Atũmwo
9 No Saulu, arĩ o na marũrũ maingĩ na akĩendaga kũũraga arutwo a Mwathani, agĩthiĩ kũrĩ mũthĩnjĩri-Ngai ũrĩa mũnene 2 akĩmũhoya marũa ma gũtwara thunagogi-inĩ cia Dameski nĩguo angĩona mũndũ o wothe wa Njĩra Ĩrĩa, mũthuri kana mũtumia, amũrehe Jerusalemu arĩ muohe.
3 Na rĩrĩa aathiaga, arĩ hakuhĩ Dameski, ũtheri ũkiuma igũrũ o rĩmwe ũkĩmũmũrĩka mĩena yothe, 4 nake akĩgwa thĩ na akĩigua mũgambo ũkĩmũũria atĩrĩ: “Saulu, Saulu, ũranyarira nĩkĩ?” 5 Saulu akĩũria atĩrĩ: “Nĩ we ũ, Mwathani?” Akĩmũcokeria: “Nĩ niĩ Jesu ũrĩa ũranyarira. 6 No ũkĩra ũtonye thĩinĩ wa itũũra, na nĩ ũkwĩrũo ũrĩa wagĩrĩirũo gwĩka.” 7 Nao andũ arĩa maatwaranĩte nake makĩrũgama makirĩte ki, makĩigua mũgambo ũcio no gũtirĩ mũndũ moonaga. 8 Saulu agĩcoka agĩũkĩra, no gũtirĩ kĩndũ onaga o na gũtuĩka nĩ aahingũrĩtie maitho. Nĩ ũndũ ũcio, makĩmũnyita moko makĩmũtwara Dameski. 9 Kwa ihinda rĩa matukũ matatũ gũtirĩ kĩndũ onaga, na ndaarĩire kana akĩnyua.
10 Kũu Dameski nĩ kwarĩ mũrutwo wetagwo Anania, na Mwathani akĩmwĩra kũgerera kĩoneki atĩrĩ: “Anania!” Nake akiuga: “Ĩ niĩ ũyũ, Mwathani.” 11 Mwathani akĩmwĩra: “Ũkĩra, ũthiĩ njĩra ĩrĩa ĩtagwo Nũngarũ, ũtonye nyũmba ya Judasi, ũcarie mũndũ wĩtagwo Saulu, wa kuuma Tariso. Tondũ rĩrĩ, nĩ kũhoya arahoya, 12 na nĩ onete thĩinĩ wa kĩoneki mũndũ wĩtagwo Anania agĩthiĩ harĩ we, akamũigĩrĩra moko nĩguo ahote kuona rĩngĩ.” 13 No Anania akĩmũcokeria: “Mwathani, nĩ njiguĩte kuuma kũrĩ andũ aingĩ ũhoro wa mũndũ ũcio, ũhoro wĩgiĩ maũndũ marĩa mothe moru ekĩte andũ aku arĩa aamũre thĩinĩ wa Jerusalemu. 14 Na okĩte arĩ na wathani kuuma kũrĩ athĩnjĩri-Ngai arĩa anene wa kũnyita andũ arĩa othe makayagĩra rĩĩtwa rĩaku.” 15 No Mwathani akĩmwĩra atĩrĩ: “Thiĩ, tondũ mũndũ ũcio nĩ ndĩmũthuurĩte atuĩke wa gũtwara rĩĩtwa rĩakwa kũrĩ ndũrĩrĩ, na kũrĩ athamaki, o na kũrĩ ciana cia Isiraeli. 16 Tondũ nĩ ngũmũmenyithia wega mathĩna marĩa egũcemania namo nĩ ũndũ wa rĩĩtwa rĩakwa.”
17 Kwoguo Anania agĩthiĩ, agĩtonya nyũmba ĩyo na akĩmũigĩrĩra moko akĩmwĩra: “Mũrũ wa Ithe witũ Saulu, Mwathani Jesu ũrĩa wakuumĩrĩire ũrĩ njĩra-inĩ ũgĩũka nĩwe wandũma nĩguo ũhote kuona rĩngĩ na ũiyũrũo nĩ roho mũtheru.” 18 O hĩndĩ ĩyo hakĩgwa kĩndũ gĩatariĩ ta ngaracũ kuuma maitho-inĩ make, na akĩhota kuona rĩngĩ. Agĩcoka agĩũkĩra agĩthiĩ, akĩbatithio, 19 na akĩrĩa irio akĩgĩa na hinya.
Agĩikara matukũ maigana ũna hamwe na arutwo kũu Dameski, 20 na o hĩndĩ ĩyo akĩambĩrĩria kũhunjia thĩinĩ wa thunagogi ũhoro wĩgiĩ Jesu, atĩ nĩwe Mũrũ wa Ngai. 21 No andũ arĩa othe maamũiguaga makĩgega na makĩũrania atĩrĩ: “Githĩ ũyũ ti mũndũ ũrĩa ũratharĩkagĩra arũmĩrĩri a Jesu thĩinĩ wa Jerusalemu? Na githĩ ndarokĩte gũkũ kũmanyita amatware kũrĩ athĩnjĩri-Ngai arĩa anene?” 22 No Saulu agĩthiĩ na mbere kũgĩa na hinya mũno, na nĩ aagegagia Ayahudi arĩa maaikaraga Dameski na njĩra ya kũmonia wega atĩ Jesu nĩwe Kristo.
