Janũarĩ

Wĩtĩkio wa Timotheo wehocetie harĩ maũndũ marĩa eerutire makĩmũteithia gũkuhĩrĩria Jehova. O nawe wagĩrĩirũo gwĩcũrania maũndũ marĩa wĩrutĩte Bibilia-inĩ nĩguo ũkorũo na ma atĩ maũndũ marĩa wĩrutĩte megiĩ Jehova nĩ ma ma. Mbere ndaya, no mũhaka ũkorũo na ma na morutani maya matatũ ma mũthingi. wa mbere, no mũhaka ũkorũo na ma biũ atĩ Jehova Ngai nĩwe Mũũmbi wa indo ciothe. (Tham. 3:14, 15; Ahib. 3:4; Kũg. 4:11) wa kerĩ, no mũhaka ũkorũo na ma atĩ Bibilia nĩ ndũmĩrĩri ya Ngai kũrĩ andũ ĩrĩa ĩtongoretio nĩ roho. (2 Tim. 3:16, 17) wa gatatũ, no mũhaka wĩtĩkie atĩ Jehova nĩ akoragwo na andũ mamũthathayagia marĩ gĩkundi rungu rwa ũtongoria wa Kristo, na metagwo Aira a Jehova. (Isa. 43:10-12; Joh. 14:6; Atũm. 15:14) Ũguo ti kuuga atĩ no mũhaka ũmenye maũndũ mothe marĩa marĩ thĩinĩ wa Bibilia. Muoroto waku wagĩrĩirũo gũkorũo arĩ kũhũthĩra ‘ũhoti waku wa gwĩciria,’ nĩguo ũkorũo na ma na maũndũ marĩa wĩtĩkĩtie.—Rom. 12:1. w20.07 10 ¶8-9

Ũrathi ũcio ũtaarĩirie ũhoro wĩgiĩ ngigĩ ciarĩ na mothiũ maatariĩ ta ma andũ na “kĩndũ gĩatariĩ ta thũmbĩ cia thahabu” mĩtwe-inĩ yacio. (Kũg. 9:7) Ngigĩ icio iraherithia “andũ [thũ cia Ngai] arĩa matarĩ na mũhũũri wa Ngai mathiithi-inĩ mao” kwa ihinda rĩa mĩeri ĩtano, ihinda o ta rĩrĩa ngigĩ ĩtũũraga muoyo. (Kũg. 9:4) Ũndũ ũcio nĩ ta ũrataarĩria ũhoro wĩgiĩ ndungata cia Jehova iria njitĩrĩrie maguta. Arĩa aitĩrĩrie maguta mahunjagia marĩ na ũcamba ndũmĩrĩri ya Ngai ya ituĩro rĩa mũtabarĩre ũyũ, na ũndũ ũcio nĩ ũtũmaga arĩa manyitaga mbaru maũndũ ma thĩ ĩno maigue ũũru mũno. Hihi ũguo nĩ kuuga atĩ ngigĩ iria irĩ thĩinĩ wa ibuku rĩa Joeli 2:7-9 ti ũndũ ũmwe na ngigĩ iria irĩ thĩinĩ wa ibuku rĩa Kũguũrĩrio? Ĩĩ. Rĩmwe na rĩmwe, Bibilia nĩ ĩhũthagĩra kĩndũ kĩmwe gũtaarĩria maũndũ ngũrani. Kwa ngerekano, thĩinĩ wa Kũguũrĩrio 5:5, Jesu etagwo “Mũrũthi ũrĩa wa mũhĩrĩga wa Juda,” no thĩinĩ wa 1 Petero 5:8, Mũcukani etagwo “mũrũthi ũrararama.” w20.04 3 ¶8; 5 ¶10

Hagari ũrĩa warĩ ndungata ya Sarai, nĩ eekire ũndũ ũtaarĩ wa ũũgĩ thutha wa gũtuĩka mũtumia wa Aburamu. Thutha wa Hagari kũgĩa nda nĩ aambĩrĩirie kũnyũrũria Sarai, tondũ Sarai ndaarĩ na ciana. Maũndũ maathiire na mbere gũthũka nginya Sarai akĩingata Hagari. (Kĩam. 16:4-6) Nĩ ũndũ wa gũkorũo tũtarĩ akinyanĩru, no twĩcirie atĩ Hagari aarĩ mũndũ mũũru na atĩ ũguo eekirũo nĩguo kwagĩrĩire. No Jehova oonaga Hagari na njĩra ĩngĩ. Nĩ aamũtũmĩire mũraika wake. Rĩrĩa mũraika ũcio aathiire kũrĩ Hagari, nĩ aamũteithirie kũrũnga mwĩcirĩrie wake na akĩmũrathima. Hagari nĩ aamenyire atĩ Jehova nĩ aakoretwo akĩmũrora na nĩ aamenyaga maũndũ mothe marĩa aageragĩra. Ũndũ ũcio watũmire Hagari ete Jehova “Ngai wonaga maũndũ, . . . ũcio ũnyonaga.” (Kĩam. 16:7-13) Nĩ ũndũ ũrĩkũ Jehova oonire harĩ Hagari? Nĩ ooĩ wega mũrerere wake na maũndũ mothe marĩa aageragĩra. Jehova nĩ aamenyaga atĩ Hagari nĩ aahĩtĩtie nĩ ũndũ wa kwagĩra Sarai gĩtĩo, no ningĩ nĩ aataũkagĩrũo nĩ ũrĩa Hagari aaiguaga na maũndũ marĩa aageragĩra na kwoguo akĩmũrũmbũiya na njĩra ya wendo. w20.04 16 ¶8-9

Mũtũmwo Paulo ooigire atĩ Akristiano othe a ma marĩ ihenya-inĩ. (Ahib. 12:1) Na ithuothe, tũrĩ ethĩ kana akũrũ, tũrĩ na hinya kana tũrĩ anogu, no mũhaka tũkirĩrĩrie nginya mũico angĩkorũo nĩ tũrenda kwamũkĩra kĩheo kĩrĩa Jehova atwĩrĩire. (Mat. 24:13) Paulo aarĩ na wĩyathi wa kwaria tondũ we nĩ aahotete ‘gũtengʼera ihenya nginya mũthia.’ (2 Tim. 4:7, 8) No hihi Paulo aaragĩrĩria ihenya rĩa mũthemba ũrĩkũ? Paulo rĩmwe nĩ aahũthagĩra maũndũ meekĩkaga mathaako-inĩ hĩndĩ ya Ngiriki ya tene kũrutana maũndũ ma bata. (1 Kor. 9:25-27; 2 Tim. 2:5) Maita maigana ũna nĩ aaringithanirie ũtũũro wa Mũkristiano na gũtengʼera ihenya. (1 Kor. 9:24; Gal. 2:2; Afil. 2:16) Mũndũ ambagĩrĩria “ihenya” rĩrĩ rĩrĩa eyamũrĩra Jehova na abatithio. (1 Pet. 3:21) Na ahutagia karũrigi rĩrĩa Jehova amũhe kĩheo kĩa muoyo wa tene na tene.—Mat. 25:31-34, 46; 2 Tim. 4:8. w20.04 26 ¶1-3

