Oktomba

Jehova ambĩrĩirie gũthuura Akristiano aitĩrĩrie maguta thutha wa kũriũka kwa Jesu na no kũhoteke atĩ Akristiano othe hĩndĩ ya karine ya mbere maarĩ aitĩrĩrie maguta. Kuuma karine ya mbere nginya kĩambĩrĩria-inĩ kĩa matukũ ma kũrigĩrĩria, andũ aingĩ arĩa mooigaga nĩ arũmĩrĩri a Kristo maarĩ Akristiano a maheeni. Jesu aamaringithanirie na “itindiĩ.” O na kũrĩ ũguo, hĩndĩ ĩyo yothe Jehova no aathiaga na mbere na gũitĩrĩria Akristiano amwe ehokeku maguta na nĩo maatariĩ ta “ngano” ĩrĩa Jesu aarĩtie ũhoro wayo. (Mat. 13:​24-30) Matukũ-inĩ maya ma kũrigĩrĩria Jehova nĩ athiĩte na mbere gũthuura Akristiano aitĩrĩrie maguta nĩguo mahinge 144,000. Jehova angĩtua itua rĩa gũthuura amwe kahinda kanini mbere ya mũico wa mũtabarĩre ũyũ-rĩ, ithuĩ tũtingĩkorũo na kĩhooto gĩa gwĩkĩrĩra nganja itua rĩake. (Isa. 45:9; Dan. 4:35; Rom. 9:​11, 16) Twagĩrĩirũo nĩ gwĩthema kũhaana ta aruti wĩra arĩa maatetirie mũmaandĩki nĩ ũndũ wa kũmahe mũcara ũiganaine na aruti wĩra arĩa maarutire wĩra o ithaa rĩmwe.​—Mat. 20:​8-15. w16.01 4:15

Mahinda-inĩ maya Ngai ndatwĩraga twĩke ũndũ ta ũcio. O na kũrĩ ũguo, nĩ atwĩraga tũmwathĩkĩre o na rĩrĩa tũrona maathani make ta marĩ maritũ kana rĩrĩa tũraaga gũtaũkĩrũo nĩ gĩtũmi kĩamo. Hihi nĩ ũndũ ũrĩkũ wonaga Ngai agĩkwĩra wĩke ũkona ũrĩ mũritũ? Andũ amwe mahota kuuga, nĩ kũhunjia. Rĩngĩ na rĩngĩ nĩ maiguaga guoya na nĩ ũndũ ũcio ũgakorũo ũtarĩ ũndũ mũhũthũ kũhunjĩria andũ matoĩ. Nao angĩ no kũhoteke nĩ ũritũ wa gũikara marĩ ngũrani na andũ arĩa angĩ cukuru kana wĩra-inĩ. (Tham. 23:2; 1 Thes. 2:2) Hihi nĩ ũiguaga ta Iburahimu, ũkaigua ta arĩ kwambata ũrambata o kahora kĩrĩma kĩa Moria rĩrĩa ũrahiũrania na ũndũ ũkĩrĩte ũhoti waku? Angĩkorũo nĩguo-rĩ, wĩciragie ũhoro wa ũmĩrĩru na wĩtĩkio wa Iburahimu. Gwĩcũrania ũhoro wa athuri na atumia ehokeku no gũtũtindĩke kwĩgerekania nao na gũtũteithie gũkuhĩrĩria Jehova biũ arĩ mũrata witũ.​—Ahib. 12:1, 2. w16.02 1:3, 14

Tondũ Saulu nĩ eehotorete biũ kũũraga Daudi-rĩ, Jonathani nĩ aarigagwo ekuonania wĩhokeku wake harĩ ũ. O na gũtuĩka nĩ aarĩkanĩire kĩrĩkanĩro na Daudi, Jonathani ningĩ nĩ aabataraga gwathĩkĩra ithe. No nĩ aamenyaga atĩ Ngai aarĩ hamwe na Daudi no ti Saulu. Nĩ ũndũ ũcio, Jonathani oonanirie wĩhokeku harĩ Daudi handũ ha harĩ Saulu. Aataarire Daudi ehithe agĩcoka akĩaria maũndũ mega mamwĩgiĩ harĩ Saulu. (1 Sam. 19:​1-6) Tũngĩaga kwĩmenyerera, wĩhokeku witũ harĩ bũrũri, cukuru, kana timũ ya mathako no ũtũme twage kuonania wĩhokeku harĩ Jehova. Kwa ngerekano Henry nĩ endete mũno gũthaka chess. Maita maingĩ cukuru yao nĩyo yaahotanaga mũthako-inĩ ũcio na nĩ ũndũ ũcio nĩ eendaga kwĩrutanĩria mũno. Oigire ũũ: “Kahora kahora wĩhokeku wakwa harĩ cukuru nĩ wambĩrĩirie gũka mbere ya wĩhokeku wakwa harĩ Ngai. Tondũ macindano ma chess meekagwo mũico-inĩ wa kiumia ndiakoragwo na mahinda ma kũigana ma gũthiĩ mĩcemanio na ũtungata. Nĩ ũndũ ũcio ngĩtua itua rĩa kwĩyeheria timũ-inĩ ya chess.”​—Mat. 6:33. w16.02 3:10, 12

Nĩ kũrĩ maũndũ mangĩgũteithia ũrĩ mũndũ mwĩthĩ kũmenya kana itua rĩaku rĩa kũbatithio rĩroima ngoro. Wendi waku mũnene wa gũtungatĩra Jehova wagĩrĩirũo gũkorũo ũkĩoneka mahoya-inĩ maku. Maita marĩa ũhoyaga na maũndũ marĩa ũgwetaga thĩinĩ wa mahoya maku, no maguũrie ũrĩa ũkuruhanu waku na Jehova ũtariĩ. (Thab. 25:4) Njĩra ĩmwe ya bata ĩrĩa Jehova acokagia mahoya maitũ nayo nĩ gũtwerekeria Kiugo-inĩ gĩake. Nĩ ũndũ ũcio kĩyo gitũ gĩa kwĩruta Bibilia nĩ ũndũ ũngĩ ũngĩonania atĩ kũna nĩ tũrenda gũkuhĩrĩria Jehova makĩria na kũmũtungatĩra kuuma ngoro. (Josh. 1:8) Kwoguo nĩ wega kwĩyũria ũũ: ‘Nĩ maũndũ marĩkũ ngwetaga mahoya-inĩ makwa? Hihi nĩ thomaga Bibilia itegũtĩrĩria?’ Angĩkorũo famĩlĩ-inĩ yanyu nĩ gũkoragwo na Ũthathaiya wa Famĩlĩ, wĩyũrie ũũ: ‘Hihi nĩ nyitaga mbaru mũbango ũcio na ngoro yakwa yothe?’ Macokio maku ma ciũria icio nĩ megũgũteithia kuona kana itua rĩaku rĩa kũbatithio nĩ rĩa kuuma ngoro. w16.03 1:11, 13

