Ĩpuro

Kũrĩ hĩndĩ kĩũmbe kĩu kĩa roho kĩarĩ na ũrata na Jehova ĩndĩ gĩkĩambĩrĩria kwĩrirĩria gũthathaiyo nĩ andũ. Handũ ha kweheria merirĩria macio, gĩkĩreka makũre nginya magĩciara mehia. (Jak. 1:​14, 15) Kĩũmbe kĩu nĩ Shaitani, ũrĩa ‘ũtaigana kwĩrũgamania na ũhoro-ũrĩa-wa-ma.’ Nĩ aaremeire Jehova na nĩ ũndũ ũcio agĩtuĩka ‘ithe wa maheeni.’ (Joh. 8:​44) Kuuma o rĩrĩa Shaitani aaremeire Jehova, akoretwo arĩ thũ yake ĩrĩa nene mũno na agakorũo arĩ thũ ya andũ. Marĩĩtwa marĩa aaheirũo nĩ monanagia wega ũrĩa waganu wake ũigana. Rĩĩtwa Shaitani nĩ kuuga “Mũkararia,” kuonania atĩ kĩũmbe kĩu kĩũru kĩa roho gĩtinyitaga mbaru ũnene wa Ngai, ithenya rĩa ũguo nĩ kĩũthũire na nĩ kĩrũaga naguo. Makĩria ma kĩndũ kĩngĩ o gĩothe, Shaitani endaga ũnene wa Jehova ũthire. w15 5/15 1:1, 2

Makĩria ma gũtũteithia kuona kũrĩa tũngĩagagĩria maũndũ maitũ ma kĩĩroho, kwĩruta Bibilia nĩ gũtũteithagia kũmenya ngumo cia Jehova na ũndũ ũcio ũgatũma tũmwende mũno. Na rĩrĩa wendo witũ harĩ we wongerereka, wendo wake gũtwerekera noguo wongererekaga, na nĩ ũndũ ũcio ũrata witũ nake ũkarũma biũ. O na kũrĩ ũguo, nĩguo tũkuhĩrĩrie Jehova, no mũhaka tũkorũo na muoroto ũrĩa wagĩrĩire hĩndĩ ĩrĩa tũreruta Kiugo gĩake. Rĩandĩko rĩa Johana 17:3 riugaga ũũ: ‘Naguo muoyo wa tene na tene nĩ atĩrĩ, nĩ makũmenye wee Ngai ũrĩa ũmwe wa ma, na mamenye ũrĩa warekirie, na nĩwe Jesu Kristo.’ Kwoguo muoroto witũ ndwagĩrĩirũo gũkorũo ũrĩ kũgĩa tu na ũmenyo, no wagĩrĩirũo gũkorũo ũrĩ ‘kũmenya’ wega ngumo cia Jehova. (Tham. 33:13; Thab. 25:4) Twamenya Jehova wega makĩria, tũtirĩthumbũkaga nĩ ũndũ wa kwaga gũtaũkĩrũo biũ nĩ maũndũ mamwe marĩa eekire magwetetwo thĩinĩ wa Bibilia. w15 4/15 3:6-8

Kahinda kanini kahĩtũku, athuri amwe arĩa makoretwo na moimĩrĩro mega harĩ gũteithia ariũ a Ithe witũ makũre kĩĩroho, nĩ mooririo njĩra ĩrĩa mahũthagĩra rĩrĩa maramamenyeria. O na gũtuĩka maũndũ ma athuri acio matihaanaine, othe maaheanire ũtaaro ũhaanaine. Ũndũ ũcio ũronania atĩa? Njĩra ya Kĩĩmandĩko ya kũmenyeria andũ ĩhũthĩkaga ‘makanitha-inĩ kana ciũngano-inĩ ciothe kũndũ guothe,’ o ta ũrĩa yahũthĩkaga matukũ-inĩ ma mũtũmwo Paulo. Mũthuri nĩ ekũbatara kũhaarĩria ngoro ya mũndũ ũrĩa aramenyeria. O ta ũrĩa mũrĩmi mbere ya kũhanda mbeũ abataraga gũcimbũria tĩri nĩguo ũhũthe, noguo mũthuri ekũbatara kũhaarĩria ngoro ya ũrĩa aramenyeria mbere ya kũmũruta maũndũ merũ. Nĩ ũndũ ũcio-rĩ, mũthuri angĩhaarĩria atĩa ngoro ya mũndũ ũrĩa aramenyeria? No eke ũguo angĩhũthĩra njĩra ta ĩrĩa yahũthĩrirũo nĩ Samueli rĩrĩa aahaaragĩria Saulu gũtuĩka Mũthamaki wa Isiraeli.​—1 Sam. 9:​15-27; 10:1. w15 4/15 1:11, 12

Maũndũ maingĩ marĩa marekwo gũkũ thĩ, nĩ mũgarũ na ithimi iria irĩ thĩinĩ wa Bibilia. Ũguo ti kuuga atĩ maũndũ mothe marĩa marĩ thĩinĩ wa thĩ nĩ moru. O na kũrĩ ũguo, nĩ twagĩrĩirũo nĩ kũmenya atĩ Shaitani nĩ arĩhũthagĩra thĩ yake kwarahũra merirĩria maitũ, na kũgeria gũtũingĩria mehia-inĩ kana gũtũma twende maũndũ ma thĩ na tũtiganĩrie ũthathaiya wa Jehova. (1 Joh. 2:​15, 16) Akristiano amwe a karine ya mbere nĩ meendire maũndũ ma gũkũ thĩ. Kwa ngerekano, Paulo aandĩkire ũũ: “Dema nĩaandiganĩirie, nĩ ũrĩa endete maũndũ ma mahinda maya.” (2 Tim. 4:10) Bibilia ndiugĩte nĩ maũndũ marĩkũ ma gũkũ thĩ Dema eendire magĩtũma atiganĩrie Paulo. No kũhoteke nĩ aambĩrĩirie kwenda mũno indo cia kĩĩmwĩrĩ gũkĩra maũndũ ma kĩĩroho. Angĩkorũo ũguo nĩguo kwarĩ, Dema nĩ orirũo nĩ mĩeke ya bata ya kĩĩroho. Ma nĩ atĩ, thĩ ndĩngĩahotire kũhe Dema kĩndũ kĩa bata gũkĩra irathimo iria Jehova angĩamũheire korũo nĩ aathire na mbere gũtungata hamwe na Paulo.​​—Thim. 10:22. w15 5/15 2:10, 11

