Dicemba

Rĩmwe na rĩmwe, no twage gũtaũkĩrũo nĩ ũndũ mũna thĩinĩ wa Kiugo kĩa Ngai. Rĩngĩ narĩo, Jehova no age gũcokia mahoya maitũ na njĩra ĩrĩa tũrerĩgagĩrĩra. Maũndũ ta macio no matume tũkorũo na nganja. Tũngĩaga kwĩrutanĩria nĩgetha nganja icio ithire, ũndũ ũcio no ũtũme wĩtĩkio witũ wage hinya na ũthũkie ũrata witũ hamwe na Jehova. (Jak. 1:7, 8) Ũndũ ũcio no ũtũme tũũrũo nginya nĩ kĩĩrĩgĩrĩro gitũ kĩa mahinda marĩa maroka. Mũtũmwo Paulo aaringithanirie kĩĩrĩgĩrĩro gitũ kĩa mahinda marĩa maroka na nanga. (Ahib. 6:19) Nanga nĩ ĩteithagĩrĩria meri rĩrĩa kwagĩa na kĩhuhũkanio, na nĩ ĩmĩgiragĩrĩria ndĩgathiĩ kũrĩa kũrĩ na mahiga. No nanga ĩngĩhota gũteithia na njĩra ta ĩyo angĩkorũo nyororo ĩrĩa ĩmĩnyitithanĩtie na meri nĩ nũmu. O ta ũrĩa nyororo ĩngĩgĩa na gutu ĩngĩtuĩka na njĩra hũthũ, no taguo gũkorũo na nganja kũngĩtũma wĩtĩkio witũ wage hinya. Mũndũ ũrĩ na nganja na maũndũ marĩa etĩkĩtie angĩcemania na ũkararia, no orũo nĩ wĩtĩkio wake wĩgiĩ ciĩranĩro iria Jehova eranĩire. Tũngĩũrũo nĩ wĩtĩkio witũ, o na kĩĩrĩgĩrĩro gitũ nĩ gĩthiraga. Nĩ hinya mũno harĩ mũndũ ta ũcio gũkorũo na gĩkeno. w21.02 30 ¶14-15

No kũhoteke Iburahimu aarĩ na makĩria ma mĩaka 70 rĩrĩa we na famĩlĩ yake mooimire Uru. (Kĩam. 11:31–12:4) Aatũũrire hema-inĩ kĩndũ mĩaka igana rĩmwe, agĩthamaga kuuma handũ hamwe nginya harĩa hangĩ bũrũri-inĩ wa Kanaani. Iburahimu aakuire arĩ na ũkũrũ wa mĩaka 175. (Kĩam. 25:7) No ndoonire Jehova akĩhingia kĩĩranĩro kĩrĩa aamwĩrĩire gĩa kũhe njiarũa ciake bũrũri ũrĩa aaikaraga. Ningĩ aakuire atonete itũũra, kana Ũthamaki wa Ngai ũkĩhandwo. O na kũrĩ ũguo, Bibilia yugaga atĩ aakuire “arĩ mũkũrũ na akaiganĩra.” (Kĩam. 25:8) O na acemanĩtie na moritũ macio mothe, Iburahimu nĩ aatũũririe wĩtĩkio mũrũmu, na nĩ eehaarĩirie gweterera Jehova. Nĩ kĩĩ kĩamũteithirie gũkirĩrĩria? Tondũ ũtũũro-inĩ wake wothe Jehova nĩ aamũgitĩire, na aamuonaga arĩ mũrata wake. (Kĩam. 15:1; Isa. 41:8; Jak. 2:22) O ta Iburahimu, nĩ twetagĩrĩra itũũra rĩrĩa rĩrĩ na mĩthingi ya ma. (Ahib. 11:10) O na kũrĩ ũguo, ithuĩ tũtireterera itũũra rĩu rĩakwo. Ũthamaki wa Ngai nĩ wahandirũo mwaka wa 1914, na ũkoretwo ũgĩtongoria maũndũ mothe kũrĩa igũrũ. (Kũg. 12:7-10) No nĩ twetereire rĩrĩa ũgooka gwathana thĩinĩ wa thĩ yothe. w20.08 4 ¶11-12

