Maũndũ Marĩa Meekirũo nĩ Atũmwo

9 No Saulu, arĩ o na marũrũ maingĩ ma kwĩhĩtĩra arutwo a Mwathani akĩendaga kũmoraga,+ agĩthiĩ kũrĩ mũthĩnjĩri-Ngai ũrĩa mũnene 2 akĩmũhoya marũa ma gũtwara thunagogi-inĩ cia Dameski nĩguo angĩona mũndũ o wothe wa Njĩra Ĩrĩa,+ mũndũrũme kana mũtumia, amũrehe Jerusalemu arĩ muohe.

3 Na rĩrĩa aathiaga, arĩ hakuhĩ Dameski, ũtheri ũkiuma igũrũ o rĩmwe ũkĩmũmũrĩka mĩena yothe,+ 4 nake akĩgwa thĩ na akĩigua mũgambo ũkĩmũũria atĩrĩ: “Saulu, Saulu, ũraanyarira nĩkĩ?” 5 Saulu akĩũria atĩrĩ: “Nĩ we ũ, Mwathani?” Akĩmũcokeria: “Nĩ niĩ Jesu+ ũrĩa ũranyarira.+ 6 No ũkĩra ũtonye thĩinĩ wa itũũra, na nĩ ũkwĩrũo ũrĩa wagĩrĩirũo gwĩka.” 7 Nao andũ arĩa maatwaranĩte nake makĩrũgama makirĩte ki, makĩigua mũgambo ũcio no gũtirĩ mũndũ moonaga.+ 8 Saulu agĩcoka agĩũkĩra, no gũtirĩ kĩndũ oonaga o na gũtuĩka nĩ aahingũrĩtie maitho. Nĩ ũndũ ũcio, makĩmũnyita moko makĩmũtwara Dameski. 9 Kwa ihinda rĩa matukũ matatũ gũtirĩ kĩndũ oonaga,+ na ndaarĩire kana akĩnyua.

10 Kũu Dameski nĩ kwarĩ mũrutwo wetagwo Anania,+ na Mwathani akĩmwĩra kũgerera kĩoneki atĩrĩ: “Anania!” Nake akiuga: “Ĩ niĩ ũyũ, Mwathani.” 11 Mwathani akĩmwĩra: “Ũkĩra, ũthiĩ njĩra ĩrĩa ĩtagwo Nũngarũ, ũtonye nyũmba ya Judasi, ũcarie mũndũ wĩtagwo Saulu, wa kuuma Tariso.+ Tondũ rĩrĩ, nĩ kũhoya arahoya, 12 na nĩ onete kũgerera kĩoneki mũndũ wĩtagwo Anania agĩthiĩ harĩ we, akamũigĩrĩra moko nĩguo ahote kuona rĩngĩ.”+ 13 No Anania akĩmũcokeria: “Mwathani, nĩ njiguĩte kuuma kũrĩ andũ aingĩ ũhoro wa mũndũ ũcio, ũhoro wĩgiĩ maũndũ marĩa mothe moru ekĩte andũ aku arĩa aamũre thĩinĩ wa Jerusalemu. 14 Na okĩte arĩ na wathani kuuma kũrĩ anene a athĩnjĩri-Ngai wa kũnyita* andũ arĩa othe makayagĩra rĩĩtwa rĩaku.”+ 15 No Mwathani akĩmwĩra atĩrĩ: “Thiĩ, tondũ mũndũ ũcio nĩ kĩndũ kĩrĩa ndĩthuurĩire,+ wa gũtwara rĩĩtwa rĩakwa kũrĩ ndũrĩrĩ,+ na kũrĩ athamaki,+ o na kũrĩ ariũ a Isiraeli. 16 Tondũ nĩ ngũmũmenyithia wega mathĩna marĩa mothe egũcemania namo nĩ ũndũ wa rĩĩtwa rĩakwa.”+

17 Kwoguo Anania agĩthiĩ, agĩtonya nyũmba ĩyo na akĩmũigĩrĩra moko akĩmwĩra ũũ: “Mũrũ wa Ithe witũ Saulu, Mwathani Jesu ũrĩa wakuumĩrĩire ũrĩ njĩra-inĩ ũgĩũka nĩwe wandũma nĩguo ũhote kuona rĩngĩ na ũiyũrũo nĩ roho mũtheru.”+ 18 O hĩndĩ ĩyo hakĩgwa kĩndũ gĩatariĩ ta ngũũcĩ kuuma maitho-inĩ make, na akĩhota kuona rĩngĩ. Agĩcoka agĩũkĩra, na akĩbatithio, 19 na akĩrĩa irio akĩgĩa na hinya.