Na githĩ tũtikenaga mũno rĩrĩa tũrathoma thĩinĩ wa Kitabu cha Mwaka maũndũ marĩa tũhingĩtie thĩinĩ wa thĩ yothe! Ningĩ ta wĩcirie ũrũmwe ũrĩa tũkoragwo naguo thĩinĩ wa thĩ yothe rĩrĩa tũrĩ igomano-inĩ citũ tũgĩthikĩrĩria mĩario mĩega mũno ya Bibilia na tũkerorera drama na cionereria. Icunjĩ icio ciothe itwĩkagĩra ngoro tũtungatagĩre Jehova na ngoro itũ yothe. Gũkũngũĩra gĩkuũ kĩa Jesu o nakuo nĩ gũtũmaga tũkorũo na ũrũmwe. Nĩ ũndũ wa gwathĩkĩra ũtongoria wa Jesu na kuonania ngatho citũ nĩ ũndũ wa wega ũrĩa Jehova aatuonirie, o mwaka ithuothe nĩ tũcemanagia Nisani 14 thutha wa riũa gũthũa tũgakũngũĩra gĩkuũ kĩa Jesu. (1 Kor. 11:​23-26) Na ciumia cigana ũna mbere ya Kĩririkano nĩ twĩrutanagĩria mũno gwĩta andũ aingĩ o ũrĩa kũngĩhoteka, moke tũnyitanĩre nao thĩinĩ wa mũcemanio ũcio wa bata. Kĩyo gitũ tũrĩ mũndũ ũmwe ũmwe no kĩage kũhingia ũndũ mũnene. No tondũ tũrutithanagia wĩra hamwe, nĩ tũhotaga kũhunjĩria andũ milioni nyingĩ ũhoro wa Jehova na tũgateithia amwe metĩkĩre kũmũgooca na kũmũtungatĩra! w16.03 3:4, 6, 7

Ariũ a ithe witũ arĩa maramenyerio nĩguo matungate kĩũngano-inĩ marabatara gũteithio kuonaga maũndũ kũringana na Maandĩko. Kwa ngerekano, ta tua atĩ mũthuri nĩ ahe mũrũ wa Ithe witũ wĩra wa gũtigagĩrĩra atĩ gacĩra ga kũingĩra Nyũmba-inĩ ya Ũthamaki nĩ gatheru na gatirĩ na indo ingĩhĩnga mũndũ. No athome nake rĩandĩko rĩa Tito 2:​10 acoke amũtaarĩrie ũrĩa kũruta wĩra ũcio wa gũtheria Nyũmba ya Ũthamaki ‘gũtĩithagia ũrutani ũrĩa wa Ngai Mũhonokia witũ.’ Ningĩ no amũteithie one ũrĩa kũruta wĩra ũcio kũngĩguna andũ arĩa akũrũ thĩinĩ wa kĩũngano. Kũgĩa na ndeereti ta ĩyo na mũrũ wa Ithe witũ nĩ kũrĩmũteithagia gwĩciria ũrĩa andũ maragunĩka nĩ wĩra wake handũ ha kũũrutaga no getha ahingie watho. Nĩ arĩgĩaga na gĩkeno nĩ ũndũ wa kuona ũrĩa aarĩ na ariũ a Ithe witũ thĩinĩ wa kĩũngano maragunĩka nĩ wĩra wake. Makĩria ma ũguo, nĩ wega mũthuri atigagĩrĩre atĩ nĩ acokeria mũrũ wa Ithe witũ ngatho nĩ ũndũ wa ũrĩa arerutanĩria kũhũthĩra ũtaaro ũcio. O ta ũrĩa maĩ mateithagia mũmera gũkũra, no taguo kũmũcokeria ngatho kuuma ngoro kũrĩmũteithagia gũthiĩ na mbere gũkũra kĩĩroho. w15 4/15 2:7, 8

Hihi kũrĩ hĩndĩ ũrĩ waigua ũtiganĩirio rĩrĩa ũrahiũrania na ũndũ mũritũ? No ũkorũo warĩ ũritũ wa kwaga wĩra, gũtindĩkĩrĩrio wĩke maũndũ moru ũrĩ cukuru, ndwari, kana ũndũ ũngĩ mũru. No kũhoteke nĩ wahoire andũ ũteithio, no makĩaga gũkũhe ũteithio ũrĩa wabataraga. Ma nĩ atĩ, kũrĩ mathĩna andũ matangĩhota gũkwehereria. Hĩndĩ ĩrĩa ũrĩ mathĩna-inĩ ta macio-rĩ, hihi ũtaaro wa Bibilia wĩgiĩ ‘kwĩhoka Jehova’ no ũkorũo ũrĩ wa bata? (Thim. 3:​5, 6) Ĩĩ nĩ wa bata mũno! Thĩinĩ wa Bibilia kũrĩ na ngerekano nyingĩ iria ingĩtũteithia gwĩtĩkia biũ atĩ ti itherũ Jehova nĩ ateithagia andũ ake. Nĩ ũndũ ũcio, handũ ha kũigua ũru tondũ andũ matirakũhe ũteithio ũrĩa ũrabatara, hũthĩra mweke ũcio kwĩhoka Jehova biũ o ta ũrĩa Paulo eekire, na nĩ ũkwĩyonera agĩgũteithia. Gwĩka ũguo nĩ gũgwĩkĩra wĩtĩkio waku harĩ Jehova hinya, na gũtũme ũrata waku hamwe nake ũrũme biũ. w15 4/15 4:3-5

Nĩguo ahote kũgucĩrĩria andũ matikarũmĩrĩre Jehova Ngai witũ ũrĩ wendo, Shaitani no ahũthĩrire maheeni. (1 Joh. 4:8) Ahũthagĩra maheeni nĩguo andũ ‘matikahũtĩre kana manyotere maũndũ ma ũthingu.’ (Mat. 5:6) Nĩkĩo ‘atumumarĩtie meciria ma arĩa matetĩkĩtie nĩgetha ũtheri wa ũhoro-ũrĩa-mwega wa riri wa Kristo, o we ũrĩa ũrĩ mũhianĩre wa Ngai, ndũkae kũmaarĩra.’ Njĩra ĩrĩa nene mũno Shaitani ahũthagĩra kũheenia andũ, nĩ ndini ya maheeni. No mũhaka akorũo nĩ akenaga mũno rĩrĩa arona andũ magĩthathaiya andũ arĩa maakuire tene, ũũmbi, nyamũ, mũndũ, kana kĩndũ kĩngĩ o gĩothe handũ ha gũthathaiya Jehova ‘Ngai witũ wĩ ũiru.’ (Tham. 20:5) O na andũ aingĩ arĩa meciragia atĩ marathathaiya Ngai na njĩra ĩrĩa yagĩrĩire nĩ mahĩngĩcĩtwo nĩ morutani mahĩtanu na mĩtugo ĩtarĩ kĩene. Matariĩ o ta Aisiraeli arĩa Jehova eerire ũũ: “Nĩ kĩ gĩtũmaga mũnoge mũkĩrutĩra wĩra kĩndũ gĩtangĩmũhũnia? Ta ‘thikĩrĩriai na kĩyo . . . na mũreke ngoro cianyu ciĩkenagie na nyama noru.”​​—Isa. 55:2. w15 5/15 1:14, 15