23 Na rĩrĩ, thutha wa matukũ maingĩ, Ayahudi makĩbanga marĩ hamwe kũmũũraga. 24 No Saulu akĩmenya mũbango ũcio wao wa kũmũũraga. Nao nĩ maaroraga ihingo mũno mũthenya na ũtukũ nĩguo mamũũrage. 25 Nĩ ũndũ ũcio, arũmĩrĩri ake makĩmuoya na makĩmũruta nja mamũgereirie mwanya warĩ rũthingo-inĩ, makĩmũharũrũkia arĩ gĩkabu-inĩ.
26 Rĩrĩa aakinyire Jerusalemu, akĩgeria mũno kũnyitanĩra na arutwo, no othe nĩ maamwĩtigagĩra tondũ matietĩkagia atĩ nĩ aatuĩkĩte mũrutwo. 27 Nĩ ũndũ ũcio, Baranaba akĩmũteithĩrĩria, akĩmũtwara kũrĩ atũmwo na akĩmataarĩria maũndũ mothe megiĩ ũrĩa Saulu onete Mwathani njĩra-inĩ na akĩarĩrio nĩwe, na ũrĩa aaririe arĩ na ũcamba ũhoro wa rĩĩtwa rĩa Jesu arĩ Dameski. 28 Nake agĩikara hamwe nao, agathiaga kũndũ guothe Jerusalemu, akĩaragia ũhoro wa rĩĩtwa rĩa Mwathani arĩ na ũcamba. 29 Na nĩ aaragia na agakararania na Ayahudi arĩa maaragia Kĩngiriki, no o nĩ maageragia kũmũũraga. 30 Rĩrĩa ariũ a Ithe witũ maamenyire ũhoro ũcio, makĩmũikũrũkia Kaisarea na makĩmwĩra athiĩ Tariso.
31 Hĩndĩ ĩyo gũkĩgĩa ihinda rĩa thayũ kĩũngano-inĩ kĩa Judea guothe na Galili, na Samaria, na gĩgĩthiĩ na mbere kũgĩa na hinya; na tondũ kĩũngano nĩ gĩetigĩrĩte Jehova* na gĩgatũũra kũringana na hinya ũrĩa kĩaheagwo nĩ roho mũtheru, gĩgĩthiĩ na mbere kuongerereka.
32 Na hĩndĩ ĩrĩa Petero aatuĩkanagia gĩcigo-inĩ kĩu gĩothe, agĩkinya kũrĩ arutwo* arĩa maaikaraga Luda. 33 Agĩkora mũndũ wetagwo Ainea, ũrĩa watũũrĩte akomete ũrĩrĩ mĩaka ĩnana tondũ nĩ aakuĩte ciĩga. 34 Petero akĩmwĩra: “Ainea, Jesu Kristo nĩ akũhonia. Ũkĩra ware ũrĩrĩ waku.” O hĩndĩ ĩyo agĩũkĩra. 35 Rĩrĩa andũ arĩa othe maaikaraga Luda na Sharoni maamuonire, magĩtĩkia Mwathani.
36 Na rĩrĩ, Jopa nĩ kwarĩ mũrutwo wetagwo Tabitha, na rĩĩtwa rĩu rĩgĩtaũrũo nĩ kuuga, “Dorokasi.” Eekaga maũndũ maingĩ mega na nĩ aaheanaga iheo cia tha. 37 No matukũ-inĩ macio akĩrwara na agĩkua. Nao makĩmũthambia na makĩmũkomia nyũmba ya igũrũ. 38 Tondũ Luda kwarĩ hakuhĩ na Jopa, rĩrĩa arutwo maaiguire atĩ Petero aarĩ itũũra-inĩ rĩu, magĩtũma andũ erĩ makamũthaithe mamwĩre atĩrĩ: “Ĩtĩkĩra gũka gwitũ narua.” 39 Nake Petero agĩũkĩra agĩthiĩ nao. Rĩrĩa aakinyire, makĩmũtwara nyũmba ĩyo ya igũrũ; nao atumia a ndigwa othe magĩthiĩ harĩ we makĩrĩraga na makĩmuonagia nguo nyingĩ iria Dorokasi aatumĩte hĩndĩ ĩrĩa aarĩ hamwe nao. 40 Petero agĩcoka akĩra andũ othe moime nja, agĩturia maru akĩhoya. Agĩcoka akĩrora mwĩrĩ ũcio, akiuga: “Tabitha, ũkĩra!” Nake akĩhingũria maitho, na rĩrĩa onire Petero, agĩikara thĩ. 41 Nake akĩmũnyita guoko, akĩmũrũgamia, na agĩta arutwo* othe na atumia a ndigwa na akĩmũneana kũrĩ o arĩ muoyo. 42 Ũndũ ũcio ũkĩmenyeka Jopa guothe, na andũ aingĩ magĩtĩkia Mwathani. 43 Nake Petero agĩikara kũu Jopa matukũ manini hamwe na mũtanduki njũa ũmwe wetagwo Simoni.