Yezu “Longukaka Bulemfu”

Yezu ke lemfukilaka Yehowa ntangu yonso. (Yoa. 8:29) Sambu na nki Biblia ke tuba nde: “Yandi longukaka bulemfu na bampasi yina yandi kutanaka na yo”?​—Baef. 5:8.

Ntangu Yezu vandaka na ntoto, yandi kutanaka ti mambu ya nkaka yina yandi kutanaka ve ti yo ntangu yandi vandaka na zulu. Bibuti yina sansaka yandi vandaka kuzola yandi mingi, kansi bo vandaka bantu ya kukonda kukuka. (Luka 2:51) Bamfumu ya mabundu yina vandaka ntima-mbi mpi bamfumu ya luyalu niokulaka yandi mingi. (Mat. 26:59; Mar. 15:15) Diaka, “yandi kudikulumusaka mpi lemfukaka tii na lufwa,” ya mpasi mingi.​—Bafil. 2:8.

Mambu yina Yezu kutanaka ti yo sadisaka yandi na kumonisa bulemfu na kiteso mosi yina yandi me monisaka ntete ve ntangu yandi vandaka na zulu. Yo me sadisaka yandi mpi na kukuma Ntotila ya kukuka, Nganga-Nzambi ya Nene, yina me fwana na kuwila beto kibeni mawa mpi kuditula na kisika na beto. (Baeb. 4:15; 5:9) Yezu monisaka bulemfu na kiteso ya mingi kuluta na mambu ya mpasi yina yandi kutanaka ti yo, yo yina Yehowa me kumaka diaka kusepela ti yandi mingi kuluta. Kana beto ke landa kulemfukila Yehowa ata ntangu beto ke kutana ti mambu ya mpasi na kisalu yina yandi ke pesa beto, yandi ta kuma kusepela diaka ti beto mingi kuluta.​—Yak. 1:4.