Kiugo kĩa Ngai kiugaga ũũ: “Mwathani nĩ mwĩhokeku, na nĩ ekũmwĩkĩra hinya na amũgitĩre kuumana na ũrĩa mũũru.” (2 Thes. 3:3) Hihi Jehova atũgitagĩra na njĩra irĩkũ? Jehova nĩ atũheete indo cia mbaara iria ingĩtũgitĩra kuumana na tharĩkĩro cia Shaitani. (Ef. 6:13-17) Indo icio cia mbaara ikoragwo na hinya na nĩ irutaga wĩra ũrĩa kwagĩrĩire. Ĩndĩ indo icio itũgitagĩra o rĩrĩa tu twehumba irĩ ciothe na twaga gũciruta. Kwa ngerekano, mũcibi wa ũhoro ũrĩa wa ma ũrũgamĩrĩire ũhoro wa ma ũrĩa ũkoragwo Kiugo-inĩ kĩa Ngai, Bibilia. Twagĩrĩirũo kwĩyoha mũcibi ũcio nĩkĩ? Nĩguo tũtikahĩtithio nĩ Shaitani ũrĩa “nĩwe ithe wa maheeni.” (Joh. 8:44) Akoretwo akĩheenania mĩaka mĩingĩ mũno, na nĩ ahotete kũhĩtithia “thĩ yothe ĩrĩa ĩikaragwo.” (Kũg. 12:9) No ũhoro wa ma ũrĩa ũkoragwo thĩinĩ wa Bibilia nĩ ũtũgitagĩra nĩguo tũtikaheenio. Twĩyohaga atĩa mũcibi ũcio wa mũhaano? Twĩkaga ũguo na njĩra ya kwĩruta ũhoro wa ma wĩgiĩ Jehova, kũmũthathaiya na “roho na ma,” na gũikaraga tũrĩ ehokeku maũndũ-inĩ mothe.—Joh. 4:24; Ef. 4:25; Ahib. 13:18. w21.03 26-27 ¶3-5

Ũndũ ũrĩa watũmaga bũrũri ũcio ũkorũo ũrĩ wa mwanya nĩ tondũ nĩkuo gwakoragwo na ũthathaiya wa ma. Kuuma Pentekoste mwaka wa 33 M.M., Bũrũri Ũrĩa Mũthaka ndũkoretwo ũrĩ bũrũri mũna thĩinĩ wa thĩ tondũ andũ a Jehova makoragwo kũndũ guothe thĩinĩ wa thĩ. Handũ ha ũguo, ‘Bũrũri Ũrĩa Mũthaka’ mahinda-inĩ maya nĩ paradiso ya kĩĩroho ya andũ a Jehova, ũguo nĩ kuuga maũndũ ta ũthathaiya wao harĩ Jehova kũgerera mĩcemanio na wĩra wa kũhunjia. Matukũ-inĩ ma kũrigĩrĩria, mũthamaki wa mwena wa rũgongo nĩ akoretwo akĩingĩra maita maingĩ “Bũrũri-inĩ Ũrĩa Mũthaka.” Kwa ngerekano, rĩrĩa thirikari ya Nazi ya Njĩrĩmani yatuĩkire mũthamaki wa mwena wa rũgongo makĩria hĩndĩ ya Mbaara ya Kerĩ ya Thĩ, nĩ yaingĩrire “Bũrũri-inĩ Ũrĩa Mũthaka” na njĩra ya kũnyarira na kũũraga andũ a Ngai. Thutha wa Mbaara ya Kerĩ ya Thĩ, rĩrĩa Soviet Union yatuĩkire mũthamaki wa mwena wa rũgongo, mũthamaki ũcio nĩ aaingĩrire “Bũrũri-inĩ Ũrĩa Mũthaka” na njĩra ya kũnyarira andũ a Ngai na kũmatwara ithamĩrio. w20.05 13 ¶7-8

Ta wĩcirie andũ amwe maatuĩkire arata a Ngai arĩa maatũũraga mbere ya Kristo. Iburahimu nĩ oonanirie wĩtĩkio mũnene. Makĩria ma mĩaka 1,000 thutha wa Iburahimu gũkua, Jehova aamwĩtire “mũrata wakwa.” (Isa. 41:8) Kwoguo, o na gĩkuũ gĩtingĩtigithũkania Jehova na arata ake a hakuhĩ. Kwoguo maitho-inĩ ma Jehova Iburahimu arĩ o muoyo. (Luk. 20:37, 38) Ngerekano ĩngĩ nĩ ya Ayubu. Rĩrĩa araika othe maagomanĩte kũrĩa igũrũ, Jehova nĩ aaririe arĩ na ũũma igũrũ rĩgiĩ Ayubu. Jehova ooigire aarĩ “mũrũngĩrĩru na mwĩkindĩru, mũndũ wĩtigĩrĩte Ngai na wĩthemaga maũndũ marĩa moru.” (Ayub. 1:6-8) Ningĩ Jehova aaiguaga atĩa igũrũ rĩgiĩ Danieli ũrĩa wamũtungatĩire kĩndũ mĩaka 80 arĩ mwĩhokeku bũrũri-inĩ wa andũ mataathathayagia Jehova? Araika meerire mũthuri ũcio mũkũrũ maita matatũ atĩ aarĩ “mũndũ wendetwo mũno” nĩ Ngai. (Dan. 9:23; 10:11, 19) No tũkorũo na ma atĩ Jehova nĩ eriragĩria mũno mũthenya ũrĩa akaariũkia arata ake arĩa makuĩte.—Ayub. 14:15. w20.05 26-27 ¶3-4

Mũrutwo mwega wa Bibilia no erute mawatho ma Ngai na nginya amende. No hihi nĩ egwathĩkĩra Jehova nĩ ũndũ wa kũmwenda? Ririkana atĩ o na Adamu na Hawa nĩ mooĩ mawatho ma Ngai no matiamwendete kuuma ngoro. (Kĩam. 3:1-6) Kwoguo kũruta arutwo a Bibilia o mawatho na ithimi cia Ngai gwiki ti kũiganu. Mawatho na ithimi cia Jehova hingo ciothe ikoragwo irĩ cia gũtũguna. (Thab. 119:97, 111, 112) No arutwo aitũ no mage kuona maũndũ na njĩra ĩyo mangĩaga gũtaũkĩrũo atĩ Jehova aheanĩte mawatho macio nĩ ũndũ wa gũtwenda. Kwoguo no tũũrie arutwo ũndũ ta ũyũ: “Ũgwĩciria Ngai eraga ndungata ciake ciĩke ũndũ ũyũ kana itigeke ũndũ ũyũ nĩkĩ? Ũndũ ũcio ũrakuonia Jehova atariĩ atĩa?” Tũngĩteithia arutwo aitũ gwĩciria ũhoro wĩgiĩ Jehova na mende biũ rĩĩtwa itũũgĩru rĩa Jehova no tũmahutie ngoro. Na njĩra ĩyo, arutwo aitũ nĩ mekwenda to mawatho macio no nĩ nginya ũrĩa ũheanĩte mawatho macio. Wĩtĩkio wao nĩ ũgũkũra, na nĩ marĩhotaga gũkirĩrĩria magerio maritũ marĩa marĩcemanagia namo.—1 Kor. 3:12-15. w20.06 10 ¶10-11