Jesu nĩ aataũkagĩrũo nĩ ruo rwa andũ arĩa angĩ, nginya arĩa maahiũranagia na maũndũ we ataacemanĩtie namo. Kwa ngerekano, nĩ aamenyaga atĩ andũ aingĩ maarĩ na ũtũũro mũritũ na nĩ meetigĩrĩte atongoria a ndini. Atongoria acio nĩ maamahenagia na makamatitikithia mawatho maingĩ ma gwĩtungĩra. (Mat. 23:4; Mar. 7:​1-5; Joh. 7:​13) Gũtirĩ hĩndĩ Jesu aakoretwo arĩ na guoya o na kana akaheenio, no nĩ angĩahotire gũtaũkĩrũo nĩ maũndũ we ataacemanĩtie namo. Nĩ ũndũ ũcio, “rĩrĩa onire mĩrũrũngano ya andũ, akĩmaiguĩra tha, nĩ ũndũ nĩmaanyamarĩkĩte, na makahurunjũka ta mbũri itarĩ na mũrĩithi.” (Mat. 9:​36) O ta Ithe, Jesu nĩ onanirie wendo na tha. Jesu ona andũ makĩnyamarĩka, nĩ aamonagia wendo. Nĩ ũndũ ũcio, onanirie wendo o ta wa Ithe. Kwa ngerekano, hĩndĩ ĩmwe thutha wa Jesu na atũmwo ake gũkorũo marutĩte wĩra mũnene wa kũhunjia, meendaga gũthiĩ handũ hatarĩ andũ nĩguo makahurũke. Ĩndĩ, akĩona kĩrĩndĩ kĩnene kĩmwetereire, agĩkĩiguĩra tha, “agĩitĩka kũmaruta mohoro maingĩ.”​​—Mar. 6:​30, 31, 34. w15 5/15 4:3, 4

Njĩra ĩrĩa nene mũno Jehova onanirie nayo ũũgĩ wake mũingĩ nĩ kũgerera kũũmba Mũriũ wake wa irigithathi. Jesu aarutithanagia wĩra na Ithe arĩ “njorua ya wĩra.” No tũhũũre mbica gĩkeno na kũiganĩra kũrĩa aagĩire nakuo rĩrĩa Ithe “aathondekire igũrũ,” na ‘agĩkurura mĩkaro ya gĩtina gĩa thĩ.’ O na kũrĩ ũguo, harĩ indo iria ciothe ciombĩtwo, ‘kĩrĩa gĩakenagia Jesu makĩria nĩ rũruka rwa andũ.’ (Thim. 8:​22-​31) Hatarĩ nganja, kuuma o kĩambĩrĩria, Jesu nĩ eendete andũ mũno. Thutha-inĩ, nĩ ũndũ wa wĩhokeku na wendo wake harĩ Ithe, o hamwe na wendo wake mũnene harĩ “rũruka rwa andũ,” Mũriũ ũcio wa Irigithathi wa Ngai nĩ “ecuumire kana akĩĩnyihia,” agĩtuĩka wa kũhaananio na andũ a gũkũ thĩ. Eekire ũguo nĩguo arute muoyo wake “ũtuĩke wa gũkũũra andũ aingĩ.” (Afil. 2:5-8; Mat. 20:28) Na githĩ ũcio ti wendo mũnene mũno harĩ andũ! w15 6/15 2:1, 2

Hihi nĩ ũkenaga nĩ maũndũ marĩa Jehova agwĩkĩire? Angĩkorũo nĩguo-rĩ, nĩ wega ũmwĩyamũrĩre na ũbatithio. Ririkana atĩ, kwĩyamũrĩra Ngai nĩ mwĩhĩtwa wa kuuma ngoro atĩ ũgũtũũra ũmũtungatagĩra tene na tene o na kũngĩthiĩ atĩa. Hihi nĩ wagĩrĩirũo gwĩtigĩra kũmwĩyamũrĩra? Aca! Menya atĩ Jehova nĩ akwendete mũno, na nĩ “arathimaga arĩa mamũcaragia na kĩyo.” (Ahib. 11:6) Kwĩyamũrĩra Jehova na kũbatithio gũtingĩthũkia ũtũũro waku. Ithenya rĩa ũguo, gũtungatĩra Jehova nĩ kwagĩria gũkwagĩria ũtũũro waku. Jehova endaga ũkorũo na ũtũũro mwega. No Shaitani nĩ mwĩyendi na ndakũrũmbũyagia. Gũtirĩ kĩndũ kĩega aheaga arĩa mamũnyitaga mbaru. Akũmahe amarutĩre kũ? w16.03 2:16, 18, 19

Nĩguo ũrata waku na Jehova ũkorũo ũrĩ mũrũmu, no mũhaka ũkorũo na ma atĩ nĩ athikagĩrĩria mahoya. Ta wĩcirie ũndũ ũyũ: Jesu atanoka gũkũ thĩ, nĩ eeyonagĩra Jehova agĩcokia mahoya ma ndungata ciake gũkũ thĩ. Hĩndĩ ya ũtungata wake gũkũ thĩ, Jesu nĩ aahũthĩrire mahoya marĩ njĩra yake ya kwaranĩria na Ithe. O na kũrĩ hĩndĩ aahũthĩrire ũtukũ mũgima akĩhoya. Hihi nĩ aangĩekire ũguo korũo nĩ eeciragia atĩ Jehova ndaramũthikĩrĩria? (Luk. 6:​12; 22:​40-​46) Hihi nĩ angĩarutĩte arutwo ake kũhoya korũo eeciragia atĩ mahoya no kĩndũ gĩa kũhooreria meciria tu? Hatarĩ nganja, Jesu nĩ aamenyaga atĩ Jehova nĩ athikagĩrĩria mahoya. O na ithuĩ no tũkorũo na ma atĩ Jehova nĩ “mũigua wa mahoya.”​​—Thab. 65:2. w15 4/15 3:11, 13

