Februarĩ

Jesu nĩ aacayagĩra andũ mũno. Andũ nĩ moonaga atĩ nĩ amendete na kwoguo magetĩkĩra ndũmĩrĩri ya Ũthamaki. O ũrĩa tũgũkũria ũcayanĩri ta ũcio kwerekera andũ, noguo tũrĩkoragwo na moimĩrĩro mega rĩrĩa tũramahunjĩria. Nĩ kĩĩ kĩngĩtũteithia gũcaĩra andũ arĩa tũhunjagĩria? Nĩ kwĩĩkĩra iratũ-inĩ ciao na kũmekĩra maũndũ na njĩra o ta ĩrĩa tũngĩenda gwĩkĩrũo maũndũ nayo. (Mat. 7:12) Wĩciragie mabataro ma o mũndũ. Tũtiagĩrĩirũo kũhũthĩra njĩra o ĩmwe tu ya kwambĩrĩria ndeereti harĩ andũ othe arĩa tũrahunjĩria. Handũ ha ũguo, twagĩrĩirũo kwĩrutanĩria gũtaũkĩrũo nĩ mabataro na mawoni ma o mũndũ. Mũrie ciũria na njĩra ya ũũgĩ nĩguo ũtaũkĩrũo nĩ maũndũ make. (Thim. 20:5) Gwĩka ũguo nĩ gũtũmaga tũtaũkĩrũo nĩ kĩrĩa kĩratũma mabatare ũhoro mwega. Twarĩkia kũmenya, no tũhote kuonia mũndũ ũcio ũcayanĩri na njĩra ya kũmũhe ũteithio ũrĩa arabatara, ta ũrĩa Jesu eekaga.—Ringithania 1 Akorintho 9:19-23. w19.03 20 ¶2; 22 ¶8-9

Adamu na Hawa nĩ moonanirie atĩ matiarĩ na ngatho nĩ ũndũ wa maũndũ mothe mega marĩa Jehova aamekĩire. Ithuothe tũrĩ na mweke wa kuonania atĩ tũtingĩtua itua ta rĩu Adamu na Hawa maatuire. Rĩrĩa twabatithio nĩ tuonagia Jehova atĩ nĩ twĩtĩkĩtie atĩ nĩwe ũrĩ na kĩhooto gĩa gũtũigĩra ithimi ciĩgiĩ wega na ũũru. Nĩ tuonanagia atĩ nĩ twendete Ithe witũ na nĩ tũmwĩhokete. Ũritũ ũrĩa tũcemanagia naguo thutha wa kũbatithio, nĩ gũtũũra kũringana na ithimi cia Jehova handũ ha citũ ithuĩ ene. Andũ milioni nyingĩ nĩ mekaga ũguo o mwaka. O nawe no wĩke ũguo ũngĩthiĩ na mbere kuongerera ũmenyo waku wa Kiugo kĩa Ngai, Bibilia; ũnyitanagĩre hĩndĩ ciothe na aarĩ na ariũ a Ithe witũ; na ũhunjagie na kĩyo maũndũ marĩa wĩrutĩte megiĩ Ithe witũ ũrĩ wendo. (Ahib. 10:24, 25) Rĩrĩa ũratua matua, thikagĩrĩria ũtaaro ũrĩa Jehova akũheaga kũgerera Kiugo gĩake na ithondeka rĩake. (Isa. 30:21) Weka ũguo, maũndũ marĩa mothe ũrĩkaga nĩ marĩgaacagĩra.—Thim. 16:20. w19.03 7 ¶17-18

Jehova nĩ atũheete irio nyingĩ cia kĩĩroho. Kwa ngerekano, nĩ twamũkagĩra motaaro mega kũgerera mĩcemanio itũ, ngathĩti citũ, na website citũ. Hihi nĩ ũrĩ waigua mĩario, ũgathoma ũndũ mabuku-inĩ maitũ, kana ũkerorera broadcast ũkeĩra, ‘Ũndũ ũcio nĩguo ngũbataraga’? Hihi tũngĩonania ngatho citũ atĩa harĩ Jehova? (Kol. 3:15) Njĩra ĩmwe nĩ kũmũcokagĩria ngatho kaingĩ mahoya-inĩ maitũ nĩ ũndũ wa iheo icio njega. Ningĩ nĩ tuonanagia ngatho citũ harĩ Jehova rĩrĩa twaiga kũrĩa tũthathayagĩria kũrĩ gũtheru. Nĩ tũnyitanagĩra kaingĩ harĩ gũthambia na kũmenyerera Nyũmba citũ cia Ũthamaki, na arĩa makoragwo mehokeirũo indo cia mĩgambo na video nĩ macimenyagĩrĩra nĩguo itigathũke. Rĩrĩa twamenyerera Nyũmba citũ cia Ũthamaki wega, nĩ cikaraga ihinda iraya na itibataraga gũtinda igĩthondathondekwo. Na njĩra ĩyo, nĩ tũhonokagia mbeca ingĩhũthĩrũo gwaka na gũcokereria Nyũmba ingĩ cia Ũthamaki thĩinĩ wa thĩ. w19.02 18 ¶17-18

Ayubu nĩ aahũthagĩra mahinda maingĩ gwĩcũrania ũhoro wĩgiĩ magegania ma ũũmbi wa Jehova. (Ayub. 26:7, 8) Nĩ aagegaga ecũrania ũhoro wĩgiĩ thĩ, igũrũ, matu, na marurumĩ, na akĩmenya atĩ oĩ o maũndũ manini mũno megiĩ ũũmbi mũnene wa Ngai. Ningĩ nĩ aatĩĩte ciugo cia Jehova. Ayubu ooigire ũũ igũrũ rĩgiĩ ciugo cia Ngai: “Ciugo cia kanua gake ndĩcituĩte mũthithũ wĩ bata.” (Ayub. 23:12, The Bible in Gikũyũ) Gwĩtigĩra Jehova nĩ gwateithirie Ayubu kũmũhe gĩtĩo. Nĩ eendete Ithe wake wa igũrũ na nĩ eendaga kũmũkenia. Ũndũ ũcio nĩ wateithirie Ayubu ende o na makĩria gũtũũria wĩkindĩru. O na ithuĩ nĩ tũrabatara gwĩka o ta ũguo Ayubu eekire. Nĩ tũĩ maũndũ maingĩ megiĩ magegania ma ũũmbi gũkĩra andũ a matukũ ma Ayubu. Ningĩ tũrĩ na Bibilia yothe ĩrĩa ĩtongoretio nĩ roho na no ĩtũteithie kũmenya kũna ũrĩa Jehova atariĩ. Maũndũ marĩa mothe twĩrutaga nĩ matũmaga twĩtigĩre Ngai. Gwĩtigĩra Jehova na kũmũhe gĩtĩo nĩ gũtũtindĩkaga kũmwenda na kũmwathĩkĩra o na gũkũria wendi mũnene wa gũtũũria wĩkindĩru witũ.—Ayub. 28:28. w19.02 5 ¶12