No kũhoteke Habili nĩ eecirĩtie mũno ũhoro wa kĩĩranĩro kĩu na agataũkĩrũo atĩ kũrĩ mũndũ ‘ũngĩkaagũthwo ndiira ya kũgũrũ’ nĩguo andũ othe makinyanĩre o ta ũrĩa Adamu na Hawa maatariĩ mbere ya kwĩhia. Habili aarĩ na wĩtĩkio atĩ maũndũ mothe marĩa Ngai eeranĩire no mũhaka mahinge, na nĩkĩo Jehova eetĩkĩrire igongona rĩake. (Kĩam. 4:3-5; Ahib. 11:4) Nuhu aahonokire kũniinwo hĩndĩ ya Mũiyũro nĩ ũndũ wa wĩtĩkio. (Ahib. 11:7) Ningĩ thutha wa Mũiyũro, wĩtĩkio nĩguo watũmire arute magongona ma nyamũ. (Kĩam. 8:​20) O ta Habili, Nuhu aarĩ na wĩtĩkio mũrũmu atĩ andũ nĩ mangĩkaahonokio kuuma ũkombo-inĩ wa mehia na gĩkuũ. Nimirodi nĩ aambĩrĩirie gwathana na wendi wake warĩ andũ makararie Jehova, ĩndĩ Nuhu aikarire arũmĩtie wĩtĩkio wake. (Kĩam. 10:​8-​12) No kũhoteke wĩtĩkio wake nĩ wekĩragwo hinya mũno aahũũra mbica ũrĩa thĩ ĩkaahana ĩrĩ rungu rwa wathani ũtarĩ na ũhinyanĩrĩria, na andũ matarĩ rungu rwa mehia na gĩkuũ. O na ithuĩ no ‘tuone’ mahinda ta macio mega ũguo, na ma nĩ atĩ marĩ hakuhĩ mũno!​​—Rom. 6:​23. w15 5/15 3:4, 6

Mĩtangĩko mĩnene no ĩthũkie ũgima witũ wa mwĩrĩ na wa kĩĩroho. Rekei twĩhoke Jehova na tũririkane ciugo cia rĩandĩko rĩa ũmũthĩ. Ciugo njega cia gwĩkĩra ngoro kuuma kũrĩ mũndũ ũrataũkĩrũo wega nĩ maũndũ maitũ no gũtũme ngoro itũ ĩkene. Kwaria na mũndũ ũrĩ na mawoni ta ma Jehova, akorũo nĩ mũciari, mũndũ ũrĩa tũhikanĩtie nake, kana mũrata twĩhokete, no gũtũteithie kũnyihanyihia mĩtangĩko. Jehova nowe ũtaũkagĩrũo biũ nĩ mĩtangĩko itũ. Paulo aandĩkire ũũ: “Tigagai gwĩtanga nĩ ũndũ o na ũrĩkũ: no rĩrĩ, menyithagiai Ngai maũndũ marĩa mothe mwendaga, mũkĩmũhoyaga na mũkĩmũthaithaga, hamwe na kũmũcokeria ngatho. Naguo thayũ wa Ngai, ũrĩa ũtangĩmenyeka ũrĩa ũtariĩ, nĩũrĩikaragia ngoro cianyu o na gwĩciria kwanyu nakuo thĩinĩ wa Kristo Jesu.” (Afil. 4:6, 7) Wĩciragie ũhoro wa arĩa matũteithagia nĩguo tũtigathũkio kĩĩroho​​—aarĩ na ariũ a Ithe witũ, athuri a kĩũngano, ngombo ĩrĩa ĩĩhokekete na njũgĩ, araika, Jesu, na Jehova we mwene. w15 5/15 4:16, 17

Mwena wa rũgongo wa hekarũ ĩrĩa yarĩ Jerusalemu haarĩ na iria rĩetagwo Bethesida. Andũ aingĩ arũaru na maarĩ na mawathe matiganĩte nĩ maathiaga hau metĩkĩtie atĩ maingĩra iria-inĩ rĩu hĩndĩ ĩrĩa maĩ mounjugwo, no kũhona mangĩahonire. Aathiĩte ho tondũ nĩ endete andũ, na hau nĩho aacemanirie na mũndũ ũcio warũarĩte ihinda iraya o na Jesu atanoka gũkũ thĩ. (Joh. 5:​6-9) Jesu aamũririe kana no ende kũhonio. Aacokirie atekũrĩa marĩĩgu atĩ no ende kũhonio, ĩndĩ nĩ aarigagwo ũrĩa kũngĩahotekire tondũ ndaarĩ na mũndũ wa kũmũtonyia iria-inĩ rĩu. Thutha ũcio Jesu eerire mũndũ ũcio eke ũndũ ũngĩonekire ta ũtangĩhoteka. Aamwĩrire oe kĩbarĩ gĩake etware. Mũndũ ũcio agĩathĩkĩra ciugo cia Jesu, akĩoya kĩbarĩ gĩake na akĩambĩrĩria gwĩtwara. Na githĩ kĩama kĩu kĩa magegania gĩtionanagia ũrĩa Jesu aagekĩra andũ thĩinĩ wa thĩ njerũ! Ningĩ kĩama kĩu nĩ gĩtuonagia atĩ Jesu nĩ arĩ tha. Nĩ aacaragia arĩa maabataraga ũteithio. Kĩonereria kĩu kĩa Jesu kĩagĩrĩirũo nĩ gũtwĩkĩra ngoro tũthiĩ na mbere gũcaria andũ arĩa makuĩte ngoro nĩ ũndũ wa maũndũ moru marĩa marekĩka thĩinĩ wa thĩ ĩno. w15 6/15 2:8-10

