Ũhoro Ũthingataine Wega

ŨTANABANGA ũhoro na njĩra ĩthingataine, nĩ ũkũbatara gũkorũo na muoroto mũna meciria-inĩ. Hihi muoroto waku nĩ kũhe andũ ũhoro wĩgiĩ ũrutani mũna, mwerekera, ngumo, mũtugo mũna, kana njĩra ya ũtũũro? Hihi ũrenda kũnyita mbaru kana kũregana na ũndũ mũna? Hihi muoroto waku nĩ gũteithia athikĩrĩria mongerere ũmenyo wao ũndũ-inĩ mũna kana moe ikinya rĩna? Ũkĩarĩria mũndũ ũmwe kana andũ aingĩ, nĩguo ũkorũo na moimĩrĩro mega, ũkũbatara kũmenya maũndũ marĩa moĩ ũhoro-inĩ ũcio na mwerekera wao harĩ guo. Warĩkia gwĩka ũguo, banga ũhoro waku na njĩra ĩgũkũhotithia gũkinyĩra muoroto waku.

Atũmwo 9:22 ĩkĩaria ũhoro wĩgiĩ ũtungata wa Saulu (Paulo) thĩinĩ wa Dameski, yugaga, ‘aahootaga Ayahudi arĩa maatũire Dameski akaruta ihooto na njĩra ĩthingataine wega atĩ Jesu nĩwe Kristo.’ Ihooto icio aarutire na njĩra yathingataine wega hihi nĩ irĩkũ? Kũringana na ũtungata wake wa thutha-inĩ thĩinĩ wa Antiokia na Thesalonike, Paulo aambire kuonania ũũma wa atĩ Ayahudi nĩ meetĩkĩtie Maandĩko ma Kĩhibirania na atĩ nĩ metĩkagĩra ũrĩa Maandĩko macio mooigĩte igũrũ rĩgiĩ Mesia. Agĩcoka thĩinĩ wa Maandĩko macio akĩhũthĩra tũcunjĩ tũrĩa twarĩ na ũhoro wĩgiĩ ũtũũro na ũtungata wa Mesia. Akĩgweta ũrĩa tũcunjĩ tũu tugĩte agĩcoka agĩtũringithania na maũndũ marĩa meekĩkĩte ũtũũro-inĩ wa Jesu. Macũngĩrĩro-inĩ, agĩtiriha na ũũma ũtangĩkararĩka, wa atĩ Jesu nĩwe Kristo, kana Mesia. (Atũm. 13:16-41; 17:2, 3) O nawe ũngĩtaarĩria ma ya Bibilia na njĩra ĩthingataine wega, no ĩkorũo na moimĩrĩro mega harĩ andũ.

Kũbanga Ũhoro. Ũhoro no ũbangwo na njĩra mwanya mwanya ithingataine wega. Ũngĩona arĩ wega, no ũhũthĩre njĩra cigana ũna irĩ hamwe. Wĩcirie imwe cia njĩra icio.

Kũbanga kũringana na tũcunjĩ. Njĩra ĩno ĩhutĩtie kũbanga ũhoro waku ũũgayanĩtie tũcunjĩ, o gacunjĩ gagagũteithia gũkinyĩra muoroto waku. Tũcunjĩ tũu no tũkorũo tũrĩ maũndũ marĩa ma bata makĩria ma gũteithia athikĩrĩria mataũkĩrũo nĩ kĩrĩa ũraarĩrĩria. No tũkorũo tũrĩ ihooto cia kũregana kana kũnyita mbaru ũndũ mũna. Maũndũ mamwe, o na angĩkorũo nĩ makonainie na ũhoro ũrĩa ũrarĩrĩria, no ũmahũthĩre kana wage, gũkĩringana na athikĩrĩria aku kana na muoroto waku.

Rora ngerekano ĩgiĩ kũbanga ũhoro kũringana na tũcunjĩ. Mĩario mĩkuhĩ ĩgiĩ rĩĩtwa rĩa Ngai no ĩkorũo na tũcunjĩ ta (1) bata wa kũmenya rĩĩtwa rĩa Ngai, (2) rĩĩtwa rĩa Ngai nĩ rĩrĩkũ, na (3) ũrĩa tũngĩtĩĩa rĩĩtwa rĩu.

Mũndũ no erute maũndũ maingĩ megiĩ kũbanga ũhoro kũringana na tũcunjĩ, angĩthuthuria mabuku marĩa mahaaragĩrio nĩ “ngombo ĩrĩa ĩĩhokekete na njũgĩ” marĩa tũhũthagĩra tũkĩruta andũ Bibilia. (Mat. 24:45) Maingĩ mamo makoragwo na icunjĩ cigana ũna, iria ingĩteithia arutwo kũgĩa na ũmenyo wĩgiĩ ũrĩa ma cia mũthingi cia Bibilia ikonainie. Mabuku marĩa makoragwo na ũhoro mũingaingĩ mahũthagĩra ciongo nini kũgayania o gĩcunjĩ. O gĩcunjĩ kĩhaaragĩria mũrutwo harĩ ũhoro ũrĩa ũrũmĩrĩire na gĩkamũteithia kwandandũra ũmenyo wake wĩgiĩ ma.

