“Nge Kele Muntu ya Mfunu Mingi”

1-2. Inki lenda sadisa beto na kubakisa nde beto kele na valere mingi na meso ya Yehowa?

BANSADI ya nkaka ya Yehowa ke yindulaka nde bo kele ve mfunu sambu mbala ya nkaka muntu mosi me sadilaka bo mambu ya mbi kibeni. Kana nge mpi ke yindulaka mutindu yai, nki lenda sadisa nge na kundima nde nge kele mpenza ti valere na meso ya Yehowa?

² Nge lenda tanga masolo ya kele na Biblia ya ke monisa mutindu Yehowa ke zolaka nde bo sadila bantu mambu. Yezu, Mwana ya Nzambi, vandaka kusadila bantu mambu na mawete mpi luzitu. Yo vandaka kumonisa nde yandi ti Tata na yandi ke bakaka na valere mingi bantu yina ke yindulaka nde bo kele ve mfunu. (Yoa. 5:19; Baeb. 1:3) Na disolo yai, beto ta mona: (1) mutindu Yezu sadisaka bantu na kubakisa nde bo kele na valere mingi mpi (2) mambu yina lenda ndimisa beto nde Yehowa ke bakaka beto na valere mingi.​—Agai 2:7.

MUTINDU YEZU SADISAKA BANTU NA KUZABA NDE BO KELE MFUNU MINGI

3. Inki mutindu Yezu sadilaka bantu ya Galilea mambu?

³ Ntangu Yezu vandaka kulonga na Galilea, bantu mingi kwisaka sambu yandi longa bo mpi yandi belula bo. Yezu tubaka nde “bo vandaka kuniokwama mpi kuyungana bonso mameme yina me konda ngungudi.”(Mat. 9:36) Bamfumu ya mabundu vandaka kumona bo bantu-mpamba mpi bo vandaka kubinga bo “bantu ya bo me singaka.” (Yoa. 7:47-49) Kansi Yezu vandaka kusadila bo mambu na mawete mpi luzitu ntangu yandi vandaka kulonga bo mpi kubelula maladi na bo. (Mat. 9:35) Diaka, sambu na kusadisa bantu mingi, yandi pesaka bantumwa na yandi formasio sambu na kulonga nsangu ya mbote mpi yandi pesaka bo kiyeka ya kubelula maladi mpi bifu yina bantu vandaka ti yo na nitu.​—Mat. 10:5-8.

4. Mutindu Yezu vandaka kusadila bantu yina yandi vandaka kulonga mambu ke longa nge nki?

⁴ Mutindu Yezu vandaka kusadila bantu mambu na mawete mpi luzitu, yo monisaka nde yandi ti Tata na yandi ke bakaka bantu ya kukonda mfunu na valere mingi. Kana nge ke yindula nde nge kele ve mfunu mingi na meso ya Yehowa, yindula mutindu Yezu vandaka kusadila bantu yina yandi vandaka kulonga mambu. Yo ta sadisa nge na kubakisa nde nge kele mfunu mingi na meso ya Yehowa.

5. Inki mambu nkento yina Yezu kutanaka ti yandi na Galilea vandaka kukutana ti yo?

⁵ Yezu vandaka kulonga bantu na kimvuka mpi yandi vandaka kutudila konso muntu dikebi. Mu mbandu, ntangu yandi vandaka kulonga na Galilea, yandi kutanaka ti nkento mosi yina vandaka ti maladi ya kubasika menga banda bamvula 12. (Mar. 5:25) Nsiku vandaka kutuba nde muntu ya kele ti maladi yina kele mvindu mpi konso muntu ya ke simba yandi ta kuma mpi mvindu. Yo ke monana nde yandi vandaka mingi-mingi kudivandila. Diaka, yandi vandaka ve ti nswa ya kusambila Yehowa ti bantu ya nkaka na sinagoga mpi yandi vandaka ve kuvukana ti bo na bankinsi ya nkaka. (Levi 15:19, 25) Ntembe kele ve nde nkento yina vandaka kuniokwama na nitu mpi yandi vandaka kudimona mfunu ve.​—Mar. 5:26.

6. Inki nkento yina vandaka kubela maladi ya kubasika menga salaka sambu yandi beluka?

⁶ Nkento yai vandaka kuniokwama ngolo mpi yandi zolaka nde Yezu kubelula yandi. Kansi yandi songaka ve Yezu na pwelele yonso. Sambu na nki? Mbala ya nkaka yandi vandaka kuwa nsoni ya maladi na yandi. To mbala ya nkaka, yandi vandaka kuyindula nde Yezu ta kula yandi sambu maladi na yandi ta kumisa bantu ya nkaka mvindu. Kansi yandi vandaka kundima kibeni nde kana yandi me simba lele ya Yezu, yandi ta beluka. (Mar. 5:27, 28) Lukwikilu na yandi ya ngolo sadisaka yandi na kubeluka. Ntangu Yezu sosaka kuzaba muntu yina simbaka yandi, nkento yina ndimaka nde yandi muntu simbaka Yezu. Inki Yezu salaka?