Ciugo “Ithe witũ” itũririkanagia atĩ tũkoragwo tũrĩ thĩinĩ wa ũrũmwe wa ‘ariũ a Ithe witũ’ arĩa makoragwo mendaine mũno. (1 Pet. 2:​17) Na githĩ kĩu ti gĩtĩo kĩnene mũno! Arĩa mathuurĩtwo nĩ Jehova magatũũre igũrũ nĩ matuĩtwo ariũ ake, nĩ ũndũ ũcio nĩ magĩrĩire mũno kũmwĩta “Baba.” (Rom. 8:​15-17) O nao Akristiano arĩa marĩ na kĩĩrĩgĩrĩro gĩa gũgaatũũra gũkũ thĩ no mamwĩte “Baba,” tondũ nĩwe ũmaheete muoyo na nĩwe ũmahingagĩria mabataro mao. Arĩa marĩ na kĩĩrĩgĩrĩro gĩa gũgatũũra gũkũ thĩ makaagĩrĩra biũ gũtuĩka ciana cia Ngai rĩrĩa magacokerio ũkinyanĩru na monanie wĩhokeku wao hĩndĩ ya igerio rĩa mũico. (Rom. 8:​21; Kũg. 20:7, 8) Aciari nĩ maheaga ciana ciao kĩheo kĩega mũno rĩrĩa maciruta kũhoya na kuona Jehova arĩ Ithe witũ wa igũrũ ũtũrũmbũyagia. Gũtirĩ kĩheo kĩngĩ kĩnene aciari mangĩhe ciana ciao gĩkĩrĩte gũciteithia ikũrie ũrata wa hakuhĩ hamwe na Jehova. w15 6/15 4:4-6

Nĩguo tũtũũre kũringana na ciugo ‘tũhonokagie kuuma harĩ ũrĩa mũru,’ no mũhaka twĩrutanĩrie gũkorũo ‘tũtarĩ a gũkũ thĩ.’ Tũtiagĩrĩirũo ‘kwenda ũhoro wa thĩ, o na kana maũndũ marĩa mekuo gũkũ thĩ.’ (Joh. 15:19; 1 Joh. 2:​15-​17) Nĩ tũgaakorũo na gĩkeno kĩnene rĩrĩa Jehova akeheria Shaitani na aniine thĩ ĩno njũru. O na kũrĩ ũguo, mbere ya hĩndĩ ĩyo ĩkinye, twagĩrĩirũo nĩ kũririkana atĩ Shaitani arĩ na “marũrũ manene, tondũ nĩoĩ atĩ no ihinda inyinyi atigairie.” Egwĩka o ũrĩa wothe angĩhota nĩguo athũkie ũkuruhanu witũ na Jehova. Nĩ ũndũ ũcio, twagĩrĩirũo gũthiĩ na mbere kũhoya Jehova atũgitĩre kuumana na Shaitani. (Kũg. 12:​12, 17) Hihi nĩ wĩriragĩria gũgatũũra thĩinĩ wa thĩ ĩtarĩ na Shaitani? Angĩkorũo nĩguo-rĩ, thiĩ na mbere kũhoya Ũthamaki wa Ngai ũtũme rĩĩtwa rĩa Ngai rĩamũrũo na ũtũme wendi wake wĩkwo gũkũ thĩ. Wĩhokage Jehova akũhingĩrie mabataro maku ma kĩĩroho na ma kĩĩmwĩrĩ. Tua itua rĩa gũtũũra kũringana na ihoya rĩu rĩa kĩonereria.​​—Mat 6:​9-​13. w15 6/15 5:12, 17, 18

O na gũtuĩka tũtiũĩ biũ maũndũ marĩa mageekĩka ihinda-inĩ rĩu rĩa kũgerio, no twĩrĩgĩrĩre atĩ nĩ ihinda tũkabatara kwĩima. Hĩndĩ ya karine ya mbere, nĩguo Akristiano mahonoke maabatarire gũtiga indo ciao, na gũkirĩrĩria mathĩna maingĩ. (Mar. 13:15-​18) Hihi nĩ tũgaakorũo twĩharĩirie kũũrũo nĩ indo citũ nĩguo tũikare tũrĩ ehokeku? Hihi nĩ tũgaakorũo twĩharĩirie gwĩka o ũrĩa wothe gũkaabatarania nĩguo tũrũmie wĩkindĩru witũ harĩ Jehova? Ririkana atĩ ihinda-inĩ rĩu no ithuĩ tu tũgaakorũo tũkĩrũmĩrĩra kĩonereria kĩa mũnabii Danieli na njĩra ya gũthiĩ na mbere gũthathaiya Ngai witũ o na kũngĩgaakorũo na moritũ marĩkũ. (Dan. 6:​10, 11) Rĩu rĩtigakorũo rĩrĩ ihinda rĩa kũhunjia ‘ũhoro mwega wa Ũthamaki.’ Ihinda rĩa kũhunjia ũhoro ũcio rĩgakorũo rĩrĩ ithiru. Ihinda rĩa “ithirĩro” rĩgakorũo rĩrĩ ikinyu! (Mat. 24:14) O na kũrĩ ũguo, andũ a Ngai nĩ makaahunjia ndũmĩrĩri ndũrũ mũno ya ituĩro. No kũhoteke ndũmĩrĩri ĩyo ĩgaakorũo ĩrĩ kũmenyithia andũ atĩ thĩ njũru ya Shaitani ĩrĩ hakuhĩ mũno kũniinwo. w15 7/15 2:3, 8, 9

Jesu oigire atĩ andũ amwe nĩ magaatũmena nĩ ũndũ wa kwaga kũnyita mbaru mwena o na ũrĩkũ. Nĩ wega kũririkana atĩ andũ aingĩ arĩa matũũkagĩrĩra matiũĩ ũhoro wa Ũthamaki wa Ngai. Nĩ ũndũ ũcio, matitaũkagĩrũo kĩrĩa gĩtũmaga tũkorũo tũrĩ ehokeku mũno harĩ Ũthamaki ũcio handũ ha harĩ thirikari cia andũ. Nĩguo mũndũ akorũo arĩ mwĩhokeku harĩ Jehova ekũbatara gũikara ehandĩte biũ rĩrĩa aracemania na mathĩna. (Dan. 3:​16-​18) O na gũtuĩka andũ othe no maigue guoya-rĩ, andũ ethĩ no metigĩre kuoneka marĩ ngũrani na andũ arĩa angĩ. Angĩkorũo ciana ciaku nĩ icemanagia na magerio ta kũhũũrĩra bendera thurutia kana ikũngũĩro cia gũtũũgĩria bũrũri, wĩrutanĩrie gũciteithia. Hũthĩra mahinda ma Ũthathaiya wa Famĩlĩ gũteithia ciana ciaku itaũkĩrũo nĩ maũndũ macio nĩguo ikahota kũhiũrania namo irĩ na ũmĩrĩru. Citeithie itaaragĩrie wĩtĩkio wacio itarĩ na guoya ĩndĩ irĩ na gĩtĩo. (Rom. 1:​16) Aria na arutani a cio igũrũ rĩgiĩ maũndũ macio. w15 7/15 3:15, 16