Kuuma o tene, atongoria a gũkũ thĩ nĩ makoretwo makĩnyarira andũ a Jehova. No matũigĩrĩre igenyo matũthitange, no ũhoro wa ma nĩ atĩ ithuĩ tũthuuraga ‘gwathĩkĩra Ngai arĩ we mũtongoria, no ti andũ.’ (Atũm. 5:29) No tũnyũrũrio, tũikio njera, o na kana tũhũũrũo. O na kũrĩ ũguo, nĩ ũndũ wa gũteithio nĩ Jehova, tũticokaga na thutha, ĩndĩ tũikaraga tũhooreire rĩrĩa tũragerio. Ta wĩcirie kĩonereria kĩrĩa tũigĩirũo nĩ Ahibirania atatũ arĩa maatahĩtwo magatwarũo Babuloni, nĩo Hanania, Mishaeli, na Azaria. Nĩ maataarĩirie mũthamaki na njĩra ya ũhooreri atĩ matingĩainamĩrĩire mũhianano ũrĩa aathondekete. Meehaarĩirie gwĩtĩkĩra ũndũ o wothe Jehova aangĩetĩkĩririe ũhaanĩke. (Dan. 3:1, 8-28) Tũngĩĩgerekania atĩa na Ahibirania acio atatũ hĩndĩ ĩrĩa wĩhokeku witũ ũragerio? Twĩhokaga Jehova tũrĩ na wĩnyihia atĩ nĩ arĩtũrũmbũyagia. (Thab. 118:7) Rĩrĩa andũ moiga atĩ nĩ twĩkĩte maũndũ matagĩrĩire, tũmacokagĩria na njĩra ya ũhooreri na gĩtĩo. (1 Pet. 3:15) Tũregaga biũ gwĩka ũndũ o wothe ũngĩthũkia ũrata witũ na Ithe witũ ũtwendete. w19.02 10-11 ¶11-13

No twĩkĩre ũmĩrĩru witũ hinya na njĩra ya gwĩciria ũhoro wĩgiĩ kĩĩrĩgĩrĩro kĩrĩa tũkoragwo nakĩo nĩ ũndũ wa igongona rĩa ũkũũri rĩa Kristo. (Joh. 3:16; Ef. 1:7) Ciumia cigana ũna mbere ya Kĩririkano, tũrĩ na mweke wa mwanya wa kuonania ngatho citũ o na makĩria nĩ ũndũ wa igongona rĩa ũkũũri. Ihinda-inĩ rĩu, nĩ wega gũthoma Ũthomi wa Bibilia wa Kĩririkano na gwĩcũrania ũhoro wĩgiĩ maũndũ marĩa meekĩkire mbere ya gĩkuũ kĩa Jesu. Na kwoguo rĩrĩa tũgaacemania nĩ ũndũ wa Irio cia Hwaĩ-inĩ cia Mwathani nĩ tũgataũkĩrũo wega makĩria nĩ bata wa mũgate na ndibei iria ikaahũthĩrũo hĩndĩ ĩyo, na igongona rĩa bata rĩrĩa rĩrũgamagĩrĩrũo nĩcio. Rĩrĩa twataũkĩrũo nĩ ũrĩa Jesu na Jehova matwĩkĩire na twataũkĩrũo nĩ ũrĩa ũndũ ũcio ũtũgunaga ithuĩ ene na arĩa twendete, kĩĩrĩgĩrĩro gitũ nĩ kĩgĩaga hinya, na tũgekĩrũo ngoro gũkirĩrĩria nginya mũthia. (Ahib. 12:3) Nĩ tũkenaga tondũ Jesu no athiaga na mbere kuonania ngumo icio arĩ Mũthĩnjĩri-Ngai Ũrĩa Mũnene kũrĩa igũrũ, o we ũtũthaithanagĩrĩra harĩ Ngai. (Ahib. 7:24, 25) Nĩguo tuonanie ngatho citũ cia kuuma ngoro, nĩ twagĩrĩirũo kũririkanaga gĩkuũ kĩa Jesu o ta ũrĩa aathanire.—Luk. 22:19, 20. w19.01 22 ¶8; 23-24 ¶10-11

Jehova nĩ atũheete ithuothe gĩtĩo gĩa kũmũgooca. Macokio marĩa tũrutaga mĩcemanio-inĩ nĩ gĩcunjĩ kĩmwe kĩa “igongona rĩa kũgooca,” na gũtirĩ mũndũ ũngĩ ũngĩtũrutĩra igongona rĩu. (Ahib. 13:15) Hihi Jehova erĩgagĩrĩra ithuothe tũrute igongona kana macokio mahaanaine? Aca, tiguo erĩgagĩrĩra! Mĩcemanio ĩkoragwo ĩhaana ta kũrĩanĩra irio hamwe na arata ega. Ta hũũra mbica andũ amwe thĩinĩ wa kĩũngano mabangĩte gũgaacemania handũ marĩanĩre na ũnyitwo ũgeni wĩrũo ũhaarĩrie kĩndũ kĩnini gĩa kũrĩa ũgoka nakĩo. Ũngĩka atĩa? No wĩkore ũkĩigua guoya hanini, ĩndĩ no kũhoteke ũngĩka ũrĩa wothe ũngĩhota kũrehe kĩndũ gĩgũkenerũo nĩ andũ othe. Jehova atũnyitaga ũgeni mĩcemanio-inĩ na akoragwo ahaarĩirie indo nyingĩ njega nĩ ũndũ witũ. (Thab. 23:5; Mat. 24:45) Na nĩ akenaga rĩrĩa twarehe kĩheo kĩraringana na ũhoti witũ o na kĩngĩkorũo kĩrĩ kĩnini. Kwoguo wĩhaaragĩrie wega na ũgacokia maita maingĩ o ũrĩa ũngĩhota. Weka ũguo to kũrĩa ũrĩrĩagĩra metha-inĩ ya Jehova, no ningĩ nĩ ũrĩkoragwo ũrehete kĩheo gĩa kũgayana na kĩũngano gĩothe. w19.01 8 ¶3; 13 ¶20

