Julaĩ

Kiugo gĩa Kĩngiriki kĩrĩa gĩtaũrĩtwo ‘kũnyitana ũgeni’ nĩ kuuga “gũtuga andũ tũtoĩ.” Ciugo icio iratũririkania ngerekano ya Iburahimu na Loti. Athuri acio erĩ nĩ maatugire ageni matooyaine nao. Ageni acio maarĩ araika. (Kĩam. 18:​2-5; 19:​1-3) Hihi ithuĩ nĩ tũtugaga arĩa angĩ na njĩra ya kũmanyita ũgeni mĩciĩ-inĩ itũ tũrĩanĩre na twĩkĩrane ngoro? Tũtirabatara kũhaarĩria maũndũ maingĩ na ma goro atĩ nĩguo gũtuĩke tũrĩ atugi. Ningĩ tũtingĩenda kũnyitaga ũgeni o arĩa mangĩhota gũtũnyita ũgeni. (Luk. 10:42; 14:​12-14) Muoroto witũ wagĩrĩirũo gũkorũo ũrĩ gwĩkĩra arĩa angĩ hinya no ti kwĩyonania. O na angĩkorũo tũtiũyaine mũno na mũrori witũ wa mũthiũrũrũko na mũtumia wake-rĩ, hihi nĩ twĩrutanagĩria kũmanyita ũgeni? (3 Joh. 5-8) O na gũtuĩka nĩ tũkoragwo na mĩhangʼo mĩingĩ o hamwe na mĩtangĩko ya o mũthenya-rĩ, harĩ bata ‘tũtikariganĩrũo nĩ kũnyitanaga ũgeni.’ w16.01 1:11, 12

Mũhũũri ũcio mekĩragwo kũgerera roho mũtheru ũkoragwo ũrĩ ũira wa atĩ o magaatũũra igũrũ no ti gũkũ thĩ. Mũkristiano mũitĩrĩrie maguta ndakoragwo na nganja o na hanini atĩ kĩĩrĩgĩrĩro gĩake nĩ gĩa gũthiĩ igũrũ. (2 Kor. 1:​21, 22; 5:5) Rĩu rĩkoragwo rĩrĩ rĩĩtana. Ĩndĩ angĩkorũo nĩ agaathiĩ igũrũ no mũhaka atũũre arĩ mwĩhokeku harĩ rĩĩtana rĩake. Petero aataarĩirie ũndũ ũcio ũũ: “Nĩ ũndũ ũcio ariũ a Ithe witũ-rĩ, mwĩrutanĩriei mũno nĩguo mũrũmie ũhoro wanyu wa gwĩtwo o na gũthuurũo, tondũ mũngĩthiĩ na mbere gwĩka maũndũ macio, gũtirĩ hĩndĩ mũgaatoorio. Na njĩra ĩyo nĩ mũkaagĩa na kĩrathimo kĩnene gĩa gũtonya thĩinĩ wa Ũthamaki wa tene na tene wa Mwathani na Mũhonokia witũ Jesu Kristo.” (2 Pet. 1:​10, 11) Nĩ ũndũ ũcio, nĩguo rĩĩtana rĩa gũthiĩ igũrũ rĩkorũo na ũguni harĩ Mũkristiano o wothe mũitĩrĩrie maguta, no mũhaka athiĩ na mbere gũikara arĩ mwĩhokeku.​—Ahib. 3:1; Kũg. 2:10. w16.01 3:6, 7

Ti ũndũ mwagĩrĩru gũtũũgĩria mũndũ o na ũrĩkũ, o na angĩkorũo nĩ aitĩrĩirio maguta. Bibilia ĩtwĩkĩraga ngoro twĩgerekanagie na wĩtĩkio wa athuri a kĩũngano, ĩndĩ ndĩtwĩraga tũtũũgagĩrie mũndũ o na ũrĩkũ arĩ ta mũtongoria witũ. (Ahib. 13:7) Maandĩko moigaga atĩ nĩ kũrĩ andũ amwe “magĩrĩire kũheagwo gĩtĩo kĩnene.” Andũ acio magĩrĩire kũheagwo gĩtĩo tondũ nĩ “marũgamagĩrĩra maũndũ na njĩra njega” na nĩ “merutanagĩria kwaria na kũrutana ũhoro wa kiugo kĩa Ngai” no ti tondũ nĩ aitĩrĩrie maguta. (1 Tim. 5:17) Kwoguo, arĩa marĩ na rĩĩtana rĩa gũthiĩ igũrũ no maigue ũũru tũngĩmatũũgĩria kana tũmahe gĩtĩo kĩrĩa gĩtamagĩrĩire. Ningĩ no ũkorũo ũtarĩ ũndũ mũhũthũ harĩ o gũikara marĩ enyihia tũngĩmekagĩra maũndũ na njĩra ya mwanya. (Rom. 12:3) Gũtirĩ o na ũmwe witũ ũngĩenda kũhĩngithia ũmwe wa ariũ a Ithe na Kristo!​—Luk. 17:2. w16.01 4:9

Ũrata no ũringithanio na kĩndũ kĩa goro mũno. O na kũrĩ ũguo, ndũngĩringithanio na kĩndũ gĩtarĩ muoyo kĩrĩa tũngĩgũra tũcoke tũkĩige handũ o ũguo. Ũrata ũtariĩ ta kĩndũ kĩrĩ muoyo kĩrĩa kĩbataraga kũrũmbũiyo na kũheo indo cia gũgĩtũũria nĩguo gĩthiĩ na mbere gũkũra na gũtherema. Iburahimu nĩ oonaga ũrata wake na Jehova ũrĩ wa bata mũno na nĩ aaũrũmbũyagia. Eekaga ũguo atĩa? Iburahimu nĩ aamenyaga atĩ no mũhaka athiĩ na mbere gwĩtigĩra na gwathĩkĩra Ngai. Rĩrĩa aarĩ rũgendo-inĩ erekeire Kanaani arĩ hamwe na andũ a famĩlĩ yake, aathire na mbere kũreka Jehova amũtongorie agĩtua matua manene na manini. Mwaka ũmwe mbere ya Isaaka gũciarũo, Iburahimu arĩ na mĩaka 99, Jehova nĩ aamwĩrire aruithie arũme othe a nyũmba yake. Hihi Iburahimu nĩ eekĩrĩire watho ũcio nganja kana akĩgeria gũcaria njĩra cia kũregana naguo? Aca, eehokire Ngai na agĩathĩka ‘mũthenya o ro ũcio.’​—Kĩam. 17:​10-14, 23. w16.02 1:9, 10