No tũbatare gũkorũo na wetereri tondũ mũndũ no oe ihinda inene agĩkahona kĩĩroho. Andũ aingĩ arĩa manakorũo matekũnyitanĩra na kĩũngano nĩ moigaga atĩ maambĩrĩirie rĩngĩ kũnyitanĩra na kĩũngano thutha wa gũceererũo maita maingĩ nĩ athuri na andũ angĩ kĩũngano-inĩ. Mwarĩ wa Ithe witũ ũmwe wĩtagwo Nancy kuuma Asia aandĩkire ũũ: “Mũrata ũmwe wakwa wa hakuhĩ kĩũngano-inĩ nĩ aandeithirie mũno. Aanyendete o ta ũrĩa angĩenda mwarĩ wa nyina ũrĩa mũkũrũ. Nĩ aandirikanagia maũndũ maingĩ mega twaneka nake hau kabere. Nĩ aathikagĩrĩria arĩ na wetereri rĩrĩa ndĩramũitũrũrĩra ngoro yakwa na nĩ aaheaga ũtaaro rĩrĩa ndĩrabatara. Nĩ oonanirie atĩ aarĩ mũrata wa ma, na nĩ eehaarĩirie kũndeithia hĩndĩ o yothe.” Mũndũ ũrakarĩte no aringithanio na mũndũ ũgurarĩtio. Ũcayanĩri ũtariĩ ta ndawa ĩrĩ na hinya ĩngĩteithia mũndũ ũcio kũhona. Andũ amwe arĩa matigĩte kũnyitanĩra na kĩũngano no maiguaga marakarĩte nĩ ũndũ wa ũndũ meekirũo nĩ mũndũ thĩinĩ wa kĩũngano. Ũndũ ũcio nĩ ũtũmaga mage kwĩrirĩria gũcokerera Jehova. Amwe no gũkorũo monaga atĩ nĩ meekirũo ũndũ ũtarĩ wa kĩhooto. No mabatare mũndũ ũkũmathikĩrĩria na ataũkĩrũo nĩ ũrĩa maraigua. w20.06 26 ¶10-11

Rĩrĩa rĩothe waregana na igerio, nĩ ũrĩkoragwo ũrĩ ũndũ mũhũthũ harĩ we gwĩka ũndũ ũrĩa wagĩrĩire. Ningĩ ririkanaga atĩ mawoni ta macio matagĩrĩire megiĩ ngomanio moimanĩte na Shaitani. Kwoguo rĩrĩa waregana namo, nĩ ‘ũtooragia ũrĩa mũũru.’ Nĩ tũũĩ atĩ Jehova nĩwe ũrĩ na kĩhooto gĩa kuuga ũndũ mũna nĩ mehia. Na nĩ twĩkaga ũrĩa wothe tũngĩhota nĩguo tũtikehie. No rĩrĩa twehia, nĩ tumbũragĩra Jehova mehia macio kũgerera mahoya. (1 Joh. 1:9) Na tũngĩka rĩhia iritũ, nĩ tũcaragia ũteithio kũrĩ athuri arĩa Jehova amũrĩte nĩguo matũrũmbũiye. (Jak. 5:14-16) O na kũrĩ ũguo, tũtiagĩrĩirũo gũtũũra tũthumbũkaga nĩ ũndũ wa mehia twekire tene. Nĩkĩ? Tondũ Ithe witũ ũtwendete nĩ arutire igongona rĩa ũkũũri rĩa Mũrũ wake nĩguo tuohagĩrũo mehia maitũ. Jehova nĩ atuohagĩra biũ rĩrĩa twerira. Kwoguo twagĩrĩirũo gũthiĩ na mbere gũtungatĩra Jehova tũrĩ na thamiri theru.—1 Joh. 2:1, 2, 12; 3:19, 20. w20.07 22-23 ¶9-10

Kũrĩ hĩndĩ Jehova aatũũraga kuo arĩ wiki. No ndaarĩ na ihooru. Jehova ndabataraga mũndũ ũngĩ nĩguo akorũo na gĩkeno. O na kũrĩ ũguo, Ngai nĩ oonire arĩ wega ombe andũ angĩ na makenere ũtũũro. Nĩ ũndũ wa wendo, Jehova akĩambĩrĩria kũũmba. (1 Joh. 4:19) Mbere ndaya, Jehova oombire Jesu Mũrũ wake. Thutha ũcio, kũgerera harĩ Mũrũ ũcio wake ‘indo iria ingĩ ciothe ikĩũmbwo,’ o hamwe na ciũmbe milioni nyingĩ cia kĩĩroho. (Kol. 1:16) Jesu nĩ aakeneire mweke ũcio wa kũrutithania wĩra na Ithe. (Thim. 8:30) Na araika a Ngai o nao nĩ maakenire. Maarĩ kuo rĩrĩa Jehova na Jesu, Njorua yake ya wĩra maathondekire igũrũ na thĩ. Araika acio moonanirie atĩa gĩkeno kĩao? Rĩrĩa thĩ yombirũo, “makĩambĩrĩria kwanĩrĩra makenete” na hatarĩ nganja Jehova omba o kĩndũ nĩ maakenaga, na makĩria rĩrĩa oombire andũ marĩ a mũico harĩ ũũmbi wake. (Ayub. 38:7; Thim. 8:31, kohoro ka magũrũ-inĩ) Ũũmbi ũcio wothe nĩ woonanirie wendo na ũũgĩ wa Jehova.—Thab. 104:24; Rom. 1:20. w20.08 14 ¶1-2

Jehova aatũmbire ũndũ tũrĩbataraga kwendwo o na kuonia andũ arĩa angĩ wendo. Kwoguo mũndũ angĩtũthũũra nĩ tũiguaga ũũru na rĩmwe nginya tũgetigĩra. Mũrũ wa Ithe witũ ũmwe ooigire ũũ: “Rĩrĩa thigari ciahũũraga, ikanuma, na ikanjĩhĩtĩra atĩ tondũ ndĩ Mũira wa Jehova nĩ ndaiguaga makĩte na ngaigua njonorithĩtio.” Rĩrĩa andũ matũthũũra nĩ tũiguaga ũũru, no nĩ tũkoragwo tũkĩĩrĩgĩrĩra atĩ ũndũ ta ũcio no ũhaanĩke. Jesu nĩ aarathĩte atĩ nĩ tũngĩgaathũũrũo. Nĩ kĩĩ gĩtũmaga andũ mathũũre arũmĩrĩri a Jesu? Nĩ tondũ o ta Jesu, ‘tũtirĩ a thĩ ĩno.’ (Joh. 15:17-19) Kwoguo o na gũtuĩka nĩ tũheete thirikari cia andũ gĩtĩo, tũticithathayagia kana tũgathathaiya indo ta bendera iria irũgamagĩrĩra thirikari icio. Tũthathayagia o Jehova wiki. Tũnyitaga Ngai mbaru o we ũrĩ na kĩhooto gĩa gwatha andũ, no Shaitani na “rũciaro” rwake nĩ mareganaga biũ na ũndũ ũcio. (Kĩam. 3:1-5, 15, kohoro ka magũrũ-inĩ) Tũhunjagia atĩ Ũthamaki wa Ngai noguo tu ũngĩniinĩra andũ mathĩna, na atĩ ica ikuhĩ nĩ ũkũniina arĩa othe mareganaga naguo. (Dan. 2:44; Kũg. 19:19-21) Ndũmĩrĩri ĩyo ĩkoragwo ĩrĩ ũhoro mwega harĩ andũ arĩa ahooreri, no andũ arĩa aganu matikenagio nĩyo. w21.03 20 ¶1-2

