Novemba

Rĩrĩa twathoma atĩ Iburahimu aakuire ‘ekinyĩirie arĩ mũndũ mũniaru-rĩ,’ ti kuuga atĩ nĩ aaiganĩtie gũtũũra na atĩ ndeeriragĩria gũgaatũũra hĩndĩ ĩrĩa ĩroka. Bibilia ĩkĩaria ũhoro wa Iburahimu yugaga ũũ: “Nĩ gũkorũo eetereire itũũra rĩrĩa rĩrĩ na mĩthingi ya ma, o rĩo mũthondeki na mwaki warĩo arĩ Ngai.” (Ahib. 11:10) Ta hũũra mbica ũrĩa Iburahimu agaakena agĩtũũra thĩinĩ wa Paradiso na agĩthiĩ na mbere kũgaacĩrithia ũrata wake na Jehova! Nĩ akaahutio ngoro mũno amenya atĩ kĩonereria gĩake kĩa wĩtĩkio gĩathire na mbere gũteithia ndungata cia Jehova mĩaka ngiri nyingĩ thutha wa gũkua gwake! Na nĩ aakeeruta atĩ gũcokerio Isaaka kwarĩ “ngerekano” ya ũndũ ũngĩ mũnene makĩria. (Ahib. 11:19) Ningĩ nĩ akaamenya atĩ, ruo rũrĩa aaiguire rĩrĩa ehaaragĩria kũruta Isaaka igongona nĩ rũteithĩtie andũ milioni nyingĩ kũhũũra mbica ũrĩa Jehova aaiguire rĩrĩa aarutire Mũrũwe Jesu Kristo atuĩke ũkũũri.​—Joh. 3:16. w16.02 1:15, 16

Wĩhokeku witũ harĩ Jehova no ũgerio mũno mũndũ ũrĩ na ũnene angĩtwĩka ũru. No kũhoteke Jonathani nĩ aacemanĩtie na thĩna ta ũcio. Mũthamaki Saulu ũrĩa warĩ mũitĩrĩrio maguta wa Jehova nĩ aamenyete atĩ mũriũ ũcio wake aarĩ na ũrata na Daudi no ndaataũkagĩrũo nĩ kĩrĩa gĩatũmaga Jonathani ende Daudi. Kwoguo rĩrĩa Jonathani aageragia gũteithia Daudi, Saulu nĩ aarakarire mũno na agĩconorithia Jonathani mbere ya andũ aingĩ. O na kũrĩ ũguo Jonathani ndaigana kwĩrĩhĩria. Ningĩ aathire na mbere gũkorũo arĩ mwĩhokeku harĩ Ngai na harĩ Daudi, ũrĩa wathuurĩtwo atuĩke mũthamaki wa Isiraeli thutha wa Saulu. (1 Sam. 20:​31-​41) Thĩinĩ wa ciũngano cia andũ a Jehova mahinda-inĩ maya-rĩ, arĩa matongoragia no mage gũtwĩka maũndũ moru. O na kũrĩ ũguo ti akinyanĩru na no matũtuĩre ũrĩa gũtagĩrĩire. (1 Sam. 1:​13-17) Nĩ ũndũ ũcio mũndũ angĩtwĩka ũũru kana atũtuĩre ũrĩa gũtagĩrĩire, twagĩrĩirũo gũthiĩ na mbere gũkorũo tũrĩ ehokeku harĩ Jehova. w16.02 3:14, 15

Andũ amwe mahota kwaga gũtaũkĩrũo nĩ ngũrani ya kwĩyamũrĩra Ngai na kũbatithio. Kwa ngerekano, andũ amwe ethĩ moigaga atĩ nĩ meyamũrĩire Jehova no matiĩharĩirie kũbatithio. Hihi no kũhotekeke ũguo? Rĩrĩa mũndũ areyamũrĩra Jehova amwĩraga atĩ ekũmũtungatĩra tene na tene. Narĩo hĩndĩ ya kũbatithio akonania mbere ya andũ atĩ nĩ eyamũrĩire Jehova. Nĩ ũndũ ũcio kũbatithio ĩkoragwo ĩrĩ njĩra ya kuumbũra mbere ya andũ atĩ nĩ weyamũrĩire Jehova na njĩra ya mahoya ũrĩ wiki. Mbere ya kũbatithio wagĩrĩirũo gũtigĩrĩra atĩ nĩ ũrataũkĩrũo kwĩyamũrĩra Ngai nĩ kuuga atĩa. Na njĩra nguhĩ nĩ kuuga atĩ rĩrĩa weyamũrĩra Jehova, ũmwĩraga atĩ rĩu ũrĩ wake. Ũmwĩraga atĩ, ũtũũro-inĩ waku, ũrĩigaga wendi wake mbere ya maũndũ marĩa mangĩ mothe. Kĩĩranĩro o gĩothe kĩagĩrĩirũo kuoywo na ũritũ na makĩria kĩrĩa mũndũ erĩire Jehova!​—Mat. 5:33. w16.03 1:14, 15

Paulo aahũthĩrire ngerekano ya mwĩrĩ wa mũndũ gũtaarĩria atĩ o Mũkristiano o Mũkristiano no ateithie kĩũngano gĩkorũo na ũrũmwe na kĩrũmĩrĩre Jesu arĩ we mũtwe wa kĩũngano. Oigire atĩ ciĩga ciothe cia mwĩrĩ inyitanagĩra hamwe na igateithio ‘nĩ marũngo mothe marĩa maũheaga kĩrĩa ũbataraga.’ (Ef. 4:16) Nĩ ũndũ ũrĩkũ tũngĩka tũrĩ mũndũ o mũndũ o na angĩkorũo tũrĩ ethĩ kana tũrĩ akũrũ, andũ marĩ hinya kana matarĩ hinya, nĩguo kĩũngano gĩkorũo kĩrĩ na hinya na ũrũmwe? Twagĩrĩirũo gwathĩkĩra na gũtĩa athuri tondũ nĩo Jesu amũrĩte matũtongoragie thĩinĩ wa kĩũngano. (Ahib. 13:7, 17) Ti hingo ciothe arĩ ũndũ mũhũthũ gwĩka ũguo. O na kũrĩ ũguo no tũhoe Jehova atũteithie. Roho wake mũtheru no ũtũteithie tũhote kũnyita mbaru mĩbango ya kĩũngano na ngoro itũ yothe. Nĩ ũndũ ũcio, rĩmwe na rĩmwe tũngĩigua hinya kũrũmĩrĩra ũtongoria ũrĩa tũraheo, twagĩrĩirũo nĩ gwĩcũrania ũrĩa kĩũngano gĩgũkorũo na ũrũmwe tũngĩĩnyihia na tũnyitanĩre na athuri. Makĩria ma ũguo, kuonania ũnyitanĩri maũndũ-inĩ ta macio no gũtũteithie tũthiĩ na mbere kwendana makĩria. w16.03 3:8, 9

