Bangogo ya Nsuka ya Mefwana

YO LENDA vanda nde nge sosa-sosaka mambu mingi na mikanda mpi nge yidikaka malongi ya disolo na nge na dikebi yonso. Yo lenda vanda mpi nde nge yidikaka bangogo ya luyantiku yina tatedimisa mpusa ya bawi. Kansi, nge kele dyaka na mfunu ya kima mosi: bangogo ya nsuka ya mefwana. Kumona yo ve mpamba. Mambu ya nge ketuba na nsuka kezingaka mingi na mabanza ya bawi. Kana bangogo na nge ya nsuka kusimba ve ntima ya bawi na nge, ata mambu yina nge tubaka ntete lenda vanda dyaka ve na mfunu.

Tadila mambu ya melanda: Penepene na nsuka ya luzingu na yandi, Yozue kusalaka diskure mosi yina bantu mevilaka ve na ntwala ya bambuta-bantu ya dikanda ya Izraele. Na nima ya kutubila mambu yina Yehowa kusalaka sambu na bantu ya Izraele banda na ntangu ya Abrahami, keti Yozue kuvutukilaka kaka mambu ya mfunu na bunkufi? Ve. Kansi, yandi syamisaka bantu na kikesa yonso nde: “Beno zitisa Mfumu Nzambi, beno sadila yandi na ntima mosi ya mbote. Beno lemfuka na yandi.” Tanga nge mosi bangogo ya nsuka ya Yozue na Yozue 24:14, 15.

Diskure yankaka ya bantu mevilaka ve, ya kele na Bisalu 2:​14-36, kele yina ntumwa Piere kusalaka na ntwala ya kibuka mosi ya bantu na Yeruzalemi na Nkinsi ya Pantekoti ya mvu 33 ya T.B. Ntete, yandi tendulaka nde bo vandaka kuta kimbangi sambu na kulungisa mbikudulu ya Yoele yina ketubila mpeve yina Nzambi zolaka kupesa bo. Na nima, yandi monisaka mutindu dyambu yai vandaka kuwakana ti bambikudulu yina kutadilaka Mesia yina kele na mukanda ya Bankunga yina kutubilaka na ntwala lufutumuku ya Yezu Kristu mpi mutindu Nzambi kutulaka yandi na diboko ya kitata. Ebuna, sambu na kusukisa, Piere kutubilaka dyambu ya mpasi yina konso muntu na kati ya bawi na yandi zolaka kukutana na yo. Yandi tubaka nde: “Bantu yonso ya Israele fweti zaba mambu yai mbote-mbote: Yesu yina ya beno tulaka na zulu ya [nti, NW], Nzambi me solaka yandi na kuvanda Mfumu mpi Mesia.” Bantu yina kuvandaka pana kuyufulaka nde: “Bampangi, nki beto fweti sala?” Piere kuvutulaka nde: “Konso muntu na kati na beno kubalula ntima, yandi kubaka mbotika na zina ya Yesu Kristo.” (Bis. 2:37, 38) Na kilumbu yina, mambu yina yandi tubaka kusimbaka ntima ya bantu kiteso ya 3 000 yina vandaka kuwa yandi, ebuna bo yambaka kyeleka yina metala Yezu Kristu.

Mambu ya Nge Fwete Vila Ve. Mambu yina nge ketuba na nsuka fwete wakana mbala mosi ti ntu-dyambu ya disolo na nge. Yo fwete vanda mutindu ya mbote ya kusukisa bangindu ya mfunu ya nge vandaka kutuba. Ata nge lenda sadila bangogo ya mfunu ya ntu-dyambu na nge na bangogo na nge ya nsuka, nge lenda tuba yo mutindu yo kele ya kusonika to ve, yo metala kaka nge mosi.

Mbala mingi, na ntangu nge ketuba, lukanu na nge kele ya kusyamisa bantu na kusadila mambu yina nge ketuba. Mosi na kati ya balukanu ya mfunu ya bangogo ya nsuka kele ya kumonisa bo mambu ya bo fwete sala. Ntangu nge ponaka ntu-dyambu na nge ti bangindu ya mfunu, keti nge yindulaka mbotembote bikuma yina kesala nde bangindu yina tavanda mfunu na bawi na nge mpi nki tavanda lukanu ya kutubila yo? Kana nge salaka mpidina, nge mezaba mambu ya nge kezola nde bawi kusala. Ntangu yai nge fwete songa bo mambu yango mpi ntangu yankaka mutindu ya bo fwete sala yo.

Katula kusonga bawi na nge mambu ya bo fwete sala, bangogo na nge ya nsuka fwete pesa bo mpi kikuma ya kusala yo. Bangogo yango fwete vanda ti bikuma ya kyeleka ya kupusa bo na kusadila mambu yango mpi ntangu yankaka mambote yina bo lenda baka na kusala yo. Kana nge yidika mbote nsa ya nsuka mpi nge sadila bangogo ya mbote, yo tasadisa bawi na kuyibuka disolo na nge ya mvimba.