7. Inki Yezu salaka sambu na kusadisa nkento yina vandaka kuniokwama? (Marko 5:34)

⁷ Yezu sadilaka nkento yina mambu ti mawete mpi luzitu. Yandi monaka nde nkento yina vandaka “kutekita na boma.” (Mar. 5:33) Yo yina, Yezu tubilaka yandi na mawete mpi pesaka yandi kikesa. Nkutu, yandi bingaka nkento yango nde “mwana na mono.” Mutindu Yezu bingaka yandi mpidina, monisaka nde yandi sadilaka nkento yina mambu na luzitu, na mawete mpi ti zola. (Tanga Marko 5:34.) Yai kele kaka mbala mosi mpamba na Biblia ya Yezu ke binga nkento nde “mwana na mono.” Yo ke monana nde yandi sadilaka bangogo yina sambu yandi monaka nde nkento yina vandaka kuwa boma mingi. Ntembe kele ve nde nkento yina waka kiese mingi ntangu Yezu sadilaka yandi mambu na mawete mpi ti zola. Mambu yina Yezu tubaka sadisaka yandi na kudiyangisa ve mingi mutindu yandi simbaka lele ya Yezu mpi kotaka na kimvuka ya bantu. Yezu sukaka kaka ve na kubelula yandi kansi Yezu sadisaka yandi na kubakisa nde Yehowa ke bakaka yandi na valere mingi.

8. Inki mambu ya mpasi mpangi Maria kutanaka ti yo?

⁸ Bubu yai mpi, bansadi ya nkaka ya Yehowa ke niokwamaka mingi sambu na bifu yina bo ke vandaka ti yo na nitu. Mpangi Maria kele mupasudi-nzila ya ntangu yonso na Brésil.a Yandi butukaka kukonda makulu mpi diboko ya kimama. Yandi ke tuba nde: “Banduku na mono ya nzo-nkanda vandaka kupesa mono bazina yina vandaka kupesa mono mpasi mingi kibeni. Nkutu, bantangu ya nkaka bantu ya dibuta na mono vandaka kusadila mono mambu ya mbi mpi bo vandaka kumona nde mono kele ve mfunu.”

9. Inki sadisaka mpangi Maria na kubakisa nde yandi kele mfunu mingi na meso ya Yehowa?

⁹ Inki sadisaka mpangi Maria? Ntangu yandi kumaka Mbangi ya Yehowa, bampangi pesaka yandi kikesa mpi bo sadisaka yandi na kuditadila mutindu Yehowa ke tadilaka yandi. Yandi ke tuba nde: “Mono ta kuka ve kutanga bazina ya bampangi yonso yina me sadisaka mono. Mono ke pesaka Yehowa mersi mingi mutindu yandi me pesaka mono bampangi na dibundu.” Bampangi sadisaka mpangi Maria na kubakisa nde yandi kele mfunu mingi na meso ya Yehowa.

10. Inki vandaka kuyangisa Maria ya Magdala? (Tala mpi bifwanisu.)

¹⁰ Beto tala mutindu Yezu sadisaka Maria ya Magdala. Yandi vandaka ti bademo 7 na kati na yandi. (Luka 8:2) Mutindu yandi vandaka ti bademo, yo ke monana nde yandi vandaka kusala mambu yina vandaka kuyitukisa bantu ya nkaka. Yo yina bantu vandaka kutina yandi. Yo salaka nde yandi kudiwa yandi mosi, yandi vanda ve na lutaninu mpi kukonda muntu ya kusadisa yandi. Yo ke monana nde Yezu basisaka bademo yina vandaka kuyangisa yandi mpi yandi kumaka longoki ya Yezu. Inki diaka Yezu salaka sambu na kusadisa Maria ya Magdala na kubakisa nde yandi kele mfunu mingi na meso ya Yehowa?

11. Inki mutindu Yezu monisaka Maria ya Magdala nde yandi kele mfunu mingi na meso ya Yehowa? (Tala mpi bifwanisu.)

¹¹ Yezu lombaka Maria ya Magdala na kukwenda ti bo na kisalu ya kulonga nsangu ya mbote.b Yo sadisaka Maria ya Magdala na kuwa mutindu Yezu vandaka kulonga bantu. Ntangu Yezu futumukaka, yandi monikaka ntete na Maria ya Magdala mpi yandi vandaka muntu ya ntete yina Yezu solulaka ti yandi. Yezu pesaka Maria ya Magdala mukumba ya kusonga bantumwa na yandi nde yandi me futumuka. Yo monisaka nde Yezu sadisaka Maria ya Magdala na kubakisa nde yandi kele mfunu mingi na meso ya Yehowa.​—Yoa. 20:11-18.

