ke sala mambu yai, yo ta sadisa beto na kulanda kusala mambu yango sambu na kuvanda ti sante ya mbote. Mutindu mosi mpi, beto ke zabaka nde kupusana pene-pene ya Yehowa kele mbote sambu na beto. Kansi kana beto ke yindula mingi mambote yina yo ke natilaka beto, yo ta sadisa beto na kulanda kupusana kibeni pene-pene na yandi.—Nk. 119:27-30.
4. Inki muyimbi-bankunga tubaka na Nkunga 73:28?
4 Tanga Nkunga 73:28. Muntu yina sonikaka Nkunga 73 vandaka Mulevi mosi yina vandaka kubula miziki na tempelo ya Yehowa. Yo ke monana nde yandi vandaka kusadila Yehowa banda bamvula mingi. Kansi, yandi vandaka kaka ti mfunu ya kuyibuka nde “kupusana pene-pene ya Nzambi” vandaka mbote sambu na yandi mpi kuyibusa bantu ya nkaka nde yo kele mpi mbote sambu na bo. Inki kele mwa mambote yina kupusana pene-pene ya Nzambi ke nataka?
“KUPUSANA PENE-PENE YA NZAMBI” KE PESAKA BETO KIESE
5. (a) Sambu na nki kupusana pene-pene ya Yehowa ke pesaka beto kiese? (b) Mutindu Bingana 2:6-16 ke monisa yo, tubila bambandu ya ke monisa mutindu mayele ya Yehowa lenda tanina nge mpi kunatila nge mambote.
5 Kusala kinduku ya ngolo ti Yehowa ke pesaka beto kiese mingi. (Nk. 65:4) Beto kele ti bikuma mingi ya ke ndimisa beto mambu yai. Mu mbandu, ntangu beto ke tangaka Biblia mpi ke sadilaka mambu ya kele na kati, beto ke kumaka mayele mingi. Mayele yango ke taninaka beto na bupusi ya mbi mpi ke sadisaka beto na kusala ve bifu ya nene. (Tanga Bingana 2:6-16.) Yo yina Biblia ke tuba nde: “Kiese na muntu yina me zwa mayele mpi na muntu yina me zwa luswasukusu.”—Bing. 3:13.
6. Sambu na nki muyimbi-bankunga vandaka diaka ve na kiese?
6 Ya kieleka, banduku ya Yehowa ke vandaka mpi ti basusi bantangu ya nkaka. Muntu yina sonikaka Nkunga 73 vandaka diaka ve na kiese sambu yandi kumaka ti bangindu ya mbi. Yandi waka makasi mpi yandi kumaka kulula bantu ya mbi sambu yandi kumaka kuyindula nde bo vandaka ti luzingu ya mbote ata bo vandaka ve kuzitisa Nzambi. Yandi kudikusaka mutindu yandi vandaka kuyindula nde bantu ya lulendo mpi bantu ya mubulu vandaka ntangu yonso bamvwama, na sante ya mbote mpi bo vandaka nkutu ve kumona mpasi. (Nk. 73:3-7, 12) Yo yangisaka yandi mingi, yo yina yandi vandaka kudiyula kana bikesa yina yandi vandaka kusala sambu na kusadila Yehowa vandaka kibeni mfunu. Ntangu yandi vandaka kudiyangisa, yandi tubaka nde: “Ya kieleka, mono kudipesaka mpasi ya mpamba na kuvanda ti ntima ya mpembe mpi mono kudipesaka mpasi ya mpamba na kuyobisa maboko na mono sambu na kusonga nde mono me sala mbi ve.”—Nk. 73:13.