Rĩrĩa ciana ciaku iraigua ũkĩhoya wĩnyihĩtie nĩ irĩĩrutaga kwĩhoka Jehova. Mwarĩ wa Ithe witũ Ana ũrĩa ũikaraga Brazil oigire ũũ: “Rĩrĩa kũrĩ na mathĩna, ta hĩndĩ ĩmwe cũcũ na guka maarĩ arũaru, aciari akwa nĩ maahoyaga Jehova amahe hinya wa kũhiũrania na thĩna ũcio na makamũhoya ũũgĩ nĩguo mahote gũtua matua mega. O na rĩrĩa marĩ na mĩtangĩko mĩnene atĩa meehokaga Jehova. Nĩ ũndũ ũcio nĩ ndeerutire kwĩhoka Jehova.” Rĩrĩa mũrahoya na ciana ciaku, ndũkahoyage tu nĩ ũndũ wa cio. Hoyaga Jehova agũteithie o nawe. No ũmũhoe agũteithie ũkaahota kũhoya rũtha wĩra-inĩ nĩgetha ũthiĩ kĩgomano, akũhe ũmĩrĩru ũhote kũhunjĩria mũndũ wa itũũra rĩanyu, kana agũteithie na njĩra ingĩ. Wĩhokage Jehova, na ciana ciaku o nacio nĩ irĩĩrutaga gwĩka ũguo. w15 11/15 1:7, 8

Njĩra ĩmwe njega ĩrĩa ĩngĩgũteithia gũkũria ũrata waku na Jehova, nĩ gwĩcũranagia ũhoro wa kĩheo kĩrĩa kĩnene mũno Jehova atũheete kĩa igongona rĩa ũkũũri. (2 Kor. 5:​14, 15; 1 Joh. 4:​9, 19) Gwĩcũrania ũhoro wa igongona rĩu na ũrĩa rĩngĩkũguna no gũgũtindĩke wonanie ngatho. Kwa ngerekano, ta tua atĩ mũndũ nĩ akũhonokia ũkiriĩ kũrikĩra maĩ-inĩ. Hihi no gũthiĩ ũngĩthiĩ mũciĩ wĩhure na ũriganĩrũo nĩ ũrĩa mũndũ ũcio agwĩkĩire? Aca! Hingo ciothe no ũiguage ũrĩ na ngatho nyingĩ kwerekera mũndũ ũcio wakũhonokirie. O ũndũ ũmwe na ũcio, twagĩrĩirũo gũcokagĩria Jehova na Jesu ngatho mũno nĩ ũndũ wa ũkũũri tondũ nĩ maatũhonokirie. Nĩ ũndũ wa gĩĩko kĩu kĩnene kĩa wendo, rĩu tũrĩ na kĩĩrĩgĩrĩro kĩa muoyo wa tene na tene thĩinĩ wa paradiso gũkũ thĩ! w16.03 2:16, 17

Nĩ ũndũ wa Jesu gũkorũo arĩ mwĩhokeku mĩaka mĩingĩ ĩrĩa aarĩ igũrũ, Jehova aarĩ na ma biũ atĩ nĩ angĩatũũrire arĩ mwĩhokeku o na oka gũkũ thĩ. Jesu nĩ aanyitire mbaru wathani wa Ngai arĩ na wĩhokeku, na akĩonania atĩ mũndũ mũkinyanĩru no ahote gũtũũria wĩkindĩru wake harĩ Jehova o na rungu rwa mĩnyamaro. Jesu nĩ aatũũririe wĩkindĩru wake na agĩtetera ũnene wa Jehova rungu rwa magerio maritũ. Aakuire arĩ mwĩhokeku harĩ Ithe. Na githĩ tũtiagĩrĩirũo nĩ gũcokagia ngatho nĩ ũndũ wa ũrĩa Jesu aarutire igongona rĩrĩa rĩabataranagia harĩ gũkũũra andũ na kũmahe mweke wa gũtũũra tene na tene thĩinĩ wa thĩ njerũ ya Ngai! Mũtũmwo Johana aandĩkire ũũ: “Ũhoro ũrĩa wendani wa Ngai wonanirio naguo harĩ ithuĩ nĩ ũyũ, atĩ Ngai nĩaarekirie Mũriũ wake wa mũmwe oke gũkũ thĩ, nĩ getha tũgĩe muoyo nĩ ũndũ wake. Wendani nĩ ũũ; ti atĩ nĩ ithuĩ twendaga Ngai; ĩndĩ nĩwe watwendaga ithuĩ, agĩkĩrekia Mũriũ oke atuĩke ihaki rĩa mehia maitũ.”​—1 Joh. 4:9, 10. w15 11/15 3:13, 14

Tondũ tũrĩ njiarũa cia Adamu, ithuothe nĩ tũgaĩte mehia na gĩkuũ. Gũtirĩ o na ũmwe witũ ũngiuga, “Niĩ ndirabatara ũkũũri.” O na mũndũ ũrĩa mwĩhokeku atĩa nĩ abataraga ũkũũri. Ithuothe nĩ twagĩrĩirũo nĩ kũririkana atĩ nĩ tuoheirũo thiirĩ mũnene mũno. Hihi wendo na tha iria Jehova atuonetie ciagĩrĩirũo gũtũtindĩka twĩkage atĩa? Angĩkorũo nĩ kũrĩ mũrũ kana mwarĩ wa Ithe witũ tũigĩire muku ngoro-inĩ twagĩrĩirũo kwĩgerekania na Jehova “Ngai muohanĩri.” (Neh. 9:17; Thab. 86:5) Twecũrania ũrĩa Jehova atũrekeire thiirĩ mũnene nĩ tũrĩtindĩkagwo kuohera arĩa angĩ kuuma ngoro. Tũtingĩgunĩka nĩ wendo na wohanĩri wa Jehova angĩkorũo tũtirĩendaga na tũkohera arĩa angĩ. (Mat. 6:14, 15) O na gũtuĩka kuohanĩra gũtingĩcenjia maũndũ marĩa mahĩtũku no gũtũteithie tũkaagĩa na gĩkeno mahinda marĩa maroka. w16.01 2:5, 15-17