Mwana mũnini no ahote gũtaũkĩrũo gwĩka wendi wa Ngai nĩ kuuga atĩa na eyamũrĩre Mũũmbi wake. Kwoguo kũbatithio nĩ ikinya rĩa bata na rĩagĩrĩru harĩ mũndũ mwĩthĩ ũrĩa ũngĩkorũo agimarĩte kĩĩroho na nĩ eyamũrĩire Jehova. (Thim. 20:7) Mũndũ gũkorũo arĩ mũgimaru nĩ kuuga atĩa? Kũgimara nĩ makĩria ma gũkũra kĩĩmwĩrĩ. Bibilia yugaga atĩ andũ agima nĩ “arĩa mamenyeretie ũhoti wao wa gwĩciria na njĩra ya kũũhũthĩra gũkũũrana wega na ũũru.” (Ahib. 5:14) Nĩ ũndũ ũcio andũ arĩa agimaru kĩĩroho nĩ mamenyaga maũndũ marĩa magĩrĩire maitho-inĩ ma Ngai na magatua itua irũmu ngoro-inĩ ciao rĩa kũmeeka. Gũkĩrĩ ũguo, matingĩhĩngĩcwo na njĩra hũthũ meke maũndũ moru na ningĩ matibataraga gũtindĩkĩrĩrio nĩguo meke ũrĩa kwagĩrĩire. Mũndũ mwĩthĩ ũrĩa ũkũbatithio erĩgagĩrĩrũo atĩ nĩ arĩtũũraga kũringana na ithimi cia ũthingu cia Ngai, o na rĩrĩa aciari kana andũ angĩ agima matarĩ hakuhĩ.​​—Afil. 2:12. w16.03 1:4, 5

No mũhaka Jonathani akorũo nĩ aagegirio mũno nĩ ũcamba wa Daudi rĩrĩa angʼethanĩire na Goliathu. Daudi ooragire Goliathu agĩcoka agĩtwarĩra Saulu, Mũthamaki wa Isiraeli ‘mũtwe wa Mũfilisiti ũcio aũkuuĩte na guoko gwake.’ (1 Sam. 17:57) No kũhoteke Jonathani nĩ aaiguire enda Daudi mũno nĩ ũndũ wa ũcamba wake. Hatiarĩ na nganja atĩ Ngai aarĩ hamwe na Daudi na nĩ ũndũ ũcio “Jonathani akiumĩrania ngoro na Daudi, akĩmwenda o ta ũrĩa eyendete we mwene. . . . Jonathani akĩgĩa kĩrĩkanĩro na Daudi nĩ ũndũ nĩamwendete o ta ũrĩa eyendete we mwene.” (1 Sam. 18:​1-3, Holy Bible in Gĩkũyũ) Ũtũũro-inĩ wake wothe thutha ũcio, Jonathani aatũũrire arĩ mwĩhokeku harĩ Daudi. O na gũtuĩka Ngai aathurire Daudi atuĩke Mũthamaki wa kerĩ wa Isiraeli-rĩ, Jonathani no aathire na mbere kwĩhokeka harĩ Daudi. Ningĩ Jonathani nĩ aacaĩire Daudi hĩndĩ ĩrĩa Saulu eendaga kũmũũraga. Rĩrĩa aamenyire atĩ Daudi arĩ werũ-inĩ wa Judea, nĩ aathire kuo nĩguo akamwĩkĩre hinya, na akĩmwĩra ciugo iria irĩ rĩandĩko-inĩ rĩa ũmũthĩ.​—1 Sam. 23:16. w16.02 3:1, 2

Kuuma o kĩambĩrĩria, Jehova na Jesu makoretwo marĩ na ũrũmwe. Maarutithanirie wĩra marĩ na ũrũmwe na nĩ ũndũ ũcio makĩũmba indo itiganĩte iria tuonaga ũmũthĩ. O nacio ndungata cia Ngai nĩ ikoretwo ikĩrutithania wĩra irĩ na ũrũmwe. Kwa ngerekano Nuhu na famĩlĩ yake nĩ maarutithanirie wĩra marĩ na ũrũmwe magĩaka thabina, nao Aisiraeli makĩrutithania wĩra na ũrũmwe harĩ kwamba, kwambũra, na gũthamia hema ya gũtũnganwo rĩrĩa maarĩ werũ-inĩ. Ningĩ thĩinĩ wa hekarũ, nĩ maainagĩra Ngai marĩ na ũrũmwe nyĩmbo njega cia kũmũgooca. Maũndũ macio mothe maahotekaga nĩ ũndũ wa kũnyitanĩra. (Kĩam. 6:​14-16, 22; Ndar. 4:​4-32; 1 Maũ. 25:​1-8) O na Akristiano a tene nĩ maarutithanagia wĩra marĩ na ũrũmwe rungu rwa ũtongoria wa Jesu arĩ we mũtwe wa kĩũngano. Mũtũmwo Paulo akĩaria ũhoro wa Akristiano acio aitĩrĩrie maguta oigire atĩ, o na angĩkorũo o ũmwe wao aarĩ na “iheo mwanya mwanya,” “ũtungata mwanya mwanya,” na “mawĩra mwanya mwanya,” othe maarĩ o ‘mwĩrĩ ũmwe.’​—1 Kor. 12:​4-6, 12. w16.03 3:1, 2

Ta wĩcirie ũhoro wa wĩra wa kũhunjia ũrĩa Jesu eendaga arũmĩrĩri ake marute. Njĩra ĩrĩa mangĩahũthĩrire kũhunjia, na gĩcigo kĩrĩa mangĩahunjirie, ciothe ciarĩ njerũ. Hĩndĩ ya Isiraeli ya tene, andũ a ndũrĩrĩ nĩ maanyitagwo ũgeni rĩrĩa moka Isiraeli gũthathaiya Jehova. (1 Ath. 8:​41-43) Ũndũ ũcio wekĩkire mbere ya Jesu kũruta watho ũrĩa ũrĩ rĩandĩko-inĩ rĩa ũmũthĩ. Arutwo a Jesu meerirũo ‘mathiĩ’ kũrĩ andũ othe. Mũthenya wa Pentekoste mwaka wa 33 Jehova nĩ oonanirie atĩ endaga ũhoro ũrĩa mwega ũhunjio thĩ yothe. Mũthenya ũcio nĩ aaitĩrĩirie andũ ta 120 a kĩũngano kĩu kĩerũ roho wake mũtheru. Andũ acio makĩaria na thiomi itiganĩte, makĩarĩria Ayahudi na andũ a ndũrĩrĩ arĩa meegarũrĩte magatuĩka Ayahudi. (Atũm. 2:​4-11) Thutha ũcio nĩ maambĩrĩirie kũhunjĩria Asamaria. Ningĩ, mwaka wa 36 makĩambĩrĩria kũhunjĩria ndũrĩrĩ iria itaaruaga. Ũndũ ũcio wonanagia atĩ Akristiano maagĩrĩirũo kũhunjĩria andũ othe thĩinĩ wa thĩ. w16.03 4:12

