Bareferanse ya Mukanda ya Lukutakanu Luzingu mpi Kisalu
© 2024 Watch Tower Bible and Tract Society of Pennsylvania
6-12 MAI
BIMVWAMA YA NDINGA YA NZAMBI | BANKUNGA 36-37
“Kuwa Ve Makasi Sambu na Bantu ya Mbi”
Inki Ta Salama Ntangu Kimfumu ya Nzambi Ta Kwisa?
4 Inki mutindu bantu ya mbi ke niokulaka beto bubu yai? Ntumwa Polo tubaka nde na bilumbu ya nsuka, “bantangu ya mpasi mpi ya nku ta vanda.” Yandi yikaka nde “bantu ya mbi mpi bantu ya luvunu ta salaka diaka mbi kuluta.” (2 Timoteo 3:1-5, 13) Keti nge ke mona nde mambu yai ke salama? Bampangi mingi ke niokwama na mambu yina bantu ya mbi ke sala, mu mbandu mbangika, kuzola ve bantu ya mpusu ya nkaka, mpi mubulu. Bantu ya nkaka ke waka nsoni ve na kusala mambu ya mbi. Bankaka ke monisaka nde bo ke sadisa bantu, kansi bo kele kibeni bantu ya mbi. Mbala ya nkaka mambu ya mbi me kuminaka nge ntete ve, kansi mambu yina bantu ya mbi ke salaka ke pesaka beto yonso mpasi. Beto ke waka mpasi ntangu beto ke waka nde bantu ke niokula bana-fioti, minunu, mpi bantu yina kele ngolo ve. Bantu yai ya mbi ke salaka mambu bonso bambisi ya makasi to bademo. (Yakobo 3:15) Ata mpidina, Ndinga ya Nzambi ke tuba mambu yina ke pesa beto kiese mpi kivuvu.
Yehowa Ke Sakumunaka Bantu Yina Ke Lolulaka
10 Beto mosi ke kudipesaka mpasi ntangu beto ke kangilaka bantu makasi. Makasi kele bonso kizitu ya nene mpi Yehowa ke zolaka nde beto kangila ve bantu makasi sambu beto vanda na ngemba. (Tanga Baefezo 4:31, 32.) Yandi ke siamisa beto na ‘kuyambula makasi mpi na kubikisa nganzi.’ (Nk. 37:8) Kana beto sadila ndongisila yina, yo ta sadisa beto. Kana beto ke kangila bantu makasi, yo lenda bebisa nitu na beto mpi mabanza na beto. (Bing. 14:30) Kana beto me kangila muntu makasi, beto ke kudiniokula beto mosi sambu yo ta sala yandi ve mbi. Yo kele bonso nde beto me nwa ndikila (poison). Ndikila yina ta sala yandi ve mbi kansi yo ta sala beto mosi mbi. Kansi kana beto ke lolula bantu ya nkaka, yo ta natila beto mambote. (Bing. 11:17) Beto ta kuma ti ngemba ya mabanza mpi ya ntima mpi beto ta landa kusadila Yehowa kukonda mpasi.
‘Mona Kiese na Yehowa’
20 “Bantu yina ke kudikulumusaka, bo ta zinga mbote na ngemba mpenza na ntoto.” (Nkunga 37:11a) Kansi “bantu ya kudikulumusa” yango kele banani? Ngogo yina bo me balula nde “kudikulumusa” me katuka na ngogo yina ke tendula “kuniokula, kumonisa mpasi, kukatula muntu valere.” Ya kieleka, “bantu ya kudikulumusa” kele bantu yina ke vingilaka na kudikulumusa yonso ntangu yina ya Yehowa ta katula mambu yonso ya kukonda lunungu yina bantu ke salaka sambu na kuniokula bo. “Bo ta zinga mbote na ngemba mpenza na ntoto.” (Nkunga 37:11b) Nkutu bubu yai beto ke zinga na ngemba mpenza na paladisu ya kimpeve na kati ya dibundu ya Bukristu ya kieleka.
Bimvwama ya Kimpeve
it-2-F 341
Ngumba
Yo ke nikanaka ve, yo ke vandaka ntangu yonso mpi yo ke vandaka nda. Bangumba ke nikanaka ve mpi yo ke vandaka ntangu yonso. (Yez 54:10; Hab 3:6; tala mpi Nk 46:2.) Yo yina, ntangu muyimbi-bankunga tubaka nde lunungu ya Yehowa kele bonso “bangumba ya Nzambi” (Nk 36:6; noti na nsi ya lutiti.), yandi zolaka kutuba nde lunungu ya Yehowa ke nikanaka ve. To sambu bangumba ke vandaka nda, yo lenda tendula nde lunungu ya Nzambi me luta ntama kibeni lunungu ya bantu. (Tala mpi Yez 55:8, 9.) Ntangu bo tiamunaka bolo ya nsambwadi ya makasi ya Nzambi, Kusonga 16:20 ke tuba nde: “Bo monaka ve bangumba.” Yo ke monisa nde ata bima yina kele nda bonso bangumba ta bumbana ve ntangu makasi ya Nzambi ta tiamuka.—Tala mpi Yer 4:23-26.
13-19 MAI
BIMVWAMA YA NDINGA YA NZAMBI | BANKUNGA 38-39
Losa Kizitu ya Kudiyangisa Kuluta Ndilu Sambu na Bifu Yina Nge Salaka
“Tala Kaka na Ntwala”
12 Tanga 1 Yoane 3:19, 20. Beto yonso ke kudiyangisaka bantangu ya nkaka. Mu mbandu, bantu ya nkaka ke kudiyangisaka sambu na mambu yina bo salaka na ntwala ya kuzaba kieleka. Bankaka diaka ke kudiyangisaka sambu na bifu yina bo salaka na nima ya kubaka mbotika. (Bar. 3:23) Ya kieleka, beto ke zolaka kusala mambu ya mbote. Kansi “beto yonso ke bulaka sakuba mbala mingi.” (Yak. 3:2; Bar. 7:21-23) Kudiyangisa kele mbi ve. Sambu na nki? Sambu yo lenda sadisa beto na kusoba mambu ya nkaka na luzingu na beto mpi na kubaka lukanu ya kuvutukila diaka ve mambu ya mbi yina beto salaka.—Baeb. 12:12, 13.