Jesu oigire ciugo ici nĩguo ateithie Petero na arĩa angĩ mahũũre mbica ya kĩĩrĩgĩrĩro kĩa ihinda rĩrĩa rĩroka. Nĩ mangĩahotire kũhũũra mbica itemi rĩrĩa magaakorũo narĩo thĩinĩ wa thirikari ĩrĩa ĩgaathamaka igũrũ rĩa thĩ na ĩrehere andũ arĩa aathĩki irathimo cia magegania. Kuuma o tene ndungata cia Jehova nĩ ikoretwo ikĩgunĩka nĩ ũndũ wa gwĩciria ũhoro wa kũhinga gwa ciĩranĩro cia Ngai. Habili nĩ aahũũraga mbica kĩĩranĩro kĩa Jehova kĩgiĩ ihinda rĩega rĩrĩa rĩroka, na nĩ ũndũ wa wĩtĩkio wake harĩ kĩĩranĩro kĩu, nĩ aakenirie Jehova. Iburahimu nĩ aahũũrire mbica hĩndĩ ĩrĩa ciĩranĩro cia Jehova ciĩgiĩ “mbeũ” ikaahinga, na nĩ ũndũ ũcio agĩathĩkĩra Jehova o na rĩrĩa ũtaarĩ ũndũ mũhũthũ gwĩka ũguo. (Kĩam. 3:​15) Musa “nĩaatanyĩte kuona kĩheo kĩa ngatho kĩrĩa gĩkaheanwo” na ũndũ ũcio ũkĩmũteithia kwenda Jehova na gũkorũo na wĩtĩkio. (Ahib. 11:26) Wĩtĩkio na wendo witũ harĩ Jehova no itũteithie kũhũũra mbica irathimo iria atwĩrĩire. w15 5/15 3:17, 18

Kũringana na kĩonereria kĩrĩa Jesu aatũigĩire, Mũkristiano ũrenda gũkũra kĩĩroho ndangĩiganĩra tu na ũmenyo mũnini wa Bibilia. Ithenya rĩa ũguo, arikagĩra biũ thĩinĩ wa Maandĩko nĩ ũndũ wa kũmenya atĩ “irio iria nyũmũ nĩ cia andũ arĩa agima.” (Ahib. 5:14) Mũkristiano mũgimaru kĩĩroho nĩ endaga ‘kũgĩa na ũmenyo wĩgiĩ Mũrũ wa Ngai.’ (Ef. 4:13) Hihi wee nĩ ũthomaga Bibilia o mũthenya? Hihi nĩ ũkoragwo na mũtaratara mwega wa wĩruti waku kĩũmbe, na ũkerutanĩria gũkorũo na ũthathayia wa famĩlĩ o kiumia? Rĩrĩa ũrathoma Kiugo kĩa Ngai, geragia mũno gũcaria motaaro ma Bibilia marĩa mangĩgũteithia kũgĩa na muonere wa maũndũ ta wa Jehova. Ũcoke wĩrutanĩrie kũhũthĩra motaaro macio rĩrĩa ũratua matua, na ũndũ ũcio nĩ ũrĩtũmaga ũkuhĩrĩrie Jehova makĩria. w15 9/15 1:5, 9, 10

Kwoguo Jesu nĩ oĩ wega ũkuruhanu ũrĩa ũkoragwo ho gatagatĩ ka mĩmera, nyamũ, andũ, na rĩera rĩrĩa rĩmathiũrũrũkĩirie. Nĩ oĩ kũhũthĩra na gwatha ũũmbi o wothe na njĩra ĩrĩa yagĩrĩire. Rĩrĩa Jesu aarĩ gũkũ thĩ nĩ onanirie atĩ nĩwe “hinya wa Ngai” na njĩra ya gwatha maahinya ma ndũire. Ta hũũra mbica ĩno: Kristo nĩ mũnogu mũno nĩ ũndũ wa wĩra mũingĩ ũrĩa oima naguo ũtungata-inĩ. Makũmbĩ ma maĩ marahũũra meri na hinya magĩikagia maĩ thĩinĩ. O na gũtuĩka kũrĩ na mũrurumo mũnene wa kĩhuhũkanio na meri nĩ ĩrakeka mũno, Jesu no gũkoma akomete. Nĩ arabatara kũhurũka. Arutwo ake makamũũkĩria mamakĩte mũno, makamwĩra ũũ: “Tũrĩ hakuhĩ gũthira.” (Mat. 8:​25, NW) Jesu akaarahũka agakaania iria na rũhuho agaciĩra ũũ: “Kira, ũhorere.” (Mar. 4:​39) Naruo rũhuho rũu rũnene rũgathira, ‘gũkahorera o kũhorera.’ Na githĩ kĩu ti kĩonereria kĩa magegania kĩa ũrĩa Jesu ahũthagĩra hinya wake gwatha maahinya ma ndũire! w15 6/15 1:12-14

No kũhoteke Jesu akĩaria ũhoro wa irio ciitũ cia ũmũthĩ aaragia ũhoro wa mabataro maitũ ma o mũhaka. Aathire na mbere kuuga atĩ Ngai nĩ ahumbaga mahuti ma gĩthaka, agĩcoka akiuga ũũ: “Githĩ ndangĩkĩria mũno kũmũhumba nguo, inyuĩ mwĩtĩkĩtie o hanini? Agĩcoka akĩgweta rĩngĩ ũtaaro ũyũ wa bata mũno: “Tigagai gwĩtanga nĩ ũndũ wa rũciũ.” (Mat. 6:30-34) Ũndũ ũcio wonanagia atĩ handũ ha kwenda mbeca, twagĩrĩirũo nĩ kũiganwo nĩ mabataro maitũ marĩa ma o mũhaka ma o mũthenya. Mabataro macio nĩ ta nyũmba, wĩra wa gũtũteithia kũhe famĩlĩ ciitũ mabataro ma cio, na ũũgĩ wa kũhiũrania na ndwari. Tũtibatiĩ kũhoya tu nĩ ũndũ wa mabataro ta macio ma kĩĩmwĩrĩ, tondũ tũrĩ na mabataro ma kĩĩroho ma bata makĩria. Jesu oigire ũũ: “Ti mũgate wiki ũtũũragia mũndũ muoyo, no kiugo o gĩothe kĩrĩa kiumaga kanua ka Ngai.” (Mat. 4:4) Nĩ ũndũ ũcio twagĩrĩirũo nĩ gũthiĩ na mbere kũhoya atĩ Jehova athiĩ na mbere gũtũhe irio cia kĩĩroho cia ihinda rĩrĩa rĩagĩrĩire. w15 6/15 5:4, 7, 8