Jehova aarutire igongona rĩa ũkũũri rĩa mwana wake nĩ getha “tũgĩe muoyo.” (1 Joh. 4:9) Mũtũmwo Paulo akĩaria ũhoro wa gĩĩko kĩu kĩnene kĩa wendo wa Ngai, oigire ũũ: “O ihinda rĩrĩa rĩaagĩrĩire rĩakinya, Kristo nĩaakuire ithenya rĩa andũ othe matatĩaga Ngai. Na rĩrĩ, nĩ hinya mũndũ etĩkĩre kũũragwo ithenya rĩa mũndũ ũngĩ, o na ũrĩa mũthingu, no hihi kwahota kuoneka mũndũ ũngĩũmĩrĩria kũũragwo o ũguo, ithenya rĩa mũndũ mwega. No rĩrĩ, ũndũ ũrĩa Ngai onanĩtie ũtwendi wake naguo-rĩ, nĩ ũyũ, atĩ Kristo aatũkuĩrĩire rĩrĩa twatũire tũrĩ o ehia.” (Rom. 5:​6-8) Nĩ ũndũ wa wendo ũcio mũnene wa Ngai, andũ nĩ maagĩire na mweke wa kũgĩa na ũrata na Ngai. Kũgerera ũkũũri, Jehova onanĩtie wendo wake harĩ kĩrĩndĩ gĩa thĩ gĩothe. Angĩkorũo kĩĩrĩgĩrĩro gitũ nĩ gĩa gũgaatũũra tene na tene gũkũ thĩ, tũngĩthiĩ na mbere gũtungatĩra Jehova tũrĩ ehokeku no tũkorũo na ma atĩ nĩ agaatũma ũtũũro witũ ũkorũo ũrĩ mwega mũno thĩinĩ wa thĩ njerũ. Nĩ ũndũ ũcio, twagĩrĩirũo kuona ũkũũri ũrĩ ũira mũnene wa atĩ wendo ũrĩa Jehova akoragwo naguo harĩ ithuĩ ndũngĩthira. w15 8/15 1:13, 15

Kĩyo o gĩothe kĩrĩa tũngĩĩkĩra harĩ kũnyitanĩra na ithondeka rĩa Jehova na kũruta mawĩra ma kĩĩroho marĩa twĩhokeirũo ti kĩndũ gĩkĩringithanio na gĩtĩo kĩrĩa tũgaakorũo nakĩo rungu rwa Ũthamaki wa Ngai. O na kũrĩ ũguo, maũndũ maitũ no macenjie. Kwa ngerekano, aarĩ na ariũ a Ithe witũ amwe arĩa maatungataga Betheli ya Amerika nĩ maaheirũo mawĩra mangĩ ũtungata-inĩ wa hĩndĩ-ciothe na rĩu nĩ marakenera irathimo nyingĩ cia kĩĩroho. Nĩ ũndũ wa ũkũrũ na maũndũ mangĩ, amwe arĩa maatungataga tene marĩ arori arĩa magendaga nĩ matuĩkĩte mapainia a mwanya. Tũngĩkũria mwerekera wa kũiganĩra, tũhoe Ngai atũhe ũteithio wake, na twĩke ũrĩa wothe tũngĩhota ũtungata-inĩ wake nĩ tũrĩkoragwo na gĩkeno na twamũkĩre irathimo nyingĩ. (Thim. 10:22) Ĩ namo matanya maitũ ma mahinda marĩa mokĩte? No gũkorũo nĩ twĩciragia kũrĩa tũngĩenda gũgatũũra thĩinĩ wa thĩ njerũ, ĩndĩ no kũhoteke tũkeerũo tũthamĩre kũndũ kũngĩ. Gũtekũmakania kũrĩa tũgatungatĩra kana ũrĩa tũgakorũo tũgĩka, no tũkorũo na ma biũ atĩ nĩ tũgakorũo na gĩkeno na tũiganĩire. ww15 8/15 3:8

Nuhu atũũraga thĩinĩ wa thĩ yarĩ na waganu mũingĩ mũno. No ndaatuire andũ arĩa maatũũranagia nao arata ake a hakuhĩ. Ndaathiaga thiritũ na andũ mataarĩ arata a Ngai. Marĩ hamwe na andũ arĩa mũgwanja a famĩlĩ yake, maarĩ na wĩra mũingĩ mũno ũtungata-inĩ wa Ngai, ũrĩa warĩ hamwe na gwaka thabina. Ningĩ Nuhu aarĩ “mũhunjia wa ũhoro wa ũthingu.” (2 Pet. 2:5) Nĩ ũndũ wa wĩra wake wa kũhunjia, gwaka thabina, na gũkorũo na mahinda na famĩlĩ yake, Nuhu nĩ aakoragwo na maũndũ maingĩ mega ma gwĩka marĩa maakenagia Ngai. Nĩ ũndũ ũcio, marĩ hamwe na famĩlĩ yake nĩ maahonokire hĩndĩ ya Mũiyũro. Tondũ ithuothe tũrĩ njiarũa ciao-rĩ, nĩ twagĩrĩirũo nĩ gũcokagia ngatho mũno tondũ Nuhu na famĩlĩ yake nĩ maathĩkĩire Jehova na magĩĩthema thiritũ njũru. O ũndũ ũmwe na ũcio, Akristiano ehokeku a karine ya mbere matiathiaga thiritũ na andũ arĩa matathĩkagĩra Ngai, na nĩ ũndũ ũcio makĩhonokio Jerusalemu ĩkĩniinwo mwaka-inĩ wa 70.​​—Luk. 21:​20-​22. w15 8/15 4:17, 18

Ti maũndũ mothe ma gwĩkenia macanjamũraga kana marĩ ũguni, ningĩ ti wega gũkĩria njano maũndũ-inĩ ma gwĩkenia. Thamiri itũ ĩngĩtũteithia atĩa gũkenera na kũgunĩka nĩ maũndũ ma gwĩkenia marĩa magĩrĩire? Maandĩko matwĩraga twĩthemage “maũndũ ma kĩĩmwĩrĩ” ta ‘ũmaraya, merirĩria mathũku, ũũra-thoni, kũhoya mĩhianano, kũrogana, ũthũ, kũũgitana, ũiru, marakara, ngarari, kwamũkana, morutani mahĩtanu, gũcumĩkĩra, kũrĩo, maruga marĩa mainagĩrũo nyĩmbo itaagĩrĩire, na maũndũ mangĩ ta macio.’ Paulo aandĩkire atĩ “andũ arĩa mekaga maũndũ ta macio, matikagaĩrũo ũthamaki wa Ngai.” (Gal. 5:​19-21) Nĩ ũndũ ũcio no twĩyũrie ũũ: ‘Hihi thamiri yakwa nĩ ĩndongoragia gwĩthema mathako marĩ na macindano moru, gũtũgĩria bũrũri, kana ũhinya? Hihi thamiri yakwa nĩ ĩnganagia rĩrĩa ndĩragucĩrĩrio kwĩrorera thenema irĩ na maũndũ ma ponografĩ kana ironania ngomanio itagĩrĩire, ũrĩu, kana ũragũri?’ w15 9/15 2:11, 12