Kuuma o tene, ndungata cia Jehova nĩ ikoretwo ikĩona ũrĩa kũmenyeria andũ arĩa angĩ gũkoragwo na moimĩrĩro mega. Kwa ngerekano, nĩguo akahonokie Loti, Aburamu aahũthĩrire ‘andũ ake arĩa megithĩtio kana maamenyeretio mbaara,’ na makĩhootana. (Kĩam. 14:​14-​16) Matukũ-inĩ ma Mũthamaki Daudi, arĩa maainagĩra Jehova maarĩ ‘arute kana amenyerie’ kũina nyĩmbo cia kũmũgooca. (1 Maũ. 25:7) Matukũ-inĩ maya maitũ, tũrarũa na Shaitani na thĩ yake njũru. (Ef. 6:​11-​13) Ningĩ nĩ twĩrutanagĩria gwĩka o ũrĩa wothe tũngĩhota nĩguo tũgoocithie Jehova. (Ahib. 13:​15, 16) Nĩ ũndũ ũcio, o ta ndungata cia Jehova cia tene, nĩguo tũkorũo na moimĩrĩro mega, nĩ tũkũbatara gũkorũo tũrĩ amenyerie. Thĩinĩ wa kĩũngano, athuri nĩo Jehova ehokeire wĩra wa kũmenyeria arĩa angĩ. Mbere ya kwambĩrĩria kũmenyeria mũrũ wa Ithe witũ, mũthuri wa kĩũngano no abatare kwarĩrĩria nake motaaro ma Kĩĩmaandĩko marĩa mekũmũteithia one bata wa kũhũthĩra maũndũ marĩa arĩmũrutaga.​​—1 Tim. 4:​6. w15 4/15 2:1, 2

Ũguo ti kuuga atĩ nĩ andũ othe Mũcukani oragaga ĩmwe kwa ĩmwe. O na kũrĩ ũguo, roho wake wa ũũragani ũtheremete kũndũ guothe thĩinĩ wa thĩ. Ningĩ tondũ Hawa nĩ eetĩkĩrire kũheenio nĩ Shaitani, nake Adamu akĩaga gwathĩkĩra Ngai, mehia na gĩkuũ nĩ ciatheremire kũrĩ andũ othe. (Rom. 5:​12) Nĩ na njĩra ĩyo Mũcukani akoretwo arĩ na “hinya wa gĩkuũ.” We nĩ “mũũragani” o ta ũrĩa Jesu aamwĩtire. (Joh. 8:​44) Hatarĩ nganja, Shaitani nĩ thũ nene! Rĩrĩa twaregana na Mũcukani, tũkoragwo tũkĩregana nginya na arĩa othe mamũnyitaga mbaru gũũkĩrĩra ũnene wa Jehova. Acio nĩ hamwe na gĩkundi kĩnene kĩa araika arĩa maaremeire Ngai na nĩo metagwo ndaimono. (Kũg. 12:​3, 4) Maita maingĩ ndaimono nĩ cionanĩtie ũrĩa irĩ hinya kũrĩ andũ na njĩra ya gũtũma manyamarĩke mũno. (Mat. 8:​28-​32; Mar. 5:​1-5) Ndũkanahũthie ona hanini hinya ũrĩa araika acio oru makoragwo naguo kana ũrĩa ũkoragwo na “mũnene wa ndaimono.” (Mat. 9:​34) Tiga nĩ ũteithio wa Jehova, tũtingĩhota gũtooria Shaitani. w15 5/15 1:6, 7

Angĩkorũo nĩ ũraigua ũkĩgucĩrĩrio mũno wĩingĩrie thĩinĩ wa ngomanio itagĩrĩire-rĩ, ũngĩka atĩa? Ĩtĩkĩra atĩ ũrĩ na thĩna. (Rom. 7:​22, 23) Hoya Jehova akũhe hinya. (Afil. 4:​6, 7, 13) Wĩtheme maũndũ marĩa mangĩkũingĩria waganu-inĩ. (Thim. 22:3) Na kũngĩũka igerio ta rĩu, regana narĩo ũtekũrĩa marĩĩgu. (Kĩam. 39:12) Jesu nĩ aatũigĩire kĩonereria kĩega mũno harĩ gwĩtiiria magerio. Jesu ndaigana gũtumumario nĩ ciĩranĩro cia Shaitani, o na kana akĩamba gwĩcũrania ũhoro wacio. Ithenya rĩa ũguo, atekũrĩa marĩĩgu, aacokagia ũũ: “Nĩ haandĩke.” (Mat. 4:​4-​10) Jesu aarĩ na ũmenyo wa Kiugo kĩa Ngai na ũndũ ũcio nĩ wamũhotithagia kuoya ikinya rĩa na ihenya na kũgweta maandĩko rĩrĩa aragerio. Nĩguo tũtoorie Shaitani, no mũhaka twĩmenyerere tũtikaingĩre thĩinĩ wa ngomanio itagĩrĩire. w15 5/15 2:15, 16

Gũkorũo tũrĩ na ũhoti wa gũtaũkĩrũo nĩ maũndũ tũtarĩ twacemania namo, no gũtũteithie kwĩgerekania na ũũgĩ wa Jehova na gwĩciria kabere moimĩrĩro ma ciĩko ciitũ. Jehova angĩenda, no ahote kuona mbere nginya moimĩrĩro marĩa manini ma ciĩko imwe. O na gũtuĩka ithuĩ tũtirĩ na ũhoti ta ũcio, no tũhote gwĩciria kabere ũrĩa kũngĩthiĩ tũngĩka ũndũ mũna. Nĩguo twĩgerekanie na ũũgĩ wa Ngai, nĩ wega kwamba gwĩciria kana kũhũũra mbica moimĩrĩro ma ciĩko ciitũ. Kwa ngerekano, angĩkorũo ũrĩ na ndũgũ na mũndũ mũrenda kũhikania nake, nĩ ũkũbatara kũririkana atĩ ihinda-inĩ rĩu ti ũndũ mũhũthũ kwĩgirĩrĩria merirĩria ma ngomanio. Nĩ ũndũ ũcio, wĩtheme gwĩka ũndũ o wothe ũngĩthũkia ũrata waku wa goro hamwe na Jehova. Rũmĩrĩra ũtaaro ũyũ wa Jehova wa ũũgĩ: “Mũndũ mũbarĩrĩri onaga gũkĩgĩa ũũru, akehitha, no arĩa matarĩ ogĩ mathiagĩrĩra o na mbere, magakĩya kũhera.”​​—Thim. 22:3. w15 5/15 4:10, 11