Thiĩ na mbere kũhoya Jehova agũteithagie kũregana na maũndũ ma waganu na wĩkage ũrĩa kwagĩrĩire o na rĩrĩa atarĩ ũhũthũ gwĩka ũguo. Mĩthiĩre itũ ya tene no ĩkorũo ĩkũrĩtie thĩinĩ witũ merirĩria ma gwĩkaga maũndũ marĩa Jehova athũire. O na kũrĩ ũguo, no atũteithie gwĩka mogarũrũku marĩa mangĩbatarania nĩguo tũthiĩ na mbere kũmũtungatĩra na njĩra ĩrĩa ĩmũkenagia. Mũthamaki Daudi nĩ aamenyete ũndũ ũcio. Thutha wa gũtharia na Bathi-Sheba aahoire Jehova ũũ: “Nyũmbĩra ngoro ĩtarĩ na gĩko; thĩinĩ wakwa cokia roho mwerũ, mwĩkindĩru.” (Thab. 51:10, 12) Mĩerekera ya mehia no ĩtũgucĩrĩrie mũno, ĩndĩ Jehova no atũteithie tũkũrie wendi mũnene wa gwĩka ũrĩa kwagĩrĩire. No atũteithie kũgirĩrĩria meciria maitũ matarĩ makinyanĩru.​​—Thab. 119:133. w15 6/15 3:5, 6

Arĩa akũrũ gatagatĩ-inĩ gaitũ nĩ maririkanaga rĩrĩa o kĩũngano gĩatongoragio nĩ mũthuri ũmwe handũ ha kĩama gĩa athuri, rĩrĩa wabici cia honge ciarũgamagĩrĩrũo nĩ mũrũ wa Ithe witũ ũmwe handũ ha Kamĩtĩ ya Wabici ya Rũhonge, na rĩrĩa ũtongoria waheanagwo nĩ mũrũgamĩrĩri wa Watch Tower Society handũ ha Kĩama Kĩrĩa Gĩtongoragia kĩa Aira a Jehova. O na gũtuĩka ariũ a Ithe witũ acio nĩ maarĩ na ateithĩrĩria, mũndũ ũmwe tu nĩwe wehokeirũo gũtua matua thĩinĩ wa ciũngano, wabici-inĩ cia honge, na wabici-inĩ nene ya Aira a Jehova. Mĩaka-inĩ ya 1970 nĩ gwekirũo mogarũrũku. Handũ ha mũndũ ũmwe gũkorũo agĩtongoria maũndũ, ikundi cia athuri nĩcio ciambĩrĩirie gũtongoria. Mogarũrũku macio meekirũo kũringana na ũtaũku wa Maandĩko. Ithondeka nĩ rĩkoretwo rĩkĩgunĩka kuumana na ngumo nyingĩ njega cia athuri arĩa othe Jehova athurĩte marĩ “iheo,” handũ ha ũtongoria wa mũndũ ũmwe.​​—Ef. 4:8. w15 7/15 1:14, 15

Andũ a Jehova matinyitaga mbaru mwena o na ũrĩkũ maũndũ-inĩ ma gũkũ thĩ, na matiĩingĩragia maũndũ-inĩ marĩa magayũkanagia andũ, ta ũkabira, gũtũũgĩria bũrũri, kana ũndũire. Nĩkĩ? Tondũ nĩ mendete Jehova, nĩ ehokeku harĩ we, na nĩ mamwathĩkagĩra. (1 Joh. 5:3) Gũtekũmakania kũrĩa tũrereirũo, rũrĩrĩ, bũrũri, kana ũndũire witũ, ithuĩ twendaga gũtũũra kũringana na ithimi cia ũthingu cia Jehova. Wĩhokeku witũ harĩ Jehova na harĩ Ũthamaki wake nĩ wa bata gũkĩra wĩhokeku ũrĩa tũngĩkorũo naguo harĩ kĩndũ kĩngĩ o gĩothe. (Mat. 6:33) Wĩhokeku ta ũcio ũbataraga Mũkristiano aikare eyamũranĩtie na thogothogo na ngucanio cia gũkũ thĩ. (Isa. 2:4; Joh. 17:​11, 15, 16) Andũ aingĩ thĩinĩ wa thĩ nĩ monanagia wĩhokeku harĩ bũrũri wao, rũrĩrĩ rwao, kana ũndũire wao kana o na harĩ timũ ya mathako ya bũrũri wao. Wĩhokeku ta ũcio nĩ ũrehaga macindano na ũthũ, na rĩmwe ũkarehe ũiti wa thakame na mbaara cia ndũrĩrĩ. Hihi no ũhote kwaga kũnyita mbaru mwena o na ũrĩkũ? w15 7/15 3:1, 2