Mahinda-inĩ ma tene, ũthathaiya wa maheeni nĩ wahutanĩtie na ngomanio itagĩrĩire. (Hos. 4:13, 14) Hatarĩ nganja, ũthathaiya wa mũthemba ũcio nĩ wagucagĩrĩria andũ tondũ nĩ mangĩahingirie merirĩria mao moru. No ndwamarehagĩra gĩkeno gĩa gũtũũra o na hanini! Daudi ooigire atĩ kĩeha kĩa andũ arĩa maathingataga ngai ingĩ no kũingĩha kĩaingĩhaga. Ningĩ nĩ maanyamaririe ciana ciao na njĩra ya gũciruta magongona kũrĩ ngai cia maheeni. (Isa. 57:5) Jehova nĩ aathũire ciĩko ta icio cia kwaga tha. (Jer. 7:31) O na ũmũthĩ, ndini cia maheeni nĩ ciĩtĩkagĩria ngomanio itagĩrĩire, nginya ngomanio cia arũme kwa arũme na atumia gwa atumia. Andũ nĩ makenagĩra maũndũ macio tondũ monaga ta marĩ na wĩyathi no moimĩrĩro makoragwo marĩ o marĩa magwetetwo Bibilia-inĩ. (1 Kor. 6:18, 19) O ta ũrĩa ũngĩkorũo wĩyoneire, andũ maingĩhagĩrũo nĩ kĩeha. Nĩ ũndũ ũcio andũ ethĩ, thikagĩrĩriai Ithe wanyu wa igũrũ. Koragwoi na ma atĩ, nĩ inyuĩ mũrĩgunĩkaga mwamwathĩkĩra. Ririkanagai atĩ ruo rũrĩa ruumanaga na gwĩka maũndũ moru nĩ rũnene gũkĩra mwago ũrĩa tũngĩkenera o kahinda kanini.—Gal. 6:8. w18.12 27-28 ¶16-18

Mũkristiano ũrĩ thĩinĩ wa kĩhiko angĩĩingĩria ngomanio-inĩ itagĩrĩire, ũrĩa mahikanĩtie nake no abatare gũtua itua. Jesu ooigire atĩ Mũkristiano ũcio mwĩhokeku arĩ na gĩtũmi kĩega gĩa gũtigana, na akorũo arĩ na wĩyathi wa kũhika kana kũhikania rĩngĩ. (Mat. 19:9) O na kũrĩ ũguo, no atue itua rĩa kuohera ũcio mahikanĩtie nake. Gwĩka ũguo ti mahĩtia. O na Hosea nĩ aacokirie Gomeri. Thutha wa Gomeri gũcoka kwa Hosea ndaagĩrĩire gũkomania na mũndũrũme ũngĩ o wothe. Kwa ihinda rĩna Hosea ‘ndaakomaga’ na Gomeri. (Hos. 3:1-3) Ĩndĩ, thutha wa ihinda no kũhoteke Hosea nĩ aahingagĩria mũtumia ũcio wake mabataro make ma kĩhiko, ũndũ ũrĩa ũronania ũrĩa Ngai aakoragwo ehaarĩirie gũcokia andũ ake na gũcokia ũrata wake hamwe nao. (Hos. 1:11; 3:4, 5) Ũndũ ũcio ũratũruta atĩa igũrũ rĩgiĩ kĩhiko? Mũkristiano ũrĩa mwĩhokeku angĩtua itua rĩa gũthiĩ na mbere gũikara kĩhiko-inĩ na akomanie na ũcio ũrĩ na mahĩtia, nĩ kuonania atĩ nĩ amuoheire. (1 Kor. 7:3, 5) Hatingĩkorũo na gĩtũmi kĩngĩ gĩa gũtũma matigane. Kuumania na hau, erĩ mabatiĩ kwĩrutanĩria nĩguo mateithanie harĩ kũgĩa na mawoni ta ma Ngai megiĩ kĩhiko. w18.12 13 ¶13

Rĩrĩa tũreruta, nĩ twagĩrĩirũo gwĩcũrania ũrĩa mwĩcirĩrie wa Jehova ũngĩtũteithia gũtua matua megiĩ mahinda marĩa maroka. Gwĩka ũguo nĩ kũrĩtũteithagia rĩrĩa twacemania na ũndũ ũrabatara tũtue itua rĩa na ihenya tondũ nĩ tũrĩkoragwo tũĩ ũrĩa tũbatiĩ gwĩka. Rĩrĩa Jusufu aaregire o na ihenya kũhenererio nĩ mũtumia wa Potifa, nĩ oonanirie atĩ nĩ aamenyaga muonere wa Jehova wĩgiĩ wĩhokeku thĩinĩ wa kĩhiko. (Kĩam. 39:8, 9) Ningĩ eerire mũtumia wa Potifa ũũ: “Ingĩkĩhota atĩa gwĩka ũndũ ta ũcio mũnene ũguo wa waganu, o na njĩhie Ngai?” ũndũ ũrĩa wonanagia atĩ nĩ aagĩte na muonere wa Ngai. Ĩ ithuĩ na ithuĩ? Ũngĩka atĩa mũndũ mũrutaga wĩra nake angĩambĩrĩria gũgũthaakĩra? Ĩ ũngĩtũmĩrũo maũndũ ma ũũra-thoni thimũ-inĩ yaku? No ũkorũo ũrĩ ũndũ mũhũthũ gũtua itua rĩrĩa rĩagĩrĩire angĩkorũo nĩ twĩrutĩte na tũgetĩkĩra mawoni ma Jehova maũndũ-inĩ ta macio na tũgatua itua o mbere ũrĩa tũngĩka. w18.11 25 ¶13-14

