Ũhoro Mwega Ũrĩa Waandĩkirũo nĩ Mathayo

25 “Ningĩ Ũthamaki wa igũrũ no ũhaananio na airĩtu ikũmi arĩa mooire matawa mao+ magĩthiĩ gũtũnga mũhikania.+ 2 Atano maarĩ akĩgu, nao atano maarĩ ogĩ.+ 3 Nĩ gũkorũo acio akĩgu maakuuire matawa mao no matiakuuire maguta, 4 no acio ogĩ magĩkuua maguta ndigithũ-inĩ ciao o hamwe na matawa mao. 5 Na tondũ mũhikania nĩ aaikarire, othe magĩcũnga na magĩkoma. 6 Na ũtukũ gatagatĩ-rĩ, gũkĩanĩrĩrũo ũũ: ‘Mũhikania nĩ mũũku! Thiĩi mũkamũtũnge.’ 7 Nao airĩtu acio othe magĩũkĩra na makĩhaarĩria matawa mao.+ 8 Acio akĩgu makĩra arĩa maarĩ ogĩ atĩrĩ, ‘Tũgaĩrei maguta manyu, nĩ ũndũ matawa maitũ marĩ hakuhĩ kũhora.’ 9 Acio maarĩ ogĩ makĩmacokeria ũũ: ‘No mage gũtũigana ithuothe. Kwoguo inyuĩ thiĩi kũrĩ arĩa mendagia maguta mwĩgũrĩre manyu.’ 10 Na rĩrĩa maathiire kũgũra maguta, mũhikania agĩkinya. Nao airĩtu acio meehaarĩirie makĩingĩra hamwe nake iruga-inĩ rĩa ũhiki,+ na mũrango ũkĩhingwo. 11 Thutha ũcio, airĩtu acio angĩ magĩũka, makiuga atĩrĩ, ‘Mũnene, Mũnene, tũhingũrĩre!’+ 12 Nake akĩmacokeria akĩmeera, ‘Ngũmwĩra o ma atĩrĩ, niĩ ndimũĩ.’

13 “Nĩ ũndũ ũcio, ikaragai mwĩhũgĩte,+ nĩ gũkorũo mũtiũĩ mũthenya kana thaa.+

14 “Nĩ gũkorũo nĩ ta ũrĩa mũndũ ũmwe weendaga gũthiĩ bũrũri wa kũraya eetire ngombo ciake agĩciĩhokera indo ciake.+ 15 Akĩnengera ĩmwe taranda* ithano, ĩngĩ igĩrĩ, na ĩngĩ ĩmwe, o ngombo kũringana na ũhoti wayo, agĩcoka agĩthiĩ bũrũri wa kũraya. 16 O hĩndĩ ĩyo ĩrĩa yaneirũo taranda ithano ĩgĩthiĩ na ĩkĩonjorithia nacio na ĩgĩthũkũma ingĩ ithano. 17 Nayo ĩrĩa yanengerirũo igĩrĩ ĩgĩka o taguo, ĩgĩthũkũma ingĩ igĩrĩ. 18 No ngombo ĩrĩa yanengerirũo taranda ĩmwe tu ĩgĩthiĩ ĩkĩenja irima na ĩgĩthika mbeca icio cia* mwathi wayo.

19 “Thutha wa ihinda iraya, mwathi wa ngombo icio agĩcoka na agĩtara mathabu nacio.+ 20 Nĩ ũndũ ũcio ĩrĩa yanetwo taranda ithano ĩgĩũka na ĩkĩrehe taranda ingĩ ithano, ĩkiuga, ‘Mwathi wakwa, wanjĩhokeire taranda ithano; ta rora, nĩ thũkũmĩte ingĩ ithano.’+ 21 Mwathi wayo akĩmĩra atĩrĩ: ‘Nĩ wĩkĩte wega ngombo ĩno njega na njĩhokeku! Ũrarĩ mwĩhokeku maũndũ-inĩ manini. Nĩ ngũkwĩhokera maũndũ maingĩ.+ Ingĩra gĩkeno-inĩ kĩa mwathi waku.’+ 22 Nayo ĩrĩa yanetwo taranda igĩrĩ ĩgĩũka ĩkiuga, ‘Mwathi wakwa, wanjĩhokeire taranda igĩrĩ; ta rora, nĩ thũkũmĩte ingĩ igĩrĩ.’+ 23 Mwathi wayo akĩmĩra atĩrĩ, ‘Nĩ wĩkĩte wega ngombo ĩno njega na njĩhokeku! Ũrarĩ mwĩhokeku maũndũ-inĩ manini. Nĩ ngũkwĩhokera maũndũ maingĩ. Ingĩra gĩkeno-inĩ kĩa mwathi waku.’