Thutha wa Nyũmba ya Ũthamaki gwakwo, nĩ ĩkũbatara kũigwo ĩrĩ theru na ĩrĩ na kĩhaarĩro nĩguo yonanagie ngumo cia Ngai ũrĩa tũthathayagia tondũ nĩ Ngai wa mũbango. (1 Kor. 14:33) Bibilia yonanagia atĩ ũtheru wa kĩĩroho nĩ ũkonainie na ũtheru wa kĩĩmwĩrĩ. (Kũg. 19:8) Nĩ ũndũ ũcio, angĩkorũo andũ nĩ mekwenda gwĩtĩkĩrĩka nĩ Jehova, no mũhaka makoragwo marĩ atheru kĩĩmwĩrĩ. Twaiga Nyũmba citũ cia Ũthamaki irĩ theru na irĩ na kĩhaarĩro, nĩ tũrĩiguaga wega tũkĩnyita andũ ũgeni moke mĩcemanio itũ tũrĩ na ma biũ atĩ ũrĩa nyũmba citũ itariĩ nĩ ũkũmateithia makĩria mone atĩ ũhoro mwega ũrĩa tũmahunjagĩria nĩ wa ma. Nĩ marĩonaga atĩ tũthathayagia Ngai mũtheru na ica ikuhĩ nĩ egũtheria thĩ ĩtuĩke paradiso. (Isa. 6:1-3; Kũg. 11:18) O ũrĩa wothe kũngĩkorũo kũrĩ, Nyũmba itũ ya Ũthamaki yagĩrĩirũo gũkorũo ĩrĩ kĩonereria kĩega ũhoro-inĩ wĩgiĩ ũtheru na kĩhaarĩro, tondũ ĩrũgamĩrĩire rĩĩtwa rĩa Jehova na nĩ nyũmba ya ũthathaiya mũtheru.​​—Gũcok. 23:14. w15 7/15 4:13-15

Rĩrĩa arũmĩrĩri a Jesu maataũkĩirũo atĩ gũkorũo kuo gwake kwaambĩrĩirie 1914, nĩ meerĩgagĩrĩra atĩ mũthenya wa Jehova ũngĩokire narua mũno. Nĩ ũndũ ũcio makĩambĩrĩria kwĩharĩria nĩ ũndũ wa mũthenya ũcio na njĩra ya kuongerera kĩyo wĩra-inĩ wa kũhunjia. Ĩndĩ Jesu oigĩte atĩ ahota gũikaranga, oke “ngũkũ ĩkĩgamba, kana rũcinĩ” tene. Kũngĩathire ũguo-rĩ, arũmĩrĩri ake mangĩabatarire gwĩka atĩa? Jesu aamerĩte ũũ: ‘Ikaragai mwĩhũgĩte.’ Kwoguo, o na angĩkorũo nĩ tũrona ta twetereire ihinda iraya, ti kuuga atĩ mũthenya wa Jehova ndũrĩ hakuhĩ, kana atĩ gũtirĩ hingo ũgoka. Thĩinĩ wa thĩ njerũ, nĩ tũgaakena mũno twecũrania ũrĩa maũndũ mothe marĩa maarathĩtwo megiĩ matukũ ma kũrigĩrĩria maahingire o ta ũrĩa Jehova oigĩte. Gwĩcũrania ũrĩa maũndũ maahanĩkire nĩ gũgatũma wĩtĩkio witũ ũgĩe na hinya makĩria harĩ Jehova na harĩ ciĩranĩro ciake iria itagaakorũo ihingĩtio. (Josh. 23:14) Tondũ Jehova nĩwe ‘ũtuaga ciathĩ na mahinda,’ nĩ tũkamũcokeria ngatho mũno tondũ nĩ aatwĩkĩraga ngoro tũikarage tũkĩmenyaga atĩ ‘ithirĩro rĩa maũndũ mothe nĩrĩakuhĩrĩirie.’​—Atũm. 1:7; 1 Pet. 4:7. w15 8/15 2:10, 11, 14

Maũndũ-inĩ ma gwĩkenia, andũ aingĩ meroragĩra kana mageka maũndũ ma ũhinya, ma waganu, ma ũgo na ũragũri. Kwa ngerekano, kaingĩ Intaneti, tabarĩra cia TV, thenema, mabuku ma ngʼano, na ngathĩti cionanagia maũndũ ma ũhinya na ma waganu ta matarĩ moru. Maũndũ marĩa moonagwo marĩ moru tene rĩu nĩ metĩkĩrĩkĩte kũndũ kũmwe. No ũguo ti kuuga atĩ maũndũ macio nĩ metĩkĩrĩku maitho-inĩ ma Ngai. (Rom. 1:​28-32) Arũmĩrĩri a Jesu a tene, nĩ meethemaga biũ maũndũ ma gwĩkenia marĩa matarĩ matheru. Nĩ ũndũ wa gwĩka ũguo na gũkorũo marĩ na mĩthiĩre mĩega, nĩ maamenagwo na makanyarirũo nĩ andũ. Mũtũmwo Petero aandĩkire ũũ: “Nĩmagegaga tondũ [Akristiano] mũtithiaga thiritũ nao hĩndĩ ĩrĩa makĩragĩrĩria ũmaramari ũcio wao, na magakĩmũcambagia.”​—1 Pet. 4:4. w15 8/15 4:2, 3

Mũkristiano mũgimaru kĩĩroho nĩ athingataga thayũ thĩinĩ wa kĩũngano. (Ef. 4:​1-6, 15) Muoroto witũ nĩ andũ a Ngai maikarage ‘magwatanĩtio hamwe’ na marutithanagie wĩra marĩ na ũrũmwe. Maandĩko monanagia atĩ nĩguo tũkorũo na ũrũmwe ta ũcio, nĩ tũkũbatara gũkorũo tũrĩ enyihia. Nĩ ũndũ wa wĩnyihia, mũrũ kana mwarĩ wa Ithe witũ mũgimaru kĩĩroho nĩ erutanagĩria gũtũũria ũrũmwe o na rĩrĩa andũ arĩa angĩ thĩinĩ wa kĩũngano maahĩtia. Nĩ ũndũ ũcio, wĩyũrie ũũ: ‘Njĩkaga atĩa rĩrĩa mũrũ kana mwarĩ wa Ithe witũ kĩũngano-inĩ ahĩtia? Njĩkaga atĩa rĩrĩa mũndũ anjiguithia ũũru? Hihi nĩ kũiga njigaga muku, kana hihi nĩ ngeragia gũcokia ũkuruhanu mwega nake?’ Muoroto wa Mũkristiano mũgimaru kĩĩroho nĩ kũniina mathĩna no ti kũrehe mathĩna. Hihi wee nĩ ũrĩ na muoroto wa gũtũũria thayũ thĩinĩ wa kĩũngano? w15 9/15 1:12, 13