Jehova nĩ aheete aarĩ a Ithe witũ itemi rĩa bata mũno kĩũngano-inĩ. Makoragwo marĩ cionereria njega ũhoro-inĩ wĩgiĩ ũũgĩ, wĩtĩkio, kĩyo, ũmĩrĩru, ũtaana, na ciĩko njega. (Luk. 8:2, 3; Atũm. 16:14, 15; Rom. 16:3, 6; Afil. 4:3; Ahib. 11:11, 31, 35) Ningĩ nĩ tũkenaga mũno gũkorũo na andũ aingĩ akũrũ thĩinĩ wa ciũngano citũ. No makorũo makĩhiũrania na mathĩna ma mwĩrĩ marĩa moimanaga na ũkũrũ. Ĩndĩ nĩ merutanagĩria ũrĩa wothe mahota ũtungata-inĩ na makahũthĩra hinya ũrĩa wothe marĩ naguo gwĩkĩra andũ arĩa angĩ ngoro na kũmamenyeria. Ningĩ nĩ twĩrutaga maũndũ maingĩ kuumana na ũmenyeru wao. Nĩ a bata mũno harĩ Jehova na harĩ ithuĩ. (Thim. 16:31) Ningĩ ta wĩcirie ũhoro wĩgiĩ andũ ethĩ. Nĩ macemanagia na moritũ maingĩ magĩkũrĩra thĩinĩ wa thĩ ĩno ĩtongoragio nĩ Shaitani ũrĩa Mũcukani na mwĩcirĩrie wake mũũru. Ĩndĩ nĩ twĩkĩragwo ngoro mũno rĩrĩa tuona makĩruta macokio mĩcemanio-inĩ, makĩhunjia, na magĩtetera wĩtĩkio wao marĩ na ũmĩrĩru. Hatarĩ nganja, inyuĩ andũ ethĩ mũrĩ na itemi rĩa bata thĩinĩ wa kĩũngano kĩa Jehova!—Thab. 8:2. w20.08 21-22 ¶9-11

Rĩrĩa mũndũ ambĩrĩria kũhunjia na emenyithania atĩ nĩ Mũira wa Jehova, no acemanie na ũkararia ũhaana ta kĩhuhũkanio kuuma kũrĩ andũ a famĩlĩ, anyũrũrio nĩ arata, kana andũ maage gũthikĩrĩria ndũmĩrĩri yake. Ũngĩgĩa na ũmĩrĩru atĩa? Wa mbere, korũo na ma atĩ Jesu o na arĩ kũrĩa igũrũ no arathiĩ na mbere gũtongoria wĩra wa kũhunjia. (Joh. 16:33; Kũg. 14:14-16) Wa kerĩ, korũo na ma biũ na kĩĩranĩro kĩrĩa Jehova eranĩire atĩ nĩ arĩkũrũmbũyagia. (Mat. 6:32-34) O ũrĩa wĩtĩkio waku ũrĩ na hinya, noguo ũrĩkoragwo na ũmĩrĩru makĩria. Nĩ woonanirie wĩtĩkio mũnene, rĩrĩa wamenyithirie arata na andũ a famĩlĩ yanyu atĩ nĩ ũrambĩrĩirie kwĩruta Bibilia na Aira a Jehova na gũthiĩ mĩcemanio yao. Hatarĩ nganja nĩ wĩkĩte mogarũrũku manene ũtũũro-inĩ waku nĩguo ũhote gũtũũra kũringana na ithimi cia Jehova cia ũthingu. Gwĩka ũguo kwabatarire wĩtĩkio na ũmĩrĩru. O ũgĩthiaga na mbere gũkũria ũmĩrĩru, koragwo na ma atĩ “Jehova Ngai waku arĩ hamwe nawe kũrĩa guothe ũrĩthiaga.”—Josh. 1:7-9. w20.09 5 ¶11-12

Mũthamaki Asa nĩ aaigire kĩonereria kĩega harĩ kũhũthĩra ũũgĩ na kwĩhoka Jehova biũ. Ndaatungatagĩra Jehova o rĩrĩa maũndũ marĩ maritũ, no nĩ nginya rĩrĩa kũrĩ na thayũ. Kuuma o kĩambĩrĩria, “Asa nĩ eerutĩire na ngoro yothe harĩ Jehova.” (1 Ath. 15:14, kohoro ka magũrũ-inĩ.) Njĩra ĩmwe Asa oonanirie nayo atĩ nĩ eerutĩire harĩ Jehova nĩ kweheria ũthathaiya wa maheeni Juda. Bibilia yugaga ũũ: “Akĩeheria igongona cia ngai cia kũngĩ na kũndũ kũrĩa gũtũũgĩru, akĩhehenja itugĩ cia kũhoywo, na agĩtema mĩtĩ ya kũhoywo.” (2 Maũ. 14:3, 5) O na nĩ eeheririe nginya cũwe Maaka kuuma gaturũa-inĩ gake Ũthamaki-inĩ. Aamweheririe nĩkĩ? Tondũ nĩ aanyitaga mbaru ũthathaiya wa mũhianano. (1 Ath. 15:11-13) Asa to ũthathaiya wa maheeni eeheririe. No ningĩ nĩ aateithirie andũ a Juda gũcokerera ũthathaiya mũtheru wa Jehova. Jehova nĩ aarathimire Asa, na agĩtũma Aisiraeli makorũo na ihinda rĩa thayũ. Ihinda-inĩ rĩa mĩaka ikũmi hĩndĩ ya wathani wa Asa, “bũrũri ũcio warĩ na thayũ.”—2 Maũ. 14:1, 4, 6. w20.09 14 ¶2-3

Kaingĩ nĩ twĩhokagĩra andũ arĩa angĩ indo citũ cia bata. Kwa ngerekano, nĩ tũigaga mbeca citũ bengi. Rĩrĩa tweka ũguo, twĩrĩgagĩrĩra atĩ mbeca citũ nĩ ikũgitĩrũo, na itikũũra kana ciiywo. Mũtũmwo Paulo aaririkanirie Timotheo atĩ nĩ aaheetwo kĩndũ kĩa bata, nĩkĩo ũmenyo wa ma wĩgiĩ muoroto wa Ngai harĩ andũ. Ningĩ Timotheo nĩ eehokeirũo wĩra wa ‘kũhunjia kiugo’ na kũruta “wĩra wa mũhunjia.” (2 Tim. 4:2, 5) Paulo eerire Timotheo agitĩre kĩrĩa eehokeirũo. O ta Timotheo, o na ithuĩ nĩ twĩhokeirũo maũndũ ma bata. Jehova nĩ atũheete mweke wa mwanya wa kũgĩa na ũmenyo wa ma wĩgiĩ ũhoro wa ma ũrĩa ũkoragwo Kiugo-inĩ gĩake Bibilia. Ũhoro ũcio nĩ wa bata tondũ nĩ ũtũrutaga ũrĩa tũngĩgĩa na ũrata mwega na Jehova, na ũgatũteithia kũmenya kĩrĩa kĩngĩtũteithia kũgĩa na gĩkeno kĩa ma ũtũũro-inĩ. Rĩrĩa twetĩkĩra ũhoro wa ma na twaũhũthĩra ũtũũro-inĩ witũ, nĩ tũkũũragwo kuuma ũkombo-inĩ wa morutani ma maheeni na mĩtugo ĩtarĩ mĩega.—1 Kor. 6:9-11. w20.09 26 ¶1-3