13 Beto lenda landa kudiyangisa kuluta ndilu ata na nima ya kubalula ntima mpi ata Yehowa me lolula beto. Kudiyangisa ya mutindu yai kele mbi. (Nk. 31:10; 38:3, 4) Sambu na nki? Beto tala mbandu ya mpangi-nkento mosi yina vandaka kudiyangisa kuluta ndilu sambu na masumu yina yandi salaka. Yandi ke tuba nde: “Mono vandaka kuyindula nde yo vandaka ve mfunu nde mono sala ngolo na kisalu ya Yehowa sambu yo ke monana nde mono ta guluka ve.” Bampangi mingi lenda yindula mpi mutindu yai. Yo kele mfunu nde beto kudiyangisa ve kuluta ndilu. Sambu kana beto ke kudiyangisa kuluta ndilu, Satana ta wa kiese mingi kana beto yambula kusadila Yehowa ata Yehowa me lolulaka beto.—Tala mpi 2 Bakorinto 2:5-7, 11.
w02-F 15/11 20 § 1-2
Inki Beto Lenda Sala Sambu Bilumbu na Beto Kuvanda Mfunu na Meso ya Yehowa?
Bilumbu ya luzingu na beto ke vandaka fioti mpi yo ke lutaka nswalu. Ntangu muyimbi-bankunga Davidi yindulaka mutindu luzingu na beto kele nkufi, yandi tubaka nde: “O Yehowa, sadisa mono na kuzaba mutindu nsuka na mono ta vanda, mpi nda ya bilumbu na mono, sambu mono zaba mutindu luzingu na mono kele nkufi. Ya kieleka, nge me kumisaka bilumbu na mono fioti kibeni; mpi nda ya luzingu na mono kele kima ya mpamba na ntwala na nge.” Davidi vandaka ti mfunu ya kusepedisa Nzambi luzingu na yandi ya mvimba na mambu yina yandi vandaka kutuba mpi kusala. Sambu na kumonisa nde yandi vandaka ti mfunu ya lusadisu ya Nzambi, yandi tubaka nde: “Nge kele kivuvu na mono mosi kaka.” (Nk 39:4, 5, 7) Yehowa waka kisambu na yandi. Yandi tadilaka mambu yina vandaka kusala mpi yandi sakumunaka yandi sambu na yo.
Luzingu me fuluka ti mambu mingi ya kusala mpi konso kilumbu, beto lenda vanda ti mambu mingi ya kusala konso ntangu. Yo lenda sala nde beto vanda ve na kiese, mingi-mingi kana beto kele ti mambu mingi ya kusala mpi ya kulonguka kansi ntangu kele fioti. Keti beto ke zolaka kuzinga na mutindu yina ke sepedisaka Nzambi bonso Davidi? Beto fwete vila ve nde Yehowa ke talaka mbote-mbote konso muntu na kati na beto. Kiteso ya bamvula 3600 me luta, Yobi, muntu mosi yina vandaka kuwa Nzambi boma bakisaka nde Yehowa vandaka kumona banzila na yandi mpi vandaka kutanga bitambi na yandi yonso. Yandi kudiyulaka nde: “Inki mvutu mono lenda pesa kana yandi lomba mono na kuvutula munoko?” (Yob 31:4-6, 14) Beto lenda sala nde bilumbu ya luzingu na beto kuvanda mfunu na meso ya Nzambi kana beto ke tula mambu ya kimpeve na kisika ya ntete, kana beto ke lemfukila bansiku ya Nzambi mpi kana beto ke sadila ntangu na beto na mutindu ya mbote kibeni. Beto tadila mbote-mbote mambu yai.
Yidika Diaka Kinduku na Nge ti Yehowa
Solula ti Yehowa mbala na mbala. Tata na nge ke zaba mbote nde yo lenda vanda mpasi na kusamba yandi mutindu nge ke landa kudiyangisa sambu na disumu yina nge salaka. (Bar. 8:26) Ata mpidina, “kwamina na kisambu,” songa Yehowa nde nge ke zola kibeni kuyidika kinduku na nge ti yandi. (Bar. 12:12) Mpangi Andrej ke tuba nde: “Mono vandaka kudiyangisa mingi sambu na disumu yina mono salaka mpi mono vandaka kuwa nsoni. Kansi ntangu yonso yina mono vandaka kusamba, mono vandaka kuwa mbote. Mono kumaka ti ngemba mingi ya mabanza.” Kana nge ke zaba ve mambu yina nge lenda tuba na kisambu, tala bisambu yina ntotila Davidi salaka ntangu yandi balulaka ntima. Bisambu yango kele na Nkunga 51 mpi Nkunga 65.
Bimvwama ya Kimpeve
Monisa nde Nge Me Fwana na Kutudila Ntima
16 Yo kele mfunu mingi nde beto kudiyala sambu bantu kutudila beto ntima. Kudiyala ta sadisa beto na kuvanda mpima ntangu beto ke zola kusonga bantu ya nkaka mambu ya kinsweki yina bo songaka beto. (Tanga Bingana 10:19.) Yo lenda vanda mpasi na kudiyala ntangu beto ke sadila ba-aplikasio ya kutindilana ba message mpi ya kusolula ti bantu na Internet. Kana beto keba ve, beto lenda panza mambu ya kinsweki na bantu mingi kukonda kukana. Kana beto panza bansangu yina na Internet, beto ta zaba ve mutindu bantu ya nkaka ta sadila yo mpi mpasi yina yo lenda nata. Kudiyala ta sadisa beto mpi na kuvanda mpima ntangu bambeni ke pusa beto na kutuba mambu yina lenda tula bampangi na beto na kigonsa. Yo lenda salama ntangu bapolisie ke yula beto bangiufula na insi yina bo me buyisaka kisalu na beto. Beto lenda sadila munsiku ya ‘kukeba munoko na beto ti kima ya kukangila munoko,’ ntangu bo ke pusa beto na kutuba mambu yina lenda tula bampangi na beto na kigonsa to ntangu bo ke yula beto bangiufula to na mambu ya nkaka. (Nk. 39:1) Beto fwete vanda bantu ya me fwana na kutudila ntima na dibuta, na kinduku, na dibundu mpi na nganda ya dibundu. Diaka beto fwete kudiyala sambu bantu kutudila beto ntima.
20-26 MAI
BIMVWAMA YA NDINGA YA NZAMBI | BANKUNGA 40-41
Sambu na nki yo Kele Mfunu na Kusadisa Bantu ya Nkaka?
Bantu Yina Ke Kabaka Ke Vandaka na Kiese
16 Bantu yina ke kabaka na masonga ke vingilaka ve nde bantu kuvutudila bo. Yezu tubaka nde: “Kana nge ke sala nkinsi, bingisa bansukami, bantu ya kele ti bifu na nitu, bantu ya makulu-kifu, mpi bifwa-meso; ebuna nge ta vanda na kiese, sambu bo kele ve ti kima ya kufuta nge.” (Luka 14:13, 14) Biblia ke tuba nde: “Muntu ya ke kabaka ta baka lusakumunu,” mpi “Kiese na muntu yina ke tudilaka muntu ya kukonda mfunu dikebi.” (Bingana 22:9; Nkunga 41:1) Beto fwete kabaka sambu beto ke zolaka mpenza kusadisa bantu ya nkaka.