Ariũ a ithe witũ amwe ethĩ matiateithirio nĩ aciari kwĩigĩra mĩoroto ya kĩĩroho kuuma marĩ o anini. Nĩ ũndũ ũcio, andũ acio ethĩ matiigana kũiga maũndũ ma kĩĩroho mbere ũtũũro-inĩ wao. (Mat. 10:24) Kwoguo, mũthuri agĩrĩirũo kwamba gũthondeka ũrata na mũrũ wa Ithe witũ ũrĩa arenda gũteithia agĩrĩre kũheo mĩeke kĩũngano-inĩ na amũteithie one atĩ kĩũngano nĩ kĩramũbatara. Acoke thutha wa ihinda maarĩrĩrie nake maandĩko marĩa mangĩmũteithia gwĩciria na ũritũ ũhoro wa wĩyamũrĩri wake harĩ Jehova. (Koh. 5:4; Isa. 6:8; Mat. 6:​24, 33; Luk. 9:​57-​62; 1 Kor. 15:58; 2 Kor. 5:​15; 13:5) Mũthuri no amũrie ũũ: ‘Werire Jehova atĩa rĩrĩa wamwĩyamũrĩire?’ No agerie kũmũkinyĩra ngoro na njĩra ya kũmũria ũũ: ‘Ũgwĩciria Jehova aaiguire atĩa mũthenya ũrĩa wabatithirio?’ (Thim. 27:11) ‘Ĩ nake Shaitani aaiguire atĩa?’ (1 Pet. 5:8) Maandĩko ta macio no mahutie mũrũ wa Ithe witũ ngoro mũno. w15 4/15 2:9, 11

Nĩkĩ ti hingo ciothe Jehova acokagia mahoya maitũ na ihenya ũrĩa tũngĩĩciria? Ririkana atĩ Bibilia ĩhananagia Jehova na mũciari na ithuĩ ĩgatũhanania na ciana. (Thab. 103:13) Mũciari ndaheaga mwana wake kĩrĩa gĩothe amwĩtia kana akamũhe o hĩndĩ ĩyo amwĩtia. Mũciari nĩ oĩ atĩ mwana no etie kĩndũ ũmũthĩ no rũciũ akorũo atarĩ na ũhoro nakĩo. Ningĩ mũciari nĩ amenyaga kĩrĩa kĩagĩrĩire mwana wake biũ, na akamenya ũrĩa kĩndũ kĩu gĩkũhutia andũ arĩa angĩ. Nĩ amenyaga kĩrĩa mwana arabatara na rĩrĩa agĩrĩirũo nĩ kũmũhe. Mũciari angĩmenyera kũheaga mwana wake o kĩrĩa gĩothe amwĩtia o hĩndĩ ĩrĩa amwĩtia, angĩtuĩka wa gwathagwo nĩ mwana wake. Jehova, Ithe witũ wa igũrũ, nĩ atwendete. Tondũ nĩwe Mũũmbi witũ, nĩ oĩ maũndũ marĩa tũbataraga na nĩwe ũmenyaga ihinda rĩrĩa rĩagĩrĩire rĩa gũtũhingĩria maũndũ marĩa twamũhoya. Nĩ wega gweterera tũkeyonera ũrĩa Jehova egũcokia mahoya maitũ.​—Isa. 29:16; 45:9. w15 4/15 4:6, 7

Tondũ nĩ tũkuhĩrĩirie mũno mũico wa mũtabarĩre ũyũ Shaitani endaga ‘twĩiguĩre tha’ na njĩra ya gũtũma twende mũno gũthingata maũndũ ma thĩ ĩno. Endaga tũriganĩrũo atĩ tũratũũra matukũ-inĩ ma kũrigĩrĩria nĩguo tũtige gũikara twĩhũgĩte. Ndũgetĩkĩre kũhĩngĩcwo nĩwe! Ithenya rĩa ũguo, ikaraga ‘wĩhũgĩte.’ (Mat. 16:​22, 23; 24:42) Ndũgetĩkie mũhuhu wa Shaitani atĩ mũico ũrĩ kũraihu kana atĩ gũtirĩ mũico ũroka. Shaitani endaga twĩtĩkie atĩ tũtirĩ agĩrĩru a kwendwo nĩ Ngai na atĩ Ngai ndangĩtuohera mehia maitũ. Ũcio o naguo no mũhuhu wake wa maheeni. No ta wĩcirie, nũ ũtarĩ mwagĩrĩru o na hanini kwendwo nĩ Jehova? Na githĩ ti Shaitani! Ningĩ nũ wĩmenyaga wega atĩ gũtirĩ hingo akoherũo? Nĩ Shaitani. No ithuĩ Bibilia ĩtwĩraga ũũ: “Ngai ndaagĩte kĩhooto; ndangĩriganĩrũo nĩ wĩra wanyu, o na wendani ũrĩa mwonanirie nĩ ũndũ wa rĩĩtwa rĩake.” (Ahib. 6:​10) Jehova nĩ akenagio mũno nĩ kĩyo gitũ gĩa gwĩka wendi wake, na ũtungata witũ ti wa tũhũ. (1  Kor. 15:58) Nĩ ũndũ ũcio, rekei tũtigetĩkĩre kũhĩngĩcwo nĩ mũhuhu wa maheeni wa Shaitani. w15 5/15 1:16-19

