Landa na Kuyela​—Kwenda na Ntwala

NTANGU nge yantikaka kusadila minsiku ya Biblia, mutindu na nge ya kuyindula, ya kutuba, mpi bikalulu ya kukotilaka nge mingi kuyantikaka kusoba malembemalembe. Nge salaka yo na ntwala nde nge sonikisa na Nzo-Nkanda ya Kisalu ya Teokrasi. Ntangu yai, mbala yankaka nge meyelaka mpi mepesaka luzingu na nge na Yehowa. Keti yo ketendula nde nge fwete yambula na kuyela? Ata fyoti ve. Mbotika na nge kele kaka luyantiku.

Longoki Timoteo vandaka kusala dezia bonso nkuluntu ntangu Polo kusongaka yandi na “kuyindulula” (NW) ndongisila mpi mabaku ya kisalu yina bo pesaka yandi, na “kudipesa mvimba” na mambu yai, na mpila nde ‘bantu yonso kumona nde bisalu na yandi ke kwenda na ntwala.’ (1 Tim. 4:12-15) Yo vanda nge meyantika ntama mingi ve na kulanda nzila ya kyeleka to nge kele ti eksperiansi mingi na luzingu ya Bukristu, nge fwete sala ngolo na kukwenda na ntwala.

Nzayilu mpi Kubalula Ntima

Na Efezo 3:14-19 (NW), beto ketanga nde ntumwa Polo kusambaka nde bampangi na yandi Bakristu “kukuka kubakisa mbotembote na mabanza . . . nene mpi nda mpi zulu mpi mudindu” ya kyeleka. Sambu na kulungisa lukanu yina, Yezu kupesaka makabu ya bantu sambu na kulonga, kusungika, mpi kutunga dibundu. Kuyindulula mbala na mbala mambu yina kele na Ndinga ya kupemama ya Nzambi, kumosi ti lutwadisu ya kekatuka na balongi ya kele na eksperiansi mingi, lenda sadisa beto na ‘kukuma bambuta’ na kimpeve.​—Ef. 4:11-15.

Kuyela yina kelomba kukumisa ‘ntima na beto ti mabanza na beto ya mpa.’ Yo kelomba kukuma ti mabanza ya ngolo ya kewakana ti yina ya Nzambi mpi ya Kristu. Beto fwete sosa kubakisa ntangu yonso mabanza na bo, sambu beto “lwata bikalulu ya mpa.” (Ef. 4:23, 24) Ntangu nge kelongukaka ba Evanzile, keti nge kemonaka masolo yai ya luzingu ya Kristu bonso mbandu ya nge fwete landa? Keti nge kesosaka kuzaba bikalulu ya sikisiki yina Yezu kumonisaka mpi na nima nge sala kikesa ya kyeleka sambu na kumonisa yo na luzingu na nge?​—1 Pie. 2:21.

Mambu ya nge ketubila na masolo na nge lenda vanda kidimbu ya kesonga kiteso yina nge mekwendaka na ntwala. Bantu yina melwataka bikalulu ya mpa ketubaka ve mambu ya kukonda masonga, ya kupola, ya nsoni, to ya mbi. Kansi, bo ketubaka “mambu ya mfunu yina lenda sadisa bantu yina ke wa [bo].” (Ef. 4:25, 26, 29, 31; 5:3, 4; Yude 16) Bamvutu mpi mambu ya bo ketubaka, yo vanda na kinsweki to na balukutakanu ya dibundu, kemonisaka nde kyeleka kele na kubalula luzingu na bo.

Kana ‘malongi ya bantu ya luvunu yina ke kusaka bantu ya nkaka na mayele na bo, kebenda nge ve mutindu mupepe ke nataka bima ndambu na ndambu,’ yo kesonga mpi nde nge kekwenda na ntwala. (Ef. 4:14) Mu mbandu, inki nge kesalaka kana inza kefulusa ntu na nge ti bangindu, balukanu, to mutindu ya kusakana ya mpa? Keti nge kemekaka kukatula ntangu na bisalu ya kimpeve sambu na kusala mambu yai? Kusala mutindu yai lenda kangisa nge na kuyela na kimpeve. Yo yina, yo kele mayele mingi na kusumba ntangu sambu na kusala bisalu ya kimpeve!​—Ef. 5:15, 16.