Nĩguo tũthikagĩrĩrie andũ arĩa angĩ na kinyi, nĩ tũrabatara gũkoragwo tũrĩ enyihia na tũrĩ na wetereri. Harĩ na itũmi ithatũ cia gũtũma twĩke ũguo. Wa mbere, gwĩka ũguo nĩ kũrĩtũteithagia tũtikahiũhe gũtuĩra andũ. Wa kerĩ, nĩ tũrĩhotaga kũmenya ũrĩa mũrũ kana mwarĩ wa Ithe witũ araigua, tũkamenya mĩoroto yake, na ũndũ ũcio ũgatũteithia kũmũcaĩra. Na wa gatatũ, rĩrĩa twareka mũrũ kana mwarĩ wa Ithe witũ eyarie, no tũmũteithie kwĩmenya. Rĩmwe na rĩmwe mũndũ no age gũtaũkĩrũo wega nĩ ũrĩa araigua, nginya rĩrĩa arĩtaarĩria mũndũ ũngĩ maũndũ marĩa maramũthĩnia. Aarĩ na ariũ a Ithe witũ amwe nĩ maiguaga hinya kuuga ũrĩa maraigua nĩ ũndũ wa mũrerere, ũndũire, na ũmũndũ wao. No moe ihinda mangĩgetĩkĩra gũtwĩra ũrĩa maraigua, no rĩrĩa meka ũguo nĩ matũteithagia kũmenya wega ũrĩa maraigua. Tũngĩĩgerekania na Jehova na njĩra ya gũkorũo na wetereri, mũthia-inĩ nĩ megũtwĩhoka na matwĩre ũrĩa maraigua. Na rĩrĩa metĩkĩra kwaria na ithuĩ, nĩ twagĩrĩirũo gũthikĩrĩria na kinyi. w20.04 15-16 ¶6-7

Kaingĩ thamaki cikaraga harĩa harĩ na maĩ maciagĩrĩire na irio cia kũigana. Hihi ategi a thamaki mategaga ihinda o rĩothe rĩrĩa menda? Mishonarĩ ũmwe watũmĩtwo gĩcigĩrĩra-inĩ gĩa Pacific nĩ eerutire atĩ thamaki ititegagwo hĩndĩ o yothe. Hĩndĩ ĩmwe, mũrũ wa Ithe witũ ũmwe wa kũu nĩ aamwĩrire mathiĩ magatege thamaki. Mishonarĩ ũcio akĩmwĩra, “Reke tũkonana rũciũ thaa ithatũ rũcinĩ.” Mũrũ wa Ithe witũ ũcio aamwĩrire ũũ: “Tũtingĩthiĩ thaa icio. Tũtithiaga ihinda rĩrĩa tũrenda, no tũthiaga ihinda rĩrĩa tũngĩnyita thamaki.” Na njĩra o ta ĩyo, arĩa maatuĩkire ategi a andũ hĩndĩ ya karine ya mbere maathiaga kũrĩa andũ maroneka, na ihinda rĩrĩa mangĩoneka. Kwa ngerekano, arũmĩrĩri a Jesu maahunjagia hekarũ-inĩ, thunagogi-inĩ, nyũmba kwa nyũmba, na thoko-inĩ. (Atũm. 5:42; 17:17; 18:4) O na ithuĩ nĩ tũrabatara kũmenya wega kũrĩa tũngĩona andũ, na ihinda rĩrĩa tũngĩmona gĩcigo-inĩ gitũ. Nĩ tũrabatara kũgarũrĩra maũndũ maitũ nĩguo tũthiĩ kũrĩa tũngĩkora andũ na ihinda rĩrĩa marĩ kuo.—1 Kor. 9:19-23. w20.09 4 ¶8-9

Njĩra ĩmwe tũngĩthondeka ũrata witũ hamwe na Jesu nĩ kũnyita mbaru mĩbango ya kĩũngano gĩa Gĩkristiano. Nĩ twĩkĩraga hinya ũrata witũ hamwe na Jesu arĩ we mũtwe wa kĩũngano rĩrĩa twanyitanĩra na arĩa mamũrĩtwo nĩguo matũtongorie. (Ef. 4:16) Kwa ngerekano, thikũ ici nĩ tũrerutanĩria gũtigĩrĩra atĩ Nyũmba cia Ũthamaki ciothe nĩ irahũthĩka wega biũ. Nĩ ũndũ ũcio, ciũngano imwe nĩ ituranĩirũo na ingĩ. Mũbango ũcio nĩ ũtũmĩte mĩhothi ĩhũthĩke wega. O na kũrĩ ũguo, ũndũ ũcio nĩ ũtũmĩte ahunjia amwe mabatare kũgarũrĩra maũndũ mao. Ahunjia amwe nĩ matungatĩte ciũngano-inĩ imwe kwa ihinda rĩa mĩaka mĩingĩ na kwoguo makagĩa ũrata wa hakuhĩ hamwe na aarĩ na ariũ a Ithe witũ a ciũngano icio. No rĩu nĩ marorio mathamĩre ciũngano ingĩ. Na githĩ to mũhaka akorũo Jesu nĩ akenaga mũno kuona arutwo acio ehokeku makĩnyitanĩra na mũbango ũcio! w20.04 24 ¶14