Kĩhumo na moimĩrĩro. Njĩra ĩngĩ ya kũheana ũhoro ũthingataine wega nĩ kwarĩrĩria kĩhumo kĩa ũndũ na moimĩrĩro maguo.

Njĩra ĩno no ĩteithie angĩkorũo ũrarĩria mũndũ ũmwe kana andũ gĩkundi marabatara kuonio wega moimĩrĩro ma ũndũ mekaga kana marabanga gwĩka. Thimo mũrango wa 7 nĩ kĩonereria kĩega kĩa njĩra ĩyo. Ĩtaaragĩria cara rũkũ ũrĩa kĩmwana kĩmwe gĩtaarĩ na “wĩcirio” (kĩhumo) kĩarũmĩrĩire mũmaraya, gĩkĩgetha ruo rũnene (moimĩrĩro).—Thim. 7:7.

Nĩguo ũtĩtĩrithie makĩria, no wonanie ngũrani ya moimĩrĩro moru marĩa makoraga arĩa maregaga kũrũmĩrĩra njĩra cia Jehova na moimĩrĩro mega marĩa monagwo nĩ arĩa mathĩkagĩra Jehova. Musa atongoretio nĩ roho wa Jehova, nĩ onanirie ngũrani ta ĩyo rĩrĩa aaririe na rũrĩrĩ rwa Isiraeli rũtanaingĩra Bũrũri wa Kĩĩranĩro.—Gũcok., mũr. 28.

Rĩmwe na rĩmwe nĩ wega kwambĩrĩria mĩario yaku na njĩra ya kũgweta moimĩrĩro ma ũndũ, ũcoke warĩrĩrie kĩhumo kĩaguo. Kaingĩ njĩra ĩno ĩhutĩtie kuonania thĩna na kĩhonia.

Thĩna na kĩhonia. Ũrĩ ũtungata-inĩ, ũngĩarĩrĩria thĩna ũrathumbũra andũ na wonanie atĩ nĩ harĩ na kĩhonia kĩega, ũndũ ũcio no ũtũme mũndũ ende gũgũthikĩrĩria. No ũkorũo nĩwe ũkũgwetete thĩna ũcio kana nĩ mũndũ ũcio.

No ũgwete thĩna ta wa andũ gũkũra na gũkua, kuongerereka kwa wĩki-naĩ, kana kũingĩha kwa wagi wa kĩhooto. Ndũkũbatara gũtenderia mũno atĩ nĩ kũrĩ thĩna wa mũthemba ũcio, tondũ nĩ ũndũ ũĩkaine wega. Gweta thĩna ũcio, na ũcoke wonanie kĩhonia kĩaguo thĩinĩ wa Bibilia.

Ningĩ thĩna no ũkorũo ũrĩ maũndũ ma mũndũ kĩũmbe, ta mathĩna marĩa makoraga mũciari ũrarera ciana arĩ wiki, gũkua ngoro nĩ ũndũ wa mũrimũ mũru, kana mathĩna mũndũ arahiũrania namo nĩ ũndũ wa gwĩkwo maũndũ matarĩ ma kĩhooto. Nĩguo ũkorũo na moimĩrĩro mega no mũhaka ũthikĩrĩrie wega. Bibilia nĩ ĩkoragwo na ũhoro wa bata wĩgiĩ mathĩna macio mothe. No nĩ ũkũbatara kũmĩhũthĩra na ũũgĩ. Angĩkorũo ũhoro ũrĩa ũkwarĩrĩria nĩ ũkũguna ũrĩa ũraarĩria, nĩ ũkũbatara kuonania ũũma wa maũndũ. Reke athikĩrĩria mamenye kana ũraarĩrĩria kĩhonia gĩa gũtũũra, kĩa ihinda inyinyi, kana ũrĩa mũndũ angĩhota kũhiũrania na thĩna ũtegũthira mũtabarĩre-inĩ ũyũ wa maũndũ. Ũguo nĩ kuga ũtigĩrĩre atĩ itũmi cia Maandĩko iria ũkũheana nĩ ciganĩte kũnyita mbaru ũndũ ũrĩa ũrarĩrĩria. Kwaga ũguo, mũndũ ũcio no age kuona kĩhonia kĩrĩa ũramuonia.

Kũringana na mahinda marĩa maũndũ meekĩkire. Nĩ kũrĩ ũhoro ũbataraga kũheanwo kũringana na mahinda marĩa wekĩkire. Kwa ngerekano, thĩinĩ wa ibuku rĩa Thama, Mahũra Ikũmi mandĩkĩtwo na mũtaratara kũringana na ũrĩa meekĩkaga. Thĩinĩ wa Ahibirania mũrango wa 11, mũtũmwo Paulo aandĩkire ũhoro wa arũme na atumia arĩa maarĩ na wĩtĩkio marũmanĩrĩire kũringana na mahinda marĩa maatũraga.