Athomi amwe moigaga atĩ ciugo cia mũhari ũcio itaũrĩtwo kiugo gwa kiugo ciugĩte, “Nĩ ngũrũga ngenete nĩ ũndũ wa Mwathani; Ngũthiũrũrũka njanjamũkĩte nĩ ũndũ wa Ngai.” Na githĩ ũcio ti ũndũ wa gũtũũmĩrĩria ithuothe! Jehova to gũtwĩrĩra atwĩrĩire ciĩranĩro njega no nĩ atũhete ũũma atĩ nĩ areka maũndũ na ihenya ihinda-inĩ rĩrĩ nĩgetha muoroto wake ũhinge. Ndũmĩrĩri nene ĩrĩa ĩrĩ thĩinĩ wa ibuku rĩa Habakuku nĩ ũhoro wa kwĩhoka Jehova. (Hab. 2:4) No twĩhoke Jehova na tũtũũre tũmwĩhokete tũngĩkĩra ũrata witũ nake hinya na njĩra ya (1) kũhoyaga hingo ciothe, tũkera Jehova maũndũ mothe marĩa maratũtanga; (2) gũthikĩrĩria na kinyi Kiugo kĩa Jehova na ũtaaro o wothe tũraheo nĩ ithondeka rĩake; na (3) gweterera Jehova tũkirĩrĩirie na tũrĩ na wĩhokeku. Ũguo nĩguo Habakuku eekire. O na gũtuĩka ibuku rĩake rĩambĩrĩirie arĩ na kĩeha, rĩrĩkĩrĩire arĩ na mwĩhoko na gĩkeno. Rekei tũrũmagĩrĩre kĩonereria kĩu gĩake kĩega nĩgetha o na ithuĩ tũkomĩrĩrio nĩ ũndũ wa kũhĩmbĩrio nĩ Jehova Ithe witũ. Gũtirĩ handũ hangĩ tũngĩũmĩrĩrio na njĩra ta ĩyo thĩinĩ wa thĩ ĩno ĩiyũire waganu. w18.11 17 ¶18-19

Ũndũ ũrĩa ũngĩtũma Akristiano a ma magucĩrĩrio nĩ wendo wa Ngai nĩ ũyũ: Ngai “eendire kĩrĩndĩ gĩa gũkũ thĩ mũno, nginya akĩruta Mũrũ wake wa mũmwe, nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.” (Joh. 3:16) O na Jesu nĩ aatuonirie wendo mũnene tondũ nĩ aarutire muoyo wake nĩ ũndũ witũ. Na githĩ wendo ũcio ndũtwĩkĩraga hinya mũno! Kiugo kĩa Ngai gĩtwĩraga atĩ o na “mathĩna kana mĩtangĩko” itingĩhota ‘gũtũtigithũkania na wendo wa Kristo.’ (Rom. 8:35, 38, 39) Rĩrĩa tũrahiũrania na magerio maratũma tũũrũo nĩ hinya wa mwĩrĩ, wa meciria, kana wa kĩĩroho, wendo mũnene wa Kristo nĩ ũrĩtũheaga hinya wa gũthiĩ na mbere gũkirĩrĩria. (2 Kor. 5:14) Wendo wa Jesu no ũtwĩkĩre hinya na ũtũme twende gũthiĩ na mbere gũtũũra o na angĩkorũo nĩ tũrahiũrania na maũndũ maritũ ta icanjama, kũnyarirũo, maũndũ maitũ kwaga gũthiĩ wega, kana mĩtangĩko mĩnene. w18.09 14 ¶8-9

Nĩguo tũthiĩ na mbere kũrũmia ũhoro wa ma, no mũhaka twĩtĩkĩre na twathĩkĩre maũndũ mothe marĩa Jehova oigĩte. No mũhaka tũige ũhoro wa ma mbere ũtũũro-inĩ na tũtũũre kũringana na motaaro ma Bibilia. O ta Daudi, tũbatiĩ gũkorũo twĩhotorete gũthiĩ na mbere kũrũmĩrĩra ũhoro wa ma wa Ngai. Tũngĩaga gwĩka ũguo, no twambĩrĩrie gwĩciria ũhoro wa maũndũ marĩa twatigire nĩguo tũgũre ũhoro wa ma na twambĩrĩrie gũcokerera mamwe mamo. Handũ ha ũguo twagĩrĩirũo kũrũmia ũhoro wa ma biũ. Tũtiagĩrĩirũo gũthuura ũhoro wa ma ũrĩa tũgwĩtĩkĩra na ũrĩa tũtegũtindanĩra naguo. Twagĩrĩirũo kũrũmĩrĩra “ma yothe.” (Joh. 16:13) Nĩguo twĩtheme kwehera ũhoro-inĩ wa ma, no mũhaka tũhũthagĩre mahinda maitũ na njĩra njega. Tũngĩaga kwĩmenyerera no twambĩrĩrie kũhũthagĩra mahinda maingĩ mũno maũndũ-inĩ ma gwĩkenia, gwĩka maũndũ marĩa twendete, kũhũthĩra Intaneti, kana kwĩrorera TV. O na gũtuĩka maũndũ macio mo mene ti moru, no twĩkore tũkĩhũthĩra mahinda harĩ mo, mahinda marĩa mbere ĩyo tũrahũthagĩra wĩruti-inĩ witũ kĩũmbe kana maũndũ-inĩ mangĩ ma kĩĩroho. w18.11 10 ¶7-8

Rĩrĩa ũtũũro witũ wacenjia ũndũ tũtarerĩgĩrĩire, mogarũrũku no matũme tũkorũo na mĩtangĩko. (Thim. 12:25) O na no tuone ũrĩ ũndũ mũritũ gwĩtĩkĩra mogarũrũku macio. Hĩndĩ ta ĩyo-rĩ, tũngĩhota atĩa ‘gũkiria na kũhooreria’ ngoro citũ? (Thab. 131:1-3) O na gũtuĩka nĩ tũcemanagia na moritũ, no tũhoorerio nĩ “thayũ wa Ngai” ũrĩa ũgitagĩra meciria maitũ. (Afil. 4:6, 7) Kwoguo tũngĩĩhokaga Jehova rĩrĩa twaingĩhĩrũo nĩ mĩtangĩko, thayũ wa Ngai nĩ ũrĩtũheaga hinya wa kũrũmia itua ritũ rĩa gũtungatĩra Jehova na ũgatũgitĩra kuumana na mwerekera o wothe ũngĩtũma tũkue ngoro. Makĩria ma gũtũhooreria, roho mũtheru ningĩ no ũtũteithie kuona Maandĩko mangĩtũteithia kũiga maũndũ maitũ ma kĩĩroho mbere.—Joh. 14:26, 27. w18.10 27 ¶2; 28 ¶5, 8

