Ũhoro Mwega Ũrĩa Waandĩkirũo nĩ Mathayo

21 Rĩrĩa maakuhĩrĩirie Jerusalemu na magĩkinya Bethifage Kĩrĩma-inĩ kĩa Mĩtamaiyũ, Jesu agĩtũma arutwo erĩ,+ 2 akĩmeera atĩrĩ: “Thiĩi gĩcagi-inĩ kĩĩrĩa mũrona, na mwakinya o ũguo nĩ mũkuona ndigiri njohe ĩrĩ na njaũ yayo. Mũciohore mũndehere. 3 Mũndũ angĩmũũria ũndũ, mũmwĩre atĩrĩ, ‘Mwathani nĩ aracibatara.’ Na o hĩndĩ ĩyo nĩ egũcirekereria.”

4 Ũndũ ũcio wekĩkire nĩguo ciugo iria ciaaririo nĩ mũnabii ihinge, ũrĩa woigire ũũ: 5 “Ĩrai mwarĩ wa Zayuni ũũ: ‘Atĩrĩrĩ, Mũthamaki waku nĩ aroka kũrĩ wee,+ nĩ mũhooreri+ na akuuĩtwo nĩ ndigiri, agagĩkuuo nĩ njaũ ya ndigiri, rũciaro rwa nyamũ ya gũkuua mĩrigo.’”+

6 Nĩ ũndũ ũcio arutwo acio magĩthiĩ na magĩka o ta ũrĩa Jesu aameerĩte.+ 7 Magĩtwara ndigiri ĩyo na njaũ yayo, na magĩciigĩrĩra nguo ciao cia igũrũ, nake agĩciikarĩra.+ 8 Andũ aingĩ thĩinĩ wa kĩrĩndĩ makĩara nguo ciao cia igũrũ njĩra-inĩ,+ nao arĩa angĩ maatuaga mathĩgĩ ma mĩtĩ makĩaraga njĩra-inĩ. 9 Makĩria ma ũguo, kĩrĩndĩ kĩrĩa kĩarĩ mbere yake na kĩrĩa kĩamũrũmĩrĩire kĩaanagĩrĩra gĩkiugaga ũũ: “Twahoya ũhonokie Mũrũ wa Daudi!+ Kũrathimwo nĩ ũrĩa ũroka na rĩĩtwa rĩa Jehova!*+ Twakũhoya ũmũhonokie ũrĩ kũu igũrũ mũno!”+

10 Na rĩrĩa aatonyire Jerusalemu, andũ othe a itũũra rĩu makiumũrũrũka, makĩũranagia: “Ũyũ nũũ?” 11 Nakĩo kĩrĩndĩ gĩgĩikara gĩkiugaga atĩrĩ: “Ũyũ nĩ mũnabii Jesu,+ kuuma Nazarethi ya Galili!”

12 Jesu agĩtonya thĩinĩ wa hekarũ na akĩrutũrũra arĩa othe meendagia na makagũra indo thĩinĩ wa hekarũ, na akĩngʼaũrania metha cia arĩa maakũũranagia mbeca, na itĩ cia arĩa meendagia ndutura.+ 13 Na akĩmeera: “Nĩ kwandĩke atĩrĩ, ‘Nyũmba yakwa ĩgeetagwo nyũmba ya mahoya,’+ no inyuĩ mũramĩtua ngurunga ya atunyani.”+ 14 Ningĩ andũ arĩa maarĩ atumumu na arĩa maathuaga magĩũka kũrĩ we hekarũ-inĩ, nake akĩmahonia.

