Beto Mekatukaka na Wapi?

SAMBU NA NKI YO KELE MFUNU NA KUZWA MVUTU NA NGYUFULA YAI? Bo melongaka bantu mingi nde luzingu na ntoto kudibasikilaka. Bo mezabisaka bo nde muntu, disongidila mabanza na yandi, mayele na yandi, mpi mpusa yina yandi kevandaka na yo ya kuzaba ntendula ya luzingu, mekatukaka na kamwa kima mosi ya vandaka kubaluka malembemalembe mpi kuyelaka tii na kukuma muntu.

Kansi, beto tadila ngindu yai: Kana ya kyeleka beto kudibasikilaka mpi nde Ngangi kele ve, beto yonso na ntoto ya mvimba zolaka kuvanda bana-nsiona. Beto yonso zolaka kuvanda ve ti muntu ya kuluta mayele yina beto lendaka kulomba ndongisila mpi yina lendaka kusadisa beto na kumanisa makambu na beto. Yo zolaka kulomba nde beto tula ntima kaka na mayele ya bantu sambu na kusala na mpila nde bisumbula, mavwanga ya politiki mpi bampasi kubwila beto ve.

Keti ngindu yai kepesa nge ngemba ya mabanza? Kana yo kele ve mpidina, beto tadila ngindu yankaka yina kesepedisa beto mpi kemonana mbote kuluta.

Mambu Yina Biblia Ketuba

Biblia kelonga nde Nzambi muntu kugangaka bantu. Beto kudibasikilaka ve, kansi beto kele bana ya Tata mosi ya zola mpi ya mayele. Tala mambu yai ya pwelele ya Biblia ketuba.

Kuyantika 1:27. “Nzambi salaka bantu, bantu yango vandaka bonso yandi Nzambi, bo fwananaka na yandi. Yandi salaka bakala ti nkento.”

Nkunga 139:14. “Mono ke kumisa nge sambu nge salaka mono na mutindu mosi ya kuyituka ti ya boma; mambu yonso ya nge ke salaka kele kaka ya kuyituka, mono zaba yo mbote-mbote.”

Matayo 19:4-6. “Keti beno me tangaka ve mambu yai na Mukanda ya Nzambi? ‘Na luyantiku, ntangu Nzambi salaka bantu, yandi salaka bo bakala ti nkento. Ebuna Nzambi tubaka nde: Yo yina, bakala ta bikisa tata na yandi ti mama na yandi, yandi ta kwenda kuvukana na nkento na yandi. Ebuna bo zole ta kuma muntu mosi.’ Mpidina bo kele diaka bantu zole ve kansi kaka muntu mosi mpamba. Yo yina, muntu lenda kabula ve yina ya Nzambi me vukisaka.”

Bisalu 17:24, 25. “Nzambi yai salaka ntoto ya mvimba ti bima yonso kele na yo. Yandi muntu kele Mfumu ya zulu ti ya ntoto, yandi mpi ke vandaka ve na banzo yina ya bantu ke tungilaka yandi na maboko na bo. Yandi ke monaka mfunu ve nde bantu kupesa yandi konso makabu, sambu yandi muntu ke pesaka bantu yonso moyo, mupepe ya kupema, ti bima yonso.”

Kusonga 4:11. “Nge Mfumu Nzambi na beto, nge me lunga na kubaka lukumu, luzitu ti ngolo. Sambu nge muntu salaka bima yonso; bima yonso ke zingaka, bo ke na moyo kaka sambu na luzolo na nge.”

Mutindu Bamvutu ya Biblia Kepesaka Ngemba ya Kyeleka ya Mabanza

Kuzaba nde Nzambi muntu “ke pesaka zina ya kieleka na konso fami . . . awa na nsi-ntoto” kesoba mutindu na beto ya kutadila bantu yankaka. (Efezo 3:15) Nzayilu ya mutindu yai kele mpi na bupusi na mutindu beto kekuditadilaka mpi mutindu beto ketadilaka makambu na beto. Yo kevandaka na bupusi na mabanza na beto na mitindu yai ya melanda.

Na ntangu beto kezola kubaka badesizio ya nene, beto talutisa ve ndilu na kudiyangisa sambu na bangindu ya kuswaswana yina bantu kepesaka. Kansi, beto tatula ntima ya mvimba na bandongisila ya Biblia. Sambu na nki? Sambu “bo sonikaka Mukanda ya Nzambi yonso na ngolo na yandi; mambu yonso kele na kati yo kele mfunu sambu na kulonga bantu mambu ya kieleka, sambu na kusungika bifu yina kele na mambu ya bantu ke longuka, sambu na kubongisa bantu, ti sambu na kulonga bantu na kuzinga luzingu mosi ya kinzambi. Mpidina muntu ya Nzambi ta vandaka me yilama mbote-mbote, yandi ta vanda na mpila ya mbote ya kusala konso kisalu ya mbote.”​—2 Timoteo 3:16, 17.

Ya kyeleka, sambu na kusadila bandongisila ya Biblia, yo kelombaka kusala kikesa mpi kudiyala. Bantangu yankaka, bandongisila na yo lenda lomba nkutu nde beto sala mambu na mutindu yina kewakana ve ti bampusa na beto. (Kuyantika 8:21) Kansi, kana beto kendima mpenza nde Tata mosi ya zola muntu kusalaka beto, yo kele mpenza mayele na kutuba nde yandi zaba nzila ya kuluta mbote yina beto fwete landa. (Yezaya 55:9) Yo yina, Ndinga na yandi kendimisa beto nde: “Tula ntima na nge yonso na Mfumu Nzambi; kutula ntima ve na mambu ya nge mosi ke yindulaka nde nge zaba. Yindula Mfumu Nzambi na mambu yonso ya nge ke salaka, yandi ta songa nge nzila ya mbote.” (Bingana 3:5, 6) Kana beto sadila ndongisila yai, beto tavanda dyaka ve ti basusi mingi yina beto kevandaka na yo na ntangu beto kekutanaka ti makambu to na ntwala ya kubaka badesizio.

Na ntangu beto mekutana ti bantu yina kebuyaka kundima bikanda yankaka, beto takudiyangisa ve na kudiwa nde beto kele na nsi ya bantu yankaka, nde beto kele bantu ya mfunu ve, to nde bantu ya mpusu ya nitu to ya insi mosi buna meluta beto. Kansi, beto tavanda ti kikalulu ya kuditadila ti luzitu. Sambu na nki? Sambu Tata na beto, Yehowa Nzambi, “ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.”​—Bisalu 10:34, 35.

Kuzaba mambu yai tasadisa beto mpi na kupesa ve nzila nde kifu yina ya kubuya kundima bikanda yankaka kubebisa mutindu na beto ya kutadila bantu yankaka. Beto tabakisa nde ata kikuma mosi ve kepesa beto nswa ya kuyindula nde beto meluta bantu ya mpusu mosi buna ya nitu, sambu “na muntu mosi [Nzambi] me basisaka makanda yonso ya bantu, sambu bo kuzinga awa na nsi-ntoto.”​—Bisalu 17:26.

Ya kyeleka, kuzaba nde Nzambi muntu kugangaka beto mpi nde yandi kekudibanzaka sambu na beto kesadisaka beto na kuvanda na ngemba ya kyeleka ya mabanza. Kansi, yo kelomba kusala mambu yankaka sambu na kulanda na kuvanda ti ngemba ya mabanza.

[Bangogo sambu na kubenda dikebi ya kele na lutiti 4]

Keti bantu kudibasikilaka?