Rekaga mũrutwo waku one atĩ nĩ ũkenagio nĩ ma iria irĩ thĩinĩ wa Bibilia na atĩ nĩ ũciĩtĩkĩtie. Gwĩka ũguo no kũmũteithie gũkenera maũndũ marĩa areruta. O na no ũmwĩre ũrĩa ũteithĩkĩte nĩ ũndũ wa gũtũũra kũringana na motaaro ma Bibilia. Na njĩra ĩyo nĩ ekuona atĩ Bibilia nĩ ĩkoragwo na ũtaaro ũngĩmũteithia. Hĩndĩ ĩrĩa mũreruta no wĩre mũrutwo waku ũhoro wĩgiĩ aarĩ na ariũ a Ithe witũ amwe arĩa maahiũranagia na moritũ ta marĩa arahiũrania namo na makĩmatooria. O na no ũthiĩ na mũndũ kuuma kĩũngano-inĩ ũrĩa wanahiũrania na moritũ ta marĩa mũrutwo ũcio arahiũrania namo. Teithia mũrutwo waku kuona atĩ nĩ ũndũ wa ũũgĩ kũhũthĩra motaaro ma Bibilia ũtũũro-inĩ wake. Angĩkorũo mũndũ ũcio mũreruta nake arĩ kĩhiko-inĩ-rĩ, hihi ũrĩa mahikanĩtie nake nĩ erutaga? Angĩkorũo nderutaga no ũmũnyite ũgeni mwĩrute hamwe. Ĩkĩra mũrutwo waku ngoro erage arata na andũ a famĩlĩ maũndũ marĩa areruta.—Joh. 1:40-45. w20.10 16 ¶7-9

Aciari a Jesu a gũkũ thĩ maahotire kũrera Jesu agĩtuĩka mũndũ mũgima ũretĩkĩrĩka nĩ Ngai tondũ nĩ maarũmagĩrĩra motaaro ma Jehova megiĩ kũrera ciana. (Gũcok. 6:6, 7) Jusufu na Mariamu nĩ meendete Jehova mũno, na ũndũ ũrĩa maaigĩte mbere ũtũũro-inĩ wao nĩ gwĩkĩra ciana ciao ngoro gũkũria wendo o ta ũcio harĩ Jehova. Famĩlĩ ya Jusufu nĩ yarũmagĩrĩra mũtaratara mwega wa maũndũ ma kĩĩroho. Nĩ maathiaga mĩcemanio ya o kiumia thunagogi-inĩ thĩinĩ wa Nazarethi, o hamwe na Pasaka ya o mwaka thĩinĩ wa Jerusalemu. (Luk. 2:41; 4:16) No kũhoteke hĩndĩ ĩyo maathiaga Jerusalemu, Jusufu na Mariamu nĩ maarutaga Jesu o hamwe na ciana icio ingĩ ciao ũhoro wĩgiĩ historĩ ya andũ a Jehova na hihi magaceera kũndũ gũtiganĩte kũrĩa kũgwetetwo Maandĩko-inĩ. O ũrĩa ciana ciao ciathiaga ikĩingĩhaga, no mũhaka akorũo ndwarĩ ũndũ mũhũthũ harĩ Jusufu na Mariamu gũtũũria mũtaratara mwega wa maũndũ ma kĩĩroho. No nĩ maagunĩkaga mũno nĩ ũndũ wa gwĩka ũguo. Nĩ ũndũ wa kũiga mbere ũthathaiya wa Jehova ũtũũro-inĩ wao, nĩ maahotire gũteithia famĩlĩ yao gũkuhĩrĩria Jehova. w20.10 28 ¶8-9

Rĩrĩa wanyitwo ũgeni mũthiĩ mũkerute na mũrutwo wa Bibilia nĩ wega kũhaarĩria harĩa mũgũthiĩ gũthoma. Painia ũmwe wa mwanya wĩtagwo Dorin ooigire ũũ: “Nĩ ngenaga hĩndĩ ĩrĩa mũhunjia ũrĩa nyitĩte ũgeni ahaarĩria harĩa tũgũthiĩ kwĩruta na mũrutwo. Ũndũ ũcio nĩ ũmũteithagia kuuga maũndũ mekũguna mũrutwo.” Ũndũ ũcio ningĩ nĩ ũteithagia mũrutwo kuona atĩ inyuerĩ nĩ mũhaarĩirie, na kwoguo mũkamũigĩra kĩonereria kĩega. O na ũngĩaga kũhaarĩria na njĩra ndikĩru harĩa mũgũthoma, tigĩrĩra atĩ nĩ wahaarĩria maũndũ marĩa manene. Mahoya nĩ ma bata harĩ wĩruti wa Bibilia na kwoguo mũhunjia angĩkwĩra nĩ ũkũhoithia, wĩcirie kabere maũndũ marĩa ũkũgweta mahoya-inĩ. Ũngĩka ũguo no ũhote kũhoithia mahoya mekũhutia mũrutwo ngoro. (Thab. 141:2) Hanae ũrĩa ũikaraga Japan, no aririkanaga mahoya marĩa maahoithagio nĩ mwarĩ wa Ithe witũ ũmwe mookaga na mwarimũ wake kũmũruta Bibilia. Ooigire ũũ: “Mahoya make nĩ maatũmaga njigue ũrĩa arĩ na ũrata mũrũmu hamwe na Jehova na ngenda kũhaana take. Ningĩ rĩrĩa agweta rĩĩtwa rĩakwa mahoya-inĩ, ũndũ ũcio nĩ watũmaga njigue atĩ nĩ nyendetwo.” w21.03 9-10 ¶7-8

