“Matiatindanĩire”

KŨHŨTHĨRĨRIA mĩkaana no kũrehe ũgwati.

Mũciĩ mũnene wa Darwin, Australia, weharagĩria gũkũngũĩra thigũkũ cia mwaka wa 1974, hĩndĩ ĩrĩa ingʼoora ciagambirio kuonania atĩ gwĩ kĩhuhũkanio kĩarĩ hakuhĩ. No Darwin gũtianangĩtwo nĩ kĩhuhũkanio gwa kahinda ka mĩaka hakuhĩ 30. Nĩkĩ kĩngĩatũmire kũanangwo rĩu? Aikari aingĩ a kuo mationaga ta kũngĩakorirũo na ũgwati mũnene o kinya hĩndĩ ĩrĩa huho nene mũno ciambĩrĩirie kwambũra mabati na kũmomora thingo cia nyũmba iria andũ mekunĩte. Gũgĩkinya rũcinĩ rũu rũngĩ, mũciĩ wothe wanangĩtwo ũgathira.

Kũrĩ mweri wa 11, mwaka wa 1985, kĩrĩma kĩmwe bũrũri-inĩ wa Colombia nĩgĩatuthũkire. Rĩrĩa mbarabu yaringũkire nĩ kwagĩire na ndoro nyingĩ ĩrĩa yaitĩkire ta kĩguũ na ĩgĩthika biũ andũ makĩria ma 20,000 arĩa maikaraga Armero. Kaĩ gũtaarĩ ũndũ ũngĩamamenyithĩtie mbere ĩyo? Kĩrĩma kĩu nĩkĩainainĩte ihinda rĩa mĩeri mĩingĩ. No tondũ andũ acio nĩmamenyerete gũtũũra hakuhĩ nakĩo-rĩ, aingĩ matiamakaga. Thirikari nĩyaheetwo mũkaana atĩ nĩgũkuoneka ũgwati, no gũtirĩ ũndũ yekire. Imenyithia kameme-inĩ cieraga andũ matikae gwĩtigĩra. Gĩkeero gĩa kanitha nĩkĩahũthĩrirũo kwĩra andũ mahorere. Hwaĩ-inĩ ũcio gũgĩkorũo na mĩtuthũko ĩĩrĩ mĩnene. Wee nĩ ũngĩatiganĩirie indo ciaku na wĩthare? No andũ anini tu metharire, kahinda gagĩkorũo gathira.

Kaingĩ andũ arĩa matuĩragia ũhoro wa mahiga nĩmahotaga kũmenya kũrĩa gũkũgĩa na gĩthingithia. No matingĩhota kũmenya rĩrĩa gĩkũgĩa. Mwaka wa 1999, ithingithia nĩcioragire andũ hakuhĩ 20,000 thĩ yothe. Aingĩ a arĩa maakuire matieciragia no makorererũo nĩ ũndũ ta ũcio.

Wee Wĩkaga Atĩa Rĩrĩa Ngai We Mwene Aheana Mĩkaana?

Bibilia yatarĩirie o tene maũndũ marĩa mangĩonanirie mahinda ma kũrigĩrĩria. Hamwe na ũguo-rĩ, nĩ ĩtwĩraga tũririkane “matukũ ma Nuhu.” “Matukũ marĩa marĩ mbere ya kĩguũ kĩrĩa kĩnene,” andũ maarĩ mĩhangʼo-inĩ yao ya ũtũũro o ta mũtugo, ona gũtuĩka, hatarĩ nganja, no mamakagio nĩ ũrĩa wĩki naĩ watheremete. No ona maheo mũkaana nĩ Ngai kũgerera kwĩ ndungata yake Nuhu, “matiatindanĩire nginya rĩrĩa kĩguũ gĩokire na gĩkĩmatwara othe.” (Mathayo 24:37-39, NW) Wee nĩ ũngĩathikĩrĩirie mũkaana ũcio? Nĩ ũreka ũguo rĩu?

Ĩ korũo watũũraga Sodomu, hakuhĩ na Iria rĩa Cumbĩ hĩndĩ ya Loti, mũihwa wa Iburahimu? Bũrũri ũcio wahaanaga ikenero. Mũciĩ wa Sodomu warĩ na ũtonga mũingĩ. Andũ akuo matiamakagio nĩ kĩĩ kana kĩĩ. Hĩndĩ ya matukũ ma Loti, “andũ maakorirũo makĩrĩa na makĩnyua, na makĩgũra indo na magĩciendia, na makĩhanda, na magĩaka nyũmba.” Ningĩ mahinda mau andũ maarĩ aganu magakĩria njano. Wee nĩ ũngĩathikĩrĩirie rĩrĩa Loti akaanagia andũ mĩtugo ĩo mĩũru? Nĩ ũngĩathikĩrĩirie akwĩra atĩ Ngai nĩ atuĩte itua rĩa kũnina Sodomu? Kana ũngĩonire ta arĩ itherũ o ta ũrĩa anake arĩa mendaga kũgũra airĩtu ake monaga? Hihi no gũkorũo ũngĩambĩrĩirie kũũra ũcoke wĩhũgũre ta mũtumia wa Loti? Ona gũtuĩka amwe matiathĩkĩire mũkaana ũrĩa mahetwo-rĩ, mũthenya ũrĩa Loti aumire Sodomu, “gũkiura mwaki ta mbura, o na ũbiriti, ciumĩte matu-inĩ, ikĩmanina othe.”—Luka 17:28, 29.

Andũ aingĩ ũmũthĩ matitindanagĩra na mĩkaana. No ngerekano ici ciandĩkĩtwo Kiugo-inĩ kĩa Ngai nĩ getha itũtaare, na itũĩkĩre ngoro TŨIKARAGE TWĨHŨGĨTE!

[Mbica/Gathandũkũ karatathi ka 22]

Nĩ Ma Nĩ Kwarĩ na Kĩguũ Kĩnene Thĩ Yothe?

Andũ aingĩ arĩa marutaga ũhoro mahĩtia moigaga gũtiarĩ. No Bibilia yugaga nĩ kwarĩ.

Jesu Kristo we mwene nĩ aaririe ũhoro wakĩo, aarĩ muoyo rĩrĩa gĩokire na nĩ akĩonire arĩ igũrũ.

[Mbica/Gathandũkũ karatathi ka 23]

Nĩ Ma Sodomu na Gomora Nĩkwanangirũo?

Ũthuthuria wa indo iria ithikũrĩtio cia tene nĩwĩkĩrĩire ũira ũndũ ũcio.

Mabuku ma maũndũ ma tene nĩmagwetaga ũndũ ũcio.

Jesu Kristo nĩ atĩtĩrithirie ũndũ ũcio, na ningĩ nĩũgwetetwo mabuku-inĩ mwanya mwanya 14 ma Bibilia.