Iburahimu nĩ aamenyete atĩ Jehova nĩ aakoretwo akĩhingia ciĩranĩro ciake, kwoguo aarĩ na ma biũ atĩ ciĩranĩro iria Jehova aamwĩrĩire nĩ ikaahinga. Wĩtĩkio wa Iburahimu harĩ ciĩranĩro cia Ngai nĩ wekĩrire hinya itua rĩake rĩa gwĩka wendi wa Ngai. Nĩ ũndũ wa wĩtĩkio nĩ oimire itũũra rĩa Uru, na handũ ha kwĩyakĩra kũndũ gwa gũtũũra matũũra-inĩ ma Kanaani, aathire gũikaraga hema-inĩ. Nĩ aamenyete atĩ matũũra macio nĩ mangĩaniinirũo tondũ athamaki a kuo matiatungatagĩra Jehova. (Josh. 24:2) Iburahimu ‘aatanyĩte kuona itũũra rĩrĩa rĩakĩtwo gĩtina kĩrũmu, o rĩo mwaki warĩo na mũthondeki nĩ Ngai.’ (Ahib. 11:10) ‘Eeyonaga’ arĩ thĩinĩ wa itũũra rĩtarĩ rĩa gũthira rĩrĩa Jehova agaakorũo arĩ Mũthamaki wa rĩo. Habili, Enoku, Nuhu, Iburahimu, na andũ angĩ ta acio nĩ meetĩkĩtie ũhoro wa kũriũka na nĩ meeriragĩria gũtũũra thĩinĩ wa thĩ rungu rwa Ũthamaki wa Ngai, “itũũra rĩrĩa rĩakĩtwo gĩtina kĩrũmu.” Kũhũũra mbica irathimo ta icio cia Ũthamaki nĩ gwekĩraga hinya wĩtĩkio wao harĩ Jehova.​​—Ahib. 11:​15, 16. w15 5/15 3:8, 9

Jehova nĩ onanirie hinya wake na njĩra cia magegania mũno kũgerera harĩ Jesu Kristo. Mabuku ma Injiri nĩ monanagia maũndũ mangĩkĩra wĩtĩkio witũ hinya megiĩ ciama imwe iria Jesu aaringire. No kũhoteke Jesu nĩ aaringire ciama ingĩ nyingĩ. (Mat. 9:​35; Luk. 9:​11) Hatarĩ nganja, Ngai nĩ onanirie hinya wake kũgerera harĩ Jesu. Nĩkĩo mũtũmwo Paulo oigire atĩ, “Kristo nĩwe hinya wa Ngai.” Ciama iria Jesu aaringire itũhutagia atĩa? Mũtũmwo Petero oigire atĩ Jesu nĩ aaringire ciama kana “morirũ.” (Atũm. 2:​22) Maũndũ ma hinya marĩa Jesu eekire rĩrĩa aarĩ gũkũ thĩ monanagia irathimo cia magegania iria igakorũo kuo hĩndĩ ya wathani wake. Monanagia ciama iria akaaringĩra andũ othe thĩinĩ wa thĩ njerũ. Ningĩ ciama ciake nĩ itũteithagia mũno kũmenya ngumo ciake na cia Ithe. w15 6/15 1:1, 2

Rĩrĩa Jesu aamenyire atĩ Jehova nĩ ahonia mũtumia ũcio, aamwĩrire ũũ arĩ na wendo: “Mwarĩ ũyũ, gwĩtĩkia gwaku nĩkuo gwatũma ũhone; thiĩ na ũhoro, ũikare wĩ mũhonu mũrimũ waku.” (Mar. 5:34) Kaĩ Jesu nĩ arĩ tha-ĩ! Nĩ acayagĩra arĩa manyamarĩkaga nĩ ũndũ wa kũrũara. Shaitani endaga twĩtĩkie atĩ tũtirĩ kĩene na atĩ gũtirĩ mũndũ ũtwendete. Kũgerera ciama iria Jesu aaringire, nĩ onanirie wega atĩ nĩ atũrũmbũyagia na akarũmbũyia mathĩna maitũ biũ. Hatarĩ nganja, arĩ Mũthamaki na Mũthĩnjĩri-Ngai-Mũnene, Jesu nĩ arĩ tha. (Ahib. 4:​15) No ũkorũo ũtarĩ ũndũ mũhũthũ harĩ ithuĩ gũtaũkĩrũo nĩ ũrĩa arĩa marĩ na ndwari ya ihinda iraya maiguaga, makĩria angĩkorũo tũtirĩ twakorũo na ndwari ta ĩyo. Ĩndĩ nĩ wega kũririkana atĩ Jesu nĩ aacayaga hamwe na arĩa arũaru o na gũtuĩka we mwene ndaarwaraga. Rekei kĩonereria kĩa Jesu gĩtũtindĩkage gwĩkaga o ũguo, kũringana na ũhoti witũ.​​—1 Pet. 3:8. w15 6/15 2:11, 12

Nĩ gĩtĩo kĩnene kũmenya rĩĩtwa rĩa Ngai na “gwĩtanio na rĩĩtwa rĩake.” (Atũm. 15:14; Isa. 43:10) Tũhoyaga Ithe witũ wa igũrũ ũũ: “Rĩĩtwa rĩaku nĩrĩamũrũo.” (Mat. 6:9) Kũhoya ũguo no gũgũtindĩke ũhoyage Jehova agũteithagie gwĩthema kuuga kana gwĩka ũndũ ũngĩcambithia rĩĩtwa rĩake itheru. Tũtingĩenda kũhaana Akristiano amwe a karine ya mbere arĩa mateekaga kũringana na ũrĩa maahunjagia, o ta ũrĩa rĩandĩko rĩa ũmũthĩ rĩronania. Nĩ kĩĩ kĩrabatarania nĩguo rĩĩtwa rĩa Ngai rĩamũrũo na rĩtherio biũ? No mũhaka Jehova akoya ikinya rĩa kũnina arĩa othe mareganaga na ũnene wake na rũtũrĩko. (Ezek. 38:​22, 23) Ningĩ kahora kahora nĩ agaacokeria andũ ũkinyanĩru. Na githĩ tũtiĩriragĩria mũno hĩndĩ ĩrĩa andũ na araika othe magatĩithagia rĩĩtwa rĩa Jehova! Macũngĩrĩro-inĩ Ithe witũ wa igũrũ ũrĩ wendo nĩwe ‘ũgatuĩka maũndũ mothe kũrĩ andũ othe.’​​—1 Kor. 15:28. w15 6/15 4:7, 10