Ta ririkana ũrĩa Mũthamaki Daudi eekire. “Nake [Daudi] arĩ kũu igũrũ [nyũmba-inĩ yake] akĩona mũndũ-wa-nja agĩĩthamba.” (2 Sam. 11:2) Ndaigana kweheria maitho na meciria make harĩ mũtumia ũcio. Ũndũ ũcio watũmire erirĩrie mũtumia wene na agĩtharia nake. Nĩguo tũtoorie methugunda moru, tũkũbatara ‘kũgĩa kĩrĩko na maitho maitũ,’ o ta ũrĩa Ayubu eekire. (Ayub. 31:​1, 7, 9) No mũhaka tũtue itua irũmu rĩa kũgirĩrĩria maitho maitũ nĩguo tũtikerorere mũndũ tũrĩ na muoroto wa waganu. Ũguo nĩ hamwe na gwĩthema kwĩrorera mbica cia ũũra thoni kompiuta-inĩ, ibaũ-inĩ cia kũgathĩrĩria indo, ngathĩti-inĩ, kana handũ hangĩ o hothe. Rĩrĩa ũrarũa na merirĩria moru, oya ikinya rĩa na ihenya. Ĩtĩkĩra kũrũmĩrĩra ũtaaro wa Kiugo kĩa Ngai tondũ nĩ ũgũgũteithia gwĩthema mehia na nĩ ũndũ ũcio ũikare ũrĩ mũtheru.​—Jak. 1:​21-25. w15 6/15 3:12-14

Gwĩciria ũhoro wa maũndũ marĩa maakorire Jesu kahinda kanini thutha wake kũbatithio, no gũtũteithie gũtaũkĩrũo bata wa gĩcunjĩ gĩkĩ kĩa ihoya rĩa kĩonereria: “Ndũgatũtware magerio-inĩ.” Jesu aatwarĩtwo nĩ roho wa Ngai werũ-inĩ “nĩguo akagerio nĩ mũcukani.” (Mat. 4:1) Hihi ũndũ ũcio nĩ wagĩrĩirũo nĩ gũtũgegia? Ndũngĩtũgegia tũngĩtaũkĩrũo nĩ gĩtũmi kĩnene kĩrĩa gĩatũmire Ngai atũme Mũriũ wake gũkũ thĩ. Aamũtũmĩte gũkũ thĩ nĩguo acokie thitango ĩrĩa yoimĩrire rĩrĩa Adamu na Hawa maareganire na ũnene wa Ngai. Kwarĩ na ciũria ciabataraga ihinda nĩguo icokio. Kwa ngerekano-rĩ, hihi ũrĩa Ngai ombĩte mũndũ warĩ na mahĩtia? Hihi mũndũ mũkinyanĩru nĩ angĩahotire kũrũmia wĩkindĩru wake harĩ Ngai o na akĩhatĩkagwo nĩ ‘ũrĩa mũru’? Na hihi mũndũ nĩ angĩagacĩrire atarĩ rungu rwa wathani wa Ngai ta ũrĩa Shaitani ooigĩte? (Kĩam. 3:​4, 5) Gũcokia ciũria ta icio nĩ kũngĩabatarire ihinda iraya ĩndĩ nĩ kũngĩateithirie andũ o hamwe na araika mone atĩ njĩra ya Jehova ya gwathana nĩyo njega biũ. w15 6/15 5:12

Thĩna ũrĩa mũnene ũkaambĩrĩria atĩa? Ũkaambĩrĩria rĩrĩa ndini ciothe cia maheeni ikaaninwo. Thĩinĩ wa Bibilia, ndini icio ciĩtagwo “Babuloni ũrĩa Mũnene, nyina wa maraya.” (Kũg. 17:​5-7) Na githĩ ti ũndũ mwagĩrĩru biũ kũhaanania ndini cia maheeni na mũmaraya! Atongoria a ndini icio nĩ mahũraga ũmaraya na atongoria a gĩũteti a thĩ ĩno njũru. Handũ ha kũnyita Jesu na Ũthamaki wake mbaru, manyitaga mbaru atongoria a gũkũ thĩ na makahũthia mawatho ma Bibilia no getha tu magĩe na hinya wa gĩũteti. Makoragwo marĩ ngũrani biũ na Akristiano aitĩrĩrie maguta arĩa maikaraga matethahĩtie. (2 Kor. 11:2; Jak. 1:​27; Kũg. 14:4) Nũ ũkaanina ndini icio cia maheeni? Jehova Ngai nĩwe ũgeekĩra ‘rĩciria rĩake’ ngoro-inĩ cia “hĩa iria ikũmi” cia ‘nyamũ ĩrĩa ya rangi mũtune.’ Hĩa icio nĩ thirikari ciothe cia gĩũteti iria mahinda-inĩ maya inyitaga mbaru Ũrũmwe wa Mabũrũri, ũrĩa ũrũgamĩrĩirũo nĩ ‘nyamũ ĩrĩa ya rangi mũtune.’​—Kũg 17:​3, 16-18. w15 7/15 2:3, 4

Nĩ kĩĩ kĩngĩarũngire mwĩcirĩrie ũcio mũru? Paulo eerire Akristiano acio ũũ: “Rĩu ariũ a Ithe witũ-rĩ, ndamũthaitha . . . atĩ mwaragie ũhoro o ũmwe inyuothe, gũtige kũgĩa na nyamũkano thĩinĩ wanyu; no rĩrĩ, mũkĩiguane o wega, mũikarage mwĩ ngoro ĩmwe, mũgĩtuaga ũhoro na njĩra o ĩmwe.” (1 Kor. 1:​10, 11, 13) O na ũmũthĩ gũtiagĩrĩirũo nĩ kũgĩa na nyamũkano o na hanini thĩinĩ wa kĩũngano gĩa Gĩkristiano. (Rom. 16:​17, 18) Paulo aaririkanirie Akristiano aitĩrĩrie maguta atĩ bũrũri ũrĩa ũrĩ wao kĩũmbe nĩ igũrũ, na nĩ ũndũ ũcio matiagĩrĩirũo nĩ kũiga meciria mao harĩ maũndũ ma gũkũ thĩ. (Afil. 3:17-​20) Magĩrĩirũo nĩ gũtungatĩra marĩ mabarũthi handũ-inĩ ha Kristo. Mabarũthi matiĩingĩragia ngucanio-inĩ na maũndũ-inĩ ma gĩũteti ma bũrũri ũrĩa matũmĩtwo magatungatĩre. O ũndũ ũmwe na ũcio, Akristiano aitĩrĩrie maguta matiagĩrĩirũo kwĩingĩrania ngucanio-inĩ na maũndũ-inĩ ma gĩũteti ma gũkũ thĩ. (2 Kor. 5:​20) O nao Akristiano arĩa marĩ na kĩĩrĩgĩrĩro gĩa gũgaatũũra gũkũ thĩ nĩ raiya a Ũthamaki wa Ngai, nĩ ũndũ ũcio matiagĩrĩirũo kũnyita mbaru mwena o na ũrĩkũ harĩ maũndũ ma gĩũteti ma gũkũ thĩ. w15 7/15 3:9, 10