12. Inki pusaka mpangi Lidia na kuyindula nde ata muntu mosi ve lenda zola yandi?

¹² Bonso Maria ya Magdala, bampangi mingi bubu yai ke kudiwaka bo mosi mpi kukonda muntu ya kusadisa bo. Mpangi Lidia ke zingaka na Espagne. Yandi ke tuba nde: “Ntangu mama vandaka ti divumu na mono, yandi vandaka ti mfunu ya kubasisa yo.” Ntangu mpangi Lidia vandaka mwana-fioti, mama na yandi vandaka kutudila yandi ve dikebi mpi yandi vandaka kutubila mpangi Lidia mambu ya mbi. Mpangi Lidia ke tuba diaka nde: “Mama vandaka ve kuzola mono, yo yina mono vandaka kuzola nde bantu ya nkaka kuzola mono mpi kukuma banduku na mono. Kansi mono vandaka kuyindula nde ata mono me sala nki mutindu, bantu ta zola mono ve sambu mama vandaka kusonga mono nde mono kele muntu ya mbi.”

13. Inki sadisaka mpangi Lidia na kubakisa nde yandi kele mfunu mingi na meso ya Yehowa?

¹³ Ntangu mpangi Lidia zabaka kieleka, kisambu, kulonguka na yandi mosi, bangogo ya mbote yina bampangi-Bakristu vandaka kusonga yandi mpi mambu ya mbote yina bo vandaka kusadila yandi, sadisaka yandi na kuzaba nde yandi kele mfunu mingi na meso ya Yehowa. Yandi ke tuba nde: “Mbala mingi, bakala na mono ke songaka mono nde yandi ke zolaka mono. Yandi ke songaka mono mpi nde mono ke vandaka ti bikalulu ya mbote. Banduku na mono ya nkaka ke songaka mono mpi mutindu mosi.” Nge lenda yindula mpangi mosi na dibundu na beno, yina kele ti mfunu nde nge sadisa yandi na kubakisa nde yandi kele mfunu mingi na meso ya Yehowa. Nge lenda sala yo kana nge ke tubila yandi na mawete mpi ke sadila yandi mambu ya mbote.

KUDITADILA MUTINDU YEHOWA KE TADILAKA NGE

14. Inki mutindu 1 Samuele 16:7 ke sadisa beto na kubakisa mutindu Yehowa ke tadilaka bantu? (Tala mpi lupangu “Sambu na Nki Yehowa Ke Bakaka Bansadi na Yandi na Valere Mingi?”)

¹⁴ Kuvila ve nde Yehowa ke tadilaka nge ve mutindu bantu ke tadilaka nge. (Tanga 1 Samuele 16:7.) Yehowa ke bakaka beto ve na valere sambu na kitoko na beto, bimvwama na beto to sambu na banzo-nkanda yina beto me salaka. (Yez. 55:8, 9) Yo yina, kuditadila mutindu Yehowa ke tadilaka nge kansi ve mutindu bantu ya nsi-ntoto yai ke tadilaka nge. Biblia ke tubila bambandu ya bantu yina vandaka kudimona kukonda mfunu kansi Yehowa sadisaka bo. Mu mbandu Eliya, Naomi mpi Ana. Ntangu nge ke tanga masolo na bo, tula dikebi na mambu yina ke monisa nde Yehowa vandaka kuzola bo mingi. Nge lenda sonika mpi mambu yina ke ndimisaka nge nde Yehowa ke zolaka nge mpi ke bakaka nge na valere. Diaka, nge lenda tanga mpi masolo ya bantu yina vandaka kudimona kukonda mfunu. Masolo yango kele na mikanda na beto.c

15. Sambu na nki Daniele vandaka muntu ya “mfunu mingi” na meso ya Yehowa? (Daniele 9:23)

¹⁵ Zaba nde nge kele mfunu mingi na meso ya Yehowa sambu nge ke kangamaka kaka na yandi. Yo ke monana nde ntangu Daniele kumaka ti bamvula 90 ti ndambu, yandi ‘lembaka mingi.’ (Dan. 9:20, 21) Inki mutindu Yehowa pesaka yandi kikesa? Yehowa tindaka wanzio Gabriele na kundimisa Daniele nde yandi kele “muntu ya mfunu mingi” mpi nde Yehowa waka bisambu na yandi. (Tanga Daniele 9:23.) Sambu na nki Daniele vandaka mfunu mingi na meso ya Yehowa? Sambu Daniele vandaka muntu ya mbote mpi ya kwikama. (Ezek. 14:14) Yehowa salaka nde bo sonika disolo ya Daniele na Biblia sambu yo sadisa beto. (Bar. 15:4) Yehowa ke waka bisambu na nge mpi ke bakaka nge na valere sambu nge ke zolaka mambu ya mbote mpi nge ke sadilaka yandi mbote.​—Mika 6:8, banoti na nsi ya lutiti; Baeb. 6:10.