Bibilia yonanagia atĩ Ngai ndaatũmbĩte twĩyathage, ĩndĩ aatũmbĩte twathagwo nĩwe. Jehova nĩwe ũĩ maũndũ marĩa mangĩtũguna biũ. Gwathĩkĩra ũtongoria wake nokuo tu kũngĩtũrehera thayũ na gĩkeno. Jehova atũrutĩte ma ĩyo ya bata tondũ nĩ atwendete. Mũthuri wendete ciana ciake nĩ eciragia mũno ũhoro wa ũtũũro wacio wa mahinda marĩa maroka. Nĩ endaga ikorũo na ũtũũro mwega. No ũndũ wa kĩeha nĩ atĩ, andũ aingĩ matimenyaga ũhoro wa mahinda marĩa maroka. Mahũthagĩra ũtũũro wao gũthingata maũndũ matarĩ na ũguni. (Thab. 90:10) Ithuĩ ciana cia Ngai nĩ tũiguaga twendetwo mũno nĩwe tondũ nĩ atwĩrĩire mahinda mega maroka. Ũndũ ũcio nĩ ũtũmaga tũkorũo na ũtũũro ũrĩ na muoroto. w15 9/15 4:10, 11

Matukũ-inĩ ma Aisiraeli, andũ nĩ maarĩ na mweke wa kuona na kũigua ũrĩa Ngai aarũĩrĩire Aisiraeli. Jehova nĩ aahonoketie andũ ake kuuma Misiri, na agacoka akamateithia gũtooria athamaki aingĩ. (Josh. 9:​3, 9, 10) Thũ cia Aisiraeli nĩ ciaregire gwĩtĩkĩra atĩ Ngai nĩwe warũagĩrĩra Aisiraeli, na ũndũ ũcio nĩ watũmire cihootwo. Thutha-inĩ, Mũthamaki Ahabu nĩ aarĩ na mweke wa kuona guoko kwa Ngai gũgĩtongoria maũndũ. Nĩ onire mwaki ũkiuma igũrũ rĩrĩa Elija aahoire igongona rĩcinwo. Elija aacokire akiuga atĩ Jehova nĩ angĩaniinire ngʼaragu ĩrĩa yarĩ kuo, akĩĩra Ahabu ũũ: “Ũgĩikũrũke, nĩ getha mbura ndĩgakũgirie ũthiĩ.” (1 Ath. 18:22-45) Ahabu nĩ eeyoneire maũndũ macio mothe magĩkĩka no ndaigana gwĩtĩkĩra atĩ meekĩkaga nĩ ũndũ wa hinya mũnene wa Ngai. Kĩonereria kĩu o hamwe na ingĩ iratũruta ũndũ ũyũ wa bata: Nĩ twagĩrĩirũo nĩ kuonaga guoko kwa Jehova gũkĩruta wĩra. w15 10/15 1:4, 5

Twagĩrĩirũo gũkoragwo na ũũma biũ atĩ kũrũmĩrĩra ũtongoria wa Ngai nĩ kũrĩtũteithagia. Nĩ harĩ bata kũgĩa na wĩtĩkio harĩ Ũrĩa ũrĩ na ũhoti wa gũtũteithia. Paulo atũririkanagia atĩ Ngai nĩwe ‘ũtũhotithagia gwĩka maũndũ na agakĩrĩrĩria mũno mũno marĩa mothe tũhoyaga o na marĩa twĩciragia, nĩ ũndũ wa ũhoti wake ũrĩa ũrutaga wĩra thĩinĩ witũ.’ (Ef. 3:20) Andũ a Jehova mekaga ũrĩa wothe mangĩhota nĩguo meke wendi wake, no nĩ mamenyaga atĩ nĩ harĩ maũndũ matangĩhota kũhingia, nĩ ũndũ ũcio makehoka biũ arathime kĩyo kĩao. Na githĩ ti gĩkeno kũmenya atĩ Ngai witũ arĩ hamwe na ithuĩ! Hihi tũngĩhoya Jehova atuongerere wĩtĩkio no aigue mahoya maitũ? Bibilia ĩtwĩraga na ma atĩ ‘tũngĩhoya ũndũ waganĩrĩire na kwenda gwake,’ no atũigue. (1 Joh. 5:14) Jehova nĩ arĩkenagio nĩ ithuĩ twamwĩhoka biũ. Nĩ arĩtũiguaga twamũhoya atuongerere wĩtĩkio, na ningĩ wĩtĩkio witũ nĩ ũkuongerereka ‘tũtuwo aagĩrĩru a gũgatonya Ũthamaki-inĩ wa Ngai.’​—2 Thes. 1:​3, 5. w15 10/15 2:16-18

Gwĩcũrania maũndũ ma kĩĩroho nĩ gũteithagia mũndũ akũre kĩĩroho. (Ahib. 5:14; 6:1) Mũndũ ũhũthagĩra ihinda inyinyi agĩĩciria ũhoro wa Jehova na Jesu ndangĩhota gũtũũria wĩtĩkio mũrũmu. Mũndũ ta ũcio arĩ ũgwati-inĩ wa gũtigana na ũhoro wa ma. (Ahib. 3:12) Jesu nĩ aatũheire mũkaana atĩ tũngĩaga gũthikĩrĩria kana kwamũkĩra Kiugo kĩa Ngai tũrĩ na “ngoro thingu na njega,” tũtingĩhota ‘gũgĩikaria’ kana gũgĩtũũria. Handũ ha ũguo, no tũtahwo na ihenya nĩ ‘mĩhangʼo, o na ũtonga, o na mĩago ya muoyo ũyũ, na twage gũciara maciaro marĩa mega.’ (Luk. 8:​14, 15) Nĩ ũndũ ũcio, rekei tũthiĩ na mbere gwĩcũrania Kiugo kĩa Ngai. Ũndũ ũcio nĩ ũgũtũma tũtũkie ngumo cia Jehova na ũmũndũ wake o ta ũrĩa cionanĩtio Bibilia-inĩ. (2 Kor. 3:18) No tũthiĩ na mbere kwĩruta makĩria ũhoro wa Ithe witũ wa igũrũ na kũmũtũkia tene na tene. Gũtirĩ gĩtĩo gĩkĩrĩte kĩu!​—Koh. 3:11. w15 10/15 4:13, 14