17 Ntangu Polo vutukilaka bangogo yai ya Yezu, “kiese ke vandaka mingi na kupesa, kansi na kubaka kiese ke vandaka fioti,” yandi vandaka ve kutubila kupesa kaka bima ya kinsuni. Beto lenda mpi kupesa bantu kikesa, bandongisila ya Biblia mpi lusadisu yina bo kele na yo mfunu. (Bisalu 20:31-35) Na mambu yina Polo tubaka mpi salaka, yandi longaka beto mfunu ya kukaba ntangu, ngolo na beto, kutudila bantu dikebi mpi kumonisila bo zola.
18 Bantu ya mayele yina ke longukaka bikalulu ya bantu ke ndimaka mpi nde kukaba ke natilaka bantu kiese. Mukanda mosi ke tuba nde bantu ke vandaka na kiese mingi na nima ya kusadila bantu ya nkaka mambu ya mbote. Bantu ya mayele ke tubaka nde ntangu beto ke sadisaka bantu, beto ke bakisaka mfunu mpi lukanu ya luzingu. Yo yina, bantu ya nkaka ya mayele ke longisilaka bantu na kusadisa bantu na luzolo yonso, mpidina bo ta vanda na sante ya mbote mpi na kiese. Ya kieleka, mambu yai ya bantu ya mayele me bakisaka ke yitukisa beto ve sambu Yehowa, Ngangi na beto ya zola ke tubaka ntangu yonso nde kukaba ke pesaka beto kiese.—2 Timoteo 3:16, 17.
Yehowa Ta Sadisa Nge
7 Kana nge ke bela, Yehowa ta pesa nge kikesa mpi ta sadisa nge, mutindu yandi sadisaka bansadi na yandi ya ntama. Ntotila Davidi sonikaka nde: “Kiese na muntu yina ke tudilaka muntu ya kukonda mfunu dikebi; Yehowa ta gulusa yandi na kilumbu ya mpasi. Yehowa ta keba yandi mpi ta bikisa yandi na luzingu.” (Nkunga 41:1, 2) Awa, Davidi zolaka ve kutuba nde bantu ya mbote ya bilumbu na yandi, disongidila bayina vandaka kutudila bantu ya kukonda mfunu dikebi, ta fwa ve. Kansi nki mutindu Yehowa zolaka kusadisa bantu yai ya mbote? Davidi tendulaka nde: “Yehowa ta sadisa yandi na mbeto na yandi ya maladi; na ntangu ya maladi na yandi nge ta soba kibeni mbeto na yandi.” (Nkunga 41:3) Yehowa ke zabaka kibeni bampasi ya bansadi na yandi mpi yandi ke vilaka bo ve. Yandi lenda pesa bo kikesa mpi mayele. Yehowa me salaka mpi nitu ya muntu ti ngolo ya kubelula yo mosi kimbefo yina kele na kati.
Landa Mbandu ya Mawa ya Yehowa
17 Ata kuwila bantu mawa kele mbote sambu na sante, beto ke salaka yo ntete sambu na kulanda mbandu ya Yehowa mpi kupesa yandi lukumu. Diaka, yandi kele zola mpi ke wilaka bantu mawa. (Bingana 14:31) Yandi kele mbandu ya kukuka. Yo yina, beto fwete sala bikesa ya kulanda mbandu ya Nzambi ya kuwila bantu mawa. Mpidina beto ta zinga na bumosi ti bampangi mpi ta zinga mbote ti bantu ya nkaka.—Bagalatia 6:10; 1 Yoane 4:16.
Bimvwama ya Kimpeve
it-1-F 1261
Yehowa
Biblia ya mvimba ke tubilaka nswa ya Yehowa ya kuyala mpi yo ke monisaka pwelele lukanu ya ntete-ntete yina Yehowa ke vandaka ti yo: Kusantisa zina na yandi. Yo ke tendula nde Yehowa fwete katula mambu yonso ya luvunu yina bantu ke tubaka sambu na yandi. Diaka, yo ke tendula mingi-mingi nde bigangwa yonso ya mayele na zulu ti na ntoto fwete kumisa zina yango sambu yo kele ya santu. Disongidila nde bo fwete ndima nde Yehowa mpamba kele ti nswa ya kuyala mpi bo fwete zitisa luyalu na yandi. Bo fwete sala yo na luzolo yonso, bo fwete ndima kusadila yandi mpi bo fwete vanda na kiese ya kusala luzolo na yandi sambu bo ke zolaka yandi. Kisambu yina Davidi salaka na Nkunga 40:5-10 ke monisa pwelele kikalulu yina mpi mutindu ya mbote ya kusantisa zina ya Yehowa. (Na Ebr 10:5-10 ntumwa Polo monisaka nde bitini ya nkaka ya nkunga yina tadilaka Yezu Kristu.)
27 MAI–2 JUIN
BIMVWAMA YA NDINGA YA NZAMBI | BANKUNGA 42-44
Baka Mambote Mingi na Malongi ya Nzambi
Bangindu ya Mfunu ya Kitini ya Zole ya Mukanda ya Bankunga
42:5, 6, 12; 43:3-5. Kana beto me kabwana ti dibundu ya Bukristu sambu na mwa ntangu fioti sambu na bikuma yina beto lenda yala ve, kuyibuka kiese ya kinduku ya mutindu yai ya beto vandaka na yo na bilumbu me luta lenda sadisa beto. Ata na luyantiku, diambu yai lenda kumisa ngolo mpasi ya beto kele na yo sambu beto kele beto mosi, yo ta yibusa beto mpi nde Nzambi kele kisika ya beto ke tininaka mpi nde beto fwete vingila nde yandi sadisa beto.
w12-F 1/15 15 § 2
Inki Nge Fwete Sala Sambu Nge Sepela ti Kulonguka mpi Nge Bakila yo Mambote?
1 SAMBA: Kima ya ntete ya nge fwete sala kele kisambu. (Nk. 42:8) Sambu na nki? Sambu kulonguka Ndinga ya Nzambi kele na kati ya mambu yina beto ke salaka sambu na kusambila Yehowa. Yo yina, beto fwete lomba Yehowa na kusadisa beto sambu beto tula dikebi na beto yonso na kulonguka mpi yandi pesa beto mpeve santu na yandi. (Luka 11:13) Mpangi Barbara, yina kele misionere banda ntama ke tuba nde: “Mono ke sambaka ntangu yonso na ntwala ya kutanga Biblia to na ntwala ya kulonguka yo. Na nima ya kusamba, mono ke bakisaka nde Yehowa kele ti mono mpi nde yandi ke ndima mambu yina mono ke sala.” Kusamba na ntwala ya kulonguka ke kangulaka mabanza na beto mpi bantima na beto sambu beto dia mbote-mbote madia ya kimpeve yina kele na ntwala na beto.