15 Rĩrĩa anene a athĩnjĩri-Ngai na andĩki-watho moonire maũndũ ma magegania marĩa eekaga, na tũhĩĩ tũrĩa twaanagĩrĩra thĩinĩ wa hekarũ tũkiugaga atĩrĩ, “Twahoya ũhonokie Mũrũ wa Daudi!”+ makĩrakara+ 16 makĩmũũria atĩrĩ: “Hihi nĩ ũraigua ũrĩa aya maroiga?” Nake Jesu akĩmacokeria ũũ: “Ĩĩ nĩ ndĩraigua. Kaĩ mũtathomete ũũ: ‘Kuuma tũnua-inĩ twa ciana na tũkenge, nĩ ũtũmĩte hoime rũgooco’?”+ 17 Agĩcoka akĩmatiga akiuma itũũra rĩu agĩthiĩ Bethania, akĩraara kuo.+

18 Na rĩrĩa aacokaga itũũra-inĩ rĩu rũcinĩ tene, akĩigua ahũtiĩ.+ 19 Akĩona mũkũyũ mũkĩra-inĩ wa njĩra na agĩthiĩ harĩ guo, no gũtirĩ kĩndũ oonire tiga o mathangũ matheri,+ akĩwĩra atĩrĩ: “Kuuma rĩu ndũkaagĩa matunda rĩngĩ.”+ Naguo mũkũyũ ũcio ũkĩũma o hĩndĩ ĩyo. 20 Na rĩrĩa arutwo moonire ũguo makĩgega, makĩũria: “Kũngĩhoteka atĩa mũkũyũ ũyũ ũũme o rĩmwe?”+ 21 Jesu akĩmacokeria ũũ: “Ngũmwĩra atĩrĩ na ma, mũngĩkorũo na wĩtĩkio na mwage nganja, to ũguo ndĩrekire mũkũyũ ũcio mũrĩhotaga gwĩka, ĩndĩ o na mũngĩra kĩrĩma gĩkĩ ‘Uma haha ũthiĩ ũgwe iria-inĩ,’ noguo kũngĩkĩka.+ 22 Na maũndũ marĩa mothe mũrĩhoyaga mũrĩ na wĩtĩkio, nĩ mũrĩheagwo.”+

23 Thutha wa gũthiĩ hekarũ-inĩ, anene a athĩnjĩri-Ngai na athuri a kĩrĩndĩ magĩthiĩ kũrĩ we akĩrutana makĩmũũria atĩrĩ: “Wĩkaga maũndũ maya na wathani ũrĩkũ? Na nũũ ũkũheete wathani ũyũ?”+ 24 Nake Jesu akĩmacokeria ũũ: “O na niĩ nĩ ngũmũũria ũndũ ũmwe. Na mwanjokeria, o na niĩ nĩ ngũmwĩra njĩkaga maũndũ maya na wathani ũrĩkũ: 25 Ũbatithio wa Johana woimĩte kũ? Hihi woimĩte igũrũ kana woimĩte kũrĩ andũ?”* No makĩambĩrĩria kwĩrana ũũ: “Tũngiuga atĩrĩ, ‘Woimĩte igũrũ,’ egũtũũria, ‘Mwakĩagire kũmwĩtĩkia nĩkĩ?’+ 26 No tũngiuga, ‘Woimĩte kũrĩ andũ,’ nĩ tũgwĩtigĩra kĩrĩndĩ, nĩ gũkorũo andũ othe metĩkĩtie atĩ Johana aarĩ mũnabii.” 27 Nĩ ũndũ ũcio magĩcokeria Jesu atĩrĩ: “Tũtiũĩ.” Nake akĩmeera ũũ: “O na niĩ ndikũmwĩra njĩkaga maũndũ maya na wathani ũrĩkũ.

28 “Mũkuona atĩa? Harĩ mũndũ warĩ na ariũ erĩ. Agĩthiĩ harĩ wa mbere, akĩmwĩra atĩrĩ, ‘Mũrũ wakwa, thiĩ ũkarute wĩra mũgũnda-inĩ wa mĩthabibũ ũmũthĩ.’ 29 Nake akĩmũcokeria akĩmwĩra, ‘Ndigũthiĩ,’ no thutha-inĩ akĩĩrira na agĩthiĩ. 30 Agĩthiĩ harĩ wa kerĩ, akĩmwĩra o taguo. Ũcio akĩmũcokeria atĩrĩ, ‘Nĩ ngũthiĩ Baba,’ no ndaathiire. 31 Nĩ ũrĩkũ wekire wendi wa ithe?” Makiuga: “Nĩ ũcio wa mbere.” Jesu akĩmeera ũũ: “Ngũmwĩra o ma atĩ etia a mbeca cia igooti na ahũũri maraya magaatonya Ũthamaki-inĩ wa Ngai mbere yanyu. 32 Tondũ Johana ookire kũrĩ inyuĩ na njĩra ya ũthingu, no mũtiamwĩtĩkirie. Ĩndĩ etia a mbeca cia igooti na ahũũri maraya nĩ maamwĩtĩkirie,+ na o na thutha wa kuona ũguo, mũtiigana kwĩrira mũmwĩtĩkie.