Nĩ kĩndũ kĩrĩkũ gĩkoretwo na moimĩrĩro marĩa moru mũno harĩ andũ. Nĩ ũhoro wa maheeni! Mũndũ kuuga ũndũ oĩ atĩ ti wa ma nĩgetha aheenie mũndũ ũngĩ. Nũũ warĩ wa mbere kũheenania? O ta ũrĩa Jesu Kristo ooigire, “Mũcukani” nĩwe “ithe wa maheeni.” (Joh. 8:44) Nĩ rĩ Mũcukani aaheenanirie riita rĩa mbere? Ũndũ ũcio wekĩkire mĩaka ngiri nyingĩ mĩhĩtũku mũgũnda-inĩ wa Edeni. Mũthuri wa mbere Adamu na mũtumia wake Hawa, nĩ maakenagĩra ũtũũro thĩinĩ wa Paradiso ĩrĩa maaheetwo nĩ Mũũmbi wao. Nake Mũcukani akĩingĩrĩra maũndũ. Nĩ aamenyaga atĩ Ngai eerĩte Adamu na Hawa matikanarĩe maciaro ma “mũtĩ wa kũmenyithania wega o na ũũru,” na atĩ marĩa nĩ mangĩakuire nĩ ũndũ wa kwaga gwathĩka. O na kũrĩ ũguo, Shaitani kũgerera harĩ nyoka eerire Hawa ũũ: “Aca, ti atĩ no mũhaka mũgakua [ũhoro wa maheeni wa mbere biũ], nĩ gũkorũo Ngai nĩoĩ atĩ mũthenya ũrĩa mũkamarĩa, hĩndĩ ĩo maitho manyu nĩmakahingũka, mũtuĩke o ta Ngai, mũmenyage wega o na ũũru.”—Kĩam. 2:15-17; 3:1-5. w18.10 6 ¶1-2

Nĩguo ngoro citũ ikorũo irĩ nũngĩrĩru, no mũhaka meciria na merirĩria maitũ makorũo marĩ matheru. Twagĩrĩirũo kũiga meciria maitũ marĩ matheru nĩguo tũkorũo tũtarĩ na kameni tũgĩthathaiya Jehova. (2 Kor. 4:2; 1 Tim. 1:5) No nĩ na njĩra ĩrĩkũ arĩa arũngĩrĩru ngoro ‘monaga Ngai,’ na nĩ tũĩ atĩ ‘gũtirĩ mũndũ ũngĩona Ngai na acoke gũtũũra muoyo’? (Tham. 33:20) Kiugo gĩa Kĩngiriki kĩrĩa gĩtaũrĩtwo ‘kuona’ no gĩkorũo na rĩciria rĩa “kũhũũra mbica meciria-inĩ, gũtaũkĩrũo, kũmenya.” Arĩa monaga Ngai na “maitho ma ngoro” nĩ arĩa mamũmenyete wega na makenagio nĩ ngumo ciake. (Ef. 1:18) Makĩria ma kũmenya ngumo cia Ngai, athathaiya a ma no ‘mone Ngai’ na njĩra ya kũrora maũndũ marĩa amekagĩra. (Ayub. 42:5) Ningĩ nĩ maigaga ‘maitho mao ma ngoro’ harĩ irathimo njega iria Ngai erĩire arĩa merutanagĩria gũtũũra marĩ arũngĩrĩru na kũmũtungatĩra marĩ ehokeku. w18.09 20 ¶13, 15-16

Gwĩka ũndũ ũrĩa tũĩ atĩ nĩguo wagĩrĩire nĩ kũrehaga irathimo. O na gũtuĩka ũũgĩ ũkoragwo wĩhocetie harĩ ũmenyo, nduonanagio kũgerera maũndũ marĩa mũndũ amenyete tu, no nĩ nginya kũgerera matua marĩa atuaga. O na thigiriri nĩ irĩ ũũgĩ. Cionanagia ũguo na njĩra ya kwĩyethera irio hĩndĩ ya riũa. (Thim. 30:24, 25) Kristo, na nĩwe “ũũgĩ wa Ngai,” hingo ciothe ekaga maũndũ marĩa makenagia Ithe. (1 Kor. 1:24; Joh. 8:29) Ngai nĩ oĩ ngũrani ya gũtua itua rĩega, na gwĩka kũringana na itua rĩu. Na nĩ arathimaga arĩa makoragwo marĩ enyihia na arĩa mekaga ũndũ ũrĩa moĩ nĩguo wagĩrĩire. (Mat. 7:21-23) Kwoguo, ĩkaga maũndũ na njĩra ĩrĩtũmaga andũ othe thĩinĩ wa kĩũngano mahote gũtungatĩra Jehova marĩ enyihia. Gwĩka maũndũ marĩa tũĩ nĩmo magĩrĩire nĩ kuoyaga ihinda na kũbataraga wetereri. No gwĩka ũguo kuonanagia atĩ mũndũ nĩ mwĩnyihia na ũndũ ũcio nĩ ũtũmaga agĩe na gĩkeno ihinda-inĩ rĩrĩ na nginya tene na tene. w18.09 7 ¶18

Jehova nĩ aamenyaga atĩ andũ akinyanĩru nĩ mangĩkanyitanĩra nake harĩ kũhingia mĩoroto yake. O na gũtuĩka andũ rĩu ti akinyanĩru, arĩa ehokeku no marutithanie wĩra hamwe na Jehova o mũthenya. Kwa ngerekano, tũkoragwo tũrĩ “arutithania wĩra hamwe na Ngai” rĩrĩa tũrahunjia ũhoro ũrĩa mwega wa Ũthamaki wake na gũtua andũ arutwo. (1 Kor. 3:5-9) Ta wĩcirie ũrĩa Mũũmbi mwene hinya wothe atuonetie gĩtĩo kĩnene nĩ ũndũ wa gũtũhe mweke wa kũrutithania nake wĩra ũyũ onaga ũrĩ wa bata! O na kũrĩ ũguo, kũhunjia na gũtua andũ arutwo to cio njĩra cia kũrutithania wĩra hamwe na Jehova. Njĩra ingĩ tũngĩka ũguo nacio nĩ gũteithĩrĩria famĩlĩ na arĩa tũthathayagia nao, kũnyitana ũgeni, kwĩrutĩra gũteithĩrĩria mawĩra ma gĩtheokrasi, na kwandandũra ũtungata witũ. (Kol. 3:23) O na kũrĩ ũguo, ndũkaringithanie maũndũ marĩa ũngĩhota gwĩkĩra Jehova na marĩa andũ angĩ mangĩhota. Ririkana atĩ o mũndũ arĩ na mĩaka, ũgima wa mwĩrĩ, ũhoti, na maũndũ ngũrani na ma ũrĩa ũngĩ. w18.08 23 ¶1-2