Gwĩcũrania ũhoro wa mũhari ũcio no gũgũteithie kuona ũrĩa Jehova akwendete na ũrĩa akũrũmbũyagia. Korũo na ma atĩ ũrĩ wa bata maitho-inĩ ma Jehova. (1 Pet. 5:​6, 7) Twagĩrĩirũo kuona Bibilia ĩrĩ ya bata mũno tondũ nĩyo njĩra ĩrĩa nene Ngai ahũthagĩra gũtwarĩria. Aciari na ciana mangĩaranagĩria wega moimĩranĩtie ngoro no mehokane na makorũo na wendo gatagatĩ-inĩ kao. Jehova nĩ Ithe witũ ũrĩ wendo. O na gũtuĩka tũtirĩ twamuona kana tũkĩmũigua akĩaria-rĩ, nĩ atwaragĩria kũgerera Kiugo gĩake, na nĩ twagĩrĩirũo nĩ kũmũthikĩrĩria. (Isa. 30:​20, 21) Tondũ nĩ tũmwĩyamũrĩire, Jehova nĩ endaga gũtũtongoria na gũtũgitĩra kuumana na maũndũ marĩa moru. Ningĩ nĩ endaga tũmũmenye na tũmwĩhoke.​​—Thab. 19:7-11; Thim. 1:33. w15 8/15 1:6, 7

O na tũgĩtanyaga Paradiso ĩrĩa ĩrĩ mbere-rĩ, irathimo iria nene thĩinĩ wa thĩ njerũ igakorũo irĩ cia kĩĩroho. Nĩ ũgaakorũo ũrĩ ũndũ wa gĩkeno mũno kũmenya atĩ rĩĩtwa rĩa Jehova nĩ rĩtheretio na ũnene wake ũgaatũgĩrio! (Mat. 6:​9, 10) Nĩ tũgacanjamũka mũno tuona atĩ muoroto ũrĩa Jehova aarĩ naguo kĩambĩrĩria-inĩ wĩgiĩ andũ na thĩ nĩ wahinga. Ningĩ ta wĩcirie ũrĩa ũgaakorũo ũrĩ ũndũ mũhũthũ gũkuhĩrĩria Jehova makĩria o ũrĩa tũgathiĩ tũgĩkinyanagĩra. (Thab. 73:28) Tũrĩ na ma atĩ nĩ tũgaakenera irathimo icio tondũ Jesu oigire atĩ “maũndũ mothe mahotekaga nĩ Ngai.” (Mat. 19:​25, 26) Ĩndĩ angĩkorũo nĩ tũrerĩgĩrĩra gũgaatũũra thĩinĩ wa thĩ tene na tene no mũhaka twĩrutanĩrie mahinda-inĩ maya nĩguo ‘twĩnyitĩre’ muoyo wa tene na tene. (1 Tim. 6:19) No mũhaka tũikarage tũkĩrĩgagĩrĩra mũthia wa thĩ ĩno njũru na ningĩ nĩ tũkũbatara kuoya makinya marĩa magĩrĩire nĩguo twĩhaarĩrie nĩ ũndũ wa ũtũũro thĩinĩ wa thĩ njerũ. w15 8/15 3:2, 3

Maũndũ maingĩ marĩa maheanagwo nĩ nyũmba cia mohoro ta TV, redio, Intaneti, na mabuku, no mathũkie ũrata witũ na Jehova. Maũndũ macio matikoragwo marongoreirio gwaka wĩtĩkio witũ harĩ Jehova na ciĩranĩro ciake. Ithenya rĩa ũguo, mekĩraga andũ ngoro maige mwĩhoko wao harĩ thĩ ĩno njũru ya Shaitani. Nĩ ũndũ ũcio, twagĩrĩirũo nĩ kwĩmenyerera mũno tũtigathuure maũndũ marĩa mangĩarahũra “merirĩria marĩa moru ma gũkũ thĩ.” (Tit. 2:​12) Ngũrani na maũndũ marĩa maheanagwo nĩ thĩ ĩno, maũndũ marĩa maheanagwo nĩ ithondeka rĩa Jehova matukũ-inĩ maya ma kũrigĩrĩria mekĩraga andũ ngoro kũgĩa na mĩthiĩre ĩrĩa ĩgaatũma mone muoyo wa tene na tene. Nĩ tũkenaga mũno nĩ gũkorũo na ngathĩti, broshua, mabuku, video, na ũhoro thĩinĩ wa Intaneti ũrĩa ũtũteithagia gũthiĩ na mbere gũtungatĩra Ngai. Ningĩ ithondeka rĩa Jehova nĩ rĩtigagĩrĩra atĩ o kiumia kũrĩ na mĩcemanio thĩinĩ wa ciũngano makĩria ma 110,000 thĩ yothe. Ũhoro ũrĩa twĩrutaga mĩcemanio-inĩ ĩyo na igomano-inĩ, ũkoragwo umĩte Bibilia-inĩ na nĩ wakaga wĩtĩkio witũ harĩ Ngai na harĩ ciĩranĩro ciake.​​—Ahib. 10:​24, 25. w15 8/15 4:9, 11