Kuvila ve nde disolo na nge mekuma na nsuka. Mambu yina nge ketuba fwete monisa yo. Vitesi na nge fwete vanda mpi ya kufwana. Kutuba ve ntinu-ntinu kaka sambu nge manisa mpi nge sukisa yo na mbala mosi. Ata nge mekuma na nsuka, kulembisa ve ndinga na nge. Volime na nge fwete vanda ya kufwana kansi kulutisa ve ndilu. Bansa na nge ya nsuka fwete monisa nde nge mekuma na nsuka. Mutindu ya kutuba yo fwete pesa kikesa mpi kundimisa bawi. Ntangu nge keyidika mutindu nge tasala disolo na nge, kuvila ve na kumeka kutuba mbala mingi mutindu nge tasukisa yo.

Bangogo ya nsuka fwete vanda nda nki kiteso? Yo kele ve kima mosi ya nge fwete tudila ntangu ya yo tabaka. Bangogo ya nsuka fwete vanda ve nda mingi. Bangogo ya nsuka tamonisa nde yo kele na nda ya kufwana kana yo mesimba ntima ya bawi. Bangogo ya nsuka ya nkufi, ya kemonisa mambu pwelele, mpi ya mbote kesepedisaka ntangu yonso bantu. Bangogo ya nsuka yina kesuka na mbandu mosi ya nkufi lenda vanda mpi mbote kana nge yidikaka yo na dikebi yonso. Fwanisa bangogo ya nsuka ya nkufi ya mukanda ya Longi ya mvimba, yina kele na Longi 12:13, 14, ti bangogo ya nsuka ya nkufi mpenza ya Disolo na Zulu Ngumba, yina kele na Matayo 7:24-27.

Na Kisalu ya Bilanga. Kele ve na kisika yankaka ya nge tavanda na mfunu ya kuyidika bangogo ya nsuka kuluta na kisalu ya bilanga. Kana nge kekudibongisa mbote mpi nge ketudila bawi na nge dikebi ya zola, nge takuka kusukisa disolo na nge na mutindu mosi ya mbote. Nge lenda sadila bandongisila yina bo mepesa na balutiti yina meluta na mutindu mosi ya mbote ata ntangu nge kesolula ti muntu mosi.

Disolo lenda vanda ya nkufi kibeni sambu muntu ya nge kesolula na yandi kele na kisalu mingi. Disolo na nge ya mvimba lenda baka munuta mosi mpamba. Kana mpila kele, nge lenda tuba dyambu bonso yai: “Mu kebakisa nde nge kele ti kisalu mingi. Kansi na ntwala ya kukwenda, bika mu zabisa nge dibanza mosi yina tapesa nge kikesa. Biblia kemonisa nde Ngangi na beto kele na lukanu mosi ya kitoko, lukanu yango kele ya kukumisa ntoto yai kisika yina bantu lenda zinga kimakulu. Beto lenda vanda na kati ya Paladisu yina, kansi beto fwete zaba ntete mambu yina Nzambi kelombaka beto.” To nge lenda zabisa yandi kaka nde nge takwisa kutala yandi dyaka na ntangu yandi tavanda ve ti kisalu.

Kana disolo na beno mezengana sambu muntu yango kele na makasi to yandi ketubila nge kukonda luzitu, nge lenda sala dyaka mambu mingi ya mbote. Kuvila ve bandongisila yina kele na Matayo 10:12, 13 mpi na Roma 12:17, 18. Mbala yankaka mvutu na nge ya luzitu lenda soba mutindu na yandi ya kutadila Bambangi ya Yehowa. Yo tavanda dyambu mosi ya mbote.

Kansi, mbala yankaka nge solulaka mbote ti muntu mosi. Sambu na nki ve kuvutukila dibanza ya mfunu ya nge kezola nde yandi simba? Yika mpi bangogo yina lenda pusa yandi na kusadila dibanza yango.

Kana mpila ya kulanda disolo na beno na kilumbu yankaka kele, zabisa yandi sambu na nki yo tavanda mbote nde yandi kinga nge na mpusa yonso kilumbu yina. Yula yandi ngyufula mosi, mbala yankaka mosi na kati ya bangyufula yina kele na mukanda Comment raisonner à partir des Écritures to na mukanda mosi ya beto kesadilaka sambu na kulonguka Biblia ti bantu. Kuvila ve lukanu na nge, mutindu Yezu kumonisaka yo mpi mutindu bo mesonika yo na Matayo 28:19, 20.

Keti nge mekuma na nsuka ya kulonguka ya Biblia ti muntu mosi? Kuvutukila ntu-dyambu ya disolo tasadisa longoki na kuyibuka mambu ya beno mekatuka kulonguka. Sadila bangyufula ya mvutukilu sambu na kusadisa longoki na kukotisa bangindu ya mfunu na mabanza na yandi, mingimingi kana mvutukilu yango mesalama ve ntinu-ntinu. Kuyula ngyufula mosi yina ketala mutindu longoki lenda baka mambote ya malongi ya beno melonguka to mutindu yandi lenda zabisa yo na bantu yankaka lenda sadisa yandi na kuyindula mitindu ya mbote ya kusadila mambu ya yandi melonguka.​—Bing. 4:7.

Kuvila ve dyambu yai: bangogo na nge ya nsuka kele mfunu mingi sambu bantu kusimba mambu ya nge metuba na disolo na nge ya mvimba.