Jehova nĩ oomĩrĩirie Habakuku akĩmwĩra atĩ nĩ angĩamũcokeirie macokio ma ciũria ciake cia kuuma ngoro. Thutha wa kahinda kanini nĩ angĩomĩrĩirio nĩ ũndũ wa mĩtangĩko ĩrĩa yothe aarĩ nayo. Ngai nĩ ta eeraga mũnabii ũcio ũũ: “Gĩa na wetereri, na ũnjĩĩhoke. Nĩ ngũgũcokeria mahoya maku o na maũndũ mangĩoneka ta maroya ihinda!” Jehova nĩ aamũririkanirie atĩ nĩ aaigĩte ihinda rĩa kũhingia ciĩranĩro ciake. Nĩ eekĩrire Habakuku ngoro agĩe na wetereri harĩ ciĩranĩro ciake. Mũthia-inĩ, mũnabii ũcio ndangĩaconorithirio. Gweterera Jehova tũkirĩrĩirie na gũthikĩrĩria na kinyi maũndũ marĩa aratwĩra, nĩ kũrĩtũmaga tũmwĩhoke na gũgatũteithia tũgĩe na thayũ wa ngoro o na tũkĩgeragĩra moritũ. Jesu aatwĩkĩrire ngoro twĩhokage Jehova arĩ we Mũigi Mahinda Ũrĩa Mũnene tũtegwĩciria ũhoro wa “mahinda kana ciathĩ” iria Ngai atatũguũrĩirie. (Atũm. 1:7) Nĩ ũndũ ũcio, rekei tũtikanakue ngoro, ĩndĩ tũkirĩrĩrie tũrĩ na wĩnyihia, wĩtĩkio, na wetereri, tũkĩhũthagĩra wega mahinda marĩa tũrĩ namo harĩ gũtungatĩra Jehova kũringana na ũhoti witũ.—Mar. 13:35-37; Gal. 6:9. w18.11 16 ¶13-14

Petero aakũrĩte etĩkĩtie o ta Ayahudi arĩa angĩ atĩ andũ a Ndũrĩrĩ matiarĩ atheru. O na kũrĩ ũguo, nĩ harĩ maũndũ Petero onire magĩtũma agarũrĩre muonere ũcio. Kwa ngerekano, Petero nĩ oonirio kĩoneki. (Atũm. 10:9-16) O ta Petero, no mũhaka twĩthuthurie wega na tũkorũo twĩhaarĩirie gwĩtĩkĩra ũteithio nĩguo tuone ũndũ o wothe wĩgiĩ mũthutũkanio ũngĩkorũo ũtigarĩte ngoro-inĩ citũ. Nĩ atĩa ũngĩ tũngĩka? Tũngĩhingũra ngoro citũ biũ, mũthutũkanio no ũthire na wendo ũcoke handũ haguo. (2 Kor. 6:11-13) Hihi nĩ ũkoragwo na kamũtugo ga kwenda kũnyitanĩra tu na andũ a rũrĩrĩ rwanyu, bũrũri wanyu, kana arĩa mwaragia rũthiomi rũmwe? Angĩkorũo nĩguo, hingũra ngoro yaku. Na githĩ to wĩre mũndũ uumĩte rũrĩrĩ-inĩ rũngĩ kana bũrũri ũngĩ mũkahunjie nake kana ũmũnyite ũgeni gwaku mũciĩ mũrũme kanyamũ! (Atũm. 16:14, 15) Ũngĩkaga ũguo, ũkũiyũria ngoro yaku wendo nginya mũthutũkanio wage handũ ũngĩikara. w18.08 9 ¶3, 6; 10 ¶7

Andũ amwe a Jehova matireganĩte biũ na mĩtugo ya thĩ. Marĩ maruga-inĩ mainaga na njĩra ĩtagĩrĩire na mageka maũndũ mangĩ matagĩrĩire gwĩkwo nĩ Mũkristiano. Angĩ nao mandĩkaga maũndũ matagĩrĩire Mũkristiano thĩinĩ wa intaneti (social media) na magekĩra mbica ciao itagĩrĩire. Andũ ta acio no mathũkie aarĩ na ariũ a Ithe witũ arĩa marerutanĩria gũkorũo na mĩthiĩre mĩega. (1 Pet. 2:11, 12) Thĩ ĩtindĩkagĩrĩria andũ makorũo na “merirĩria ma mwĩrĩ na merirĩria ma maitho na mwĩyonanio wa indo iria mũndũ arĩ nacio.” (1 Joh. 2:16) No tondũ ithuĩ tũrĩ a Jehova, Bibilia ĩtwĩkĩraga ngoro “kũrega merirĩria ma thĩ, na gũtũũra tũrĩ na meciria mega na ũthingu na wĩyamũrĩri Ngai mũtabarĩre-inĩ ũyũ wa maũndũ.” (Tit. 2:12) Maũndũ mothe marĩa twĩkaga, akorũo nĩ kũrĩa na kũnyua, kwĩhumba na kwĩgemia, mũrutĩre wa wĩra, kana mwarĩrie, magĩrĩirũo kuonia andũ arĩa angĩ atĩ tũtungatagĩra Jehova na ngoro yothe. w18.07 25 ¶13-14