Mutindu nge kezinga ti bantu yankaka lenda vanda mpi kidimbu ya kesonga kuyela na nge ya kimpeve. Keti nge melongukaka na ‘kuwila bampangi na nge mawa, mpi kulolula’ bo?​—Ef. 4:32.

Kuyela ya nge kemonisa na kusala mambu bonso Yehowa fwete monana na dibundu mpi na nzo. Yo fwete monana mpi na nzo-nkanda, na bisika ya bantu mingi, mpi na kisika ya kisalu na nge ya kinsuni. (Ef. 5:21–6:9) Kana nge kemonisa bikalulu ya Nzambi na mutindu mosi ya kulunga na bisika yai yonso, beto lenda tuba nde kuyela na nge ke na kumonana.

Sadila Dikabu na Nge

Yehowa mepesaka konso muntu na kati na beto ngolo mpi mayele ya kusadila bisalu. Yandi kevingila nde beto sadila yo sambu na mambote ya bankaka, na mpila nde, na nzila na beto, yandi lenda monisa mambote na yandi ya beto mefwana ve na kubaka. Sambu na mambote yai, ntumwa Piere kusonikaka nde: “Mbote konso muntu na kati na beno kusadila mbote-mbote makabu yina ya Nzambi me pesaka yandi; makabu yina ya yandi bakaka kaka yandi mosi na Nzambi, yandi fweti sadila yo sambu na kusadisa bantu ya nkaka.” (1 Pie. 4:10) Inki mutindu nge kelungisa mukumba na nge ya kusadisa bankaka?

Piere kelanda na kutuba nde: “Muntu yina ke longaka, yandi fweti longa mambu yina ya Nzambi tubaka.” (1 Pie. 4:11) Verse yai kenyata mukumba ya kutuba mambu yina kewakana mpenza ti Ndinga ya Nzambi, na mpila nde Nzambi kubaka lukumu. Mutindu ya beto ketuba fwete pesa mpi Yehowa lukumu. Formasio ya bo kepesaka na Nzo-Nkanda ya Kisalu ya Teokrasi lenda sadisa nge na kusadila dikabu na nge na mutindu yai: kupesa Nzambi lukumu na mutindu nge kesadisa bantu yankaka. Ti lukanu yai na ntu, inki mutindu nge fwete tesa kuyela na nge na nzo-nkanda?

Na kisika ya kusala yo na kutangaka bikalulu yina nge mesala dezia na lutiti na nge ya bandongisila to na mitindu ya badevware yina bo pesaka nge, yindula kiteso formasio yango metomisa kimenga na nge ya lukumu. Nzo-nkanda kebongisaka beto na kusala mbote kisalu ya bilanga. Yo yina, kudiyula nde: ‘Keti mu kebongisaka kibeni mambu ya mu tatuba na kisalu ya bilanga? Keti mu melongukaka na kutudila bantu yina mu tatela kimbangi dikebi? Keti mu ketulaka fondasio sambu na mvutukila ya mpa na kubikisilaka bantu ngyufula mosi sambu beto tatadila yo na mbala ya nima? Kana mu kelonguka Biblia ti muntu, keti mu kesalaka ngolo na kukuma longi yina mezaba kusimba ntima?’

Kutesaka ve kuyela na nge na mabaku ya kisalu yina bo kepesa nge. Kukwenda na nge na ntwala kemonanaka ve na mukumba ya bo mepesa nge, kansi na mutindu nge kelungisa yo. Kana bo mepesa nge mukumba ya kulonga, kudiyula mutindu yai: ‘Keti mu sadilaka kibeni mayele ya kulongila? Keti mutindu ya mu longaka malongi yango kupusaka bantu yina kuwaka yo na kubalula luzingu na bo?’