Ũngĩtaarĩria maũndũ ma tene mathingatanĩte kũringana na mahinda mamo, no ũteithie athikĩrĩria aku mataũkĩrũo nĩ ũrĩa maũndũ matiganĩte meekĩkaga. Njĩra ĩyo ĩhũthĩkaga maũndũ-inĩ ma mahinda maya na marĩa meekĩkire hĩndĩ ya Bibilia. Kwoguo no ũhũthĩre njĩra icio irĩ hamwe—kũringana na mahinda marĩa maũndũ meekĩkire na ya kĩhumo na moimĩrĩro. Angĩkorũo ũkwarĩrĩria maũndũ Bibilia yonanagia nĩ mageekĩka-rĩ, kũmaarĩrĩria mathingataine no ĩkorũo arĩ yo njĩra ĩrĩa hũthũ biũ harĩ athikĩrĩria gũtaũkĩrũo na kũririkana.

Kwarĩrĩria maũndũ mathingataine kũringana na ũrĩa meekĩkire ti kuga atĩ no mũhaka hingo ciothe ũrutagie kĩambĩrĩria. Rĩmwe na rĩmwe no kũgĩe na moimĩrĩro mega makĩria kwamba gũtaarĩria harĩa ũhoro ũmatĩire thĩinĩ wa rũgano rũna. Kwa ngerekano, ũgĩtarĩria ũndũ wonetwo, no ũgwete hĩndĩ ĩmwe wĩkindĩru wa mũndũ mũna harĩ Ngai wageririo. Thutha wa kũhũthĩra ũndũ ũcio kwarahũra athikĩrĩria, no ũtaarĩrie na njĩra ĩthingataine maũndũ marĩa maatongoririe harĩ magerio macio.

Kũhũthĩra tu Ũhoro Ũrĩa Ũkonainie. O njĩra ĩrĩa yothe ũkũbanga ũhoro waku nayo, tigĩrĩra atĩ ũkũhũthĩra o maũndũ marĩa makonainie naguo. Ũgĩthuurania ũhoro waku nĩ ũkũbatara kũririkana kĩongo kĩa mĩario yaku. Ningĩ nĩ wagĩrĩirũo gwĩciria ũrĩa athikĩrĩria aku matariĩ. Ũndũ mũna no ũkorũo ũrĩ wa bata harĩ athikĩrĩria amwe, ĩndĩ wage kũhũthĩka harĩ arĩa angĩ. Ningĩ no mũhaka ũtigĩrĩre atĩ ũhoro waku wothe nĩ ũgũgũteithia kũhingia muoroto waku. Kwaga ũguo, mĩario yaku no yage kũhingia muoroto, o na ĩngĩkorũo ĩrĩ na cama.

Ũgĩka ũthuthuria, no wone ũhoro mũingĩ mwega ũkonainie na kĩrĩa ũkaarĩrĩria. Harĩ ũhoro ũcio wagĩrĩirũo kũhũthĩra ũigana atĩa? Ũngĩgũmĩra athikĩrĩria na ũhoro mũingĩ mũno, no wage gũkinyĩra muoroto waku. Maũndũ manyinyi mangĩarĩrĩrio wega no maririkanwo na njĩra hũthũ gũkĩra maũndũ maingĩ marĩrĩirio ihenya ihenya. Ũguo ti kuga atĩ tũmaũndũ twa gwĩkĩra mĩario mũcamo tũtiagĩrĩirũo kũhũthĩrũo. No ndũkareke tũmaũndũ tũu tũthũkie muoroto waku. Rora ũrĩa tũmaũndũ ta tũu twahũthĩrirũo na njĩra ya ũtaũku Bibilia-inĩ thĩinĩ wa Mariko 7:3, 4 na Johana 4:1-3, 7-9.

Ũkiuma ũndũ-inĩ ũmwe ũgĩthiĩ harĩ ũrĩa ũngĩ, wĩtheme gwĩka ũguo hinahi ũndũ athikĩrĩria mekwaga kuona ũrĩa maũndũ macio makonainie. Nĩguo maũndũ macio makorũo na ũiguithanio mwega, no ũbatare kũgathĩkania ũndũ ũmwe na ũrĩa ũngĩ. Nĩguo ũmagathĩkanie no ũhũthĩre ciugo cigana ũna ironania ũkuruhanu gatagatĩ ka ũndũ ũmwe na ũrĩa ũngĩ. Thiomi-inĩ nyingĩ, ciugo nyinyi cia kũgathĩkania no ihũthĩrũo kuonania ũrĩa rĩciria rĩerũ rĩkonainie na rĩrĩa rĩkwarĩrĩirio.

Kũhũthĩra ũhoro o ũrĩa ũkonainie, na kũũbanga na njĩra ĩthingataine wega nĩ gũgũgũteithia kũhingia muoroto waku.