Agĩikara matukũ maigana ũna hamwe na arutwo kũu Dameski,+ 20 na o hĩndĩ ĩyo akĩambĩrĩria kũhunjia thĩinĩ wa thunagogi ũhoro wĩgiĩ Jesu, atĩ nĩwe Mũrũ wa Ngai. 21 No andũ arĩa othe maamũiguaga makĩgega na makĩũrania atĩrĩ: “Githĩ ũyũ ti mũndũ ũrĩa ũratharĩkagĩra arĩa makayagĩra rĩĩtwa rĩu thĩinĩ wa Jerusalemu?+ Na githĩ ndarokĩte gũkũ kũmanyita amatware* kũrĩ anene a athĩnjĩri-Ngai?”+ 22 No Saulu agĩthiĩ na mbere kũgĩa na hinya mũno, na nĩ aagegagia Ayahudi arĩa maaikaraga Dameski na njĩra ya kũmonia athingatanĩtie wega atĩ Jesu nĩwe Kristo.+

23 Na rĩrĩ, thutha wa matukũ maingĩ, Ayahudi makĩbanga njama ya kũmũũraga.+ 24 No Saulu akĩmenya njama ĩyo yao ya kũmũũraga. Ningĩ maaikaraga makĩroraga ihingo mũthenya na ũtukũ nĩguo mamũũrage. 25 Nĩ ũndũ ũcio, arutwo ake makĩmuoya na makĩmũikũrũkia ũtukũ mamũgereirie mwanya warĩ rũthingo-inĩ, makĩmũharũrũkia arĩ gĩkabu-inĩ.+

26 Rĩrĩa aakinyire Jerusalemu,+ akĩgeria mũno kũnyitanĩra na arutwo, no othe nĩ maamwĩtigagĩra tondũ matietĩkagia atĩ nĩ aatuĩkĩte mũrutwo. 27 Nĩ ũndũ ũcio, Baranaba+ akĩmũteithĩrĩria, akĩmũtwara kũrĩ atũmwo na akĩmataarĩria maũndũ mothe megiĩ ũrĩa Saulu oonete Mwathani+ njĩra-inĩ na akĩarĩrio nĩwe, na ũrĩa aaririe arĩ na ũcamba rĩĩtwa-inĩ rĩa Jesu arĩ Dameski.+ 28 Nake agĩikara hamwe nao, agathiaga kũndũ guothe* Jerusalemu, akĩaragia rĩĩtwa-inĩ rĩa Mwathani arĩ na ũcamba. 29 Na nĩ aaragia na agakararania na Ayahudi arĩa maaragia Kĩngiriki, no o nĩ maageragia kũmũũraga.+ 30 Rĩrĩa ariũ a Ithe witũ maamenyire ũhoro ũcio, makĩmũikũrũkia Kaisarea na makĩmwĩra athiĩ Tariso.+

31 Hĩndĩ ĩyo gũkĩgĩa ihinda rĩa thayũ kĩũngano-inĩ kĩa Judea guothe na Galili, na Samaria,+ na gĩgĩthiĩ na mbere kũgĩa na hinya; na tondũ kĩũngano nĩ gĩetigĩrĩte Jehova* na gĩkomĩrĩrio nĩ roho mũtheru,+ gĩgĩthiĩ na mbere kuongerereka.

32 Na hĩndĩ ĩrĩa Petero aatuĩkanagia gĩcigo-inĩ kĩu gĩothe, agĩkinya kũrĩ arĩa aamũre arĩa maaikaraga Lida.+ 33 Agĩkora mũndũ wetagwo Ainea, ũrĩa watũũrĩte akomete ũrĩrĩ mĩaka ĩnana tondũ aarĩ na mũrimũ wa gũkua ciĩga. 34 Petero akĩmwĩra: “Ainea, Jesu Kristo nĩ akũhonia.+ Ũkĩra ware ũrĩrĩ waku.”+ O hĩndĩ ĩyo agĩũkĩra. 35 Rĩrĩa andũ arĩa othe maaikaraga Lida na Sharoni maamuonire, makĩgarũrũkĩra Mwathani.

36 Na rĩrĩ, Jopa nĩ kwarĩ mũrutwo wetagwo Tabitha, na rĩĩtwa rĩu rĩataũrũo nĩ kuuga, “Dorokasi.”* Eekaga maũndũ maingĩ mega na nĩ aaheanaga iheo cia tha. 37 No matukũ-inĩ macio akĩrwara na agĩkua. Nao makĩmũthambia na makĩmũkomia rumu ya igũrũ. 38 Tondũ Lida kwarĩ hakuhĩ na Jopa, rĩrĩa arutwo maaiguire atĩ Petero aarĩ itũũra-inĩ rĩu, magĩtũma andũ erĩ makamũthaithe mamwĩre atĩrĩ: “Twagũthaitha ũũke gwitũ narua.” 39 Nake Petero agĩũkĩra agĩthiĩ nao. Rĩrĩa aakinyire, makĩmũtwara rumu ĩyo ya igũrũ; nao atumia a ndigwa othe magĩthiĩ harĩ we makĩrĩraga na makĩmuonagia nguo nyingĩ na kanjũ* iria Dorokasi aatumĩte hĩndĩ ĩrĩa aarĩ hamwe nao. 40 Petero agĩcoka akĩra andũ othe moime nja,+ agĩturia maru akĩhoya. Agĩcoka akĩrora mwĩrĩ ũcio, akiuga: “Tabitha, ũkĩra!” Nake akĩhingũria maitho, na rĩrĩa oonire Petero, agĩikara thĩ.+ 41 Nake akĩmũnyita guoko, akĩmũrũgamia, na agĩta arĩa aamũre na atumia a ndigwa na akĩmũneana kũrĩ o arĩ muoyo.+ 42 Ũndũ ũcio ũkĩmenyeka Jopa guothe, na andũ aingĩ magĩtĩkia Mwathani.+ 43 Nake Petero agĩikara kũu Jopa matukũ maingĩ hamwe na mũtanduki njũũa ũmwe wetagwo Simoni.+