Zola ya Nzambi Ke Sukaka Ve

1-2. Inki mutindu beto lenda kudiwa ntangu beto ke kutana ti bampasi?

YINDULA fioti: Maswa mosi kele na masa mpi mupepe mosi ya ngolo ke bula. Mutindu mupepe mpi bitembo kele ngolo, yo ke sala nde maswa kukwenda kisaka-saka. Yo yina bo me tula longo sambu yo sadisa maswa na kukwenda ve kisaka-saka ata mupepe ya ngolo ke bula nki mutindu.

² Ntangu beto ke kutana ti bampasi ya ngolo, beto lenda fwanana ti maswa yina beto me tubila. Bangindu na beto lenda soba mbala na mbala. Beto lenda tudila Yehowa ntima bubu mpi mbasi beto lenda lemba diaka nitu mpi beto lenda yindula nde Yehowa ke mona ve bampasi na beto. (Nk. 10:1; 13:1) Diaka, nduku mosi lenda pesa beto kikesa kansi na nima, beto lenda kuma diaka ti badute. (Bing. 17:17; 25:11) Nkutu, beto lenda yindula nde Yehowa me yambula beto. Inki lenda sadisa beto na kundima nde Yehowa ke zolaka beto mpi ke sadisaka beto ntangu beto ke kutanaka ti bampasi?

3. Mutindu Bankunga 31:7 mpi 136:1 ke monisa yo, “zola ya kwikama” ke tendula nki mpi nki ke ndimisa beto nde Yehowa kele mbandu ya kuluta mbote ya zola ya kwikama? (Tala mpi bifwanisu.)

³ Kima ya ntete ya lenda sadisa beto na kukanga ntima ntangu beto ke kutana ti bampasi kele zola ya kwikama ya Yehowa. (Tanga Bankunga 31:7; 136:1.) Bangogo “zola ya kwikama” ke tendula zola ya ngolo kibeni yina muntu mosi kele ti yo sambu na muntu ya nkaka mpi kinduku ya ngolo yina yandi kele ti yo ti muntu yango. Yehowa kele mbandu ya kuluta mbote ya zola ya kwikama. Nkutu Biblia ke tuba nde: “Yehowa kele ya kufuluka na zola ya kwikama.” (Kub. 34:6, 7) Yo ke yika diaka nde: ‘Yehowa kele ti zola ya kwikama mingi sambu na bantu yonso yina ke bingaka nge.’ (Nk. 86:5) Baverse yai ke monisa nde Yehowa ke yambulaka ve ata fioti bansadi na yandi. Kana beto ke vila ve diambu yai, yo ta sadisa beto na kukanga ntima na bampasi.​—Nk. 23:4.

KUVILA VE NDE ZOLA YA YEHOWA KELE MFUNU MINGI

4. Inki kele malongi ya mfunu mingi yina nge yantikaka kulonguka na Biblia mpi sambu na nki nge bikaka ve nde ata muntu mosi kukatula nge yo?

⁴ Beto ta kanga mpi ntima na bampasi kana beto ke vila ve kibeni nde Yehowa ke zolaka beto. Dilongi ya ke tubila zola ya Yehowa sambu na bantu kele dilongi mosi ya mfunu mingi. Inki kele malongi ya nkaka ya mfunu mingi ya nge me zaba na Biblia? Mbala ya nkaka yo kele malongi yina nge yantikaka kulonguka na Ndinga ya Nzambi. Mu mbandu nge longukaka nde zina ya Nzambi kele Yehowa, nde Yezu kele Mwana na yandi mosi kaka ya kubutuka, nde bafwa ke zabaka kima ve mpi nde bantu ta zinga mvula na mvula na paladisu. (Nk. 83:18; Lon. 9:5; Yoa. 3:16; Kus. 21:3, 4) Ntangu nge ndimaka malongi yai, nge zolaka ve nde muntu ya nkaka kukusa nge to kukatula nge yo. Sambu na nki? Sambu nge bakisaka kibeni nde yo kele kieleka. Yo yina, beto tala mutindu kuyibuka nde Yehowa ke zolaka beto ta sadisa beto na kundima kibeni nde Yehowa ke zabaka mambu yina beto ke kutanaka ti yo mpi nde yandi ke sadisaka beto ntangu beto ke kutanaka ti bampasi.