Andũ a Jehova nĩ mendaga kũmenyeria thamiri ciao. Mendaga thamiri ciao imateithagie gũkũũrana wega na ũũru kũringana na ithimi iria irĩ thĩinĩ wa Kiugo kĩa Ngai. Thamiri ĩmenyeretio wega nĩ ĩrehaga ũrũmwe thĩinĩ wa kĩũngano gĩa Gĩkristiano. Kũgĩa na ũmenyo wa Bibilia gwiki ti kũiganu harĩ kũmenyeria na kũhũthĩra thamiri itũ. No mũhaka twende ithimi cia Ngai na tũkorũo na wĩtĩkio atĩ nĩ itũgunaga. Paulo aandĩkire ũũ: “Muoroto wa ũhoro ũrĩa ũtaaranagwo naguo nĩ rĩrĩ, nĩ gũtũma wendani wonekage o ũrĩa uumanĩte na ngoro theru, na thamiri njega, o na wĩtĩkio ũtarĩ na ũhinga.” (1 Tim. 1:5) O ũrĩa tũramenyeria thamiri itũ na tũkamĩathĩkĩra, noguo wendo witũ harĩ Jehova ũrĩthiaga ũkĩongererekaga na wĩtĩkio witũ ũkarũma. Ũrĩa tũhũthagĩra thamiri itũ nĩ ũguũragia ũrĩa tũtariĩ kĩĩroho, na kana nĩ twendaga biũ gũkenia Jehova. Thamiri nĩ ĩguũragia tũrĩ andũ a mũthemba ũrĩkũ kũna. w15 9/15 2:2, 3

Jehova nĩwe watũmbire, na agĩtũhe muoyo. (Thab. 100:​3-5) Nĩkĩo Bibilia ĩtaga Adamu mũrũ “wa Ngai,” nake Jesu nĩ aarutire arũmĩrĩri ake metage Ngai “Ithe witũ wĩ Igũrũ.” (Luk. 3:38; Mat. 6:9) Tondũ nĩwe mũheani muoyo, Jehova nĩ Ithe witũ na nĩ atwendete o ta ũrĩa mũciari wĩ wendo endete ciana ciake. Athuri no makorũo mendete ciana ciao. Ĩndĩ gũtirĩ mũthuri o na ũmwe mũkinyanĩru. O na mangĩgeria atĩa matingĩhota biũ kuonia ciana ciao wendo ta wa Ithe witũ wa igũrũ. Andũ amwe nĩ makoragwo na mathĩna maingĩ ma kĩĩmeciria nĩ ũndũ wa kũrerũo magĩkagwo maũndũ moru nĩ maithe mao. Ũcio nĩ ũndũ wa kĩeha mũno. Ngũrani na ũguo, Jehova ndangĩka ciana ciake maũndũ moru. (Thab. 27:10) Gũtaũkĩrũo nĩ ũrĩa Jehova atwendete na ũrĩa atũrũmbũyagia nĩ kũrĩtũmaga tũmũkuhĩrĩrie makĩria.​—Jak. 4:8. w15 9/15 4:3, 4

Tuonanagia atĩ nĩ twendete Jehova na tũkamwĩhoka rĩrĩa twacaria ũtongoria wake hĩndĩ ciothe mbere ya gũtua matua. Hĩndĩ ĩmwe matukũ-inĩ ma mũnabii Samueli, Aisiraeli nĩ maatoririo mbaara-inĩ nĩ Afilisiti. Andũ acio a Ngai nĩ maabataraga ũteithio na ũgitĩri. Meekire atĩa? Mooigire ũũ: “Rekei tũgĩre ithandũkũ rĩa kĩrĩkanĩro kĩa Jehova, tũrĩrute Shilo, tũrĩrehe gũkũ tũrĩ nĩ getha rĩikare thĩinĩ witũ, nĩguo rĩtũhonokie rĩtũrute moko-inĩ ma thũ ciitũ.” Moimĩrĩro maarĩ marĩkũ? “Afilisiti magĩkĩhũrana nao, nao Aisiraeli makĩhũrũo, makĩũrĩra mũndũ o mũndũ hema-inĩ yake; gũgĩkĩũraganwo mũno mũno; nĩ ũndũ kũu kwagũire andũ a Isiraeli ngiri mĩrongo ĩtatũ arĩa maathiaga na magũrũ, moragĩtwo.” (1 Sam. 4:​2-4, 10, 11) Nĩ ũndũ wa kuoya Ithandũkũ rĩa kĩrĩkanĩro, Aisiraeli nĩ maangĩonekire ta maacaragia ũteithio wa Jehova. No matiacaririe ũtongoria wa Jehova, maarũmĩrĩire meciria mao na nĩkĩo maatoririo nĩ thũ ciao.​—Thim. 14:12. w15 9/15 5:16, 17

Nĩ maũndũ marĩkũ mangĩ ũngĩka nĩguo ũkũrie na ũthiĩ na mbere gũkorũo na wĩtĩkio ũrĩ na hinya? Ndũkaiganĩre tu na maũndũ marĩa werutire mbere ya kũbatithio. (Ahib. 6:​1, 2) Wĩrute ũhoro wa morathi ma Bibilia marĩa marĩkĩtie kũhinga tondũ no mekĩre wĩtĩkio waku hinya. Ningĩ no ũhũthĩre Kiugo kĩa Ngai gwĩthima wone kana ciĩko ciaku nĩ itwaranaga na ũrĩa Bibilia yugaga igũrũ rĩgiĩ arĩa makoragwo na wĩtĩkio mũrũmu. (Jak. 1:25; 2:​24, 26) Mũtũmwo Paulo eerire Akristiano a hĩndĩ yake ‘o mũndũ omagĩrĩrie ũrĩa ũngĩ na wĩtĩkio wake.’ (Rom. 1:12) Rĩrĩa tũranyitanĩra na Akristiano arĩa angĩ, nĩ tũrĩkanagĩra hinya, makĩria rĩrĩa tũranyitanĩra na arĩa wĩtĩkio wao ‘wanagerio.’ (Jak. 1:3) Thiritũ njũru nĩ ithũkagia wĩtĩkio, ĩndĩ thiritũ njega nĩ iwĩkagĩra hinya. (1 Kor. 15:33) Kĩu nĩ gĩtũmi kĩmwe kĩrĩa gĩtũmaga tũtaarũo atĩ tũtikanatige “kũũnganaga hamwe,” ĩndĩ tũthiage na mbere ‘kũhatanĩrĩria.’​—Ahib. 10:​24, 25. w15 10/15 2:2, 8, 9