Jesu nĩ aaheete mũtũmwo Paulo ũũma atĩ nĩ angĩakinyire Roma. O na kũrĩ ũguo, kũrĩ Ayahudi amwe thĩinĩ wa Jerusalemu maabangire ũrĩa megũtharĩkĩra Paulo na mamũrage. Rĩrĩa mũtongoria wa mbũtũ ya Roma wetagwo Kilaudio Lusia aamenyire ũhoro wa njama ĩyo, nĩ aabangire ũrĩa ekũhonokia Paulo. O na ihenya, Kilaudio nĩ aathire gĩkundi kĩnene gĩa thigari kĩgitĩre Paulo na kĩmũtware Kaisarea. Akinya Kaisarea, Ngavana Felike nĩ aathanire atĩ Paulo aikare arangĩirũo “nyũmba-inĩ ya mũthamaki ya Herode.” Na njĩra ĩyo, Paulo akĩgitĩrũo kuumana na andũ acio meendaga kũmũũraga. (Atũm. 23:12-35) Hĩndĩ ĩyo, Fesito nĩwe warĩ ngavana ithenya rĩa Felike, na nĩ eendaga “gũkenia Ayahudi.” Kwoguo akĩũria Paulo ũũ: “Nĩ ũkwenda kwambata Jerusalemu ũgatuĩrũo kũu mbere yakwa?” Paulo nĩ aamenyaga atĩ angĩathiire Jerusalemu, no kũhoteke nĩ angĩoragirũo. Paulo ooigire: “Nĩ ndacokia ciira riiko kũrĩ Kaisari!” Fesito akĩra Paulo ũũ: “Tondũ nĩ wacokia ciira riiko kũrĩ Kaisari; ũgũthiĩ kũrĩ Kaisari.” Ũguo nĩ kuuga atĩ kahinda kanini thutha ũcio, Paulo nĩ angĩatwarirũo Roma kũndũ kũraihu biũ na Ayahudi acio meendaga kũmũũraga.—Atũm. 25:6-12. w20.11 13 ¶4; 14 ¶8-10

Gũtirĩ mũndũ ũtaiguaga ahĩtĩtie rĩmwe na rĩmwe. Kwa ngerekano, andũ amwe nĩ maiguaga mahĩtĩtie nĩ ũndũ wa maũndũ marĩa meekire matanamenya ũhoro wa ma. Angĩ nao nĩ maiguaga mahĩtĩtie nĩ ũndũ wa mahĩtia meekire thutha wa kũbatithio. (Rom. 3:23) Ũrĩa kũrĩ nĩ atĩ twendaga gwĩka ũrĩa kwagĩrĩire, ĩndĩ “ithuothe nĩ tũhĩngagwo maita maingĩ.” (Jak. 3:2; Rom. 7:21-23) O na gũtuĩka gũtirĩ mũndũ wendaga kũigua agĩthumbũka nĩ ũndũ wa kũhĩtia, ũndũ ũcio no ũtũteithie. Na njĩra ĩrĩkũ? Rĩrĩa twaigua tũhĩtĩtie, ũndũ ũcio nĩ ũtũteithagia kũrũnga mĩthiĩre itũ na tũgatua itua rĩa kwaga gũcokera mahĩtia macio. (Ahib. 12:12, 13) O na kũrĩ ũguo, mũndũ no athiĩ na mbere kũigua ahĩtĩtie o na thutha wa kwĩrira na kũmenya atĩ Jehova nĩ aamuoheire. Gũthumbũka na njĩra ĩyo no gũkorũo gũtarĩ na moimĩrĩro mega. (Thab. 31:10; 38:3, 4) Nĩ twagĩrĩirũo kwĩmenyerera nĩguo tũtigathumbũkage gũkĩria njano. Nĩkĩ? Tondũ Shaitani no akene mũno tũngĩtiga gũtungatĩra Jehova nĩ ũndũ wa gwĩciria atĩ Jehova ndaatuoheire, no ũhoro wa ma nĩ atĩ akoragwo atuoheire.—Ringithania 2 Akorintho 2:5-7, 11. w20.11 27 ¶12-13

Mwandĩki wa Thaburi ĩyo ũrĩa warĩ Mũlawii nĩ aambĩrĩirie kũiguĩra ũiru andũ arĩa maarĩ etĩi na aganu, ti tondũ eendaga gwĩka tao, no nĩ tondũ oonaga magaacĩrĩte. (Thab. 73:2-9, 11-14) Moonekaga magaacĩrĩte, marĩ na ũtũũro mwega, na matarĩ na mĩtangĩko. Mũlawii ũcio nĩ aabataraga kuona maũndũ ta ũrĩa Jehova aamonaga. Gwĩka ũguo nĩ kwamũteithirie gũcokwo nĩ thayũ na gũkorũo na gĩkeno. Ooigire ũũ: “Ndĩ na [Jehova], gũtirĩ kĩndũ ingĩĩrirĩria gũkũ thĩ.” (Thab. 73:25) O na ithuĩ tũtiagĩrĩirũo kũiguĩra ũiru andũ aganu arĩa monekaga ta magaacĩrĩte. Gĩkeno kĩao no kĩa ihinda inini. (Koh. 8:12, 13) Tũngĩmaiguĩra ũiru nĩ tũgũkua ngoro na tũthũkie ũrata witũ hamwe na Jehova. Kwoguo ũngĩĩkora ũkĩiguĩra andũ arĩa aganu ũiru tondũ maroneka magaacĩrĩte, ĩka ũrĩa Mũlawii ũcio eekire. Athĩkĩra ũtaaro wa Ngai na njĩra ya kũnyitanĩra na andũ arĩa mekaga wendi wa Jehova. Ũngĩkorũo wendete Jehova gũkĩra kĩndũ kĩngĩ o gĩothe, nĩ ũkũgĩa na gĩkeno kĩa ma. Ningĩ nĩ ũkũhota gũikara njĩra-inĩ ya “muoyo ũrĩa wa ma.”—1 Tim. 6:19. w20.12 19-20 ¶14-16

Ũkĩhoya Jehova igũrũ rĩgiĩ mĩtangĩko yaku, ndũkariganagĩrũo nĩ kũmũcokeria ngatho. Nĩ wega gwĩcũrania igũrũ rĩgiĩ irathimo iria tũrĩ nacio o na rĩrĩa maũndũ marĩ maritũ. Ririkana atĩ, o na ũngĩaga ciugo iria ciagĩrĩire cia gũtaarĩria ũrĩa ũraigua, Jehova no agũcokerie mahoya maku o na ũngĩmwĩra ciugo hũthũ ta ‘Jehova ndeithia.’ (2 Maũ. 18:31) Wĩhokage ũũgĩ wa Jehova, no ti waku. Matukũ-inĩ ma mũnabii Isaia, andũ a Juda nĩ meetigagĩra gũtharĩkĩrũo nĩ Aashuri. Tondũ andũ a Juda maatiendaga gũtoorio nĩ Aashuri, nĩ maahoire Amisiri ũteithio, o na gũtuĩka matiahoyaga Ngai wa ma. (Isa. 30:1, 2) Ũndũ ũcio meekire ndwarĩ wa ũũgĩ, na Jehova nĩ aameerire nĩ ũngĩamaingĩririe ũgwati-inĩ. (Isa. 30:7, 12, 13) Jehova akĩhũthĩra Isaia nĩ aameerire kũrĩa maangĩonire ũgitĩri wa ma. Aameerire ũũ: “Hinya wanyu ũkoimana na inyuĩ gũikara mũhooreire na kuonania mwĩhoko” harĩ Jehova.—Isa. 30:15b. w21.01 3-4 ¶8-9

