Keti Bantu Yonso Lenda Vanda Kiteso Mosi na Mambu ya Mbongo?

Na bansi mingi, bantu me basikaka na babala-bala sambu bo ke mona nde mambu ya mbongo kele ve ya mbote. Kipupa ya COVID-19 me kumisa mambu yango mbi kuluta; yo me sala nde mubulu kukuma mingi sambu confinement, kukonda madia, mpi kukuka ve kubaka lusadisu ya munganga me monisa pwelele luswaswanu ya nene ya kele na kati ya bamvwama mpi bansukami.

Keti kilumbu kele bampasi ya mbongo yina ke niokula nsi-ntoto bubu yai ta mana? Ee. Biblia ke tendula mambu yina Nzambi ta sala sambu na kumanisa bampasi ya beto ke kutana ti yo.

Bampasi ya mbongo yina Nzambi ta manisa

Diambu ya mpasi: Bantu me salaka ve ngidika ya mbongo yina ke lungisa bampusa ya bantu yonso.

Mutindu ya kuyidika yo: Nzambi ta katula baluyalu ya bantu mpi ta tula kimfumu na yandi; zina ya kimfumu yango kele Kimfumu ya Nzambi. Yo ta yala ntoto ya mvimba katuka na zulu.—Daniele 2:44; Matayo 6:10.

Mambu yina ta salama: Sambu yo ta yala ntoto ya mvimba, Kimfumu ya Nzambi ta twadisa mambu ya ntoto na mutindu ya kukuka. Bantu ta zingaka diaka ve na kinsukami mpi bo ta vandaka diaka ve na mpasi ya mbongo. (Nkunga 9:7-9, 18) Kansi, bo ta baka mbuma ya mbote ya kisalu na bo mpi bo ta zinga luzingu ya mbote mpi ya kiese ti mabuta na bo. Biblia ke sila nde: “Bo ta tunga banzo mpi ta zinga muna, bo ta kuna bilanga ya vinu mpi ta dia mbuma na yo. Bo ta tunga ve sambu muntu ya nkaka kuzinga, bo ta kuna mpi ve sambu bantu ya nkaka kudia.”—Yezaya 65:21, 22.

Diambu ya mpasi: Bantu lenda tina ve mambu yina ke natilaka bo bampasi mpi nzala.

Mutindu ya kuyidika yo: Na nzila ya Kimfumu na yandi, Nzambi ta katula mambu yonso ya ke salaka nde bantu kuvanda na boma mpi kukonda lutaninu.

Mambu yina ta salama: Na lutwadisu ya Nzambi, bantu ta kutanaka diaka ve ti mambu yina ke salaka nde bo to mabuta na bo kuvanda diaka ve ti bima ya mfunu ya kuzingila. Mu mbandu, bitumba, nzala, mpi bipupa ta vanda diaka ve. (Nkunga 46:9; 72:16; Yezaya 33:24) Nzambi ke tuba nde: “Bantu na mono ta zinga na kisika ya ngemba, na bisika ya kuzinga ya lutaninu mpi na bisika ya kupema ti ya pima.”—Yezaya 32:18.

Diambu ya mpasi: Mbala mingi, bantu ya bwimi mpi ya lukasi ke sadilaka bantu mambu ya nku.

Mutindu ya kuyidika yo: Bantu ya Kimfumu ya Nzambi ta longuka mutindu ya kutula zola ya kieleka sambu na bantu ya nkaka na ntwala ya mambote na bo mosi.—Matayo 22:37-39.

Mambu yina ta salama: Ntangu Kimfumu ya Nzambi ta yala, bantu yonso ta monisaka zola ya Nzambi, yina “ke sosaka ve mambote na yo mosi.” (1 Bakorinto 13:4, 5) Biblia ke tuba nde: “Bo ta sala ata mbi mosi ve mpi ta bebisa ata kima mosi ve na ngumba na mono yonso ya santu, sambu ntoto ta fuluka kibeni ti nzayilu ya Yehowaa mutindu bamasa ke fulusaka nzadi-mungwa.”—Yezaya 11:9.