5. Inki mutindu muntu lenda yambula malongi ya luvunu?

⁵ Ntangu nge yantikaka kulonguka Biblia, nki sadisaka nge na kubuya malongi ya luvunu? Mbala ya nkaka nge vandaka kufwanisa mambu yina bo vandaka kulonga nge na dibundu na beno ti mambu yina Biblia ke tubaka. Mbala ya nkaka bo longaka nge nde Yezu kele Nzambi Nkwa-Ngolo Yonso. Kansi ntangu nge longukaka Biblia, nge bakisaka nde yo kele ve mutindu yina. Yo yina, nge kumaka kundima mambu yai ya Biblia ke tubaka nde: Yezu kele “Mwana ya ntete ya lugangu yonso” to “Mwana mosi kaka ya kubutuka ya Nzambi.” (Bakol. 1:15; Yoa. 3:18) Ya kieleka, malongi ya luvunu lenda ‘kangama ngolo’ mpi yo lenda vanda mpasi na kukatula yo. (2 Bak. 10:4, 5) Kansi ntangu nge longukaka kieleka, nge vutukilaka yo diaka ve.​—Bafil. 3:13.

6. Sambu na nki beto fwete ndima kibeni nde ‘zola ya kwikama ya Yehowa ke zingaka kimakulu’?

⁶ Mutindu mosi mpi, kana beto ke zaba nde Yehowa ke zolaka beto mutindu Biblia ke tubaka yo, yo ta sadisa beto na kukatula badute. Mu mbandu, kana nge ke yindula nde Yehowa ke zolaka nge ve, baka ntangu ya kuzikisa kana yo kele mpidina to ve. Nge lenda fwanisa mambu yina ke pusa nge na kuyindula mpidina ti mambu yina kele na Nkunga 136:1. Nge lenda kudiyula nde: ‘Sambu na nki Yehowa ke tuba nde zola na yandi kele ya “kwikama”?’ ‘Sambu na nki bo me sadila bangogo “zola na yandi ya kwikama ke zingaka kimakulu” bambala 26 na Nkunga 136?’ Mutindu beto me mona yo, zola ya kwikama ya Yehowa sambu na bansadi na yandi kele na kati ya malongi ya mfunu mingi yina nge ndimaka kukonda mpasi. Ngindu ya kumona nde nge kele ve mfunu na meso ya Yehowa, kele ngindu ya mbi. Losa yo mutindu nge me losaka malongi ya nkaka ya luvunu.

7. Inki baverse ke ndimisa beto nde Yehowa ke zolaka beto mingi?

⁷ Biblia ke monisa mambu yina Yehowa ti Yezu tubaka sambu na kundimisa beto nde Yehowa ke zolaka beto mingi. Mu mbandu, Yezu tubilaka balongoki na yandi nde: “Beno kele na mfunu mingi kuluta tu-bandeke mingi.” (Mat. 10:31) Simba nde Yezu tubaka ve nde ‘beno lenda vanda na mfunu mingi,’ kansi nde “beno kele na mfunu mingi.” Yehowa yandi mosi mpi tubaka nde: “Mono ta pesa nge kikesa, ee, mono ta sadisa nge, mono ta simba nge mpenza ngolo na diboko na mono ya kitata ya lunungu.” (Yez. 41:10) Simba nde Yehowa mpi tubaka ve nde ‘mono lenda sadisa nge,’ kansi nde “mono ta sadisa nge.” Mambu yai yonso ke monisa nde Yehowa ke zolaka beto mingi kibeni. Kana nge ke ndima ve nde Yehowa ke zolaka nge ntangu nge ke kutana ti bampasi, baverse yai mpi baverse ya nkaka ta sadisa nge mingi. Nge lenda samba sambu na kukatula badute yina nge kele ti yo mpi kuyindula mingi mambu ya baverse yango ke tuba. Ebuna, nge ta ndima mambu yai ya 1 Yoane 4:16 ke tuba: “Beto me zabaka mpi beto ke ndimaka zola yina Nzambi kele na yo sambu na beto.”a

8. Inki nge lenda sala kana nge ke ndima ve nde Yehowa ke zolaka nge?

⁸ Inki nge lenda sala kana bantangu ya nkaka nge ke yindula nde Yehowa ke zolaka nge ve? Nge lenda yindula mambu yina nge me zaba ya ke monisa nde Yehowa ke zolaka beto mingi. Mambu ya Biblia ke tubaka ya me tala zola ya Yehowa sambu na beto kele ya kieleka. Kansi, kana nge ke yindula nde Yehowa ke zolaka nge ve, yo kele bonso nde nge ke ndima ve mambu yina Biblia ke tubaka sambu na zola ya Yehowa. Kuvila ve nde zola kele kikalulu ya kuluta mfunu ya Yehowa.​—1 Yoa. 4:8.

