Mathayo
25 “Ningĩ Ũthamaki wa igũrũ no ũhaananio na airĩtu ikũmi arĩa mooire matawa mao magĩthiĩ gweterera mũhikania. 2 Atano maarĩ ogĩ, nao atano maarĩ akĩgu. 3 Tondũ acio akĩgu maakuuire matawa mao no matiakuuire maguta, 4 no acio ogĩ magĩĩkuuĩra matawa mao na magĩkuua maguta na cuba. 5 Na tondũ mũhikania nĩ aaikarire, othe magĩtoorio nĩ toro na magĩcũnga. 6 Gwakinya ũtukũ gatagatĩ-rĩ, gũkĩanĩrĩrũo ũũ: ‘Mũhikania arĩ hakuhĩ gũkinya! Thiĩi mũkamũtũnge.’ 7 Nao airĩtu acio othe magĩũkĩra na makĩhaarĩria matawa mao. 8 Acio akĩgu makĩra arĩa maarĩ ogĩ atĩrĩ, ‘Tũgaĩrei maguta manyu, nĩ ũndũ matawa maitũ marĩ hakuhĩ kũhora.’ 9 Acio maarĩ ogĩ makĩmacokeria ũũ: ‘No mage gũtũigana ithuothe. Kwoguo inyuĩ thiĩi kũrĩ arĩa mendagia mwĩgũrĩre maguta manyu.’ 10 Na rĩrĩa maathire kũgũra, mũhikania agĩkinya. Nao airĩtu arĩa mehaarĩirie makĩingĩra hamwe nake iruga-inĩ rĩa ũhiki, na mũrango ũkĩhingwo. 11 Thutha ũcio, airĩtu acio angĩ magĩũka, makiuga, ‘Mũnene, Mũnene, tũhingũrĩre!’ 12 Nake akĩmacokeria akĩmeera, ‘Ngũmwĩra o ma atĩrĩ, niĩ ndimũũĩ inyuĩ.’
13 “Nĩ ũndũ ũcio, ikaragai mwĩiguĩte, nĩ gũkorũo mũtiũĩ mũthenya kana thaa.
14 “Ningĩ Ũthamaki wa igũrũ ũtariĩ ta mũndũ weendaga gũthiĩ kũndũ kũraya, agĩta ngombo ciake agĩciĩhokera indo ciake. 15 Akĩnengera ĩmwe taranda* ithano, ĩngĩ igĩrĩ, na ĩngĩ ĩmwe, o ngombo kũringana na ũhoti wayo, agĩcoka agĩthiĩ. 16 O hĩndĩ ĩyo ĩrĩa yaneirũo taranda ithano ĩgĩthiĩ na ĩkĩonjorithia nacio na ĩgĩthũkũma ingĩ ithano. 17 Nayo ĩrĩa yanengerirũo igĩrĩ ĩgĩka o taguo, ĩgĩthũkũma ingĩ igĩrĩ. 18 No ngombo ĩrĩa yanengerirũo taranda ĩmwe tu ĩgĩthiĩ ĩkĩenja irima na ĩgĩthika mbeca icio cia mwathi wayo.
19 “Thutha wa ihinda iraya, mwathi wa ngombo icio agĩcoka na agĩtara mathabu nacio. 20 Nĩ ũndũ ũcio ĩrĩa yanetwo taranda ithano ĩgĩũka na ĩkĩrehe taranda ingĩ ithano, ĩkiuga, ‘Mwathi wakwa, wanjĩhokeire taranda ithano; ta rora, nĩ thũkũmĩte ingĩ ithano.’ 21 Mwathi wayo akĩmĩra atĩrĩ: ‘Nĩ wĩkĩte wega ngombo ĩno njega na njĩhokeku! Tondũ ũrarĩ mwĩhokeku maũndũ-inĩ manini, ngũkwĩhokera maũndũ maingĩ. Ingĩra gĩkeno-inĩ kĩa mwathi waku.’ 22 Nayo ĩrĩa yanetwo taranda igĩrĩ ĩgĩũka ĩkiuga, ‘Mwathi wakwa, wanjĩhokeire taranda igĩrĩ; ta rora, nĩ thũkũmĩte ingĩ igĩrĩ.’ 23 Mwathi wayo akĩmĩra atĩrĩ, ‘Nĩ wĩkĩte wega ngombo njega na njĩhokeku! Tondũ ũrarĩ mwĩhokeku maũndũ-inĩ manini, ngũkwĩhokera maũndũ maingĩ. Ingĩra gĩkeno-inĩ kĩa mwathi waku.’