Biblia ke monisa nde beto ke zinga na bilumbu ya nsuka ya nsi-ntoto yai mpi nde ntama mingi ve Nzambi ta lungisa mambu ya yandi silaka nde yandi ta manisa bampasi yonso ya mbongo.b (Nkunga 12:5) Na ntwala nde yandi manisa yo, minsiku ya Biblia lenda sadisa nge na kununga bampasi ya mbongo ya nge ke kutana ti yo bubu yai. Mu mbandu, tala masolo “Vivre avec moins” mpi “L’argent et vous.”

Bangindu ya luvunu na yina me tala Biblia mpi mambu ya mbongo

Ngindu ya luvunu: Kinsukami ta sukaka ve, sambu Yezu tubaka nde: “Beno ta vandaka ntangu yonso ti bansukami.”—Matayo 26:11.

Diambu ya kieleka: Yezu tubilaka diambu mosi ya kieleka: Kana nsi-ntoto yai ya nku me fwa ntete ve, bansukami ta vandaka kaka. Ata mpidina, nsangu ya Yezu longaka vandaka ti “nsangu ya mbote [sambu] na bansukami;” yo vandaka mpi ti lusilu ya ke monisa nde Kimfumu ya Nzambi ta manisa kinsukami kimakulu.—Luka 4:18, 43.

Ngindu ya luvunu: Bantu yina ke zola kupesa Nzambi kiese fwete vanda bansukami, sambu Yezu tubaka nde: “Kwenda kuteka bima na nge mpi pesa mbongo na bansukami.”—Matayo 19:21.

Diambu ya kieleka: Yezu vandaka ve kupesa nsiku yina balongoki na yandi fwete zitisa. Yandi vandaka kusonga leke mosi yina bimvwama na yandi vandaka kubaka dikebi na yandi yonso, mambu yina yandi fwete sala. Yezu songaka yandi na kukumisa luzingu na yandi kukonda mindondo mpi na kundima emvitasio ya kukuma longoki ya Yezu.

Ngindu ya luvunu: Nzambi ke pesaka bantu kimvwama sambu na kusakumuna bo, sambu Biblia ke tuba nde: “Lusakumunu ya Yehowa ke kumisaka muntu mvwama.”—Bingana 10:22.

Diambu ya kieleka: Na Biblia, mbala mingi “lusakumunu ya Yehowa” ke tadilaka mambu ya kimpeve, mu mbandu kuvanda ti luzingu ya mbote, kuvanda na kinduku ya mbote ti Nzambi, mpi kuvanda ti kivuvu ya kitoko sambu na bilumbu ke kwisa. (Nkunga 25:14; Yoane 17:3) Ata Nzambi pesaka bansadi na yandi ya nkaka bimvwama sambu na kusakumuna bo, bantu mingi yina kumaka Bakristu vandaka ve bamvwama. (Kuyantika 24:34, 35; Yakobo 2:5) Yezu Kristu vandaka ve ti bima mingi ya kinsuni.—Matayo 8:20.

Ngindu ya luvunu: Biblia ke longaka nde bantu fwete vanda ti bima na kimvuka, sambu yo ke tuba mambu yai sambu na Bakristu ya mvu-nkama ya ntete: “Bo vandaka kutula bima yonso kisika mosi, bo vandaka kuteka bima na bo ti bantoto na bo.”—Bisalu 2:44, 45.

Diambu ya kieleka: Baverse yai ke tubila mambu ya bo salaka na ntangu fioti sambu na kulungisa bampusa ya bantu yina katukaka kukuma Bakristu. Bantu yai kwendaka na Yeruzalemi sambu na feti ya Pantekoti. (Bisalu 2:5) Kansi, ntangu bo kumaka Bakristu, bo bikalaka na Yeruzalemi bilumbu mingi kuluta mutindu bo yidikaka, sambu bo longuka mambu mingi ya me tala dibundu na bo ya mpa. Yo yina, bampangi na bo Bakristu vukisaka bima na bo na luzolo na bo mosi sambu na kupesa Bakristu yina ya mpa madia mpi bisika ya kulala.—Bisalu 2:41, 42, 46, 47.

a Yehowa kele zina ya Nzambi mutindu Biblia ke monisaka yo.—Nkunga 83:18.

b Sambu na kuzaba sambu na nki nge lenda tula ntima na Biblia, tala disolo “Biblia—Mukanda Yina Kele ti Bansangu ya Kieleka.”