“Kubwisa Ve Maboko”
11 Yehowa ke pesaka beto diaka kikesa na nzila ya malongi yina beto ke bakaka na balukutakanu ya dibundu, balukutakanu ya nene mpi na banzo-nkanda ya kimfumu. Malongi yina lenda sadisa beto na kusadila Nzambi ti bikuma ya mbote, kuditudila balukanu, mpi kulungisa mbote mikumba na beto ya Bukristu. (Nkunga 119:32) Keti nge ke zolaka kubaka kikesa na nzila ya malongi yai?
12 Yehowa sadisaka bantu na yandi na kununga bantu ya Amaleki mpi ya Etiopia. Yandi pesaka mpi Nehemia ti Bayuda ngolo ya kumanisa kutunga bibaka ya Yeruzalemi. Nzambi ta pesa beto mpi kikesa ya kulanda kusamuna ata bantu ke buya kuwa, basusi ke yangisa beto to bantu ke bangika beto. (1 Piere 5:10) Yehowa ta sala ve kimangu sambu na kumanisa bampasi na beto. Ata mpidina, kele ti mambu yina beto fwete sala. Inki mambu? Beto fwete tanga Ndinga ya Nzambi konso kilumbu, kubongisa balukutakanu mpi kukwenda na balukutakanu konso mposo, kulanda kulonguka beto mosi, kusala lusambu ya dibuta, kutudila Yehowa ntima mpi kusamba yandi. Beto bika ve ata kima mosi kukanga beto nzila ya kusadila mambu yina Yehowa ke pesaka beto sambu beto baka kikesa mpi ngolo. Kana nge ke kuka diaka ve kusala kima mosi na mambu yina beto me tubila, lomba Nzambi na kusadisa nge. Mpidina, mpeve ya Nzambi ‘ta pesa nge kikesa, nzala mpi ngolo ya kusala mambu.’ (Bafilipi 2:13) Keti nge mpi lenda pesa maboko ya bampangi ya nkaka kikesa?
Bimvwama ya Kimpeve
it-1-F 417
Mbwa ya Nseke
Biblia ke tubilaka mbala na mbala mbwa ya nseke na mutindu ya kifwani. Ntangu Yobi vandaka kutubila mpasi na yandi, yandi tubaka nde yandi kumaka bonso “mpangi ya bambwa ya nseke.” (Yob 30:29) Ntangu muyimbi-bankunga vandaka kutubila bitumba yina bansadi ya Nzambi belaka mpi yina pesaka nsoni, mbala ya nkaka yandi vandaka kutubila kisika ya bitumba yina bambwa ya nseke ke vukanaka sambu na kudia bamvumbi, (tala mpi Nk 68:23) yandi dilaka nde: “Nge me bedisa beto kisika yina bambwa ya nseke ke zingaka.” (Nk 44:19) Ntangu bantu ya Babilone ziungaka Yeruzalemi na mvu 607 na ntwala ya ntangu na beto, nzala kumaka mingi, yo yina bamama kumaka kusadila bana na bo mambu na nku yonso. Yo yina profete Yeremia fwanisaka mambu ya nku ya ‘bantu na yandi’ ti mutindu bambwa ya nseke ke sadilaka bana na bo mambu.—Bid 4:3, 10.
3-9 JUIN
BIMVWAMA YA NDINGA YA NZAMBI | BANKUNGA 45-47
Nkunga ya Makwela ya Ntotila
Yangalala Sambu na Makwela ya Mwana-Dimeme!
8 Tanga Nkunga 45:14, 15. Nkento ya makwela kele na ‘nkembo mpenza’ sambu na makwela ya ntotila. Kusonga 21:2 ke fwanisa nkento yai ti mbanza mosi, Yeruzalemi ya mpa, mpi yandi “me kudikumisa kitoko sambu na bakala na yandi.” Mbanza yai ya zulu kele ti “nkembo ya Nzambi” mpi yo ke ngenga “bonso ditadi mosi ya ntalu kibeni, bonso ditadi ya yaspe yina ke ngenga bonso kristale.” (Kus. 21:10, 11) Mukanda ya Kusonga ke tubila mbote-mbote kitoko ya Yeruzalemi ya mpa. (Kus. 21:18-21) Yo yina, yo ke yitukisa ve na mutindu muyimbi-bankunga ke tuba nde nkento ya makwela kele na ‘nkembo mpenza’! Nkutu, makwela ya ntotila ta salama na zulu.
9 Bakala ya makwela yina bo me natila nkento ya makwela kele Ntotila yina kele Mesia. Yandi me yidikaka nkento na yandi, ‘me kumisa yandi bunkete mpi me yobisa yandi ti masa na nzila ya ndinga.’ Nkento yai kele “ya santu mpi ya kukonda mvindu.” (Baef. 5:26, 27) Yo ke lomba nde, nkento na yandi kulwata bilele yina me fwana sambu na feti yina. Ya kieleka, yandi me lwata mutindu yina! Nkutu, ‘bo me tula bima ya wolo na bilele na yandi,’ mpi ‘bo ta nata yandi na ntotila na bilele yina bo me tunga kitoko.’ Sambu na makwela ya Mwana-Dimeme, “bo me pesa yandi nswa ya kulwata bilele ya lino ya ke ngenga, ya bunkete, mpi ya kitoko—sambu lino ya kitoko ke monisa bisalu ya lunungu ya basantu.”—Kus. 19:8.
Mambu Yina Mukanda ya Kusonga Ke Tuba Yina Ta Salama na Bilumbu Ke Kwisa
10 Inki Yehowa ta sala ntangu bo ta nwanisa bansadi na yandi? Yandi ke songa beto nde: “Nganzi na mono ya ngolo ta pela.” (Ezek. 38:18, 21-23) Kusonga kapu 19 ke tubila mambu yina ta salama na nima. Yehowa ta tinda Mwana na yandi sambu na kutanina bansadi na yandi mpi kufwa bambeni na bo. Na bitumba yina, Yezu ta vukana ti “makesa ya zulu” disongidila bawanzio ya kwikama mpi bantu 144 000. (Kus. 17:14; 19:11-15) Inki mutindu bitumba yango ta suka? Bo ta fwa bantu yonso mpi bimvuka yonso yina ke teleminaka Yehowa.—Tanga Kusonga 19:19-21.
11 Mona na mabanza mutindu bantu yina ke sambilaka Yehowa na mutindu ya mbote ta wa ntangu bo ta guluka ntangu bo ta fwa bambeni yonso ya Yehowa. Yo ta vanda ntangu mosi ya kiese kibeni. Kiese ta vanda mingi na zulu ntangu bo ta fwa Babilone ya Nene kansi kele diaka ti kima ya nkaka yina ta nata kiese mingi mpenza. (Kus. 19:1-3) Yo kele diambu ya kuluta mfunu yina mukanda ya Kusonga ke tubila, “makwela ya Mwana-Dimeme.”—Kus. 19:6-9.