Makĩria ma gwĩta thĩ “gĩturũa kĩa magũrũ,” kiugo kĩu ningĩ nĩ kĩhũthĩrĩtwo na njĩra ya mũhaano thĩinĩ wa Maandĩko ma Kĩĩhibirania kwaria ũhoro wa hekarũ ya tene ĩrĩa yahũthagĩrũo nĩ Aisiraeli. (1 Maũ. 28:2; Thab. 132:7) Hekarũ ĩyo nĩyo yarĩ gatũũrũ ka ũthathaiya wa ma gũkũ thĩ. Nĩ ũndũ ũcio, yarĩ kĩndũ gĩthaka mũno maitho-inĩ ma Jehova, na nĩ yatũmaga gĩturũa kĩa magũrũ make gĩkorũo na riri. (Isa. 60:13) Mahinda-inĩ maya gatũũrũ ka ũthathaiya wa ma ti hekarũ yakĩtwo gũkũ thĩ, ĩndĩ nĩ hekarũ ya kĩĩroho ĩrĩa ĩrehagĩra Jehova riri mũingĩ gũkĩra mwako o wothe wakĩtwo nĩ andũ. Hekarũ ĩyo nĩ mũbango ũrĩa ũhotithagia andũ kũiguithanio na Ngai kũgerera ũthĩnjĩri-Ngai na igongona rĩa Jesu Kristo. Yaambĩrĩirie mwaka wa 29 rĩrĩa Jesu aabatithirio na agĩitĩrĩrio maguta agĩtuĩka Mũthĩnjĩri-Ngai-Mũnene wa hekarũ ya Jehova ya kĩĩroho.​​—Ahib. 9:​11, 12. w15 7/15 1:1-3

Rĩu rĩgaakorũo rĩrĩ ihinda rĩa kũhe arĩa ehokeku ngerenwa yao na rĩa kũherithia arĩa aganu. (Mat. 24:46, 47, 50, 51; 25:​19, 28-​30) Kũringana na ibuku rĩa Mathayo, Jesu aarĩkĩrĩirie kĩmenyithia gĩa ithirĩro rĩa mahinda maya na njĩra ya kũheana ngerekano ya ngʼondu na mbũri. Oigire ũũ: “Rĩrĩa Mũrũ wa mũndũ agoka e na riri wake, na araika othe hamwe nake, hĩndĩ ĩo nĩagaikarĩra gĩtĩ gĩake gĩa ũthamaki kĩrĩa kĩĩ na riri: na ndũrĩrĩ ciothe nĩikonganio mbere yake: nake nĩagaciamũrania, o ta ũrĩa mũrĩithi aamũranagia ngʼondu na mbũri: aige ngʼondu mwena wake wa ũrĩo, no mbũri aciige mwena wake wa ũmotho.” (Mat. 25:31-33) Ngʼondu icio na mbũri igaatuĩrũo ituĩro rĩrĩkũ? Ngerekano ĩyo ĩrĩkagĩrĩria ũũ: “Nao [mbũri] nĩ magaatuĩrũo gĩkuũ gĩa tene na tene, no arĩa athingu maheo muoyo wa tene na tene.”​​—Mat. 25:​46, NW. w15 7/15 2:11, 12

Ma nĩ atĩ, no tũkorũo na wendo mũnene kwerekera bũrũri, ũndũire, rũthiomi, na irio cia kũrĩa twarereirũo. O na kũrĩ ũguo, no mũhaka twĩtheme mwerekera wa kuonaga ta indo citũ arĩ cio njega makĩria. Jehova ombire indo cia mĩthemba mĩingĩ nĩguo tũcikenagĩre. (Thab. 104:24; Kũg. 4:11) Kwoguo tũtiagĩrĩirũo nĩ kuona atĩ njĩra ĩmwe ya gwĩka maũndũ nĩyo njega gũkĩra iria ingĩ. Ngai endaga andũ a mĩthemba yothe mamenye ũhoro ũrĩa wa ma na makoona muoyo wa tene na tene. (Joh. 3:​16; 1 Tim. 2:​3, 4) Twagĩrĩirũo gũkoragwo twĩhaarĩirie gũthikĩrĩria mawoni ma andũ arĩa angĩ, na kũngĩhoteka tũkametĩkĩra o na mangĩkorũo marĩ ngũrani na maitũ. Tweka ũguo, nĩ tũrĩkenagĩra ũtũũro na tũgaikara tũrĩ na ũrũmwe na aarĩ na ariũ a Ithe witũ. Tũtinyitaga mbaru mwena o na ũrĩkũ harĩ thogothogo cia gũkũ thĩ tondũ tũkoragwo tũrĩ ehokeku harĩ Jehova na Ũthamaki wake. Nĩ tũthũire mwĩtĩo na roho wa macindano ũrĩa ũkoragwo thĩinĩ wa thĩ ya Shaitani. w15 7/15 3:17, 18

Nĩ kũrĩ njĩra nyingĩ tũngĩhũthĩra kuonia Jehova atĩ nĩ tũmwendete. Kwa ngerekano, nĩ tuonanagia atĩ nĩ twendete Ngai na andũ rĩrĩa tũrahunjia ũhoro mwega wa Ũthamaki tũrĩ na kĩyo. (Mat. 24:14; 28:​19, 20) Ningĩ nĩ tuonanagia biũ atĩ nĩ twendete Jehova na njĩra ya kũrũmia wĩkindĩru witũ rĩrĩa tũragerio. (Thab. 84:11; Jak. 1:​2-5) Tũngĩcemania na magerio maritũ mũno, no tũkorũo na ma atĩ Jehova nĩ arona ũrĩa tũranyamarĩka na nĩ egũtũteithia tondũ tũrĩ a bata mũno maitho-inĩ make. (Thab. 56:8) Wendo witũ harĩ Jehova nĩ ũtũtindĩkaga twĩcũranie ũhoro wa ũũmbi wake na mawĩko mangĩ ma magegania. Rĩrĩa tũrathoma Bibilia na kĩyo nĩ tuonanagia atĩ nĩ twendete Ngai na atĩ nĩ tuonaga Kiugo gĩake kĩrĩ kĩa bata mũno. Wendo witũ harĩ Jehova nĩ ũtũmaga twende mũno kũmũkuhĩrĩria na njĩra ya mahoya. Ningĩ wendo witũ harĩ we ũthiaga ũkĩongererekaga o ũrĩa tũrecũrania ũhoro wa igongona rĩa ũkũũri rĩa Mũriũ wake rĩrĩa aarutire nĩ ũndũ wa mehia maitũ. (1 Joh. 2:​1, 2) Icio nĩ imwe tu cia itũmi nyingĩ iria itũmaga twende Jehova nĩ ũndũ wa wendo wake mũnene gũtwerekera. w15 8/15 1:6, 17, 18