Nĩ tũbataraga mahinda ma gwĩcũrania rĩrĩa tũreharĩria kwĩruta Bibilia na mũndũ. Tũngĩĩcũrania mabataro ma o mũrutwo no twĩcirie ciũria cia mawoni kana ngerekano iria tũngĩhũthĩra gũteithia mũrutwo nĩguo athiĩ na mbere. Kũhũthĩra mahinda gwĩcũrania maũndũ macio nĩ gwakaga wĩtĩkio witũ na gũgatũteithia kũgaacĩrithia ũrutani witũ. Ũguo noguo twagĩrĩirũo nĩ gwĩka rĩrĩa tũrahaarĩria ngoro citũ nĩ ũndũ wa gũthiĩ kũhunjia. (Ezar. 7:10) Kũngĩhoteka no ũthome gĩcunjĩ kuuma ibuku-inĩ rĩa Atũmwo nĩguo gĩgũteithie kũgĩa na kĩyo makĩria ũtungata-inĩ. Ningĩ no wĩcũranie ũhoro wĩgiĩ mĩhari ya Bibilia ĩrĩa ũrenda kũhũthĩra mũthenya ũcio na mabuku marĩa ũrenda gũtigĩra andũ. (2 Tim. 1:6) Wĩcirie ũhoro wĩgiĩ andũ a gĩcigo kĩrĩa mũhunjagia na nĩ maũndũ marĩkũ mangĩmagucĩrĩria. Rĩrĩa weharĩria na njĩra ĩyo, nĩ ũrĩhotaga kũhũthĩra Bibilia na njĩra njega ũkĩhunjĩria andũ.​—1 Kor. 2:4. w15 10/15 4:9

Wĩyũrie ũũ: ‘Nĩ maũndũ marĩkũ mangĩtũma mwana wakwa erorere ponografĩ? Hihi nĩ oĩ ũgwati wayo? Hihi ndĩ mũrata wake wa hakuhĩ ũũ atĩ angĩgucĩrĩrio kwĩrorera ponografĩ no oke gũcaria ũteithio harĩ niĩ?’ O na ciana ciaku cingĩkorũo irĩ nini mũno, no ũciĩre ũũ: “Ũngĩona ũndũ wa waganu Intaneti-inĩ na ũigue ũkĩgucĩrĩrio kwĩrorera, ndũkanaigue hinya gũka kũnjĩra. Ndũkaigue thoni tondũ wendi wakwa nĩ gũgũteithia.” Ũtaũku ningĩ nĩ ũrĩgũteithagia wee mwene gũthuura maũndũ marĩa magĩrĩire ma gwĩkenia. Mũrũ wa Ithe witũ Pranas ooigire ũũ: “Nyĩmbo iria tũthikagĩrĩria, mabuku marĩa tũthomaga, kana thenema iria twĩroragĩra tũrĩ aciari, nĩ cigagĩra ciana kĩonereria kĩrĩa ikũrũmĩrĩra. No wĩre ciana ciaku maũndũ maingĩ mũno, no ciana ciaku iroraga ũrĩa ũreka, ikegerekania nawe.” Ciana ciaku cingĩona atĩ ũthuuraga maũndũ marĩa magĩrĩire ma gwĩkenia, no kũhoteke o nacio ciĩkage o tawe.​—Rom. 2:​21-24. w15 11/15 1:12-14

Mahinda-inĩ maya nĩ tũratĩtĩrithĩrio mũno ũhoro wa kũhunjia kũndũ kwa mũingĩ, ta ceceni-inĩ cia mbathi, ceceni-inĩ cia mũgithi, kũrĩa andũ marũgamagia ngaari, barabara-inĩ, na thoko-inĩ. Angĩkorũo ndũrĩ ũmĩrĩru wa kũhunjia kũndũ kwa mũingĩ hoya Jehova agũteithie. Ningĩ no wĩkĩrũo ngoro nĩ ciugo cia Mũrũ wa Ithe Witũ Manera ũrĩa ũtungatĩire ihinda iraya arĩ mũrori wa mũthiũrũrũko. Oigire ũũ: “Rĩrĩa kuoimĩra njĩra njerũ ya kũhunjia twamĩonaga ĩrĩ njĩra ĩngĩ ya gũtungatĩra Jehova, ya kuonania wĩhokeku na wĩkindĩru witũ harĩ we. Twakoragwo twĩhaarĩirie kũmũtungatĩra na njĩra o yothe ĩrĩa angĩatwĩrire.” Kũhũthĩra njĩra njerũ ya kũhunjia na makĩria ĩrĩa tũngĩona ta ĩtarĩ hũthũ nĩ gwĩkagĩra hinya wĩtĩkio witũ harĩ Jehova na gũgatũteithia wĩra-inĩ wa kũhunjia. (2 Kor. 12:​9, 10) Ahunjia aingĩ nĩ makenagĩra kwĩra andũ ũhoro wa website itũ ya jw.org. O ta ũrĩa redio yahũthĩkaga gũkinyĩria andũ ũhoro ũrĩa mwega nginya kũndũ kũraya, noguo website itũ ĩrahũthĩka mahinda-inĩ maya. w15 11/15 5:12, 13, 15

Hau kabere, Bibilia ya Gĩthũngũ ya New World Translation yahũthĩrĩte kiugo gĩa Kĩĩhibirania “Sheol” rĩandĩko-inĩ rĩa Kohelethu 9:10 na mĩhari-inĩ ĩngĩ. Kiugo kĩu ningĩ nĩ kĩahũthagĩrũo mũno nĩ Bibilia ingĩ cia Gĩthũngũ. Ndũrakoragwo ũrĩ ũndũ mũhũthũ harĩ ataũri a thiomi ingĩ gũtaũra kiugo kĩu tondũ andũ aingĩ arĩa maragia thiomi icio matiũĩ kiugo kĩu gĩa Kĩĩhibirania. Kiugo kĩu gĩtionekaga thĩinĩ wa ndikicanarĩ ciao na andũ amwe meciragia atĩ kiugo kĩu nĩ rĩĩtwa rĩa kũndũ. Nĩ ũndũ wa itũmi icio, thĩinĩ wa Bibilia ya New World ya 2013, ataũri nĩ meetĩkĩririo mataũre kiugo gĩa Kĩĩhibirania “Sheol” kĩrĩa ningĩ na Kĩngiriki gĩtagwo “Hades.” Magĩcitaũra na njĩra igũtaũkĩra andũ wega, magĩgĩta “Mbĩrĩra.” Ciugo cia Gĩthũngũ iria ciahĩtũkĩtwo nĩ mahinda nĩ cieheririo, na handũ-inĩ ha cio gũkĩhũthĩrũo ciugo iria irahũthĩka mũno mahinda-inĩ maya. Kũhũthĩra maũndũ mamwe marĩa ataũri maahũthĩrĩte hau kabere magĩtaũra Bibilia ya New World nĩ gwateithirie kwagagĩria Bibilia ĩyo ya Gĩthũngũ ya 2013. w15 12/15 2:10, 12