12 Inki ntangu makwela yango ta salama? Bantu yonso ya kimvuka ya bantu 144 000 ta vanda na zulu na ntwala nde bitumba ya Armagedoni kuyantika. Ata mpidina, makwela ya Mwana-Dimeme ta salama ve na ntangu yina. (Tanga Kusonga 21:1, 2.) Makwela ya Mwana-Dimeme ta salama na nima ya bitumba ya Armagedoni mpi na nima ya kufwa bambeni yonso ya Nzambi.—Nk. 45:3, 4, 13-17.
it-1-F 1041
Bitumba
Na nsuka ya bitumba yina, ntoto ta vanda na ngemba bamvula 1 000. Mambu yai ya muyimbi-bankunga tubaka: “[Yehowa] ke sukisa bitumba na ntoto ya mvimba. Yandi ke buka munduki ya tolo-tolo mpi dikonga; yandi ke yoka bapusu-pusu ya basoda na tiya,” lunganaka na mbala ya ntete ntangu Nzambi tulaka ngemba na ntoto ya Izraele mpi ntangu yandi bebisaka binwaninu ya bitumba ya bambeni. Ntangu Kristu ta fwa bantu yina ta nwanisa yandi na bitumba ya Armagedoni, ntoto ya mvimba ta kuma na ngemba ya mingi kibeni. (Nk 46:8-10) Bantu yina ta zinga mvula na mvula awa na ntoto kele bayina me kumisaka “bambele na bo ya bitumba bima ya kubundudila ntoto” mpi bayina ke “longuka mpi diaka ve bitumba.” “Sambu munoko ya Yehowa ya makesa me tuba.”—Yez 2:4; Mik 4:3, 4.
Bimvwama ya Kimpeve
Inki Ta Salama Ntangu Kimfumu ya Nzambi Ta Kwisa?
9 Inki kima ya mpa Nzambi ta tula na kisika ya bimvuka ya mbi? Keti kele ti kimvuka yina ta bikala awa na ntoto na nima ya Armagedoni? Biblia ke tuba nde: “Beto ke vingila zulu ya mpa mpi ntoto ya mpa, mpi na kati na yo lunungu ta vanda.” (2 Piere 3:13) Zulu ya ntama kele baluyalu ya mbi, ntoto ya ntama kele bantu yina bo ke yala. Inki Nzambi ta tula na kisika na yo ntangu yo ta vanda diaka ve? Yandi ta tula “zulu ya mpa mpi ntoto ya mpa.” Zulu ya mpa kele luyalu ya mpa, yina Yezu ta yala ti bantu 144 000. Ntoto ya mpa kele bantu yina Kimfumu ya Nzambi ta yala. Yezu mpi bantu yina ta yala ti yandi ta landa mbote-mbote mbandu ya Yehowa, Nzambi ya ndonga. (1 Bakorinto 14:33) Yo yina, ndonga ya mbote ta vanda na “ntoto ya mpa.” Bantu ya mbote ta kumisa ntoto kitoko. (Nkunga 45:16) Bo ta vanda na nsi ya lutwadisu ya Kristu mpi bantu 144 000. Yindula mutindu luzingu ta vanda ntangu bimvuka yonso ya mbi ta vanda diaka ve mpi ntoto ya mvimba ta vanda kaka ti kimvuka mosi ya mbote yina ta bebaka ve ata fioti!
10-16 JUIN
BIMVWAMA YA NDINGA YA NZAMBI | BANKUNGA 48-50
Bibuti—Beno Sadisa Mabuta na Beno na Kutudila Organizasio ya Yehowa Ntima Mingi
Lusambu ya Kieleka Ta Sadisa Nge na Kuvanda na Kiese Mingi
11 Beto ke sambilaka Yehowa ntangu beto ke longukaka Ndinga na yandi mpi ke longaka bana na beto mambu na yandi. Kisabatu vandaka kupesa bantu ya Izraele dibaku ya kuyambula bisalu na bo ya konso kilumbu mpi ya kutula dikebi na kukumisa kinduku na bo ngolo ti Yehowa. (Kub. 31:16, 17) Bibuti yina vandaka kusambila Yehowa na mutindu ya mbote vandaka kulonga bana na bo mambu ya Yehowa mpi bumbote na yandi. Bubu yai mpi, beto fwete baka ntangu ya kutanga mpi kulonguka Ndinga ya Nzambi. Yo kele na kati ya mambu yina beto fwete sala sambu na kusambila Yehowa mpi yo ke sadisaka beto na kukwenda pene-pene na yandi. (Nk. 73:28) Ntangu beto ke longuka na dibuta, beto lenda sadisa bana na beto na kuyedisa kinduku ya ngolo ti Tata na beto ya zulu yina ke zolaka beto.—Tanga Nkunga 48:13.
w11-F 15/3 19 § 5-7
Beno Kele ti Kikuma ya Kuwa Kiese
“Beno tambula na nziunga ya Sioni; beno tambula na nziunga na yo; beno tanga banzo-zulu na yo. Beno tula bantima na beno na bibaka na yo ya lutaninu. beno tala-tala banzo-zulu na yo ya kele ti bibaka ya ngolo, sambu beno tubila yo na bandonga ya bantu yina ke kwisa.” (Nk. 48:12, 13) Na verse yina, muyimbi-bankunga vandaka kulomba bantu ya Izraele na kutala Yeruzalemi na meso na bo mosi. Nge lenda yindula masolo ya kitoko yina mabuta ya Izraele vandaka kutubila, bayina vandaka kukwenda na mbanza ya santu sambu na bankinsi yina vandaka kusalama konso mvula mpi tempelo ya kitoko yina bo vandaka kutala. Ntembe kele ve nde yo pusaka bo na ‘kutubila yo na bandonga ya bantu yina ke kwisa.’
Yindula ntotila-nkento ya Sheba yina vandaka ntete ti badute ntangu yandi waka masolo ya kitoko ya luyalu ya Salomo mpi ya mayele na yandi ya mingi. Inki ndimisaka yandi nde mambu yina yandi waka vandaka kieleka? Yandi tubaka nde: “Mono ndimaka yo ve tii kuna mono me kwisa mpi me mona yo na meso na mono mosi.” (2 Bans. 9:6) Ya kieleka, mambu yina beto ke monaka ‘na meso na beto mosi’ ke vandaka ti bupusi mingi kibeni.