7. Inki beto lenda sala kana beto kele ti basusi? (Tala mpi kifwanisu.)
7 Muyimbi-bankunga bikaka ve nde basusi yina kulembisa yandi nitu. Yandi salaka kima mosi sambu na kusoba bangindu na yandi. Yandi “kotaka na kisika ya santu ya nene ya Nzambi,” kisika yina Yehowa sadisaka yandi na kukatula bangindu yina ya mbi. (Nk. 73:17-19) Yehowa, Nduku na beto ya kuluta mbote, ke zabaka ntangu beto ke vandaka ti basusi. Kana beto ke samba yandi sambu yandi twadisa beto mpi beto ke ndima lutwadisu yina yandi ke pesaka beto na nzila ya Ndinga na yandi mpi ya dibundu na yandi, beto ta baka ngolo yina beto kele ti yo mfunu sambu na kukanga ntima ntangu beto kele ti basusi. Ata basusi me lutila beto, Yehowa ta pesa beto kikesa mpi ta lembika beto.—Nk. 94:19.a
Mulevi yina sonikaka Nkunga 73 me telema na “kisika ya santu ya nene ya Nzambi” (Tala paragrafe 7)
“KUPUSANA PENE-PENE YA NZAMBI” KE SADISAKA BETO NA KUZINGA MBOTE MPI KE PESAKA BETO KIVUVU
8. Na nki mitindu ya nkaka ya mfunu kupusana pene-pene ya Nzambi ke natilaka beto mambote?
8 Kupusana pene-pene ya Nzambi ke natilaka beto mambote na mitindu zole ya nkaka ya mfunu. Ya ntete, yo ke sadisaka beto na kuzinga mbote. Ya zole, yo ke pesaka beto kivuvu ya kieleka sambu na bilumbu ke kwisa. (Yer. 29:11) Beto tadila mambu yango zole mbote-mbote.
9. Inki mutindu kupusana pene-pene ya Yehowa ke sadisaka beto na kuvanda na kiese mingi?
9 Kana beto ke pusana kibeni pene-pene ya Yehowa, yo ke sadisaka beto na kuzinga mbote. Bantu mingi bubu yai ke kwikilaka ve na Nzambi. Yo yina, bo ke zabaka ve sambu na nki bantu kele na luzingu mpi bo ke yindulaka nde na bilumbu ke kwisa bantu yonso ta mana na ntoto. Kansi mutindu beto me longukaka Ndinga ya Nzambi, beto me bakisaka kibeni nde Nzambi “kele mpi nde yandi ke kumaka muntu yina ke pesaka matabisi na bantu yina ke sosaka yandi na masonga yonso.” (Baeb. 11:6.) Yehowa me salaka beto sambu beto sadila yandi. Yo yina, ntangu beto ke sadilaka yandi, beto ke vandaka mpenza na kiese.—Kul. 10:12, 13.
10. Nkunga 37:29 ke tuba nki sambu na bantu yina ke tulaka kivuvu na Yehowa?
10 Bantu mingi bubu yai ke yindulaka nde luzingu yonso yo yai. Yo yina bo ke monaka nde kuvanda ti kisalu, kusansa dibuta mpi kubumba mbongo yina ta sadisa bo ntangu bo ta baka pansio, me lunga sambu na bo. Bo ke zabaka ve balusilu ya Nzambi sambu na bilumbu ke kwisa. Kansi beto bansadi ya Yehowa, beto ke tudilaka yandi ntima. (Nk. 25:3-5; 1 Tim. 6:17) Beto ke tulaka ntima na Yehowa yina kele Nzambi mpi Nduku na beto, mpi beto ke tulaka ntima nde yandi ta lungisa mambu yonso yina yandi me silaka beto. Beto ke vingila mambu mingi ya mbote na bilumbu ke kwisa, mingi-mingi dibaku ya kitoko ya kusadila Yehowa mvula na mvula na Paladisu.—Tanga Nkunga 37:29.
11. Inki mambote beto ke bakaka ntangu beto ke pusanaka pene-pene ya Nzambi mpi nki mutindu yandi ke kudiwaka?
11 Kupusana pene-pene ya Yehowa ke natilaka beto mambote na mitindu mingi ya nkaka. Mu mbandu, Yehowa ke sila beto nde yandi ta lolula masumu na beto kana beto me balula ntima. (Yez. 1:18) Yo ke salaka nde beto kudiyangisa diaka ve sambu na masumu yina beto me salaka. (Nk. 32:1-5) Diaka, beto ke pesaka Yehowa kiese ntangu beto ke pusanaka pene-pene na yandi. (Bing. 23:15.) Ya kieleka, nge lenda yindula mambote ya nkaka yina beto ke bakaka ntangu beto ke taka kinduku ya ngolo ti Yehowa. Kansi, nki mutindu nge lenda landa kupusana pene-pene ya Nzambi?
