Mukanda ya Nto-Kimvuka

Bampangi ya beto ke zolaka mingi:

Zola sambu na Nzambi mpi sambu na bantu ke pusaka beto na ‘kukwenda mpi na kukumisa bantu ya makanda yonso balongoki, na kubotika bo.’ (Mat. 28:19, 20; Mar. 12:28-31) Zola ya masonga ke vandaka ti ngolo. Kana beto kele ti zola ya mutindu yai sambu na bantu, beto lenda sadisa bayina kele “ti nkadilu ya mbote sambu na kubaka luzingu ya mvula na mvula.”​—Bis. 13:48.

Na bamvula ya me luta, beto kudipesaka na kukanga na ntu bambandu ya bangogo ya kukotila na masolo mpi na kubikila bantu mikanda. Kansi sesepi, beto ke zola kuyedisa mayele na beto ya kusolula ti bantu. Beto ke zola kumonisa nde beto ke zolaka bantu. Yo yina, beto fwete solula ti bo mambu yina ke benda dikebi na bo. Yo ke tendula nde beto fwete kangama ve kaka na kima mosi mpi beto fwete tadila mbote-mbote mambu ya ke yangisa konso muntu mpi mambu yina ke benda dikebi na yandi. Inki mutindu kamukanda yai ta sadisa beto na kusala yo?

Kamukanda yai kele ti malongi 12 ya ke sadisa beto na kulonguka bikalulu yina beto fwete yedisa sambu na kumonisa nde beto ke zolaka bantu mpi kukumisa bo balongoki. Konso dilongi me simbama na disolo mosi ya Biblia ya ke tubila kikalulu mosi ya Yezu to ya Bakristu ya mvu-nkama ya ntete monisaka na kisalu ya kusamuna. Lukanu ya kamukanda yai kele ve ya kukanga na ntu bambandu ya bangogo ya kukotila na masolo, kansi ya kusadisa beto na kuzaba inki mutindu beto lenda monisa nde beto ke zolaka bantu. Konso kikalulu kele mfunu sambu na bametode yonso ya kisalu na beto ya kusamuna. Kansi, beto ta tadila mutindu bikalulu ya nkaka kele mingi-mingi mfunu ntangu beto ke yantika masolo ti bantu, ntangu beto ke sala bamvutukilu, to ntangu beto ke twadisa kulonguka ya Biblia.

Ntangu nge ke tadila konso dilongi, yindula mbote-mbote mutindu nge lenda monisa kikalulu ya bo me tubila ntangu nge ta solula ti bantu yina ke zingaka kisika nge kele. Sala yonso sambu na kukumisa zola na nge sambu na Yehowa mpi sambu na bantu ngolo. Zola ya mutindu yina me luta konso metode yina nge lenda sadila sambu na kulungisa lukanu na nge ya kukumisa bantu balongoki.

Beto ke sepela ti dibaku ya nene ya kusala dipeka na dipeka ti nge. (Sef. 3:9) Bika Yehowa kusakumuna nge mingi kibeni awa ya nge ke landa kuzola bantu mpi kukumisa bo balongoki!