Angĩkorũo nĩ tũrĩikaraga tũroretie maitho kũrĩ Jehova, tũtirĩrekaga ciĩko cia andũ arĩa angĩ itũrakarie kana ithũkie ũrata witũ nake. Ũndũ ũcio nĩ wa bata o na makĩria angĩkorũo nĩ twĩhokeirũo maũndũ ithondeka-inĩ rĩa Jehova, o ta Musa. O na gũtuĩka o mũndũ nĩ arabatara ‘gũthiĩ na mbere kũrutĩra ũhonokio wake wĩra agĩĩtigagĩra na akĩinainaga,’ no mũhaka tũririkanage atĩ Jehova ndakoragwo aigĩte watho ũmwe ũtangĩgarũrĩka wa gũtuĩra andũ othe. (Afil. 2:12) Handũ ha ũguo, o ũrĩa twĩhokeirũo maũndũ maingĩ, noguo tũkoorio maũndũ maingĩ. (Luk. 12:48) No angĩkorũo nĩ twendete Jehova biũ, gũtirĩ ũndũ ũngĩtũhĩnga kana ũtũtigithũkanie na wendo wake. (Thab. 119:165; Rom. 8:37-39) Tondũ tũratũũra mahinda-inĩ maritũ, rekei tũthiĩ na mbere kũroria maitho maitũ kũrĩ ũrĩa “ũikaire thĩ kũu igũrũ,” nĩguo tũkamenyaga ũrĩa arenda twĩke. (Thab. 123:1) Tũtikanareke ciĩko cia andũ arĩa angĩ ithũkie ũrata witũ na Jehova. w18.07 16 ¶19-20

Nĩ tũkenaga mũno rĩrĩa tweiguĩra ũrĩa andũ a Jehova marongerereka. Mwaka-inĩ wa 2017, twerutire Bibilia na andũ makĩria ma 10,000,000. Ũndũ ũcio nĩ ũronania wega atĩ nĩ tũrareka ũtheri witũ ũtheragĩre andũ. Ningĩ ta wĩcirie ũhoro wa andũ milioni nyingĩ arĩa twanyitire ũgeni moke Kĩririkano, na makĩĩruta ũhoro wa wendo ũrĩa Ngai onanirie rĩrĩa aarutire Jesu arĩ igongona. (1 Joh. 4:9) Aira a Jehova thĩinĩ wa thĩ yothe maragia thiomi itiganĩte. O na kũrĩ ũguo, gũkorũo tũkĩaria thiomi ngũrani gũtigiragia tũgooce Jehova Ithe witũ tũrĩ na ũrũmwe. (Kũg. 7:9) Gũtekũmakania twaragia rũthiomi rũrĩkũ kana tũikaraga kũ, no tũhote kũhenia “ta ũtheri thĩinĩ wa thĩ ĩno.” (Afil. 2:15) Wongerereku ũrĩa tũreyonera, ũrũmwe ũrĩa tũkoragwo naguo, na ũrĩa tũikaraga twĩiguĩte, nĩ maũndũ magoocithagia Jehova. w18.06 21 ¶1-3

Ciugo iria Jesu aacokirie erũo ũguo nĩ cionanirie atĩ nĩ aakeneire kwaria na mũtumia ũcio ũũ atĩ ndonaga kũrĩa kũrĩ kwa bata. Ngai eendaga Jesu ahunjie, na kwoguo kũhunjĩria andũ, nginya mũtumia Mũsamaria, kwarĩ ta irio harĩ we. (Joh. 4:32-34) Jakubu na Johana matiataũkĩirũo nĩ ũndũ ũcio. Hĩndĩ ĩmwe magĩtuĩkanĩria Samaria marĩ hamwe na Jesu nĩ meethaga handũ mangĩkoma itũũra-inĩ rĩmwe rĩa kũu. Asamaria matiamamũkĩrire na kwoguo Jakubu na Johana makĩrakara makĩũria kana metie mwaki kuuma igũrũ ũniine itũũra rĩu rĩothe. Jesu nĩ aamakũũmire atarĩ na guoya. (Luk. 9:51-56) No kũhoteke Jakubu na Johana matingĩoigire ũndũ ta ũcio korũo itũũra rĩrĩa maagire kwamũkĩrũo rĩarĩ kwao Galili. No gũkorũo hihi maarakarire ũguo tondũ maarĩ na mũthutũkanio. Thutha-inĩ rĩrĩa mũtũmwo Johana aathire kũhunjĩria Asamaria, no kũhoteke nĩ aaiguire aconokete nĩ ũndũ wa ciugo iria aagwetete, tondũ nĩ maamũthikĩrĩirie wega mũno.—Atũm. 8:14, 25. w18.06 10-11 ¶12-13

Angĩkorũo ũhoro wa ma nĩ ũrũmĩte ngoro-inĩ citũ biũ o ta ũrĩa mũthigari aarũmagia mũcibi wake, nĩ tũrĩikaraga kũringana naguo na nĩ tũrĩaragia ma hĩndĩ ciothe. Tũrĩĩthemaga kwaria maheeni nĩkĩ? Tondũ maheeni makoretwo marĩ rĩmwe rĩa matharaita marĩa Shaitani ahũthagĩra mũno. Maheeni makoragwo marĩ moru harĩ ũrĩa ũraheenania na ũrĩa ũraheenio. (Joh. 8:44) Kwoguo o na gũtuĩka tũtirĩ akinyanĩru, twĩrutanagĩria o ũrĩa wothe tũngĩhota gwĩthema kwaria maheeni. (Ef. 4:25) Ĩndĩ no ũkorũo ũtarĩ ũndũ mũhũthũ. Abigail, ũrĩa ũrĩ na mĩaka 18 oigire ũũ: “Ti hingo ciothe kwaria ma kuonekaga kũrĩ kwa bata, makĩria hĩndĩ ĩrĩa ũrona waria maheeni nĩ ũgwĩkũra handũ haceke.” Tũkĩagĩrĩirũo kwaragia ma nĩkĩ? Victoria, ũrĩa ũrĩ na mĩaka 23 oigire: “Andũ no makwĩre kana magwĩke maũndũ moru nĩ ũndũ wa kwaria ma na gũtetera wĩtĩkio waku. No hĩndĩ ciothe weka ũguo nĩ ũrĩgunĩkaga tondũ nĩ ũrĩgĩaga na ũmĩrĩru, ũgakuhĩrĩria Jehova makĩria, na ũkaheo gĩtĩo nĩ arĩa makwendete.” Nĩ harĩ bata mũno gũikara ‘wĩyohete mũcibi wa ũhoro ũrĩa wa ma njohero-inĩ yaku’ hĩndĩ ciothe. w18.05 28 ¶3, 5