Ariũ a Ithe na Kristo maakorũo marĩ ehokeku nĩ maheagwo ngerenwa ya gũthiĩ kũrĩa igũrũ magatuĩke athamaki na athĩnjĩri-Ngai hamwe na Kristo. (Kũg. 20:6) Jehova, Jesu, na araika nĩ magaakena mũno hĩndĩ ĩrĩa aitĩrĩrie maguta othe 144,000 makaaheo ngerenwa yao kũrĩa igũrũ. Thutha wa kwaria ũhoro wĩgiĩ andũ 144,000 arĩa magaakorũo marĩ athamaki na athĩnjĩri-Ngai, mũtũmwo Johana aacokire akĩona ũndũ ũngĩ wa gũcanjamũra, akĩona andũ “kĩrĩndĩ kĩnene” arĩa mangĩkaahonoka Hari–Magedoni. Gĩkundi kĩu gĩa kerĩ oonire nĩ ngũrani na kĩa mbere tondũ kĩarĩ na andũ aingĩ makĩria na mũigana wao ndũgwetetwo. (Kũg. 7:9, 10) Meehumbĩte “kanjũ cia rangi mwerũ,” kuonania atĩ maaikarire ‘matarĩ na kameni’ kuuma kũrĩ thĩ ĩno ĩtongoragio nĩ Shaitani, na maaikarire marĩ ehokeku harĩ Ngai na Kristo. (Jak. 1:27) Maanagĩrĩra na mũgambo mũnene makoiga atĩ nĩ mahonoketio, nĩ ũndũ wa maũndũ marĩa Jehova na Jesu, o we Gatũrũme ka Ngai maamekĩire. Ningĩ nĩ maanyitĩte mathĩgĩ ma mĩtĩ ya mĩkĩndũ, kuonania atĩ nĩ maanyitaga Jesu mbaru makenete arĩ we Mũthamaki ũrĩa ũthuurĩtwo nĩ Jehova.—Ringithania Johana 12:12, 13. w21.01 15-16 ¶6-7

Mũthuri no erute gũkorũo arĩ mũtwe mwega wa famĩlĩ angĩĩgerekania na ũrĩa Jehova na Jesu mahũthagĩra ũnene wao. Kwa ngerekano, ta wĩcirie ũhoro wĩgiĩ ngumo ya wĩnyihia. Jehova nĩwe mũũgĩ mũno igũrũ na thĩ, no nĩ athikagĩrĩria mawoni ma ndungata ciake. (Kĩam. 18:23, 24, 32) Ningĩ o na gũtuĩka nĩ mũkinyanĩru, ihinda-inĩ rĩrĩ nderĩgagĩrĩra twĩke maũndũ makĩrĩte ũhoti witũ. Handũ ha ũguo, nĩ ateithagia andũ matarĩ akinyanĩru nĩguo mahote kũmũtungatĩra. (Thab. 113:6, 7) Bibilia yugaga atĩ Jehova nĩ “mũteithia.” (Thab. 27:9; Ahib. 13:6) Mũthamaki Daudi ooigire atĩ aahotire kũhingia maũndũ maingĩ marĩa aahingirie tondũ Jehova nĩ eenyihirie akĩmũteithia. Ta wĩcirie ũhoro wa kĩonereria kĩa Jesu. O na gũtuĩka aarĩ Mwathani harĩ arutwo ake, nĩ aamathambirie magũrũ. Jesu we mwene ooigire ũũ: “Nĩ kĩonereria ndamũigĩra, atĩ o ta ũguo ndeka harĩ inyuĩ, o na inyuĩ mwĩkage ũguo.” (Joh. 13:12-17) O na gũtuĩka nĩ eehokeirũo maũndũ manene, Jesu ndeerĩgagĩrĩra gũtungatĩrũo nĩ andũ arĩa angĩ. Handũ ha ũguo, nĩwe wamatungatagĩra.—Mat. 20:28. w21.02 3-4 ¶8-10

Ariũ a Ithe witũ ethĩ, kũrĩ na maũndũ maingĩ mũngĩhingia kĩũngano-inĩ. Aingĩ anyu nĩ mũkoragwo na hinya mũingĩ wa mwĩrĩ. Kwoguo no mũteithĩrĩrie kĩũngano kĩanyu na njĩra nyingĩ. No gũkorũo nĩ wĩriragĩria kwamũrũo ũtuĩke ndungata ya kĩũngano. Ĩndĩ no gũkorũo nĩ wonaga ta andũ arĩa angĩ monaga wĩ mũnini mũno na ta ũtarĩ na ũmenyeru wa kũigana wa kwĩhokerũo mawĩra ma bata. O na gũtuĩka ũrĩ o mũnini, kũrĩ na maũndũ maingĩ ũngĩka rĩu, nĩguo andũ arĩa angĩ kĩũngano-inĩ makwĩhoke na makũhe gĩtĩo. Hihi inyuĩ ariũ a Ithe witũ ethĩ mũrĩ na ũhoti mũngĩhũthĩra gũteithia aarĩ na ariũ a Ithe witũ kĩũngano-inĩ? Aingĩ anyu mũrĩ na ũhoti ũcio. Kwa ngerekano, no gũkorũo nĩ wonete atĩ andũ akũrũ nĩ makenaga rĩrĩa monio kũhũthĩra thimũ kana indo ingĩ cia kĩĩrĩu nĩguo mahote gũcihũthĩra hĩndĩ ya wĩruti wao kĩũmbe kana hĩndĩ ya mĩcemanio. No ũhũthĩre ũũgĩ ũrĩa ũrĩ naguo wĩgiĩ indo ta icio kũguna andũ ta acio akũrũ kĩũngano-inĩ. Ũndũ-inĩ o wothe ũrĩkaga, kenagia Ithe witũ wa igũrũ. w21.03 2 ¶1, 3; 7 ¶18

O na angĩkorũo mũtumia nĩ mũthomu gũkĩra mũthuri wake, wĩra wa gũtongoria ũthathaiya wa famĩlĩ na maũndũ mangĩ ma kĩĩroho nĩ wa mũthuri. (Ef. 6:4) O na gũtuĩka mũtumia nĩ agĩrĩirũo kwĩnyihĩria mũthuri wake, arĩ na itemi rĩa kũrũmbũiya mabataro make mwene ma kĩĩroho. Nĩ ũndũ ũcio, nĩ agĩrĩirũo gwetha mahinda ma wĩruti wake kĩũmbe na gwĩcũrania. Ũndũ ũcio nĩ ũrĩmũteithagia gũtũũria wendo na gĩtĩo harĩ Jehova, na agakenera kwĩnyihĩria mũthuri wake. Atumia arĩa menyihagĩria athuri ao nĩ ũndũ wa kwenda Jehova nĩ makoragwo na gĩkeno na kũiganĩra gũkĩra arĩa maregaga gwathĩkĩra mũbango wa Jehova wa ũtongoria thĩinĩ wa famĩlĩ. Nĩ maigagĩra andũ arĩa ethĩ kĩonereria kĩega. Ningĩ nĩ matũmaga gũkorũo na thayũ na gĩkeno thĩinĩ wa famĩlĩ ciao na kĩũngano-inĩ. (Tit. 2:3-5) Mahinda-inĩ maya, andũ aingĩ arĩa matungatagĩra Jehova makoragwo marĩ atumia.—Thab. 68:11. w21.02 13 ¶21-23