MUTINDU YA KULANDA “KUPUSANA PENE-PENE YA NZAMBI”
12. Inki mambu nge me salaka sambu na kupusana pene-pene ya Nzambi?
12 Kana nge me bakaka mbotika, yo ke monisa nde nge me salaka dezia mambu mingi ya nene sambu na kupusana pene-pene ya Yehowa. Mu mbandu, nge me longukaka bakieleka mingi ya me tala Yehowa Nzambi mpi Yezu Kristu, nge me balulaka ntima na masumu na nge, nge me monisaka nde nge ke kwikilaka kibeni na Nzambi mpi nge me salaka yonso sambu na kulemfukila yandi. Kansi sambu na kupusana kibeni pene-pene ya Nzambi, beto fwete landa kusala mambu yai.—Bakol. 2:6.
13. Inki mambu tatu lenda sadisa beto na kulanda kupusana kibeni pene-pene ya Yehowa?
13 Inki ta sadisa beto na kulanda kupusana kibeni pene-pene ya Nzambi? (1) Beto fwete landa kutanga mpi kulonguka Biblia. Ntangu beto ke sala yo, beto fwete suka ve kaka na kutanga mambu ya me tala Nzambi. Kansi, beto fwete sosa mpi kubakisa mambu yina yandi ke zola nde beto sala mpi kuzitisa minsiku yina kele na Ndinga na yandi. (Baef. 5:15-17) (2) Beto fwete yindula mingi mambu yina ke monisa pwelele nde Yehowa ke zolaka beto sambu na kukumisa lukwikilu na beto ngolo. (3) Beto fwete landa kumenga mambu yina ke sepedisaka ve Yehowa mpi beto fwete ta ve kinduku ti bantu yina ke salaka mambu yango.—Nk. 1:1; 101:3.
14. Mutindu 1 Bakorinto 10:31 ke monisa yo, tubila mambu ya nkaka yina beto fwete sala konso kilumbu sambu na kusepedisa Yehowa. (Tala mpi bifwanisu.)
14 Tanga 1 Bakorinto 10:31. Yo kele mfunu mingi na kusala mambu yina ke sepedisaka Yehowa. Kusepedisa Yehowa ke tendula ve kaka kulonga nsangu ya mbote to kukwenda na balukutakanu. Kansi yo ke tendula mpi kusala mambu ya mbote konso kilumbu. Mu mbandu, kana beto kele masonga na mambu yonso mpi beto ke kabila bantu ya nkaka bima yina beto kele ti yo, yo ke pesaka Yehowa kiese mingi. (2 Bak. 8:21; 9:7) Yandi ke zolaka mpi nde beto baka na valere mingi dikabu ya luzingu yina yandi me pesaka beto. Beto ke pusanaka pene-pene ya Yehowa, Nto ya luzingu, ntangu beto ke landaka kuvanda ti bukati-kati na mutindu na beto ya kudia mpi ya kunwa mpi ntangu beto ke salaka mambu mingi ya nkaka sambu na kuvanda na sante ya mbote. Bikesa yonso yina beto ke salaka sambu na kusepedisa Yehowa ata na mambu ya fioti-fioti ke salaka nde yandi zola beto diaka mingi.—Luka 16:10.
Beto ke sepedisaka Yehowa kana beto ke pusa kamio, moto to velo na lutaninu, kana beto ke sala ngalasisi to ke dia madia ya mbote sambu na kuvanda ti sante ya mbote mpi kana beto kele ti kikalulu ya kukabila bantu ya nkaka (Tala paragrafe 14)
15. Inki mutindu Yehowa ke zolaka nde beto sadila bantu yonso mambu?
15 Yehowa ke monisaka ntima na yandi ya mbote na bantu yonso. Yo vanda bantu ya mbote to bantu ya mbi. (Mat. 5:45) Yandi ke lomba beto mpi na kusala mutindu mosi sambu na bantu yonso. Mu mbandu, Biblia ke lomba beto na “kutuba ve mambu ya mbi sambu na muntu, na kuswana ve, . . . mpi na kumonisa mawete na bantu yonso.” (Tito 3:2) Kuyibuka mambu yai ta sadisa beto na kumona ve mpamba bantu ya nkaka ata bo ke sadilaka ve Yehowa. (2 Tim. 2:23-25) Kana beto ke landa kusadila bantu yonso mambu ti mawete mpi ti luzitu, yo ta sadisa beto na kukwenda pene-pene ya Yehowa.