33 “Thikĩrĩriai ngerekano ĩngĩ: Kwarĩ mũndũ warĩ mwene mũgũnda, ũrĩa wahandire mĩthabibũ mũgũnda-inĩ,+ akĩũirigĩra na akĩenja kĩhihĩro kĩa ndibei thĩinĩ waguo na agĩaka nyũmba ndaya na igũrũ;+ agĩcoka akĩũkomborithia arĩmi, na agĩthiĩ bũrũri wa kũraya.+ 34 Hĩndĩ ya kũgetha thabibũ yakinya, agĩtũma ngombo ciake kũrĩ arĩmi acio ikagĩĩre maciaro make. 35 No arĩmi acio makĩnyita ngombo ciake, makĩhũũra ĩmwe, makĩũraga ĩngĩ, na makĩhũũra ĩngĩ na mahiga.+ 36 Agĩcoka agĩtũma ngombo ingĩ, nyingĩ gũkĩra cia mbere, nao magĩciĩka o ũguo.+ 37 Mũthia-inĩ akĩmatũmĩra mũrũwe, akiuga atĩrĩ, ‘Nĩ mekũhe mũrũ wakwa gĩtĩo.’ 38 No rĩrĩa arĩmi acio moonire mũrũwe, makĩĩrana atĩrĩ, ‘Ũyũ nĩwe mũgai.+ Nĩ tũmũũragei na twĩyoere igai rĩake!’ 39 Kwoguo makĩmũnyita na makĩmũikia nja ya mũgũnda ũcio wa mĩthabibũ na makĩmũũraga.+ 40 Gũkĩrĩ ũguo-rĩ, rĩrĩa mwene mũgũnda ũcio wa mĩthabibũ agooka-rĩ, ageeka arĩmi acio atĩa?” 41 Makĩmwĩra atĩrĩ: “Akaamaniina biũ* tondũ nĩ oru, na akomborithie arĩmi angĩ mũgũnda ũcio, arĩa marĩmũheaga maciaro hĩndĩ ĩrĩa yagĩrĩire.”

42 Jesu akĩmoria atĩrĩ: “Kaĩ mũtarĩ mwathoma thĩinĩ wa Maandĩko atĩ, ‘Ihiga rĩrĩa aaki maaregire, nĩrĩo rĩtuĩkĩte ihiga rĩrĩa inene rĩa kona.*+ Ũndũ ũcio uumĩte kũrĩ Jehova,* na nĩ wa magegania maitho-inĩ maitũ’?+ 43 Nĩkĩo ngũmwĩra atĩrĩ, Ũthamaki wa Ngai nĩ ũkweherio kũrĩ inyuĩ na ũheo rũrĩrĩ rũrĩkoragwo na maciaro. 44 Ningĩ, mũndũ ũrĩa ũkaagwĩra ihiga rĩu nĩ akaahehenjwo.+ Nake ũrĩa wothe ũkaagwĩrũo nĩrĩo, nĩ rĩkaamũmemenda.”+

45 Rĩrĩa anene a athĩnjĩri-Ngai na Afarisai maaiguire ngerekano ciake, makĩmenya atĩ aaragia igũrũ rĩao.+ 46 O na gũtuĩka nĩ meendaga kũmũnyita, nĩ meetigagĩra kĩrĩndĩ tondũ gĩetĩkĩtie atĩ aarĩ mũnabii.+