Mũtũmwo Paulo nĩ aaigire kĩonereria kĩega ũhoro-inĩ wĩgiĩ kuonania ũmĩrĩru na ũkirĩrĩria. Rĩmwe na rĩmwe nĩ aaiguaga atarĩ na hinya. No nĩ aahotire gũkirĩrĩria tondũ nĩ eehokire Jehova nĩguo amũhe hinya ũrĩa aabataraga. (2 Kor. 12:8-10; Afil. 4:13) O na ithuĩ no tũkoragwo na ũmĩrĩru na hinya ta ũcio tũngĩĩhokaga Jehova atũteithie. (Jak. 4:10) Nĩ twagĩrĩirũo gũkoragwo na ma atĩ magerio marĩa tũcemanagia namo matikoragwo moimĩte kũrĩ Jehova. Mũtũmwo Jakubu atwĩrĩte ũũ: “Rĩrĩa mũndũ o wothe aragerio ndakoige: ‘Ndĩragerio nĩ Ngai.’ Nĩ gũkorũo Ngai ndangĩgerio na maũndũ moru, nake we mwene ndageragia mũndũ o na ũrĩkũ.” (Jak. 1:13) Tũngĩkorũo na ma biũ na ũndũ ũcio, no tũhote gũkuhĩrĩria Ithe witũ wa igũrũ o na makĩria. Jehova ‘ndagarũrũkaga kana agacenjia.’ (Jak. 1:17) Nĩ aateithirie Akristiano a karine ya mbere rĩrĩa maacemanagia na magerio, na o na ithuĩ ũmũthĩ nĩ arĩtũteithagia. Thaitha Jehova agũteithie kũgĩa na ũũgĩ, wĩtĩkio, na ũmĩrĩru. Nĩ arĩcokagia mahoya maku. w21.02 31 ¶19-21

No wĩkĩre ngoro mũrutwo wa Bibilia ũkaga mĩcemanio na njĩra ya kũmuonia atĩ nĩ ũramwĩciria. (Afil. 2:4) Ũtekũingĩrĩra maũndũ make kĩũmbe, no ũmũcokerie ngatho nĩ ũndũ wa mogarũrũku marĩa ekĩte ũtũũro-inĩ wake, ũmũrie ũhoro wĩgiĩ wĩruti wake, famĩlĩ yake, na wĩra ũrĩa arutaga. Kwaranĩria nake na njĩra ta ĩyo no gũtũme mũtuĩke arata. Ũngĩtuĩka mũrata wa mũrutwo wa Bibilia no ũmũteithĩrĩrie athiĩ na mbere nginya akinyĩrĩre kũbatithio. O ũrĩa mũrutwo arathiĩ na mbere gũkũra kĩĩroho na gwĩka mogarũrũku ũtũũro-inĩ wake, mũteithie kũigua arĩ gĩcunjĩ gĩa kĩũngano. No wĩke ũguo na njĩra ya kũmũnyita ũgeni na kũmuonia ũtaana. (Ahib. 13:2) Mũrutwo wa Bibilia agĩrĩra gũtuĩka mũhunjia, no ũmũnyite ũgeni mũthiĩ nake ũtungata-inĩ. Mũhunjia ũmwe wĩtagwo Diego kuuma Brazil ooigire ũũ: “Ariũ a Ithe witũ aingĩ nĩ maanyitaga ũgeni tũkahunjie hamwe nao. Ũndũ ũcio nĩ wandeithirie mũno kũmamenya. Kũmenyana nao nĩ kwandeithirie kwĩruta maũndũ maingĩ, na gũkĩndeithia kũigua nguhĩrĩirie Jehova na Jesu makĩria.” w21.03 12 ¶15-16

Jesu eerire arũmĩrĩri ake mendage thũ ciao. (Mat. 5:44, 45) Hihi gwĩka ũguo nĩ ũndũ mũhũthũ? Ti ũndũ mũhũthũ o na hanini. No no ũhoteke kũgerera ũteithio wa roho mũtheru wa Ngai. Maciaro ma roho wa Ngai nĩ ngumo ta wendo, wetereri, ũtugi, ũhooreri, na kwĩgirĩrĩria. (Gal. 5:22, 23) Ngumo icio nĩ itũteithagia gũkirĩrĩria rũthũũro. Andũ aingĩ arĩa matũthũire nĩ matigaga gũtũũkĩrĩra nĩ ũndũ wa kuona athuri ao, atumia, ciana, kana andũ arĩa marigainie makĩonania ngumo icio njega. Aingĩ o na manatuĩka aarĩ na ariũ a Ithe witũ. Kwoguo angĩkorũo nĩ wonaga ũrĩ ũndũ mũritũ kwenda andũ arĩa magũthũire nĩ ũndũ wa gũtungatĩra Jehova, hoya ũheo roho mũtheru. (Luk. 11:13) Na ũkoragwo na ma atĩ, hingo ciothe gwathĩkĩra Ngai nĩguo ũndũ ũrĩa mwega biũ ũngĩka. (Thim. 3:5-7) Rũthũũro no rũkorũo na moimĩrĩro moru na rũtuurithie mũndũ, no wendo ũrĩ hinya o na makĩria. Kuonia thũ citũ wendo no gũtũme citige gũtũũkĩrĩra. Na gwĩka ũguo nĩ gũtũmaga Jehova akene. Ĩndĩ o na thũ citũ ingĩthiĩ na mbere gũtũũkĩrĩra, twagĩrĩirũo gũthiĩ na mbere gũkorũo na gĩkeno. w21.03 23 ¶13; 24 ¶15, 17

Mũnabii Joeli aarathĩte ũhoro wĩgiĩ tharĩkĩro ya mbũtũ cia ita. (Joel 2:1, 8, 11) Jehova ooigire atĩ akaahũthĩra ‘mbũtũ yake nene’ (thigari cia Ababuloni) kũherithia Aisiraeli arĩa maarĩ aremi. (Joel 2:25) Mbũtũ ĩyo ĩĩtĩtwo “mũndũ wa mwena wa rũgongo” tondũ Ababuloni mangĩatharĩkĩire Isiraeli kuuma mwena wa rũgongo. (Joel 2:20) Mbũtũ ĩyo ĩringithanĩtio na gĩkundi kĩĩbangĩte wega kĩa ngigĩ. Joeli akĩaria ũhoro wa mbũtũ ĩyo oigĩte ũũ: “O [mũthigari] athiagĩra njĩra-inĩ yake arũngĩrĩirie. . . . Mahanyũkaga thĩinĩ wa itũũra, . . . Mahaicaga igũrũ rĩa nyũmba, makaingĩrĩra ndirica-inĩ ta mũici.” (Joel 2:8, 9) Hihi nĩ ũrahũũra mbica ĩyo? Thigari irĩ kũndũ guothe. Hatirĩ handũ mũndũ angĩĩhitha. Gũtirĩ mũndũ ũngĩhota gwĩthara kuuma harĩ mbũtũ ya Ababuloni! Ababuloni (kana Akalidei) maatharĩkĩire itũũra rĩa Jerusalemu o ta ngigĩ mwaka wa 607 Mbere ya Mahinda Maitũ (M.M.M.). Bibilia yugĩte ũũ: ‘Mũthamaki wa Akalidei ndaacaĩire mwanake kana mũirĩtu, mũndũ mũkũrũ kana ũtarĩ na hinya.’—2 Maũ. 36:17. w20.04 5 ¶11-12