24 “Mũthia-inĩ ngombo ĩrĩa yanetwo taranda ĩmwe ĩgĩũka ĩkiuga: ‘Mwathi wakwa, nĩ ndoĩ atĩ ũrĩ mũndũ mũhinyanĩrĩria, ũgethaga kũrĩa ũtahandĩte na ũgacokanĩrĩria kĩrĩa ũtahuuhĩte.+ 25 Nĩ ũndũ ũcio ngĩĩtigĩra na ngĩthiĩ ngĩthika taranda yaku. Rĩu ke kĩrĩa gĩ gĩaku.’ 26 Mwathi wayo akĩmĩcokeria atĩrĩ: ‘Ngombo ĩno njũru na ngũũta, nĩ woĩ atĩ ngethaga kũrĩa itahandĩte na ngacokanĩrĩria kĩrĩa itahuuhĩte, githĩ tiguo? 27 Ũngĩaigire mbeca ciakwa* bengi, nĩguo ndacoka neyo mbeca ciakwa hamwe na maciaro ma cio.

28 “‘Nĩ ũndũ ũcio-rĩ, mũtunyei taranda ĩyo mũnengere ũrĩa ũrĩ na taranda ikũmi.+ 29 Tondũ mũndũ o wothe ũrĩa ũrĩ na kĩndũ, nĩ akoongererũo, na agĩe na ũingĩ. No ũrĩa ũtarĩ, o na kĩrĩa arĩ nakĩo nĩ agaatunywo.+ 30 Na mũikie ngombo ĩno ĩtarĩ kĩene nja nduma-inĩ. Kũu nĩkuo ĩkũrĩrĩra na ĩhagaranie magego.’

31 “Rĩrĩa Mũrũ wa mũndũ+ agooka arĩ na riri wake, na araika othe hamwe nake,+ nĩ agaaikarĩra gĩtĩ gĩake kĩa ũnene kĩrĩ na riri. 32 Ndũrĩrĩ ciothe nĩ igaacokanĩrĩrio mbere yake, nake nĩ akaamũrania andũ, o ta ũrĩa mũrĩithi amũranagia ngʼondu na mbũri. 33 Na nĩ akaaiga ngʼondu+ guoko-inĩ gwake kwa ũrĩo, nacio mbũri aciige guoko-inĩ kwa ũmotho.+

34 “Hĩndĩ ĩyo Mũthamaki nĩ akeera acio marĩ guoko-inĩ gwake kwa ũrĩo atĩrĩ: ‘Ũkai inyuĩ mũrathimĩtwo nĩ Awa, gayai Ũthamaki ũrĩa wahaarĩirio nĩ ũndũ wanyu kuuma kĩambĩrĩria gĩa thĩ. 35 Nĩ ũndũ ndarĩ mũhũtu na mũkĩhe gĩa kũrĩa; ndarĩ mũnyotu na mũkĩhe gĩa kũnyua. Ndarĩ mũgeni na mũkĩnyita ũgeni;+ 36 ndarĩ njaga* na mũkĩhumba nguo.+ Ndarĩ mũrwaru na mũkĩndumberia. Ndarĩ njera na mũgĩũka kũndora.’+ 37 Nao acio athingu nĩ makaamũũria atĩrĩ: ‘Mwathani, nĩ rĩ twakuonire ũrĩ mũhũtu na tũgĩkũhe gĩa kũrĩa, kana ũrĩ mũnyotu na tũgĩkũhe gĩa kũnyua?+ 38 Nĩ rĩ twakuonire ũrĩ mũgeni na tũgĩkũnyita ũgeni, kana ũrĩ njaga na tũgĩkũhumba nguo? 39 Nĩ rĩ twakuonire ũrĩ mũrwaru kana ũrĩ njera na tũgĩũka gũkũrora?’ 40 Nake Mũthamaki nĩ akaamacokeria ameere, ‘Ngũmwĩra atĩrĩ o ma, o ta ũrĩa mwekire ũmwe wa ariũ aya anyinyi a Awa, nĩ niĩ mwekire ũguo.’+

41 “Ningĩ agaacoka ere acio marĩ mwena wake wa ũmotho atĩrĩ: ‘Njehererai+ inyuĩ andũ aya arume, thiĩi mwaki-inĩ wa tene na tene+ ũrĩa ũhaarĩrĩirio Mũcukani na araika ake.+ 42 Nĩ ũndũ ndarĩ mũhũtu, no mũtiaheire gĩa kũrĩa, na ndarĩ mũnyotu, no mũtiaheire gĩa kũnyua. 43 Ndarĩ mũgeni no mũtianyitire ũgeni; ndarĩ njaga no mũtiahumbire nguo; ndarĩ mũrwaru na ngĩikio njera, no mũtiokire kũndora.’ 44 Na hĩndĩ ĩyo o nao nĩ makaamũcokeria mamũũrie atĩrĩ: ‘Mwathani, nĩ rĩ twakuonire ũrĩ mũhũtu kana ũrĩ mũnyotu kana ũrĩ mũgeni kana ũrĩ njaga kana ũrĩ mũrwaru kana ũrĩ njera na tũkĩaga gũgũtungata?’ 45 Nake nĩ akaamacokeria ameere, ‘Ngũmwĩra atĩrĩ o ma, tondũ mũtiatungatire o na ũmwe wa ariũ aya anyinyi a Awa, nĩ niĩ mũtaatungatire.’+ 46 Nao nĩ makeeherio* tene na tene,+ no arĩa athingu maheo muoyo wa tene na tene.”+