No kũhoteke thĩinĩ wa thĩ njerũ kũrĩ mahinda tũkabatara kuonania wetereri. Kwa ngerekano, twahota gũkanaigua atĩ andũ amwe nĩ mariũkĩtio, na andũ a famĩlĩ na arata ao nĩ makenete mũno nĩ ũndũ ũcio. O na kũrĩ ũguo, no gũkorũo ithuĩ nĩ tũkabatara gweterera kũriũkio kwa endwa aitũ. Kũngĩthiĩ ũguo-rĩ, hihi nĩ tũgakenera na arĩa angĩ na tũkorũo na wetereri? (Rom. 12:15) Kwĩruta gũkũria wetereri harĩ kũhinga gwa ciĩranĩro cia Jehova mahinda-inĩ maya nĩ gũgatũteithia gũkũria wetereri hĩndĩ ĩyo. Ningĩ no twĩhaarĩrie gũgatũũra thĩinĩ wa thĩ njerũ na njĩra ya kuonania wetereri rĩrĩa twamũkĩra mogarũrũku harĩ ũtaũku witũ wĩgiĩ Bibilia. Hihi nĩ twĩrutaga na tũkagĩa na wetereri o ũrĩa ũtaũku witũ wĩgiĩ ma cia Bibilia ũrathiĩ ũkĩguũragio mahinda-inĩ maya? Angĩkorũo nĩ twĩkaga ũguo, no kũhoteke tũtikaritũhĩrũo kũgĩa na wetereri thĩinĩ wa thĩ njerũ o ũrĩa Jehova agathiĩ atũguũrĩirie wendi wake gũtwerekera.​​—Thim. 4:​18; Joh. 16:12. w15 8/15 3:9, 10

Mũtũmwo Paulo eekĩrire Akristiano a Efeso ngoro makũre kĩĩroho. Aamerire merutanĩrie nĩguo ‘makinyĩre ũhoro wa gwĩtĩkia wĩtĩkio o ũmwe, o na wa kũmenya Mũrũ wa Ngai, na o mũndũ witũ atuĩke mũndũ mũgima ũrĩ na kĩũga kĩiganaine na kĩrĩa gĩa Kristo, arĩ we ũiyũrĩte ũgima wothe.’ (Ef. 4:13) Paulo akĩandĩkĩra Akristiano acio, kĩũngano kĩu kĩa Efeso gĩakoretwo kuo ihinda rĩa mĩaka mĩingĩ. Akristiano aingĩ a kĩũngano kĩu nĩ maathiĩte na mbere kĩĩroho. O na kũrĩ ũguo, amwe ao no maabataraga gũkũra kĩĩroho. Ũguo noguo kũrĩ kĩũngano-inĩ kĩa Aira a Jehova ũmũthĩ. Nĩ kũrĩ na aarĩ na ariũ a Ithe witũ aingĩ matungatĩire Jehova ihinda iraya na nĩ magimarĩte kĩĩroho. O na kũrĩ ũguo, ti andũ othe kĩũngano-inĩ makoragwo magimarĩte kĩĩroho. Kwa ngerekano, andũ ngiri nyingĩ nĩ mabatithagio o mwaka, na nĩ ũndũ ũcio kũrĩ o na andũ aingĩ marabatara kwĩrutanĩria gũkũra kĩĩroho. Hihi wee nĩ ũrerutanĩria gũkũra kĩĩroho?​—Kol. 2:6, 7. w15 9/15 1:2, 3

Andũ aingĩ nĩ monaga atĩ gwĩka maũndũ ma kũnogora mwĩrĩ nĩ gũtũmaga magĩe na ũgima mwega wa mwĩrĩ na gũgacanjamũra mwĩrĩ na meciria. Angĩkorũo tũrenda gwĩka maũndũ ma kũnogora mwĩrĩ tũrĩ gĩkundi kĩa andũ-rĩ, hihi nĩ mũndũ o wothe tũngĩnyitanĩra nake? Thimo 13:20 yugaga ũũ: “Thiaga thiritũ na andũ arĩa ogĩ, nawe no ũgĩe na ũũgĩ, no ũrĩa ũtindanagia na irimũ nĩ gũtuurũo agatuurũo.” Nĩ ũndũ ũcio, twagĩrĩirũo gũtongorio nĩ thamiri itũ ĩrĩa ĩmenyeretio nĩ Bibilia rĩrĩa tũrathura maũndũ ma gwĩkenia. Nĩ hĩndĩ ĩrĩkũ twagĩrĩirũo nĩ gwĩkenia? Hihi ũbangagĩra maũndũ maku ma gwĩkenia hĩndĩ ya maũndũ ma kĩĩroho ta mĩcemanio, ũtungata, na wĩruti waku kĩũmbe? Kana hihi wĩkoraga ũgĩthinĩkĩrĩria maũndũ ma kĩĩroho harĩ maũndũ ma gwĩkenia? Nĩ maũndũ marĩkũ ma bata ũtũũro-inĩ waku? Jesu oigire ũũ: “No ambai mũcarie ũthamaki wa Ngai o na ũthingu wake, nacio indo icio ciothe nĩmũrĩkĩragĩrĩrio.” (Mat. 6:33) Rĩrĩa ũratua itua rĩgiĩ ũrĩa ũkũhũthĩra mahinda maku-rĩ, hihi thamiri yaku nĩ ĩkũririkanagia ũtaaro ũcio wa Jesu? w15 9/15 2:13, 15