O ũrĩa matukũ maya ma kũrigĩrĩria marathiĩ mathũkĩte, noguo ithuothe tũrabatara gũikara twĩiguĩte. Tũtikoragwo na nganja o na hanini atĩ Jehova akarehe mũico hĩndĩ ĩrĩa yagĩrĩire. (Mat. 24:42-44) No kwa ihinda rĩrĩ, tũrabatara gũkorũo tũrĩ na wetereri na hingo ciothe tũikarage twĩiguĩte. Thomaga Kiugo kĩa Ngai o mũthenya na waragie na Jehova kaingĩ kũgerera mahoya. (1 Pet. 4:7) Wĩrute kuumana na kĩonereria kĩa aarĩ na ariũ a Ithe witũ arĩa makoretwo na gĩkeno nĩ ũndũ wa gũikara meiguĩte na kũreka ũtheri wao warĩre andũ. Koragwo na maũndũ maingĩ ma gwĩka ũtungata-inĩ wa Jehova na ũhũthagĩre mahinda hamwe na aarĩ na ariũ a Ithe witũ. Gwĩka ũguo gũgũtũma ũkorũo na gĩkeno kĩnene na ũrĩonaga mahinda magĩthiĩ na ihenya. (Ef. 5:16) Kũmenya atĩ Jehova nĩ etĩkagĩra tũmũtungatĩre o na gũtuĩka tũtirĩ akinyanĩru nĩ ũndũ wĩkagĩra wĩtĩkio witũ hinya. Nĩ ũndũ ũcio, tũbatiĩ gũcokagĩria Jehova ngatho nĩ ũndũ wa gũtũhe “arũme marĩ iheo,” na nĩo athuri a kĩũngano. (Ef. 4:8, 11, 12) Kwoguo rĩrĩa athuri magagũceerera, ũgaatigĩrĩra atĩ nĩ wahũthĩra mweke ũcio wega biũ nĩguo ũgunĩke kuumana na ũũgĩ wao na ũtaaro ũrĩa magakũhe. w18.06 24-25 ¶15-18

Jesu ndeerire arutwo ake mamwende tu, no nĩ aamerire nginya ‘matũũre wendo-inĩ wake.’ Nĩkĩ? Tondũ nĩguo mũndũ atũũre arĩ mũrutwo wa Kristo no mũhaka akirĩrĩrie. Nĩguo Jesu onie arutwo ake bata wa gũkirĩrĩria, nĩ aahũthĩrire kiugo ‘gũtũũra’ maita maingĩ thĩinĩ wa Johana 15:4-10. Tuonanagia atĩa atĩ nĩ tũrenda gũtũũra twendetwo nĩ Kristo na tũrĩ etĩkĩrĩku nĩwe? Nĩ na njĩra ya gwathĩkĩra maathani make. Jesu atwĩraga, ‘Njathĩkagĩrai.’ Ũndũ ũrĩa tu Jesu atwĩraga twĩke nĩ ũrĩa we mwene eekire, tondũ oigire: “O ta ũrĩa njathĩkagĩra maathani ma Awa ngatũũra wendo-inĩ wake.” Nĩ aatũigĩire kĩonereria. (Joh. 13:15) Rĩrĩa tũgwathĩkĩra watho wa Jesu wa gũthiĩ kũhunjia, tuonanagia atĩ nĩ twendete Ngai tondũ maathani ma Jesu monanagia mwĩcirĩrie wa Ithe. (Mat. 17:5; Joh. 8:28) Rĩrĩa tũkuonia Jehova na Jesu atĩ nĩ tũmendete, o nao nĩ mathiaga na mbere gũtwenda. w18.05 18 ¶5-7

Matinĩnja nĩ marabatara gũtua matua megiĩ gĩthomo, wĩra, na maũndũ mangĩ. Angĩkorũo nĩ ũĩ mĩoroto yaku nĩ ĩrĩkũ, ti ũndũ mũritũ gũtua matua marĩa magĩrĩire. O ũrĩa ũgũkorũo na mĩbango ya kwĩigĩra mĩoroto tene, noguo ũkũgaacĩra na ihenya. Andũ aingĩ ethĩ kuuma ciũngano nyingĩ thĩinĩ wa thĩ yothe nĩ mabataraga gũcokerio ngatho mũno. Nĩ matungatagĩra Jehova na magathingata mĩoroto ya kĩĩroho ũtũũro-inĩ. Nĩ makenagĩra ũtũũro rĩrĩa marerutanĩria kũrũmĩrĩra ũtongoria wa Jehova maũndũ-inĩ mothe. Maũndũ macio mahutĩtie nginya ũtũũro wao wa famĩlĩ. Suleimani aandĩkire ũũ: “Ĩhokage Jehova na ngoro yaku yothe, nacio njĩra ciaku nĩarĩkũrũngagĩra.” (Thim. 3:5, 6) Jehova nĩ onaga andũ ethĩ arĩa marĩ kĩũngano-inĩ marĩ a bata, nĩ amendete mũno, nĩ amagitagĩra, akamatongoria na akamarathima. w18.04 26 ¶7; 27 ¶9

Mũtũmwo Johana aarĩ gĩtugĩ kĩũngano-inĩ gĩa tene gĩa Gĩkristiano. Injiri yake ĩgiĩ ũtungata wa Jesu nĩ yũmĩrĩirie Akristiano ihinda iraihu nginya ũmũthĩ. Ningĩ noyo tu ĩkoragwo na ciugo iria Jesu oigire atĩ wendo nĩguo ũtũmaga arutwo ake mamenyeke. (Joh. 13:35) Marũa marĩa matatũ ma Johana nĩ makoragwo na maũndũ maingĩ ma bata megiĩ ũhoro wa ma. Rĩrĩa twaigua tũkuĩte ngoro nĩ ũndũ wa mehia-rĩ, na githĩ tũtiguaga twacokwo nĩ thayũ twathoma atĩ “thakame ya . . . Jesu nĩ ĩtũtheragia mehia mothe”? (1 Joh. 1:7) Na angĩkorũo ngoro citũ no irathiĩ na mbere gũtũtuĩra-rĩ, na githĩ tũtiyũragwo nĩ gĩkeno twathoma atĩ “Ngai nĩ mũnene gũkĩra ngoro citũ”? (1 Joh. 3:20) Johana nowe tu waandĩkire atĩ “Ngai nĩ wendo.” (1 Joh. 4:8, 16) Marũa make ma kerĩ na ma gatatũ magaathagĩrĩria Akristiano arĩa ‘marathiĩ na mbere thĩinĩ wa ũhoro ũrĩa wa ma.’—2 Joh. 4; 3 Joh. 3, 4. w18.04 18 ¶14-15