YINDULA MINGI ZOLA YA YEHOWA SAMBU NA NGE

9-10. Inki Yezu vandaka kutubila ntangu yandi songaka balongoki na yandi nde “Tata yandi mosi ke zolaka beno”? (Yoane 16:26, 27) (Tala mpi kifwanisu.)

⁹ Mambu yina Yezu songaka balongoki na yandi lenda sadisa beto na kubakisa nde Yehowa ke zolaka beto. Yandi tubaka nde: “Tata yandi mosi ke zolaka beno.” (Tanga Yoane 16:26, 27.) Yandi tubaka ve mpidina sambu na kusepedisa balongoki na yandi; sambu ntangu yandi tubaka yo, yandi vandaka ve kutubila mambu yina vandaka kuyangisa bo kansi yandi vandaka kutubila kisambu.

¹⁰ Yezu songaka balongoki na yandi nde bo fwete samba yandi ve kansi bo fwete samba Yehowa na zina na yandi. (Yoa. 16:23, 24) Yo lombaka mpenza nde bo zaba yo. Na nima ya lufutumuku ya Yezu, mbala ya nkaka balongoki na yandi yindulaka nde bo fwete samba yandi sambu yandi vandaka nduku na bo mpi yandi vandaka kuzola bo mingi. Mbala ya nkaka bo vandaka kuyindula nde yandi ta wa bisambu na bo mpi ta songa Tata na yandi na kusadisa bo. Kansi, Yezu songaka bo na kuyindula ve mpidina. Yandi ndimisaka bo nde: “Tata yandi mosi ke zolaka beno.” Yo ke tendula nde Yehowa vandaka kuzola bo mingi, yo yina yandi vandaka kusepela kuwa bisambu na bo yandi mosi. Mambu yai kele na kati ya malongi ya mfunu mingi ya me tala kisambu. Yo ke tendula nki sambu na nge? Ntangu nge longukaka Biblia, yo sadisaka nge na kuzaba Yezu mpi na kuzola yandi. (Yoa. 14:21) Kansi bonso Bakristu ya ntete, nge fwete samba Yehowa mpi kundima kibeni nde yandi ta wa bisambu na nge sambu ‘yandi ke zolaka nge.’ Kana nge ke samba Yehowa konso ntangu, nge ta monisa nde nge ke ndimaka nde yandi ke zolaka nge.​—1 Yoa. 5:14.

SOSA KUZABA KIKUMA YA BADUTE NA NGE

11. Sambu na nki Satana ta sepela kana beto kele ti badute nde Yehowa ke zolaka beto ve?

¹¹ Nani ke pusaka beto na kundima ve nde Yehowa ke zolaka beto? Nge lenda tuba nde yo kele Satana. Yo kele kibeni kieleka sambu Biblia ke tubaka nde Satana ke sosaka “kudia” beto, disongidila kupusa beto na kuyambula Yehowa. Yo yina, yandi ta wa kiese mingi kana beto ke yindula nde Yehowa ke zolaka beto ve. (1 Pie. 5:8) Yehowa ke zolaka beto mingi mpi yandi pesaka Mwana na yandi bonso kimenga sambu na beto. Kansi Satana ke pusaka beto na kuyindula nde beto me fwana ve na kubakila kimenga yango mambote sambu beto kele kibeni bantu ya masumu. (Baeb. 2:9) Nkutu, yandi ta sepela mingi kana beto me kuma ti badute nde Yehowa ke zolaka beto ve mpi kana beto me yambula kusadila yandi. Sambu na nki? Sambu Yehowa ke zolaka ve Satana. Yo yina Satana ke sadilaka “mayele ya mbi” sambu na kumonisa nde Yehowa ke zolaka beto mpi ve. (Baef. 6:11) Kana beto me zaba mayele ya mbi ya Satana, yo ta sadisa beto na kutelemina yandi.​—Yak. 4:7.

