Bangiufula ya Batangi

Inki “ngindu” Yehowa ta tula na bantima ya baluyalu na bilumbu ke kwisa?

Kusonga 17:16, 17 ke tuba sambu na luyantiku ya mpasi ya nene nde: “Bibongo kumi yina nge monaka, mpi mbisi ya mfinda, bo ta menga nkento ya ndumba, bo ta botula bima na yandi yonso mpi bo ta bika yandi kinkonga; bo ta dia nsuni na yandi mpi bo ta yoka yandi ya mvimba na tiya. Sambu Nzambi me tula na bantima na bo ngindu ya kulungisa dibanza na yandi, ee, ya kulungisa dibanza mosi yina bo kele na yo ya kupesa kimfumu na bo na mbisi ya mfinda.” Ntete, mikanda na beto vandaka kutuba nde Yehowa ta tula na bantima ya baluyalu “ngindu” ya kufwa dibundu ya luvunu.

Kansi beto me soba ntendula yai. Yehowa ta tula na bantima ya baluyalu “ngindu” ya kupesa “kimfumu na bo na mbisi ya mfinda.” Bangiufula ya ke landa ta sadisa beto na kubakisa mutindu yo ta lungana.

Profesi yai ke tubila banani? “Nkento ya ndumba” yina bo ke binga mpi nde “Babilone ya Nene” ke monisa kimvuka ya mabundu yonso ya luvunu. “Mbisi ya mfinda ya mbwaki ya ngolo” ke monisa Nations Unies. Bo salaka yo na 1919 sambu na kutula ngemba na ntoto mpi bo vandaka kubinga yo nde Société des Nations. (Kus. 17:3-5) “Bibongo kumi” ke monisa baluyalu yonso ya ke pesaka maboko na mbisi ya mfinda.

Inki kuwakana kele na kati ya nkento ya ndumba ti mbisi ya mfinda ya mbwaki ya ngolo? Nkento ya ndumba “me vanda na zulu” ya mbisi yina ya mfinda, disongidila nde yandi ke pesa yo maboko mpi ke sosa kupusa yo na kusala luzolo na yandi.

Inki ta kumina nkento ya ndumba? Mbisi ya mfinda ti bibongo kumi yina ke sadisaka nkento ya ndumba ‘ta menga yandi.’ Bo ta botula bima na yandi yonso mpi ta monisa pwelele mambu yonso ya mbi yina yandi ke salaka. Bo ta fwa yandi kaka mutindu Yehowa tubaka. (Kus. 17:1; 18:8) Yo ke tendula nde mabundu yonso ya luvunu ta fwa. Kansi na ntwala nde yo salama, Yehowa ta pusa baluyalu na kusala kima mosi ya me salamaka ntete ve.

Yehowa ta pusa baluyalu na kusala nki? Yandi ta tula na bantima na bo “ngindu na yandi,” disongidila nde yandi ta pusa bo na ‘kupesa ngolo mpi kiyeka na bo na mbisi ya mfinda ya mbwaki ya ngolo’ yina ke monisa Nations Unies. (Kus. 17:13) Yindula fioti: Keti baluyalu ta pesa na luzolo na bo mosi ngolo mpi kiyeka na bo na mbisi ya mfinda? Ve. (Bing. 21:1; tala mpi Yezaya 44:28.) Keti bo ta pesa yandi yo malembe-malembe? Mpidina ve. Yo ta salama nswalu mpi na kintulumukina. Ebuna mbisi ya mfinda ta fwa mabundu yonso ya luvunu kimakulu.

Inki ta salama na bilumbu ke kwisa? Beto fwete yindula ve nde beto ta wa bansangu ya ke monisa nde baluyalu ke pesa maboko na Nations Unies malembe-malembe. Kima ta salama yo yai: Yehowa ta pusa baluyalu yonso na kupesa ngolo na bo na Nations Unies mpi yo ta salama na kintulumukina. Ntangu yo ta salama, yo ta monisa nde mpasi ya nene ke zola kuyantika. Na ntwala nde mambu yai kusalama, “beto fwete kangula meso mpi kutanina mabanza na beto” sambu mambu ta soba na mbala mosi ntama mingi ve.​—1 Bate. 5:6.