Rĩrĩa tũrĩ arwaru no twĩhoke Jehova atũũmĩrĩrie, atũhe ũũgĩ, na atũtiirĩrĩre o ta ũrĩa eekagĩra ndungata ciake cia tene. O na kũrĩ ũguo, rĩandĩko rĩu rĩtionanagia atĩ mũndũ angĩacaĩire mũndũ ũtarĩ hinya, angĩatũũrire tene na tene ategũkua. Muoroto wa Daudi akĩandĩka ũguo, ndwarĩ kuonania atĩ mũndũ ũcio nĩ angĩaringĩirũo kĩama atũũre tene na tene atĩ tondũ wa gũcaĩra mũndũ ũrĩa ũtarĩ hinya. No kũhoteke ciugo icio cioonanagia atĩ Ngai nĩ angĩateithirie mũndũ ũcio mũcayanĩri angĩagĩire na thĩna. Na njĩra ĩrĩkũ? Daudi aatarĩirie ũũ: “Jehova nĩarĩmũmenyagĩrĩra arĩ ũrĩrĩ-inĩ arĩ mũrũaru, na acooke amũhonie arĩ o hau ũrĩrĩ-inĩ wake.” (Thab. 41:​3, Holy Bible in Gĩkũyũ) Mũndũ ũcio mũcayanĩri nĩ angĩakorirũo na ma atĩ Ngai ndangĩriganĩrũo nĩwe na nĩ onaga wĩhokeku wake. Ningĩ tondũ mwĩrĩ wa mũndũ ũmbĩtwo ũrĩ na ũhoti wa kwĩhonia guo mwene, nĩ angĩahotire kũgĩa na ũgima mwega wa mwĩrĩ. w15 12/15 4:7

Paulo ndaaragia ũhoro wa andũ othe arĩa maarĩ njera. Aaragia ũhoro wa aarĩ na ariũ a Ithe witũ arĩa moohetwo nĩ ũndũ wa wĩtĩkio wao. Akĩandĩka ciugo icio aakoretwo aikarĩte njera mĩaka ĩna. (Afil. 1:​12-14) Nĩ aacokeirie aarĩ na ariũ a Ithe witũ ngatho nĩ ũndũ wa ‘gũcaĩra arĩa maarĩ njera.’ (Ahib. 10:34) Akristiano acio Ahibirania matingĩahotire gwĩka ũguo tondũ maarĩ kũraya nake. Hihi nĩ kũrĩ ũndũ mangĩahotire kũmũteithia? Nĩ mangĩahotire kũhoya na kĩyo nĩ ũndũ wake. (Ahib. 13:​18, 19) O na ithuĩ ũmũthĩ no tũkorũo kũndũ kũraya na aarĩ na ariũ a Ithe witũ arĩa marĩ njera. No tũremwo nĩ kũmahe ũteithio ta ũrĩa mangĩheo nĩ Akristiano arĩa marĩ gũkuhĩ na njera icio. O na kũrĩ ũguo no tũmacaĩre na tũmonie wendo na njĩra ya gũthiĩ na mbere kũmaririkana na kũmagweta mahoya-inĩ maitũ, tũgathaitha Jehova nĩ ũndũ wao. w16.01 1:13, 14

Muoroto wa Ngai kĩambĩrĩria-inĩ warĩ andũ matũũre tene na tene gũkũ thĩ. (Kĩam. 1:28; Thab. 37:29) O na kũrĩ ũguo, Jehova nĩ athuurĩte andũ amwe mathiĩ igũrũ magatuĩke athamaki na athĩnjĩri-Ngai. Kwoguo hĩndĩ ĩrĩa amaitĩrĩria maguta kĩĩrĩgĩrĩro kĩao na mwĩcirĩrie wao nĩ icenjagia biũ makambĩrĩria kwĩrirĩria mũno gũthiĩ igũrũ. (Ef. 1:18) Mũndũ amenyaga atĩa atĩ arĩ na rĩĩtana rĩa gũthiĩ igũrũ na atĩ kũna nĩ aitĩrĩirio roho mũtheru? Paulo nĩ acoketie kĩũria kĩu thĩinĩ wa marũa marĩa aandĩkĩire Akristiano aitĩrĩrie maguta thĩinĩ wa Roma, arĩa ‘meetĩtwo matuĩke aamũre.’ Aamerire ũũ: “Mũtiaamũkĩrire roho wa ũkombo wa gũtũma mwĩtigagĩre rĩngĩ, no mwamũkĩrire roho wa kũmũtua ariũ, roho o ũrĩa ũtũmaga twanĩrĩre tũkoiga: “Abba, Baba!” (Rom. 1:7; 8:​15) Na njĩra nguhĩ nĩ kuuga atĩ kũgerera roho wake mũtheru, Ngai nĩ atigagĩrĩra Mũkristiano mũitĩrĩrie maguta nĩ amenya biũ atĩ arĩ na rĩĩtana rĩa gũgaatuĩka mũgai wa Ũthamaki wa Ngai.​—1 Thes. 2:12. w16.01 3:8, 9

Nĩ na njĩra ĩrĩkũ tũngĩhe arĩa aitĩrĩrie maguta gĩtĩo kĩrĩa kĩmagĩrĩire? Ti wega kũmooragia ciũria ciĩgiĩ ũrĩa maagĩire na rĩĩtana rĩa gũthiĩ igũrũ. Twaga gwĩka ũguo, nĩ tũrĩĩthemaga kwĩingĩria maũndũ-inĩ matatũkoniĩ. (2 Thes. 3:11) Tũtiagĩrĩirũo gwĩciria atĩ aciari, mũthuri kana mũtumia, kana mbarĩ cia mũndũ mũitĩrĩrie maguta atĩ o nao nĩ marĩitĩrĩrio maguta. Gũkorũo andũ metainwo kana mahikanĩtie gũtikonainie ona hanini na gũitĩrĩrio maguta. (1 Thes. 2:12) Ningĩ nĩ twagĩrĩirũo gwĩthema kũũria arĩa mahikanĩtie na mũndũ ũitĩrĩirio maguta ũrĩa maiguaga nĩ ũndũ wa kũmenya atĩ matigaatũrania nake thĩinĩ wa Paradiso gũkũ thĩ. Handũ ha kũmooria ciũria ingĩmaiguithia ũũru, ithuothe twagĩrĩirũo gũkoragwo na ũũma atĩ Jehova nĩ agaakumbatũra guoko gwake ‘ahũnie kĩrĩa gĩothe kĩĩ muoyo kĩrĩa gĩkenda.’ (Thab. 145:16) Rĩrĩa twethema kuona ta Akristiano aitĩrĩrie maguta marĩ a bata mũno gũkĩra Akristiano arĩa angĩ-rĩ, ũcio ũkoragwo ũrĩ ũgitĩri harĩ ithuĩ kuumana na “ariũ a Ithe witũ a maheeni” arĩa moigaga atĩ nĩ aitĩrĩrie maguta.​—Gal. 2:​4, 5; 1 Joh. 2:19. w16.01 4:10, 11