Jesu ndaarĩ na nganja atĩ Bibilia nĩ Kiugo kĩa Ngai kĩrĩa kĩheanaga ũtongoria ũrĩa mwega biũ. Tũkĩrũmĩrĩra kĩonereria kĩa Jesu, no mũhaka tũthomage Bibilia o mũthenya, tũkeruta ũhoro wayo, na tũgecũrania maũndũ marĩa tweruta. Ningĩ nĩ wega gũcaria macokio ma ciũria iria tũngĩgĩa nacio rĩrĩa tũrathoma Bibilia. Kwa ngerekano, kwĩruta na njĩra ndikĩru maũndũ marĩa marĩ Bibilia-inĩ marĩa monanagia atĩ tũratũũra matukũ-inĩ ma kũrigĩrĩria, no kuongerere wĩtĩkio waku hinya atĩ mũico wa mũtabarĩre ũyũ ũrĩ hakuhĩ. Ĩkĩra wĩtĩkio waku hinya harĩ ciĩranĩro cia Bibilia cia mahinda marĩa maroka na njĩra ya gũthuthuria morathi maingĩ marĩa marĩkĩtie kũhinga. Hihi nĩ wĩtĩkĩtie atĩ ũtaaro wa Bibilia no ũhũthĩke ũmũthĩ? No ũthome ũhoro wa aarĩ na ariũ a Ithe witũ arĩa maagarũrũkire na ũtũũro wao ũkĩagĩra thutha wa kwĩruta Bibilia. (1 Thes. 2:13) No wĩgerekanie na Jesu na njĩra ya gwĩcũranagia igũrũ rĩgiĩ irathimo cia magegania iria Jehova atwĩrĩire. (Ahib. 12:2) Onaga maũndũ macio marĩ ciĩranĩro cia Ngai harĩ wee mwene, handũ ha kũmonaga marĩ ciĩranĩro cia Ngai harĩ andũ othe. w15 9/15 3:16, 17

Tũngĩonania atĩa atĩ nĩ twendete Ngai? No tũhũthĩre indo citũ kũnyita mbaru wĩra wa Ũthamaki kĩũngano-inĩ gitũ na thĩinĩ wa thĩ yothe. Ithuothe no tuonanie wendo witũ harĩ Jehova, tũkorũo tũrĩ na indo nyingĩ kana nyinyi. (2 Kor. 8:12) O na kũrĩ ũguo, nĩ kũrĩ njĩra ingĩ tũngĩonia Jehova atĩ nĩ tũmwendete. Jesu aatũrutire tũcaragie Ũthamaki mbere na tũtigatangĩkage nĩ kĩrĩa tũkũrĩa kana kĩrĩa tũkwĩhumba. Oigire atĩ Ithe witũ nĩ amenyaga kĩrĩa tũbataraga. (Mat. 6:​31-33) Kwĩhoka atĩ Jehova nĩ arĩhingagia kĩĩranĩro kĩu kuonanagia atĩ nĩ tũmwendete biũ, tondũ gũkorũo wĩhokete mũndũ kuonanagia nĩ ũmwendete. Ma nĩ atĩ, o ũrĩa tũrehoka Jehova makĩria noguo tũmuonagia atĩ nĩ tũmwendete. (Thab. 143:8) Kwoguo twagĩrĩirũo nĩ kwĩyũria ũũ: ‘Hihi maũndũ marĩa thingataga ũtũũro-inĩ wakwa nĩ monanagia atĩ nĩ nyendete Jehova? Hihi nĩ njĩtĩkĩtie atĩ Jehova arĩ na ũhoti wa kũũhingagĩria mabataro makwa ma o mũthenya?’ w15 9/15 5:7, 8

Hihi nĩ ũrĩ weyũria kana Jehova nĩ agaakũhonokia hĩndĩ ya thĩna ũrĩa mũnene ũingĩre thĩinĩ wa thĩ njerũ? Ũmwe wa maũndũ marĩa mabataranagia nĩguo mũndũ akaahonokio nĩ gũkũria wĩtĩkio mũrũmu. Mũtũmwo Petero nĩ onanirie ũrĩa wĩtĩkio ũrĩ wa bata. Oigire atĩ wĩtĩkio ũrĩa ‘ũgeretio’ nĩ ‘ũkaarehe rũgooco na riri na gĩtĩo, hĩndĩ ĩrĩa Jesu Kristo akaguũranĩrio.’ (1 Pet. 1:7) Tondũ thĩna ũrĩa mũnene nĩ ũkuhĩrĩirie mũno-rĩ, na githĩ tũtiagĩrĩirũo gũtigĩrĩra atĩ tũrĩ na wĩtĩkio mũrũmu ũrĩa ũgaatũma tũhonokio rĩrĩa Mũthamaki witũ akaguũranĩrio? Nĩ wega gũkorũo tũrĩ andũ marĩ na ‘wĩtĩkio nĩguo tũkahonokia mĩoyo itũ.’ (Ahib. 10:39) Nĩ ũndũ ũcio, no tũhoe ta mũndũ ũrĩa wahoire ũũ: ‘Ndeithia harĩa njagĩte wĩtĩkio.’ (Mar. 9:24) Kana ta atũmwo a Jesu arĩa moigire ũũ: “Tuongerere wĩtĩkio.”​—Luk. 17:5. w15 10/15 2:1, 2