Inki mutindu beno lenda sadisa bana na beno na kumona mambu ya kitoko ya organizasio ya Yehowa na ‘meso na bo mosi’? Kana Betele ya Bambangi ya Yehowa kele pene-pene ti kisika yina beno ke zingaka, beno sala yonso sambu na kukwenda kutala yo. Mu mbandu Mandy ti Bethany, yelaka bakilometre kiteso ya 1 500 ti Betele ya insi na bo. Kansi, bibuti na bo vandaka kuyidika mbala na mbala ba voyage sambu bo kwenda kutala Betele. Bo vandaka kusala yo mingi-mingi ntangu bana na bo vandaka kuyela. Bana yango ke tuba nde: “Na ntwala ya kukwenda kutala Betele, beto vandaka kuyindula nde yo vandaka kisika mosi ya mpasi na kuzinga mpi kaka bampangi ya minunu mpamba vandaka kuzinga kuna. Kansi beto monaka baleke yina vandaka kusala ngolo sambu na Yehowa mpi bo vandaka na kiese. Beto bakisaka nde organizasio ya Yehowa sukaka ve kaka kisika yina beto vandaka kuzinga mpi konso ntangu yina beto vandaka kutala Betele, yo vandaka kukumisa beto ngolo na kimpeve.” Kumona organizasio ya Yehowa na meso na bo mosi, pusaka Mandy ti Bethany na kuyantika kisalu ya kimupasudi-nzila mpi nkutu bo bingaka bo na kusala na Betele bonso bavolontere.
Beno Kuditambusa Bonso Bantu ya Kimfumu!
5 Kulonguka disolo ya insi. Muntu yina ke zola kukuma muntu ya insi mosi buna, yandi fwete longuka disolo ya luyalu ya insi yango. Mutindu mosi, bantu yina ke zola kukuma bantu ya Kimfumu fwete longuka mbote-mbote mambu yonso ya me tala Kimfumu yango. Beto tadila mbandu ya bana ya Kore na Izraele ya ntama. Bo vandaka kusepela na mbanza Yeruzalemi, na kisika na yo ya lusambu mpi na kuta disolo ya mbanza yango. Bo vandaka kusepela na Yeruzalemi, kaka ve sambu bo tungaka yo na matadi ya nene, kansi bo vandaka kusepela na kima yina mbanza yango mpi kisika yina ya lusambu vandaka kumonisa. Yeruzalemi vandaka “mbanza ya Ntotila ya Nene, NW” Yehowa, sambu yo vandaka kisika ya nene ya lusambu ya bunkete. Bansiku ya Yehowa vandaka kulongama kuna. Yehowa vandaka kumonisa ntima mbote na yandi na bantu yina Ntotila ya Yeruzalemi vandaka kuyala. (Tanga Nkunga 48:2, 3, 10, 13, 14.) Bonso bana ya Kore, keti nge mpi ke zolaka kulonguka disolo ya organizasio ya Yehowa yina kele awa na ntoto mpi kuta disolo na yo? Kana nge ke longuka mambu ya me tala organizasio ya Nzambi mpi mutindu yandi ke sadisaka bansadi na yandi, nge ta yantika kumona nde Kimfumu ya Nzambi kele diambu ya kieleka. Mpusa na nge ya kusamuna nsangu ya mbote ya Kimfumu yango ta yela.—Yer. 9:24; Luka 4:43.
Bimvwama ya Kimpeve
it-2-F 799
Bimvwama
Dikanda ya Izraele vandaka ti bimvwama mingi, yo yina bantu ya Izraele vandaka ti madia mingi mpi malafu mingi (1Bn 4:20; Lon 5:18, 19), mpi bimvwama na bo vandaka kutanina bo na kinsukami. (Bin 10:15; Lon 7:12) Ata Yehowa zolaka nde bantu ya Izraele kuvanda ti bimvwama mingi sambu bo vandaka kusala ngolo (tala mpi Bin 6:6-11; 20:13; 24:33, 34), yandi kebisaka bo na kuvila yandi ve sambu yandi muntu vandaka kupesa bo bimvwama yina mpi yandi zolaka ve nde bo yantika kutula ntima na bimvwama na bo. (Kul 8:7-17; Nk 49:6-9; Bin 11:4; 18:10, 11; Yer 9:23, 24) Yandi yibusaka bo nde bimvwama na bo vandaka kaka sambu na ntangu fioti (Bin 23:4, 5), bo lendaka kupesa yo ve Nzambi sambu yandi gulusa bo na lufwa (Nk 49:6, 7) mpi yo vandaka ve ti valere sambu na bafwa (Nk 49:16, 17; Lon 5:15). Yehowa monisaka bo nde kana bo ke tula dikebi mingi na bimvwama na bo, yo ta pusa bo na kusala mambu ya mbi mpi yandi ta ndima bo diaka ve. (Bin 28:20; tala mpi Yer 5:26-28; 17:9-11.) Yandi songaka bo mpi na ‘kukumisa Yehowa ti bima na [bo] ya ntalu.”—Bin 3:9.
17-23 JUIN
BIMVWAMA YA NDINGA YA NZAMBI | BANKUNGA 51-53
Sala Mambu Yina Ta Sadisa Nge na Kusala Ve Masumu ya Nene
Inki Mutindu Nge Lenda Tanina Ntima na Nge?
4 Na Bingana 4:23, bo me sadila ngogo “ntima” sambu na kutubila “kimuntu ya kati.” (Tanga Nkunga 51:6.) Na bangogo ya nkaka, “ntima” ke tendula mabanza, mawi, bangindu mpi banzala na beto ya kati. Yo kele kimuntu na beto ya kati kansi ve ya nganda.
5 Mutindu beto ke taninaka sante na beto ke sadisa beto na kubakisa mfunu ya kutanina kimuntu na beto ya kati. Ya ntete, sambu na kuvanda ti sante ya mbote, beto fwete dia madia ya mbote mpi fwete sala bangalasisi mbala na mbala. Mutindu mosi, sambu na kuvanda ti sante ya mbote na kimpeve, beto fwete dia madia ya mbote na kimpeve mpi kumonisa lukwikilu na Yehowa mbala na mbala. Beto ke monisaka lukwikilu na Yehowa ntangu beto ke lemfukaka na mambu yina beto ke longukaka mpi ke songaka yo bantu ya nkaka. (Bar. 10:8-10; Yak. 2:26) Ya zole, kana beto ke tula dikebi ya mingi na kimuntu na beto ya nganda, beto lenda yindula nde beto kele na sante ya mbote kansi na kati beto kele ti maladi. Kiteso mosi, mutindu beto ke salaka mambu ya kimpeve mbala na mbala, beto lenda yindula nde lukwikilu na beto kele ngolo, kansi beto lenda yedisa bangindu ya mbi. (1 Bak. 10:12; Yak. 1:14, 15) Beto fwete vila ve nde Satana ke zolaka kubebisa beto ti mabanza na yandi. Inki mutindu yandi ke salaka yo? Inki mutindu beto lenda kuditanina?