16. Inki lenda sadisa nge na kundima nde Yehowa kele Tata ya ke zolaka nge?

¹⁶ Zaba nde Yehowa kele Tata yina ke zolaka nge. Yandi ke zolaka kusadisa nge, kansi yandi ke tulaka ve dikebi kaka na bifu na nge. (Nk. 130:3; Mat. 7:11; Luka 12:6, 7) Kuzaba mambu yai ke sadisaka bampangi mingi yina ke kudimonaka kukonda mfunu. Mu mbandu, bakala ya mpangi Michelle na Espagne ke tubilaka yandi mambu ya mbi mpi ya nku banda bamvula mingi. Yo ke salaka nde mpangi Michelle kudiwa yandi mosi mpi kukonda mfunu. Yandi ke tuba nde: “Ntangu mono ke kudimonaka kukonda mfunu, mono ke monaka na mabanza Yehowa me baka mono na maboko na yandi na zola yonso mpi ke tanina mono.” (Nk. 28:9) Mpangi-nkento Lauren na Afrique du Sud ke tuba nde: “Kima ya ke ndimisaka mono nde Yehowa ke bakaka mono na valere kele mutindu yandi me bendaka mono na lweka na yandi, ke sadisaka mono na kubikala pene-pene na yandi mpi ke sadilaka mono sambu na kulonga bantu ya nkaka.”​—Yoa. 6:44.

17. Inki lenda sadisa nge na kuzaba nde Yehowa ke sepelaka ti nge? (Nkunga 5:12) (Tala mpi kifwanisu.)

¹⁷ Zaba nde Yehowa ke sepelaka ti nge. (Tanga Nkunga 5:12.) Davidi tubaka nde kana Yehowa ke sepela ti muntu, yo kele ‘lutaninu ya ngolo’ sambu na muntu yina. Kana nge ke ndima kibeni nde Yehowa ke sepelaka ti nge mpi ke sadisaka nge, yo ta sadisa nge na kundima nde nge kele muntu ya mbote na meso na yandi. Inki mutindu nge lenda zaba kana Yehowa ke sepelaka ti nge? Mutindu beto me mona yo, Yehowa ke ndimisa nge na Ndinga na yandi Biblia nde yandi ke zolaka nge. Diaka, yandi ke sadilaka bankuluntu mpi banduku na nge na dibundu sambu na kuyibusa nge nde nge kele mfunu mingi na meso na yandi. Inki nge fwete sala ntangu bo ke sadisa nge?

18. Sambu na nki nge fwete ndima bikalulu na nge ya mbote ntangu bantu ya nkaka ke songa nge yo?

¹⁸ Ntangu bantu yina me zaba nge mbote ke sikisa nge, kuyindula ve nde bo ke seka nge. Zaba nde mbala ya nkaka, Yehowa ke sadila bo sambu na kusadisa nge na kubakisa nde nge kele mfunu mingi na meso na yandi. Mpangi Michelle yina beto me tubila ke tuba nde: “Yo ke vandilaka mono mpasi na kundima bikalulu na mono ya mbote ntangu bantu ya nkaka ke songa mono yo. Kansi mono me zaba nde yo kele mambu ya Yehowa ke zolaka nde mono zaba mpi mono ndima.” Bankuluntu ke sadisaka mpangi Michelle na kundima kibeni nde Yehowa ke zolaka yandi mingi. Bubu yai, yandi kele mupasudi-nzila mpi yandi ke sadisaka Betele na kintama.

19. Sambu na nki nge fwete ndima nde nge kele mfunu mingi na meso ya Yehowa?

¹⁹ Yezu ke yibusaka beto nde beto kele mfunu mingi na meso ya Tata na beto ya zulu. (Luka 12:24) Yo yina, beto fwete ndima kibeni nde Yehowa ke bakaka beto na valere. Beto fwete vila yo ve ata fioti. Diaka, beto fwete sala yonso sambu na kusadisa bantu ya nkaka na kubakisa nde bo kele mfunu mingi na meso ya Yehowa.