12-13. Sambu na nki kukonda kukuka lenda sala nde beto yindula nde Yehowa ke zolaka beto ve?

¹² Sambu na nki beto lenda yindula mpi nde Yehowa ke zolaka beto ve? Sambu beto kele bantu ya kukonda kukuka. (Nk. 51:5; Bar. 5:12) Disumu me bebisaka kinduku na beto ti Yehowa. Yo me bebisaka mpi nitu na beto, ntima na beto mpi mutindu na beto ya kuyindula.

¹³ Kukonda kukuka ke salaka nde beto kudiyangisa mingi, beto wa boma, beto kudiwa ve na lutaninu mpi beto wa nsoni. Beto ke kudiwaka mutindu yai mingi-mingi kana beto me sala disumu. Kansi beto ke waka mpi mutindu yai ntangu beto ke yibukaka nde beto kele bantu ya masumu sambu Yehowa salaka beto ve bantu ya masumu. (Bar. 8:20, 21) Mu mbandu, kamio ke tambulaka mbote ve kana pine na yo me tobuka. Mutindu mosi mpi, kukonda kukuka me salaka nde beto kuma ti bangindu ya mbi sambu Yehowa salaka beto ve ya kukonda kukuka. Yo yina, beto fwete yituka ve kana bantangu ya nkaka beto ke yindula nde Yehowa ke zolaka beto ve. Kansi kana ngindu yai me kwisila beto, beto fwete vila ve nde Yehowa kele ‘Nzambi ya nene mpi ya ke pesaka boma, yina ke monisaka zola ya kwikama na bantu yina ke zolaka yandi mpi ke zitisaka bansiku na yandi.’​—Neh. 1:5.

14. Sambu na nki kimenga ya Yezu ke sadisaka beto na kukatula badute nde Yehowa ke zolaka beto ve? (Baroma 5:8) (Tala mpi lupangu “Kuditanina na ‘Kiyeka ya Disumu Yina Ke Kusaka.’”)

¹⁴ Bantangu ya nkaka, beto lenda yindula nde yo me fwana ve nde Yehowa kuzola beto. Ya kieleka, mutindu yandi ke zolaka beto ke pesaka beto kiese mingi sambu na kutuba masonga, yo fwanaka ve kibeni nde Yehowa kuzola beto sambu beto kele bantu ya masumu. Kansi kimenga ya Yezu ke fikaka masumu na beto mpi Yehowa pesaka beto yo sambu yandi ke zolaka beto mingi. (1 Yoa. 4:10) Nkutu, Yezu kwisaka na ntoto sambu na kugulusa bantu ya masumu, kansi ve bantu ya kukuka sambu ata muntu mosi ve kele ya kukuka. (Tanga Baroma 5:8.) Yo yina, Yehowa ke lombaka beto ve na kusala mambu na mutindu ya kukuka. Kana beto ke bakisa nde kukonda kukuka lenda pusa beto na kuyindula nde Yehowa ke zolaka beto ve, beto ta sala ngolo sambu na kutelemina ngindu yina.​—Bar. 7:24, 25.

LANDA KUKANGAMA KAKA NA YEHOWA

15-16. Inki beto fwete ndima kana beto ke landa kukangama kaka na Yehowa mpi sambu na nki? (2 Samuele 22:26)

¹⁵ Yehowa ke zolaka nde beto landa ‘kukangama kaka na yandi.’ (Kul. 30:19, 20) Kana beto sala mpidina, yandi mpi ta landa kukangama ti beto. (Tanga 2 Samuele 22:26.) Ebuna yandi ta sadisa beto na konso mpasi yina beto ta kutana ti yo.

¹⁶ Mutindu beto me longuka yo, beto kele ti bikuma mingi ya kukanga ntima na bampasi. Beto ke ndimaka nde Yehowa ke zolaka beto mpi yandi ta landa kusadisa beto. Biblia ke tubaka mpi mutindu yina. Kana beto ke kutana ti bampasi, beto fwete yibuka mambu yina beto ke zaba ya ke monisa nde Yehowa ke zolaka beto, kansi beto fwete tula ve dikebi na bangindu na beto mosi. Yo yina beto fwete landa kundima kibeni nde zola ya kwikama ya Yehowa ke sukaka ve.