Paulo aathingataga maũndũ “marĩa maagĩrĩire” na nĩ erutanĩirie mũno wĩra-inĩ wa kũhunjia na agĩthiĩ kũndũ gũtiganĩte ta Suriata, Asia Nini, Makedonia, na Judea. Oigire ũũ: ‘Nĩndiganĩirũo nĩ maũndũ marĩa ndigĩte na thutha, ngatambũrũka ‘nyite maũndũ marĩa marĩ mbere yakwa, ngerutanĩria nĩ getha ngakinya handũ harĩa hakinyagwo, na ngaaheo kĩheo kĩrĩa kĩheanagwo.’ (Afil. 1:10; 3:​8, 13, 14) Paulo ndaarĩ na famĩlĩ, na ũndũ ũcio nĩ wamũteithirie ‘kwĩheana kwĩ Mwathani atekũgucĩrĩrio nĩ maũndũ mangĩ.’ (1 Kor. 7:32-35) O ta Paulo, ndungata imwe cia Ngai nĩ ithuuraga kwaga kũingĩra thĩinĩ wa kĩhiko nĩguo itigakorũo na mawĩra maingĩ na nĩ ũndũ ũcio ikahota kwĩheana biũ ũtungata-inĩ wa Jehova. (Mat. 19:​11, 12) Andũ arĩa matakoragwo na famĩlĩ nĩ marĩ mawĩra manini makĩringithanio na arĩa mahikanĩtie. O na kũrĩ ũguo, kana mũndũ nĩ aingĩrĩte kĩhiko-inĩ kana ndaingĩrĩte, o ũmwe witũ no ahote ‘kwĩyaũra kĩrĩa gĩothe gĩtũritũhĩire’ na atungatĩre Ngai atarĩ na maũndũ maingĩ maramũhĩngĩca. Mũndũ no abatare kũnyihanyihia maũndũ marĩa amenyerete gwĩka, marĩa marĩaga mahinda make maingĩ na eigĩre mĩoroto ya kũhũthagĩra mahinda ũtungata-inĩ wa Jehova. w15 10/15 3:15, 16

Maũndũ marĩa mekĩkĩte nĩ monanĩtie ũma wa ciugo ici cia Bibilia: “Atĩrĩrĩ, wee Jehova, nĩnjũĩ atĩ gũtirĩ mũndũ wa gũkũ thĩ ũngĩhota gwĩthondekera mĩthiĩre yake we mwene, o na kana arũngĩrĩrie makinya make njĩra-inĩ ĩrĩa yerekereire.” (Jer. 10:23) Jehova ndoombire andũ marĩ na ũhoti wa kwĩyatha o ene mategũtongorio nĩwe. Nĩ ũndũ wa gwĩtĩkĩria maũndũ moru mathiĩ na mbere kwa ihinda, Jehova nĩ onanĩtie atĩ wathani wake noguo ũngĩgaacĩra. Ica ikuhĩ Ngai nĩ ekweheria waganu wothe. Thutha ũcio mũndũ ũrĩa ũgekĩrĩra nganja njĩra ya Ngai ya gwathana akooerũo ikinya o hĩndĩ ĩyo. Maũndũ marĩa andũ mekĩte ihinda rĩhĩtũku magakorũo marĩ ũira wa atĩ aremi ta acio magĩrĩire kũninwo na ihenya na atĩ waganu ndwagĩrĩirũo gwĩtĩkĩrio rĩngĩ. w15 11/15 3:5, 6

Jesu nĩ eendete kwĩra andũ ũhoro wa Ũthamaki wa Ngai. Kũringana na Bibilia Jesu aaririe ũhoro waguo gũkĩra ũndũ ũngĩ o wothe. Aaũgwetire makĩria ma maita 100 rĩrĩa aarĩ gũkũ thĩ. Hatarĩ nganja Ũthamaki warĩ wa bata mũno harĩ we. (Mat. 12:34) Kahinda kanini thutha wa Jesu kũriũkio nĩ oimĩrĩire andũ makĩria ma 500 arĩa mangĩacokire gũtuĩka ahunjia a Ũthamaki. (1 Kor. 15:6) No kũhoteke hĩndĩ ĩyo nĩrĩo eerire arũmĩrĩri ake makahunjĩrie “andũ a ndũrĩrĩ ciothe” ndũmĩrĩri ya Ũthamaki. Ũcio ndũngĩarĩ wĩra mũhũthũ! Jesu aarathire atĩ wĩra ũcio ũngĩathire na mbere “nginya ithirĩro rĩa mahinda maya,” na ũguo nĩguo gũkoretwo. Rĩrĩa ũrahunjia ũhoro mwega ũmũthĩ ũkoragwo ũkĩnyita itemi harĩ kũhinga kwa ũrathi ũcio. (Mat. 28:​19, 20) Ngai nĩ atũheete ‘maũndũ mothe mega’ nĩguo tũhote kũruta wĩra ũcio. w15 11/15 5:1-3

Arĩa mathuthuragia maandĩko marĩa ma tene mũno ma Kĩĩhibirania, ta Ikũnjo cia Iria rĩa Cumbĩ nĩ magegagio mũno nĩ ũrĩa ndemwa iria inya cia Kĩĩhibirania iria irũgamĩrĩire rĩĩtwa rĩa Ngai cionekaga maita maingĩ thĩinĩ wamo. Rĩĩtwa rĩa Ngai rĩtionekaga tu maandĩko-inĩ macio ma tene ma Kĩĩhibirania no nĩ rĩonekaga nginya thĩinĩ wa kobĩ imwe cia Maandĩko ma Kĩngiriki ma Septuagint ma kuuma karine-inĩ ya kerĩ mbere ya Kristo nginya karine ya mbere thutha wa Kristo. O na gũtuĩka kũrĩ na ũira mũingĩ wa kuonania atĩ rĩĩtwa rĩa Ngai nĩ rĩagĩrĩirũo gũkorũo Bibilia-inĩ, Bibilia nyingĩ iria itaũrĩtwo nĩ cieheretie rĩĩtwa rĩu biũ. Kwa ngerekano, mwaka-inĩ wa 1952, mĩaka ĩĩrĩ tu thutha wa Bibilia ya New World Translation of the Christian Greek Scriptures kũrutwo, Bibilia ya Revised Standard Version nĩ yacabirũo. Arĩa maataũrire Bibilia ĩyo nĩ meeheririe rĩĩtwa rĩa Ngai, magĩka mũgarũ na ataũri a Bibilia ya American Standard Version ya 1901. Meekire ũguo nĩkĩ? Ataũri a Bibilia ĩyo moigĩte ũũ kohoro-inĩ ga kwambĩrĩria: “Kũhũthĩra rĩĩtwa rĩa Ngai . . . gũtiagĩrĩire o na hanini harĩ wĩtĩkio wa Kanitha wa Gĩkristiano.” Ataũri a Bibilia ingĩ cia Gĩthũngũ na cia thiomi ingĩ nĩ mekĩte o ũguo. w15 12/15 2:3-5