24 “Mũthia-inĩ ngombo ĩrĩa yanetwo taranda ĩmwe ĩgĩũka ĩkiuga: ‘Mwathi wakwa, nĩ ndoĩ atĩ ũrĩ mũndũ mũru, ũgethaga kũrĩa ũtahandĩte na ũkongania ngano kũrĩa ũtahuuhĩte. 25 Nĩ ũndũ ũcio ngĩĩtigĩra na ngĩthiĩ ngĩthika taranda yaku. Rĩu ke taranda yaku.’ 26 Mwathi wayo akĩmĩcokeria akĩmĩra atĩrĩ: ‘Ngombo ĩno njũru na ngũta, nĩ woĩ atĩ ngethaga kũrĩa itahandĩte na ngongania ngano kũrĩa itahuuhĩte, githĩ tiguo? 27 Ũngĩaigire mbeca ciakwa bengi, nĩguo ndacoka neyo mbeca ciakwa hamwe na maciaro ma cio.
28 “‘Nĩ ũndũ ũcio-rĩ, oyai taranda ĩyo arĩ nayo mũnengere ũrĩa ũrĩ na taranda ikũmi. 29 Tondũ mũndũ o wothe ũrĩa ũrĩ na kĩndũ, nĩ akongererũo, na agĩe na ũingĩ. No ũrĩa ũtarĩ, o na kĩrĩa arĩ nakĩo nĩ agaatunywo. 30 Na mũikie ngombo ĩno njũru nja nduma-inĩ. Kũu nĩkuo ĩkaarĩragĩra na ĩkahagarania magego.’
31 “Rĩrĩa Mũrũ wa mũndũ agooka arĩ na riri wake, na araika othe hamwe nake, nĩ agaikarĩra gĩtĩ gĩake kĩa ũnene. 32 Ndũrĩrĩ ciothe nĩ igaacokanĩrĩrio mbere yake, nake nĩ akaamũrania andũ, o ta ũrĩa mũrĩithi amũranagia ngʼondu na mbũri. 33 Na nĩ akaiga ngʼondu guoko-inĩ gwake kwa ũrĩo, nacio mbũri acige guoko-inĩ kwa ũmotho.
34 “Hĩndĩ ĩyo Mũthamaki nĩ akeera acio marĩ guoko gwake kwa ũrĩo atĩrĩ: ‘Ũkai inyuĩ mũrathimĩtwo nĩ Awa, gayai Ũthamaki ũrĩa wahaarĩirio nĩ ũndũ wanyu kuuma kĩambĩrĩria* gĩa thĩ. 35 Nĩ ũndũ ndarĩ mũhũũtu na mũkĩhe gĩa kũrĩa; ndarĩ mũnyotu na mũkĩhe gĩa kũnyua. Ndarĩ mũgendi na mũkĩnyita ũgeni; 36 ndarĩ njaga na mũkĩhumba nguo. Ngĩrwara na mũkĩndumberia. Ndarĩ njera na mũgĩũka kũndora.’ 37 Nao acio athingu nĩ makaamũũria atĩrĩ: ‘Mwathani, nĩ rĩ twakuonire ũrĩ mũhũũtu na tũgĩkũhe gĩa kũrĩa, kana ũrĩ mũnyotu na tũgĩkũhe gĩa kũnyua? 38 Nĩ rĩ twakuonire ũrĩ mũgendi na tũgĩkũnyita ũgeni; kana ũrĩ njaga na tũgĩkũhumba nguo? 39 Nĩ rĩ twakuonire ũrĩ mũrwaru kana ũrĩ njera na tũgĩũka gũkũrora?’ 40 Nake Mũthamaki nĩ akaamacokeria ameere, ‘Ngũmwĩra atĩrĩ o ma, o ta ũrĩa mwekire ũmwe wa ariũ aya anyinyi a Awa, nĩ niĩ mwekire ũguo.’
41 “Ningĩ agaacoka ere acio marĩ mwena wake wa ũmotho atĩrĩ: ‘Njehererai inyuĩ mũtuĩrĩirũo nĩ Ngai, thiĩi mwaki-inĩ wa tene na tene ũrĩa ũhaarĩrĩirio Mũcukani na araika ake. 42 Nĩ ũndũ ndarĩ mũhũũtu, no mũtiaheire gĩa kũrĩa, na ndarĩ mũnyotu, no mũtiaheire gĩa kũnyua. 43 Ndarĩ mũgendi no mũtianyitire ũgeni; ndarĩ njaga no mũtiahumbire nguo; Ngĩrwara na ngĩikio njera, no mũtiokire kũndora.’ 44 Na hĩndĩ ĩyo o nao nĩ makaamũcokeria mamũũrie atĩrĩ: ‘Mwathani, nĩ rĩ twakuonire ũrĩ mũhũũtu kana ũrĩ mũnyotu kana ũrĩ mũgendi kana ũrĩ njaga kana ũrĩ mũrwaru kana ũrĩ njera na tũkĩaga gũgũtungatĩra?’ 45 Nake nĩ akaamacokeria ameere, ‘Ngũmwĩra atĩrĩ o ma, tondũ mũtiatungatĩire o na ũmwe wa ariũ aya anyinyi a Awa, nĩ niĩ mũtaatungatĩire.’ 46 Nao nĩ magaatuĩrũo gĩkuũ gĩa tene na tene, no arĩa athingu maheo muoyo wa tene na tene.”