Ndongisila ya kusadila dikabu na nge kelomba nde nge sadila mayele na nge. Keti nge kelombaka na kusala ti bantu yankaka na kisalu ya bilanga? Keti nge kesosaka mabaku ya kusadisa bantu ya mpa, baleke, to bantu ya maladi ya dibundu na beno? Keti nge kemonisaka luzolo ya mbote ya kukombula Nzo ya Kimfumu to kupesa lusadisu na bisalu ya mutindu na mutindu na balukutakanu ya distrike mpi ya nene? Keti bantangu yankaka nge lenda lomba kisalu ya mupasudi-nzila nsadisi? Keti nge lenda kuka kusala bonso mupasudi-nzila ya ntangu yonso to kukwenda kusadisa dibundu mosi kisika mpusa kele mingi? Kana nge kele mpangi ya bakala, keti nge kesala ngolo na kulungisa mambu yina Masonuku kelombaka sambu na bansadi ya kisalu mpi bankuluntu? Luzolo na nge ya kupesa lusadisu mpi ya kundima mikumba kele kidimbu yina kemonisa nde nge kekwenda na ntwala.​—Nk. 110:3.

Kisalu Yina Eksperiansi Kesalaka

Kana nge kemona nde nge lenda kuka ve kusala mambu yankaka sambu nge mekonda eksperiansi na luzingu ya Bukristu, kulemba nitu ve. Ndinga ya Nzambi lenda pesa “mayele na bantu yina ke na mayele ve.” (Nk. 19:8; 119:130; Bing. 1:1-4) Kusadila bandongisila ya Biblia kepesaka beto nzila ya kubaka mambote ya mayele ya kukuka ya Yehowa, yina kele na mfunu mingi kuluta bima yonso ya beto lenda longuka na nzila ya eksperiansi mpamba. Kansi, na ntangu beto kekwenda na ntwala na kisalu ya beto kesadilaka Yehowa, beto kebaka eksperiansi yina kele mfunu mingi. Inki mutindu beto lenda sadila yo sambu yo natila beto mambote?

Mutindu yandi kekutanaka ti mambu ya mutindu na mutindu na luzingu, muntu lenda meka kuyindula mutindu yai: ‘Mu mekutanaka dezia ti dikambu ya mutindu yai. Mu mezaba kima ya mu fwete sala.’ Keti kuyindula mpidina kele mayele? Bingana 3:7 kekebisa beto nde: “Kudiyindula ve nde nge kele mayele.” Eksperiansi fwete kangula mpenza mabanza na beto ya mambu yina beto fwete tadila ntangu beto keyidika mambu na luzingu. Kansi kana beto keyela na kimpeve, eksperiansi na beto fwete sadisa mpi mabanza ti ntima na beto na kubakisa mfunu ya lusakumunu ya Yehowa sambu na kununga. Beto tamonisa nde beto kekwenda na ntwala kana beto kekuditudila ve ntima na kuyidika mambu ya beto kekutana na yo, kansi kana beto kekwenda na Yehowa sambu yandi sadisa beto na kutwadisa luzingu na beto. Beto kemonisaka yo kana beto ketula ntima nde kima mosi ve lenda salama kukonda nswa na yandi mpi kana beto kelunda bangwisana ya kufuluka ti kutula ntima mpi zola na Tata na beto ya zulu.

Sosa Kukuma na Mambu Yina Kele na Ntwala

Ata ntumwa Polo kuvandaka Mukristu ya kupakulama mpi ya kuyela na kimpeve, yandi ndimaka nde yandi vandaka na mfunu ya “kusosa mpila ya kukuma na mambu yina kele na ntwala,” sambu na kubaka matabisi ya luzingu. (Filp. 3:13-16) Keti nge mpi kele ti ngindu ya mutindu mosi?

Inki kiteso nge meyelaka? Sambu na kutesa kuyela na nge, tala kiteso yina nge melwataka kimuntu ya mpa, kiteso yina nge kelemfukilaka kimfumu ya Yehowa, mpi kesadilaka makabu na nge sambu na kupesa Yandi lukumu. Mutindu nge kebaka mambote na Nzo-Nkanda ya Kisalu ya Teokrasi, bikalulu yina kele na Ndinga ya Nzambi fwete yantika kumonana pwelele na mutindu na nge ya kutuba mpi ya kulonga. Tudila mambu yai ya ketadila kuyela na nge dikebi. Ya kyeleka, sepila na yo, mpi yo tamonana kukonda mpasi nde nge kekwenda na ntwala.