Yedisa Kikalulu ya Kukuma na Ntangu ya Mbote
1. Inki mbandu Yehowa ke pesaka na yina me tala kusala mambu na ntangu ya mbote?
1 Ntangu yonso Yehowa ke salaka mambu na ntangu ya mbote. Mu mbandu, yandi ke sadisaka bansadi na yandi na ntangu ya mbote. (Baeb. 4:16) Yandi ke pesaka mpi madia na “ntangu ya me fwana.” (Mat. 24:45) Yo yina, beto lenda tula ntima nde kilumbu ya makasi na yandi “ta bwa ve na nima ya ntangu.” (Hab. 2:3, NW) Beto ke bakaka kibeni mambote ya Yehowa na mutindu yandi ke salaka mambu na ntangu ya mbote! (Nk. 70:6) Sambu bantu ya kukonda kukuka ke vandaka ti mambu mingi ya kusala, yo lenda vanda mpasi sambu beto sala mambu na ntangu ya mbote. Sambu na nki beto fwete yedisa kikalulu ya kukuma na ntangu ya mbote?
2. Sambu na nki kukuma na ntangu ya mbote ke pesaka Yehowa lukumu?
2 Kukuma na ntangu ya mbote kele mpasi mingi na bilumbu yai ya nsuka sambu bantu mingi ke kudizolaka mpi ke kudiyalaka ve. (2 Tim. 3:1-3) Yo yina, ntangu bantu ya nkaka ke monaka Bakristu ke kuma na ntangu ya mbote na kisalu, na lukutakanu ya bo wakanaka mpi na balukutakanu ya dibundu, yo ke pesaka Yehowa lukumu. (1 Pie. 2:12) Keti beto ke yantikaka ntangu yonso kisalu na beto ya kinsuni na ntangu ya mbote, kansi beto ke vandaka mbala mingi na retare na balukutakanu ya dibundu? Kana beto ke kuma na ntangu ya mbote na balukutakanu ya Bukristu disongidila kuyimba nkunga mpi kulanda kisambu ya luyantiku yo ke monisaka mpusa na beto ya kulanda mbandu ya Tata na beto ya zulu yina ke salaka mambu na ndonga.—1 Bak. 14:33, 40.
3. Sambu na nki kukuma na ntangu ya mbote ke monisaka nde beto ke zitisaka bampangi ya nkaka?
3 Kukuma na ntangu ya mbote ke monisaka mpi nde beto ke zitisa bampangi ya nkaka. (Bafi. 2:3, 4) Kana beto ke kuma na ntangu ya mbote na balukutakanu, mu mbandu na balukutakanu ya kisalu ya bilanga, beto ta vwalangasa ve dikebi ya bampangi na beto. Kansi, kana beto ke kuma ntangu yonso na retare, yo ta pesa bantu ya nkaka ngindu ya kumona nde ntangu na beto kele mfunu mingi kuluta ya bo. Kukuma na ntangu ya mbote ke monisaka nde beto kele bantu ya kwikama mpi ya kutudila ntima, bikalulu yina bantu ya nziunga na beto ke sepelaka na yo.
4. Inki beto fwete sala kana beto ke kumaka mbala mingi na retare?
4 Kana nge ke kumaka mbala mingi na retare, sosa kuzaba sambu na nki. Yidika manaka ya mbote yina ta sadisa nge na kulungisa mikumba na nge na ntangu ya me fwana. (Lo. 3:1; Bafi. 1:10) Lomba lusadisu na Yehowa. (1 Yoa. 5:14) Kukuma na ntangu ya mbote kele mutindu ya kumonisa ntonda na Bansiku zole ya kuluta nene: Zola ya Nzambi mpi zola ya nkweno.—Mat. 22:37-39.