Ũcio warĩ ũtaaro mwega na wa ihinda rĩrĩa rĩagĩrĩire. Ũndũ wa kĩeha nĩ atĩ, Kaini ndaigana gwĩtĩkĩra ũtaaro ũcio na nĩ ũndũ ũcio akĩingĩra mehia-inĩ. (Kĩam. 4:​11-13) Rĩrĩa Jehova onire Baruku akuĩte ngoro nĩ ũndũ wa gũkorũo na mwerekera ũtarĩ mwega, nĩ aamũteithirie kũgĩa na mwerekera ũrĩa wagĩrĩire. Ngũrani na Kaini, Baruku nĩ eetĩkĩrire ũtaaro wa Jehova na akĩhonokia muoyo wake. (Jer. 45:​2-5) Mũtũmwo Paulo aandĩkire ũũ: “Ũrĩa Mwathani endete, nĩwe aherithagia, na akahũra mwana o wothe ũrĩa etĩkagĩra.” (Ahib. 12:6) O na kũrĩ ũguo, Jehova to kũherithia aherithagia arĩa endete ĩndĩ nginya nĩ amamenyagĩria. Thĩinĩ wa Bibilia nĩ tũthomaga ũhoro wa ndungata imwe cia Jehova iria aamenyeririe igĩtuĩka andũ a bata mũno. w15 9/15 4:12, 13

Agibeoni nĩ maataũkĩirũo atĩ Aisiraeli maatongoragio nĩ Ngai ũrĩa wa ma. O nake Rahabu nĩ onire guoko kwa Ngai. Thutha wake kũigua ũrĩa Jehova aahonoketie andũ ake, eerire athigani arĩa erĩ Aisiraeli ũũ: “Nĩnjũĩ atĩ Jehova nĩamũheete bũrũri ũyũ.” O na gũtuĩka gwĩka ũguo nĩ gwatũmire eingĩrie ũgwati-inĩ, ũndũ ũcio nĩ wonanirie atĩ nĩ aarĩ na wĩtĩkio atĩ Jehova nĩ angĩamũhonokirie na ahonokie famĩlĩ yao. (Josh. 2:​9-13; 4:23, 24) Ngerekano icio o hamwe na ingĩ irĩ thĩinĩ wa Bibilia, nĩ itũteithagia gũtaũkĩrũo nĩ ũrĩa kuona Ngai kana kuona guoko gwake kuugĩte. O ũrĩa tũrathiĩ na mbere tũkĩmũmenyaga-rĩ, o na ithuĩ no tuone guoko gwake tondũ nĩ tuonaga ngumo o hamwe na ciĩko ciake na ‘maitho ma ngoro.’ (Ef. 1:18) Nĩ harĩ bata twĩgerekanagie na andũ a tene o hamwe na a mahinda maya, arĩa meeyoneire Jehova agĩteithia andũ ake. w15 10/15 1:6, 7, 9

Bibilia yonanagia atĩ Maritha aarĩ mũrata mũnene mũno wa Jesu na ĩkonania atĩ Jesu nĩ aamwendete. O na kũrĩ ũguo, Maritha towe mũtumia ũrĩa tu Jesu eendete na aahete gĩtĩo. Kwa ngerekano, Jesu nĩ eendete Mariamu mwarĩ wa nyina na Maritha o hamwe na nyina Mariamu. (Joh. 19:​25-27) Gũkĩrĩ ũguo-rĩ, nĩ kĩĩ gĩatũmĩte Jesu ende Maritha? Jesu eendete Maritha nĩ ũndũ wa ũtugi na kĩyo gĩake, na makĩria nĩ ũndũ wa wĩtĩkio wake mũrũmu. Maritha nĩ eetĩkĩtie morutani ma Jesu biũ. Ningĩ nĩ aarĩ na wĩtĩkio mũrũmu atĩ Jesu nĩwe warĩ Mesia ũrĩa weranĩirũo. (Joh. 11:​21-27) O na kũrĩ ũguo, o ta ithuĩ, o nake ndaarĩ mũkinyanĩru. Hĩndĩ ĩmwe Jesu arĩ kwao mũciĩ, Maritha nĩ aamwĩrire arũnge ũndũ onaga ta wahĩtanĩte. Aamwĩrire ũũ: “Mwathani, kaĩ ũtekũũria atĩ mwarĩ wa maitũ nĩandigĩte ndĩmũmathĩre ndĩ nyiki? Ndũkĩmwĩre andeithie.”​—Luk. 10:​38-42. w15 10/15 3:1, 2

Twathiĩ na mbere gwĩcũrania maũndũ ma kĩĩroho, nĩ tũkũhota gũtũũria kĩyo ũtungata-inĩ witũ. Na njĩra ĩyo nĩ tũrĩhotaga gwĩkĩra aarĩ na ariũ a Ithe witũ hinya o hamwe na andũ arĩa tũrahunjĩria. Ningĩ gwĩcũrania na njĩra ndikĩru ũhoro wĩgiĩ kĩheo kĩrĩa kĩnene Ngai atũheete kĩa igongona rĩa ũkũũri, nĩ kũrĩtũteithagia kuona ũrata witũ hamwe na Jehova ũrĩ wa bata mũno. (Rom. 3:24) Mũrũ wa Ithe witũ Mark kuuma Afrika ya Mũhuro ũrĩa waikĩtio njera nĩ ũndũ wa wĩtĩkio oigire ũũ: “Gwĩcũrania nĩ ta gũthiĩ thabarĩ. O ũrĩa tũrecũrania maũndũ ma kĩĩroho, noguo tũrĩmenyaga maũndũ maingĩ megiĩ Jehova Ngai. Rĩngĩ na rĩngĩ rĩrĩa ndĩraigua nguĩte ngoro kana ngatangĩka nĩ ũndũ wa mahinda marĩa maroka, njoyaga Bibilia ngecũrania igũrũ rĩgiĩ Rĩandĩko rĩna. Ũndũ ũcio nĩ ũhooragĩria mũno.” w15 10/15 4:15