Beto Lenda Vanda Ntangu Yonso ti Bikalulu ya Bunkete
5 Mutindu mosi ya mbote ya kumonisa nde beto me kudipesaka na Yehowa kele kuzabisa yandi na kisambu mpusa na beto ya kunwanisa bangindu ya mbi. Kana beto ke kwenda pene-pene na Yehowa na nzila ya kisambu, yandi mpi ta kwisa pene-pene na beto. Yandi ke pesaka beto mpeve santu na yandi sambu yo pesa beto kikesa ya kununga bangindu ya mansoni mpi kubikala bunkete. Yo yina, bika beto zabisa Yehowa na bisambu mpusa na beto ya kusepedisa yandi mpi ya kuvanda ti bangindu ya bunkete. (Nk. 19:15) Keti na kudikulumusa yonso beto ke lombaka Nzambi na kutala bantima na beto sambu na kumona kana beto kele ti “mambu ya mbi,” disongidila banzala to bangindu ya mbi, yina lenda nata beto na kusala disumu? (Nk. 139:23, 24) Keti beto ke lombaka yandi mbala na mbala na kusadisa beto na kutanina kwikama na beto ntangu beto ke kutanaka ti bampukumuna?—Mat. 6:13.
6 Mbala ya nkaka, na ntwala ya kukuma Mbangi ya Yehowa beto vandaka kusala mambu ya nkaka yina vandaka kusepedisa ve Yehowa, mpi bantangu ya nkaka banzala yina ya ntama lenda kwisila beto diaka. Ata mpidina, Yehowa lenda sadisa beto na kusala bansoba yina me fwana sambu na kulanda kusadila yandi na mutindu yina yandi ke ndimaka. Ntotila Davidi bakisaka diambu yai. Na nima ya kusala bizumba ti Batsheba, yandi bondilaka Yehowa nde: “Yingisa mono ntima ya mpembe, yidika yo, yo kuma ya mpa ti ya kikesa.” (Nk. 51:12, 14) Nzala ya kusala disumu lenda sepedisa nitu na beto ya kukonda kukuka, kansi Yehowa lenda pesa beto ngolo ya kulemfukila yandi mpi ya kusala mambu ya mbote. Bampusa ya mbi lenda yela na ntima na beto, mpi kupusa beto na kukuma ti mabanza ya mbi; kansi, Yehowa lenda sadisa beto na kulemfuka na bantuma na yandi mpi kuzinga na kuwakana ti bantuma yai. Yandi lenda tanina beto na mambu ya mbi yina ke sosa kubebisa kimpeve na beto.—Nk. 119:133.
Bimvwama ya Kimpeve
it-1-F 663
Doegi
Muntu ya Edomi, yandi vandaka mfumu ya bangungudi ya ntotila Saule mpi yo vandaka mukumba mosi ya nene. (1Sa 21:7; 22:9) Ntembe kele ve nde Doegi kumaka muntu ya dibundu ya Bayuda. Sambu “bo kangaka yandi na ntwala ya Yehowa” na Nobi, mbala ya nkaka sambu na lusilu mosi yina yandi salaka, sambu na kima mosi ya mvindu to mbala ya nkaka sambu yandi monisaka bidimbu ya maladi ya lepre, Doegi monaka mutindu nganga-nzambi ya nene Ahimeleki pesaka Davidi mampa ya kumonisa mpi mbele ya bitumba ya Goliati. Na nima, ntangu Saule vandaka kusolula ti bansadi na yandi mpi vandaka kusonga bo nde bo yonso vandaka kukanina yandi, Doegi tubaka mambu yina yandi monaka na Nobi. Ntangu Saule bingisaka nganga-nzambi ya nene mpi banganga-nzambi ya nkaka na Nobi mpi yulaka Ahimeleki bangiufula, Saule songaka basoda na yandi na kufwa banganga-nzambi yina. Ntangu bo buyaka kufwa bo, Saule songaka Doegi na kufwa banganga-nzambi yina mpi Doegi fwaka banganga-nzambi 85. Na nima ya kusala diambu yina ya mbi, Doegi fwaka Nobi mpi yandi fwaka bantu yonso ya Nobi, bambuta ti baleke mpi bambisi yonso.—1Sa 22:6-20.
Mutindu bangogo yina kele na zulu ya Nkunga 52 ke monisa yo, Davidi sonikaka mambu yai sambu na Doegi: “Ludimi na nge, yina kele makasi bonso lutebu, ke kana mambu ya mbi mpi ke sala mambu na luvunu. Nge ke zolaka mambu ya mbi kuluta mambu ya mbote, nge ke zolaka kukusa kuluta kutuba mambu ya lunungu. Nge ke zolaka konso ngogo ya ke pesa mpasi, O nge ludimi ya ke kusaka!”—Nk 52:2-4.
24-30 JUIN
BIMVWAMA YA NDINGA YA NZAMBI | BANKUNGA 54-56
Nzambi Kele na Lweka na Nge
Vanda Mayele mpi Tina Nzambi Boma!
10 Kilumbu mosi, Davidi vandaka kutina Saule mpi kwendaka na Akishi, mfumu ya bwala Gati na Filistia, bwala ya Goliati. (1 Samuele 21:11-16) Bansadi ya mfumu yina fundaka Davidi nde yandi kele mbeni na bo. Davidi salaka nki na ntangu yina ya mpasi ti ya kigonsa? Yandi sambaka Yehowa na masonga yonso. (Nkunga 56:1-5, 11-13) Ata yo lombaka nde Davidi kukusa maladi ya kilau sambu bo fwa yandi ve, yandi zabaka nde muntu gulusaka yandi mpenza vandaka Yehowa sambu yandi sakumunaka bikesa na yandi. Kutula ntima ya mvimba yina Davidi vandaka kutula na Yehowa monisaka nde yandi vandaka kutina mpenza Nzambi boma.—Nkunga 34:5-7, 10-12.
11 Bonso Davidi, beto lenda tina Nzambi boma kana beto tula ntima na balusilu na yandi ya kusadisa beto na kunwana ti mambu ya mpasi ya beto ke kutanaka na yo. Davidi kutubaka nde: “Kudipesa na Mfumu Nzambi, tula yandi ntima, ebuna yandi ta sadisa nge.” (Nkunga 37:5) Yo ke tendula ve nde beto ta bikila Yehowa bampasi na beto kukonda kusala ata kima mosi mpi kuvingila nde yandi kusadisa beto. Davidi sambaka kaka ve Yehowa na kusadisa yandi mpi na nima yandi kanga maboko. Yandi sadilaka ngolo ya nitu mpi mayele yina Yehowa pesaka yandi sambu na kumanisa diambu yina. Kansi Davidi zabaka nde sambu na kununga, yandi lenda tula ntima na bikesa na yandi mosi kaka ve. Beto mpi fwete sala kiteso mosi. Kana beto me sala yonso yina beto lenda na kiteso ya ngolo na beto, beto fwete yambula mambu yonso na maboko ya Yehowa. Na kutuba ya mbote, mbala mingi beto ke vandaka na kima ya nkaka ve ya kusala, kaka kutula ntima na Yehowa. Na ntangu yango, beto ke monisaka nde beto ke tinaka mpenza Nzambi boma. Beto lenda baka kikesa na mambu yina Davidi tubaka na masonga yonso nde: “Mfumu Nzambi ke songaka kinsweki na yandi na bantu yina ke lemfukaka na yandi.”—Nkunga 25:14.