Aciari, wendi wanyu nĩ ciana cianyu ikorũo irĩ na hinya kĩĩroho. Ngai endaga mũrere ciana cianyu na “mũrutanĩre o na mũtaarĩre ũrĩa wa Mwathani.” (Ef. 6:4) Nĩ ũndũ ũcio, tigagĩrĩra atĩ nĩ ũrathiĩ na mbere kũruta ciana ciaku. Ta wĩcirie ũndũ ũyũ: Nĩ mwĩrutanagĩria biũ nĩguo ciana cianyu ithiĩ cukuru tondũ nĩ mũĩ atĩ gĩthomo nĩ kĩa bata na nĩ mwendaga ikenere gũthoma. O ũndũ ũmwe na ũcio, aciari marĩ na wendo nĩ matigagĩrĩra atĩ ciana ciao nĩ iragunĩka nĩ ‘mũtaarĩre wa Mwathani’ hĩndĩ ya mĩcemanio ya kĩũngano na maũndũ mangĩ ma kĩĩroho. Tondũ gĩthomo kĩa Jehova nĩ kĩa bata mũno, geragia gũteithia ciana ciaku ciende maũndũ ma kĩĩroho na cionage bata wa ũũgĩ ũrĩa umaga harĩ Jehova. O ta ũrĩa Jesu aateithagia arutwo ake, geria gũteithia ciana ciaku ikoragwo na moimĩrĩro mega ũtungata-inĩ. Ĩkaga ũguo na njĩra ya gũciteithia ikũrie wendi wa kũhũthĩra Kiugo kĩa Ngai kũrutana na gũthiaga ũtungata citegũtĩĩrĩria. w15 11/15 2:6

Jehova nĩ onanĩtie nũ wagĩrĩirũo nĩ gũtongoria famĩlĩ. O na kũrĩ ũguo, mũthuri ndagĩrĩirũo nĩ gũtongoria famĩlĩ yake na gĩthũri. O na gũtuĩka mũthuri nĩwe mũtwe wa mũtumia wake, Maandĩko moigaga atĩ, nĩ agĩrĩirũo nĩ ‘kũmũtĩa.’ (1 Pet. 3:7) Mũthuri no onanie atĩ nĩ atĩĩte mũtumia wake na njĩra ya gwĩciria ũhoro wa mabataro make na kũrũmĩrĩra mawoni make maũndũ-inĩ mamwe. Bibilia yugaga ũũ: “Inyuĩ athuri-rĩ, endagai atumia anyu o ta ũrĩa Kristo nake endire kanitha, akĩya kwĩneana nĩ ũndũ waguo.” (Ef. 5:25) Jesu aarutire nginya muoyo wake nĩ ũndũ wa arũmĩrĩri ake. Mũthuri angĩtongoria mũtumia wake na njĩra ya wendo o ta ũrĩa Jesu eekaga, no ũkorũo ũrĩ ũndũ mũhũthũ harĩ mũtumia kũmwenda, kũmũtĩa, na kũmwathĩkĩra.​—Tit. 2:​3-5. w15 11/15 4:6, 7

Nĩ ũndũ wa ũhoro ũrĩa mwega gũtherema kũndũ kũingĩ, Akristiano aingĩ maaragia Kĩngiriki handũ ha Kĩĩhibirania. Na nĩ ũndũ ũcio Injiri ya Mathayo, Mariko, Luka, na Johana, ciandĩkirũo na Kĩngiriki. Ningĩ marũa marĩa maandĩkirũo nĩ mũtũmwo Paulo o hamwe na mabuku mangĩ thĩinĩ wa Bibilia maandĩkirũo na Kĩngiriki. Arĩa maandĩkaga Maandĩko ma Kĩngiriki ma Gĩkristiano nĩ maagwetaga maũndũ mamwe kuuma thĩinĩ wa Maandĩko ma Kĩĩhibirania, na kaingĩ meekaga ũguo kuuma thĩinĩ wa Septuagint. Ona gũtuĩka maũndũ macio maarutaga thĩinĩ wa Septuagint rĩmwe na rĩmwe nĩ maakoragwo na ngũrani hanini na ũrĩa maandĩkĩtwo na rũthiomi rwa Kĩĩhibirania, maũndũ macio nĩ maatuĩkire gĩcunjĩ kĩa Maandĩko marĩa matongoretio na roho wa Ngai. Nĩ ũndũ ũcio wĩra ũcio wa ataũri matarĩ akinyanĩru ũgĩtuĩka gĩcunjĩ gĩa Kiugo kĩa Ngai. Ũndũ ũcio ũtũrutaga atĩ gũtirĩ rũthiomi kana ũndũire ũmwe Ngai onaga ũrĩ wa bata gũkĩra ũrĩa ũngĩ.​—Atũm. 10:34. w15 12/15 1:8, 9

Rĩmwe na rĩmwe nĩ wega kwaga kwaria. Bibilia yugaga atĩ nĩ kũrĩ “hĩndĩ ya gũkira ki.” (Koh. 3:7) Gũkira rĩrĩa arĩa angĩ mararia kuonanagia atĩ nĩ tũmatĩĩte. (Ayub. 6:24) Gwĩthema gũtheremia ũndũ wagĩrĩirũo nĩ kũigwo ũrĩ hitho kuonanagia atĩ tũrĩ na ũũgĩ na ũtaũku. (Thim. 20:19) Kwĩgirĩrĩria kwaria rĩrĩa tũrakarĩtio nĩ mũndũ kuonanagia atĩ tũrĩ na ũũgĩ. (Thab. 4:4) Ningĩ Bibilia yugaga atĩ nĩ kũrĩ “hĩndĩ ya kwaria.” (Koh. 3:7) Kwa ngerekano-rĩ, mũrata waku angĩkũhe kĩheo gĩthaka, no kũhoteke ũkĩigage hakuhĩ nawe na ũkonanagia ngatho nĩ ũndũ wa kĩo na njĩra ya gũkĩhũthĩra wega. Twahũthĩra wega kĩheo kĩrĩa Jehova atũheete gĩa kwaria tuonanagia atĩ tũrĩ na ngatho harĩ we. Njĩra imwe iria tũhũthagĩra kĩheo kĩu nacio nĩ kwĩyaria, kwĩra arĩa angĩ ũrĩa tũrenda, kũmomĩrĩria, na kũgooca Ngai. w15 12/15 3:4, 5