BETO LENDA “PUSANA PENE-PENE YA NZAMBI” ATA NTANGU BETO KE SALA BIFU
16. Muntu yina sonikaka Nkunga 73 yantikaka kuyindula nki na nima ya mwa ntangu?
16 Kansi, nki nge lenda sala kana na bantangu ya nkaka nge ke yindula nde Yehowa ke zolaka nge diaka ve sambu na bifu yina nge me salaka? Mutindu beto tubilaka yo, mambu yai kuminaka mpi muntu yina sonikaka Nkunga 73. Yandi tubaka nde: “Makulu na mono zolaka kuvila nzila; yo bikalaka fioti bitambi na mono kusietumuka.” (Nk. 73:2) Yandi tubaka diaka nde, yandi kumaka “ngani” mpi “zoba” “bonso mbisi ya kukonda mayele” na ntwala ya Yehowa. (Nk. 73:21, 22) Keti yandi yindulaka nde Yehowa vandaka kuzola yandi diaka ve mpi nde yandi ta lolula yandi ve ata fioti sambu yandi kumaka ti bangindu yina ya mbi?
17. (a) Muyimbi-bankunga salaka nki ata yandi vandaka kudiyangisa mingi? (b) Mbandu na yandi ke longa beto nki? (Tala mpi bifwanisu.)
17 Kana muyimbi-bankunga yindulaka nde Yehowa yambulaka yandi, bangindu yina vandaka kaka sambu na ntangu fioti. Yo ke monana nde na ntangu yina yandi vandaka kudiyangisa mingi, yandi bakisaka mfunu ya kukwenda pene-pene ya Nzambi. Yo yina yandi tubaka nde: “Kansi ntangu yai mono kele ntangu yonso ti nge [Yehowa]; nge me simba diboko na mono ya kitata. Nge ke twadisa mono na ndongisila na nge, na nima nge ta nata mono tii na nkembo.” (Nk. 73:23, 24) Beto fwete lomba mpi Yehowa na kupesa beto kikesa ntangu beto me bakisa nde lukwikilu na beto me lemba to ntangu beto me lemba nitu sambu na bifu na beto. (Nk. 73:26; 94:18) Ata beto me vila nzila sambu na mwa ntangu, beto lenda vutukila Yehowa mpi kutula ntima nde yandi ke vandaka “ya kuyilama na kulolula.” (Nk. 86:5) Beto fwete kwenda pene-pene ya Nzambi na beto, mingi-mingi ntangu beto ke kudiyangisa mingi kibeni.—Nk. 103:13, 14.
Ntangu lukwikilu na beto me lemba, beto fwete kudipesa na mambu ya kimpeve sambu na kukwenda pene-pene ya Yehowa (Tala paragrafe 17)
‘PUSANA PENE-PENE YA NZAMBI’ MVULA NA MVULA
18. Sambu na nki beto ta landa kupusana pene-pene ya Yehowa mvula na mvula?
18 Beto ta landa kupusana pene-pene ya Yehowa mvula na mvula sambu beto ta vanda kaka ti mambu mingi ya kulonguka sambu na yandi. Biblia ke tuba nde ‘ata muntu mosi ve lenda bakisa’ kibeni banzila ya Yehowa, mayele na yandi mpi nzayilu na yandi.—Bar. 11:33.
19. Mukanda ya Bankunga ke pusa beto na kutula ntima na nki?
19 Nkunga 79:13 ke tuba nde: “Beto, bantu na nge mpi bitwisi ya nseke na nge, beto ta pesa nge matondo kimakulu; mpi beto ta zabisa lukumu na nge tii na bandonga yonso ya bantu yina ta kwisa.” Nge lenda tula ntima nde nge ta baka mambote ya mvula na mvula kana nge ke landa mpi kupusana pene-pene ya Nzambi. Mpi nge lenda tuba ti kundima yonso nde: “Nzambi kele ditadi ya ntima na mono mpi dikabu na mono kimakulu.”—Nk. 73:26.
NKUNGA 32 Kangama ti Nzambi!
a Bantu yina ke niokwamaka na mabanza, bayina ke vandaka ntangu yonso mawa-mawa to bayina ke kudiyangisaka mingi kibeni lenda vanda ti mfunu ya lusadisu ya munganga. Sambu na kuzaba mambu mingi, tanga Nzozulu ya Nkengi No. 1 2023.