Ata Kima Mosi Ve Lenda ‘Kabula Beto na Zola ya Nzambi’
9 Yehowa ke bakaka mpi na mbalu kikalulu na beto ya kukanga-ntima. (Matayo 24:13) Kuvila ve nde Satana ke zolaka nde nge yambula Yehowa. Konso kilumbu ya nge ke bikalaka ya kwikama na Yehowa, yo kele kilumbu ya nkaka yina ke sadisaka na kupesa mvutu na masota ya Satana. (Bingana 27:11) Bantangu ya nkaka, yo ke vandaka mpasi na kukanga ntima. Maladi, bampasi ya mbongo, basusi, mpi bampasi ya nkaka lenda sala nde konso kilumbu ya ke luta kukumina beto mumekamu. Kana kima ya muntu ke vingila ke kwisa nswalu ve, yo lenda lembisa yandi nitu. (Bingana 13:12) Kukanga ntima na bampasi ya mutindu yai ke vandaka kima mosi ya kuluta mbalu na meso ya Yehowa. Yo yina Ntotila Davidi lombaka Yehowa na kubumba mansanga na yandi na dibungu ya mpusu ya mbisi; yandi yikaka na kivuvu yonso nde: “Keti nge me sonikaka yo ve na mukanda na nge?” (Nkunga 56:9) Ee, Yehowa ke bakaka na mbalu mpi ke vilaka ve mansanga yonso ya beto ke basisaka mpi bampasi ya beto ke monaka sambu na kukanga ntima mpi kusadila yandi na kwikama. Mambu yai yonso zole kele na mbalu na meso na yandi.
Zola ya Yehowa Ke Sadisaka Beto na Kukatula Boma
16 Satana ke zabaka nde beto ke zolaka ve kufwa. Yandi ke tubaka nde beto lenda bebisa ata kinduku na beto ti Yehowa kaka sambu na kubikala na luzingu. (Yobi 2:4, 5) Kansi yo kele kibeni luvunu. Satana kele “muntu yina kele ti ngolo ya kufwa.” Yo yina, yandi ke sadilaka boma ya lufwa sambu na kupusa beto na kuyambula Yehowa. (Baeb. 2:14, 15) Bantangu ya nkaka, Satana ke pusaka bantu na kusonga beto nde kana beto me yambula ve kusadila Yehowa, bo ta fwa beto. Bantangu ya nkaka, Satana lenda mona nde beto ke bela ngolo mpi yandi lenda pusa beto na kuyambula kusadila Yehowa. Minganga to bantu ya dibuta na beto yina ke sambilaka ve Yehowa lenda pusa beto na kundima nde bo vutula beto menga. Yo ta sala nde beto fwa nsiku ya Nzambi. To muntu ya nkaka lenda pusa beto na kundima lusansu yina ke wakana ve ti minsiku ya Biblia.
17 Ata beto ke zolaka ve kufwa, beto me zaba nde Yehowa ta landa kuzola beto ata kana beto me fwa. (Tanga Baroma 8:37-39.) Kana banduku ya Yehowa me fwa, yandi ke landaka kuyibuka bo kaka bonso nde bo kele na luzingu. (Luka 20:37, 38) Yandi ke vandaka ti mpusa ya ngolo ya kuvutula bo na luzingu. (Yobi 14:15) Yehowa futaka ntalu ya mingi sambu beto ‘baka luzingu ya mvula na mvula.’ (Yoa. 3:16) Beto ke zabaka nde Yehowa ke zolaka beto mingi kibeni mpi yandi ke sadisaka beto. Beto fwete yambula ve Yehowa ntangu beto ke bela to ke zola kufwa. Kansi beto fwete tudila yandi ntima sambu yandi pesa beto kikesa, mayele mpi ngolo. Mpangi Valérie ti bakala na yandi salaka mpidina.—Nk. 41:3.
Bimvwama ya Kimpeve
it-2-F 646
Kuzaba na ntwala mambu yina ta salama, Kuyidika na ntwala mambu yina ta salama
Mutindu Yudasi Iskariote tekaka Yezu lungisaka profesi ya Nzambi mpi yo monisaka nde Yehowa ti Mwana na yandi ke zabaka na ntwala mambu yina ta salama. (Nk 41:9; 55:12, 13; 109:8; Bis 1:16-20) Kansi yo ke tendula ve nde Nzambi yidikaka na ntwala nde Yudasi muntu fwete teka Yezu. Baprofesi monisaka nde nduku mosi ya ngolo ya Yezu ta teka yandi, kansi yo tubaka ve zina ya nduku yango. Diaka, minsiku ya Biblia ke monisa ve nde Nzambi yidikaka na ntwala mambu yina Yudasi zolaka kusala. Ntumwa Polo tubaka mambu yai sambu na minsiku ya Nzambi: “Kutula ve muntu maboko ntinu-ntinu; kuvukana mpi ve na masumu ya bankaka; vanda kaka ti bikalulu ya bunkete.” (1Tm 5:22; tala mpi 3:6.) Sambu na kumonisa kibeni nde Yezu ponaka mbote-mbote bantumwa na yandi 12, yandi sambaka Tata na yandi mpimpa ya mvimba na ntwala ya kupona bo. (Luk 6:12-16) Kana Nzambi yidikaka dezia na ntwala nde Yudasi muntu ta teka Yezu, yo zolaka kuwakana ve ti lutwadisu mpi bandongisila yina Nzambi pesaka Yezu mpi yo zolaka kumonisa nde Nzambi muntu pusaka Yudasi na kusala disumu yina.
Yo kele pwelele nde ntangu Yezu ponaka Yudasi ntumwa, ata kima mosi ve na ntima na yandi monisaka nde yandi muntu ta teka Yezu. Yudasi bikaka nde ‘musisa ya ndikila (poison) kubasika’ na ntima na yandi mpi yo kumisa yandi mvindu. Yo salaka nde yandi vila nzila mpi yandi ndima diaka ve lutwadisu ya Nzambi kansi yandi ndima lutwadisu ya Diabulu yina pusaka yandi na kuyiba mpi na kuteka Yezu. (Ebr 12:14, 15; Yoa 13:2; Bis 1:24, 25; Yak 1:14, 15) Ntangu kikalulu yina ya Yudasi kumaka ngolo, Yezu tangaka na ntima ya Yudasi mpi tubaka nde yandi muntu ta teka yandi.—Yoa 13:10, 11.