Mahinda-inĩ maya gũtirĩ Mũkristiano ũrĩ na ‘ũhoti wa gũtũhonia.’ (1 Kor. 12:9) O na kũrĩ ũguo, aarĩ na ariũ a Ithe witũ amwe matarĩ na muoroto mũru nĩ maheaga arĩa angĩ mootaro megiĩ ũrigitani o na mũndũ atamahoete. Amwe o na nĩ mahatagĩrĩria andũ metĩkĩre mootaro macio mao. Mootaro mamwe no makorũo matarĩ mooru. Kwa ngerekano nĩ kũrĩ hĩndĩ Paulo eerire Timotheo anyuage ndibei nyinyi nĩ ũndũ wa thĩna ũrĩa aarĩ naguo wa nda. No kũhoteke Timotheo aarwarĩte nda nĩ ũndũ wa kũnyua maĩ matarĩ matheru. O na kũrĩ ũguo no tũbatare kwĩmenyerera mũno. Mũrũ wa Ithe witũ ahota gũtũringĩrĩria tũhũthĩre ndawa cia mĩtĩ kana tũrĩe irio mũthemba mũna. Ahota gũtwĩra atĩ nĩ kũrĩ mũndũ wa famĩlĩ yao wateithĩkire mũno tondũ aarĩ na thĩna o ta ũcio. No ũguo ti kuga atĩ ndawa kana irio icio nĩ cigũtũteithia. Nĩ wega kũririkana atĩ o na angĩkorũo ndawa kana ũrigitani mũna nĩ ũhũthĩrĩtwo nĩ andũ aingĩ to mũhaka ũkorũo ũrĩ mwega.​—Thim. 27:12. w15 12/15 4:13

Nĩ ũndũ wa mehia marĩa twagaire, ithuothe nĩ twatuĩrĩirũo gĩkuũ. (Rom. 5:12) Ĩndĩ nĩ ũndũ wa wendo, Jehova nĩ aatũmire Jesu oke gũkũ thĩ nĩguo “acame gĩkuũ nĩ ũndũ wa andũ othe.” (Ahib. 2:9) Makĩria ma gũtũhonokia, nĩ harĩ ũndũ ũngĩ igongona rĩa Jesu rĩkaahingia. Nĩ rĩkaanina gĩkuũ tene na tene. (Isa. 25:7, 8; 1 Kor. 15:​22, 26) Arĩa othe monanagia wĩtĩkio harĩ Jesu nĩ makaaheo muoyo we tene na tene thĩinĩ wa thĩ ĩrĩ na thayũ na gĩkeno marĩ raiya a Ũthamaki wa Ngai, na arĩa aitĩrĩrie maguta matuĩke athamaki Ũthamaki-inĩ ũcio. (Rom. 6:23; Kũg. 5:​9, 10) Nĩ irathimo irĩkũ ingĩ ikoimana na kĩheo kĩu tũheetwo nĩ Jehova? Kũniinwo kwa mĩrimũ yothe, thĩ kũgarũrũo ĩtuĩke paradiso, na kũriũkio kwa arĩa makuĩte nĩ irathimo ingĩ iria ikoimana na kĩheo kĩu kĩa Jehova. (Isa. 33:24; 35:​5, 6; Joh. 5:​28, 29) Nĩ twendete Jehova na Mũriũ wake mũno nĩ ũndũ wa gũtũhe ‘kĩheo kĩu gũtarĩ ciugo ingĩtaarĩria ũrĩa gĩtariĩ.’​—2 Kor. 9:15. w16.01 2:5, 6

Akristiano acio matanaitĩrĩrio maguta nĩ maakenagĩra mũno kĩĩrĩgĩrĩro gĩa gũgaatũũra gũkũ thĩ. Nĩ meeriragĩria mũno hĩndĩ ĩrĩa Jehova agaatheria thĩ ĩno, na nĩ meendaga mũno gũkaagaya irathimo icio cia ihinda rĩrĩa rĩroka. O na no kũhoteke nĩ maahũũraga mbica makĩnyita ũgeni endwa ao makĩriũkio. Nĩ meeriragĩria mũno gũgaatũũra thĩinĩ wa nyũmba iria magaaka na kũrĩa matunda ma mĩtĩ ĩrĩa makaahanda. (Isa. 65:​21-23) No nĩ kĩĩ gĩtũmaga mwĩcirĩrie wao ũcenjie? Hihi ũcenjagia nĩ ũndũ wa mĩtangĩko kana mũrimũ wa meciria? Hihi makinyaga handũ mageciria atĩ gũtũũra tene na tene thĩinĩ wa thĩ nĩ gũkaamanogia na gũtũme mage gĩkeno? Kana hihi nĩ kwenda tu mendaga kũmenya ũrĩa ũtũũro ũgaakorũo ũtariĩ kũũrĩa igũrũ? Aca. Ithenya rĩa ũguo, Ngai nĩwe ũmetaga. Atua itua rĩa kũmeeta, ahũthagĩra roho wake mũtheru gũcenjia mwĩcirĩrie wao na kĩĩrĩgĩrĩro kĩao. w16.01 3:11, 13

Jehova nĩwe Mwathani Ũrĩa Mũnene, Mũũmbi wa indo ciothe, na ũũgĩ na hinya wake itingĩringithanio na kĩndũ o na kĩrĩkũ. Jehova nĩ aateithirie Ayubu agĩtaũkĩrũo nĩ ũndũ ũcio. Thutha ũcio Ayubu oigire ũũ: ‘Nĩndamenya atĩ wee ndũrĩ ũndũ o wothe ũtangĩhota; ndũngĩgirĩka ũndũ waku o na ũrĩkũ ũrĩa wĩthugundĩire.’ (Ayub. 42:2) O na gũtuĩka Jehova no ahote kũhingia ũndũ o wothe ategũteithĩrĩrio nĩ mũndũ-rĩ, nĩ ũndũ wa wendo wake kuuma o kĩambĩrĩria nĩ akoretwo akĩnyita ũgeni araika na andũ marutithanie wĩra nake nĩguo ahingie muoroto wake. Mbere ya kũũmba indo iria ingĩ ciothe Jehova aambire kũũmba Mũriũ wake wa mũmwe. Thutha ũcio nĩ aahũthĩrire Mũriũ ũcio wake akĩmũteithĩrĩria harĩ kũũmba indo iria ingĩ ciothe. (Joh. 1:1-3, 18) Nĩ ũndũ ũcio Jehova nĩ onirie Mũriũ ũcio wake gĩtĩo kĩnene na njĩra ya kũmũhũthĩra wĩra-inĩ wake wa kũũmba na ningĩ na njĩra ya kũmenyithia andũ ũhoro wa itemi rĩu rĩa bata rĩa Mũriũ.​—Kol. 1:​15-17. w16.01 5:1, 2