Rĩrĩa wona kwagĩrĩire, taaragĩria ciana ciaku gĩtũmi gĩa gũciigĩra watho mũna kana gĩtũmi gĩa itua rĩrĩa ũtuĩte. Tinĩnja waku angĩtaũkĩrũo nĩ gĩtũmi kĩu, no kũhoteke agwathĩkĩre kuuma ngoro. Mũrũ wa Ithe witũ Barry ũrĩa warerire ciana inya, oigaga ũũ: “Kũhe matinĩnja itũmi cia kũmera meke ũndũ mũna nĩ gũtũmaga makwĩhoke tondũ nĩ monaga atĩ ndũratua matua maku na gĩthũri.” Ningĩ nĩ wega kũririkana atĩ matinĩnja ti twana tũnini, tondũ nĩ marĩ ‘ũhoti wa gwĩciria.’ (Rom. 12:1, New World Translation) Barry aatarĩirie ũũ: “Matinĩnja nĩ mabataraga kwĩruta kũhũthĩra ũhoti wa gwĩciria nĩguo matuage matua ma ũũgĩ handũ ha gũtongorio nĩ ngoro.” Rĩrĩa wahe tinĩnja waku itũmi cia matua maku ũrĩ na wĩnyihia nĩ ekuona atĩ nĩ ũramenya no arathiĩ akĩgimaraga, na nĩ ũndũ ũcio o nake nĩ arĩĩrutaga gwĩtuĩra matua make akĩhũthĩra ‘ũhoti wa gwĩciria.’ w15 11/15 2:11

Thĩinĩ wa thĩ yothe, kũrĩ na andũ milioni nyingĩ arĩa mathathayagia Jehova na makahunjia ũhoro wa rĩĩtwa rĩake na muoroto wake. Twagĩrĩirũo kuona aarĩ na ariũ a Ithe witũ acio atĩa? (Rom. 12:10) Mũtũmwo Petero aandĩkire ũũ: “Kuona atĩ nĩmũtheretie mĩoyo yanyu nĩ gwathĩkĩra ũhoro-wa-ma, mũgagĩtuĩka a kwendana na ariũ a Ithe witũ hatarĩ ũhinga-rĩ, endanagai o kwendana na ngoro cianyu.” Aacokire akiuga ũũ: “Gũkĩra maũndũ mothe, tũũrai mwendanĩte o kwendana inyuene.” (1 Pet. 1:22; 4:8) Nĩ ũndũ wa wendo mũnene ũrĩa tũkoragwo naguo gatagatĩ-inĩ gaitũ, ithondeka riitũ rĩa thĩ yothe nĩ rĩa mwanya mũno. Makĩria ma ũguo, tondũ nĩ twendete Jehova na nĩ twathĩkagĩra watho wake, nĩ atũteithagia na roho wake mũtheru. Roho ũcio nĩ ũtũteithagia gũkorũo na ũrũmwe wa mwanya tũrĩ famĩlĩ ya thĩ yothe.​—1 Joh. 4:​20, 21. w15 11/15 4:8, 9

Jehova nderĩgagĩrĩra twĩrute rũthiomi rũna atĩ nĩguo tũhote kwĩruta ũhoro wake kana wa mĩoroto yake. (Kũg. 7:​9, 10) Ona gũtuĩka andũ maragia thiomi itiganĩte, ũndũ ũcio ndũgiragĩrĩria Jehova kwaranĩria nao. Tũmenyaga ũguo atĩa? Kwa ngerekano, Bibilia ĩkoragwo na ciugo itarĩ nyingĩ iria Jesu aaririe na rũthiomi rũrĩa rwahũthagĩrũo hĩndĩ ĩyo. (Mat. 27:46; Mar. 5:41; 7:34; 14:36) Ona kũrĩ ũguo Jehova aatigĩrĩire atĩ ũhoro ũrĩa Jesu aaririe nĩ wandĩkwo na wataũrũo na Kĩngiriki na thutha ũcio ũgĩtaũrũo na thiomi ingĩ. Ningĩ tondũ Kiugo kĩa Ngai nĩ gĩathiire gĩgĩkobagio nĩ Ayahudi na Akristiano, gĩtiigana gũcenjia. Kobĩ icio nĩ ciacokire igĩtaũrũo na thiomi ingĩ nyingĩ. Kĩndũ mĩaka 400 thutha wa Kristo, mũndũ ũmwe wetagwo John Chrysostom oigire atĩ gũkinyĩria hĩndĩ yake morutani ma Jesu nĩ maataũrĩtwo na thiomi cia Suriata, Misiri, India, Perisia, Ethiopia, na thiomi ingĩ nyingĩ. w15 12/15 1:10, 11

Tũngĩaga gũtaũkĩrũo nĩ hĩndĩ ĩrĩa njagĩrĩru ya kwaria, ciugo citũ no ikorũo itarĩ na ũguni harĩ mũndũ ũrĩa tũrarĩria o na angĩkorũo nĩ acibataire. Kwa ngerekano Machi 2011 nĩ kwagĩire na gĩthingithia na kĩhuhũkanio kĩnene mwena wa irathĩro wa Japan na gĩgĩthũkangia biũ taũni nyingĩ. Andũ makĩria ma 15,000 nĩ maakuire. O na gũtuĩka Aira a Jehova icigo-inĩ icio o nao nĩ maahutĩtio nĩ gĩcanjama kĩu, nĩ maahũthĩrire Bibilia kũũmĩrĩria andũ arĩa maacakayaga. O na kũrĩ ũguo, nĩ maamenyaga atĩ andũ aingĩ a kũu nĩ a ndini ya Buddha na matiũĩ maũndũ maingĩ megiĩ Bibilia, na angĩ matiũĩ ũhoro wa Bibilia o na hanini. Nĩ ũndũ ũcio nĩ maataũkĩirũo atĩ ndũngĩarĩ ũndũ wa ũũgĩ gũthiĩ kũhunjĩria andũ acio ũhoro wa kĩĩrĩgĩrĩro gĩa kũriũka kahinda kanini tu thutha wa kĩhuhũkanio kĩu. Handũ ha ũguo maahũthĩrire kĩheo kĩao gĩa kwaria kũũmĩrĩria na gwĩkĩra andũ acio hinya, na makĩhũthĩra Bibilia gũtaarĩria andũ acio kĩrĩa gĩtũmaga maũndũ ta macio moru makore nginya andũ ega. w15 12/15 3:7

