Inki Kimfumu ya Nzambi Ta Sala?
Mvutu ya Biblia
Kimfumu ya Nzambi ta katula baluyalu yonso ya bantu mpi yo ta yala ntoto ya mvimba. (Daniele 2:44; Kusonga 16:14) Tala mwa mambu yina Kimfumu ya Nzambi ta sala na nima . . .
Yo ta fwa bantu ya mbi, bantu yina bwimi na bo ke natila beto bampasi. “Kansi bantu ya mbi, bo ta katula bo na ntoto.”—Bingana 2:22.
Yo ta manisa bitumba. “[Nzambi] ke sukisa bitumba na ntoto ya mvimba.”—Nkunga 46:9.
Yo ta sala nde bantu kuzinga mbote mpi na lutaninu na ntoto ya mvimba. “Konso muntu ta zinga na ngemba na bilanga na yandi ya vinu ti ya bafige; ata muntu mosi ve ta kwisa kupesa yandi boma.”—Mika 4:4, Bible en Kituba.
Yo ta kumisa ntoto paladisu. “Nseke ke na kiese mingi, ntoto ya kuyuma ke sepela, bintuntu me yantika kumena na ntoto ya zelo na zelo.”—Yezaya 35:1, Bible en Kituba.
Yo ta pesa konso muntu kisalu ya mfunu mpi ya yandi ta sepela ti yo. “Bantu ya [Nzambi] me solaka ta wa kiese kibeni sambu na kisalu ya maboko na bo. Bo ta sala ve kisalu ya ngolo sambu na mpamba.”—Yezaya 65:21-23.
Yo ta manisa maladi. “Ata muntu mosi ve ya ke zingaka na insi ta tuba nde: ‘Mono ke bela.’”—Yezaya 33:24.
Yo ta sala nde bantu kununa diaka ve. “Bika nde nsuni na yandi kukuma ya mpa kuluta na kileke; bika nde yandi vutuka na bilumbu ya ngolo ya kileke na yandi.”—Yobi 33:25.
Yo ta vutula bantu na luzingu. “Bantu yonso yina kele na maziamu ya kuyibuka ta wa ndinga [ya Yezu] mpi bo ta basika”—Yoane 5:28, 29.