Ũndũ wa kĩeha nĩ atĩ mahinda-inĩ maya kũrĩ na andũ aingĩ akoroku marahũthĩra mĩrimũ gwĩtongia. Mendagia ndawa kana indo cia ũrigitani makĩhũthĩra ũira wa maheeni. Nao andũ angĩ kana kambuni, magaathagĩrĩria mũno ũrĩa ndawa ciao irĩ njega na magaciendia goro nĩguo mathondeke mbeca nyingĩ. Mũndũ angĩkorũo agiĩtwo nĩ mũrimũ na nĩ arenda mũno kĩhonia kana nĩ arenda gũtũũra tũũra no one morigitani macio ta marĩ ma ma. Angĩkorũo mũndũ nĩ mũbarĩrĩri kana nĩ mũũgĩ, nĩ arĩĩmenyagĩrĩra ũhoro-inĩ wĩgiĩ maũndũ marĩa araigua na makĩria angĩkorũo maroima harĩ mũndũ ũtathomeire maũndũ macio. Mũndũ mũbarĩrĩri no eyũrie ũũ: ‘Mũndũ ũyũ aroiga atĩ vitameni kana ndawa ĩno nĩ ĩteithĩtie andũ, no rĩrĩ, kũrĩ na ũira mũiganu wa kuonania ũndũ ũcio? Na tondũ andũ matihanaine-rĩ, hihi ndĩ na gĩtũmi kĩiganu gĩa gwĩtĩkia atĩ nĩ ĩkũndeithia? Na githĩ to batare gwĩka ũthuthuria makĩria kana njarie ũtaaro harĩ mũndũ ũthomeire ũndũ ũcio?’​—Gũcok. 17:6. w15 12/15 4:14, 15

Paulo nĩ aamenyaga atĩ tũtingĩtĩkĩra wendo wa magegania wa Kristo na twage gũtindĩkwo kũmũtũũrĩra. Rĩrĩa twataũkĩrũo biũ nĩ maũndũ marĩa Jehova atwĩkĩire, na ngoro citũ igatindĩkwo nĩ wendo wake, tũiguaga tũkĩĩrirĩria kwĩrutĩra na ngoro yothe harĩ Kristo. Twĩkaga ũguo na njĩra ĩrĩkũ? Arĩa mendete Jehova nĩ matindĩkagwo kwĩgerekania na kĩonereria gĩa Kristo na kũrũmĩrĩra makinya make. (1 Pet. 2:21; 1 Joh. 2:6) Tuonanagia nĩ twendete Ngai na Kristo na njĩra ya gwathĩka. Jesu oigire ũũ: “Mũndũ o wothe wĩtĩkagĩra maathani makwa na akamaathĩkĩra, ũcio nĩwe ũnyendete. Nake ũrĩa wothe ũnyendete nĩ arĩendagwo nĩ Awa.” (Joh. 14:21; 1 Joh. 5:3) Kwoguo wĩyũrie ũũ: ‘Nĩ maũndũ-inĩ marĩkũ nyonanĩtie atĩ nĩ ndĩrarũmĩrĩra biũ makinya ma Jesu? Nĩ maũndũ marĩkũ ingĩbatara kũrutĩra wĩra?’ Gwĩthuthuria na njĩra ĩyo nĩ kwa bata mũno tondũ kũrĩ na maũndũ maingĩ maratũhatĩka tũrũmĩrĩre mĩthiĩre ya andũ a gũkũ thĩ.​—Rom. 12:2. w16.01 2:7-9

Hihi nĩ ũkoragwo na kĩyo mũno ũtungata-inĩ? Nĩ ũthomaga Kiugo kĩa Ngai na kinyi na ũgathuthuria “maũndũ marĩa marikĩru ma Ngai”? (1 Kor. 2:10) Nĩ wonaga irathimo cia Jehova ũtungata-inĩ waku? Nĩ ũiguaga ũrĩ na wendi mũnene wa gũkenia Jehova? Nĩ ũiguaga atĩ nĩ itemi rĩaku gũteithia andũ arĩa angĩ maũndũ-inĩ ma kĩĩroho? Hihi kũrĩ na ũira wa kuonania atĩ Jehova nĩ agũteithĩtie ũtũũro-inĩ waku? Angĩkorũo macokio maku harĩ ciũria icio nĩ ĩĩ-rĩ, hihi ũguo nĩ kuonania atĩ ũrĩ na rĩĩtana rĩa gũthiĩ igũrũ? Aca. Nĩkĩ? Tondũ o na arĩa makoragwo na kĩĩrĩgĩrĩro gĩa gũgaatũũra gũkũ thĩ nĩ maiguaga ũguo. Roho wa Jehova ũrutaga wĩra na njĩra ĩmwe thĩinĩ wa ndungata ciake ciothe o na angĩkorũo irĩ na kĩĩrĩgĩrĩro kĩrĩkũ. Angĩkorũo nĩ ũkoragwo na nganja kana hihi ũrĩ mũitĩrĩrie maguta ũcio nĩ ũira wa atĩ ndũrĩ mũitĩrĩrie. w16.01 3:14, 15

Jesu nĩ aakenaga mũno akĩrutithania wĩra na Ithe, agakena nĩ kuona itemi rĩrĩa aahingagia na agakena nĩ kũmenya atĩ Jehova nĩ aakenagio nĩwe. Ĩ ithuĩ? Jesu oigire atĩ kũheana na kũheo nĩ kũrehaga gĩkeno. (Atũm. 20:35) Nĩ twagĩire na gĩkeno mũno rĩrĩa twamenyire ũhoro wa ma, na nĩ tũgĩaga na gĩkeno rĩrĩa tũraruta arĩa angĩ ũhoro wa ma. Rĩrĩa tũraruta andũ ma cia Bibilia nĩ tuonaga ũrĩa magĩaga na gĩkeno kĩa ma mambĩrĩria gũtaũkĩrũo nĩ ma icio na mambĩrĩria kũgĩa na ũrata na Ngai. Nĩ tũhutagio ngoro mũno rĩrĩa tuona makĩgarũrĩra mwĩcirĩrie na mĩthiĩre yao. Ũndũ ũcio nĩ ũtũmaga tuone wĩra wa kũhunjia ũrĩ wa bata mũno. Nĩguo ũgatũma arĩa mekũiguithanio na Ngai mone muoyo wa tene na tene. (2 Kor. 5:20) Gũtirĩ wĩra ũngĩ ũngĩtũrehera gĩkeno na kũiganĩra gũkĩra wĩra ũcio wa gũteithia andũ mathingate ũtũũro ũrĩa ũgaatũma matũũre tene na tene! w16.01 5:6, 7