Mũthamaki wa mwena wa rũgongo na mũthamaki wa mwena wa mũhuro no mathiaga na mbere kũgucania, o ũmwe wao akĩenda gũkorũo arĩ mũnene gũkĩra ũrĩa ũngĩ. Kwa ngerekano, ta wĩcirie ũrĩa gwathiire thutha wa Mbaara ya Kerĩ ya Thĩ, rĩrĩa Soviet Union yaambĩrĩirie gũkorũo na ũgucania mũnene igũrũ rĩa gĩcunjĩ kĩnene kĩa Rũraya. Ũndũ ũcio nĩguo watũmire mũthamaki wa mwena wa mũhuro na mabũrũri marĩa maamũnyitaga mbaru maturanĩre njeshi ciao magĩthondeka ngwatanĩro ĩrĩa ĩtagwo NATO. Mũthamaki wa mwena wa rũgongo na mũthamaki wa mwena wa mũhuro no mathiaga na mbere gũthondeka matharaita ma goro o ũmwe wao akĩgeria gũkorũo na njeshi ĩrĩ na hinya gũkĩra ya ũrĩa ũngĩ. Ningĩ nĩ makoretwo makĩgucania na njĩra ya o ũmwe wao kũnyita mbaru thũ cia ũcio ũngĩ mbaara-inĩ thĩinĩ wa Afrika, Asia, na Latin America. Mĩaka-inĩ ya ica ikuhĩ, Russia na mabũrũri marĩa mamĩnyitaga mbaru nĩ makoretwo na ũgucania mũnene kũndũ kũingĩ thĩinĩ wa thĩ. Ningĩ nĩ makoretwo magĩũkanĩrĩra na mũthamaki wa mwena wa mũhuro makĩhũthĩra kompiuta. O ũmwe wa athamaki acio nĩ akoretwo akĩmenereria ũcio ũngĩ nĩ ũndũ wa kũhũthĩra programu cia kompiuta kũingĩrĩra maũndũ make ma gĩũteti na ma kĩĩmbeca. Na o ta ũrĩa Danieli aarathĩte, mũthamaki wa mwena wa rũgongo no arathiĩ na mbere gũtharĩkĩra andũ a Ngai.—Dan. 11:41. w20.05 13 ¶5-6

“Hihi mũtumia no ariganĩrũo nĩ kaana karĩa arongithia?” Jehova ooririe kĩũria kĩu matukũ-inĩ ma mũnabii Isaia. Ngai eerire andũ ake ũũ: “O na atumia acio mangĩriganĩrũo, niĩ ndirĩ hĩndĩ ingĩriganĩrũo nĩwe.” (Isa. 49:15) Ti kaingĩ Jehova eringithanagia na mũtumia ũrĩ na kaana. No nĩ eekire ũguo hĩndĩ ĩyo. Jehova aaringithanirie wendo mũnene ũrĩa ũkoragwo gatagatĩ ka nyina na kaana gake akĩonania wendo ũrĩa akoragwo naguo kwerekera ndungata ciake. Atumia aingĩ no metĩkanie na ciugo cia mwarĩ wa Ithe witũ ũmwe wĩtagwo Jasmin. Ooigire ũũ: “Rĩrĩa ũrongithia kaana gaku, nĩ mũkũragia wendo mũnene gatagatĩ-inĩ kanyu, na wendo ũcio nĩ ũtũũraga mĩaka mĩingĩ.” Jehova nĩ amenyaga rĩrĩa ndungata yake ĩmwe yatiga kũnyitanĩra na kĩũngano gĩa Gĩkristiano na wĩra-inĩ wa kũhunjia. Aarĩ na ariũ a Ithe witũ aingĩ arĩa matigĩte kũnyitanĩra na kĩũngano nĩ macokaga makambĩrĩria kũnyitanĩra na kĩũngano rĩngĩ, na nĩ tũmanyitaga ũgeni tũkenete. Jehova nĩ endaga mũno macoke, na nginya o na ithuĩ.—1 Pet. 2:25. w20.06 18 ¶1-3

Ti iheo ciothe cionekaga na maitho. Ũrĩa kũrĩ nĩ atĩ, iheo iria cia bata mũno itionekaga na maitho. Thĩinĩ wa Mahunjio ma Jesu ma Kĩrĩma-inĩ nĩ aagwetire atĩ mĩthithũ ya kũrĩa igũrũ nĩ ya bata mũno gũkĩra ũtonga. Aacokire akiuga ũũ: “Harĩa mũthithũ waku ũrĩ, hau nĩho ngoro yaku o nayo ĩrĩkoragwo.” (Mat. 6:19-21) Ngoro citũ itũtindĩkaga gũthingata maũndũ marĩa tuonaga marĩ ma bata. Twĩigagĩra “mĩthithũ kũrĩa igũrũ” na njĩra ya kwĩgĩĩra rĩĩtwa rĩega kana mũrũgamo mwega hamwe na Ngai. Jesu aataarĩirie atĩ mĩthithũ ta ĩyo ndĩngĩanangwo kana ĩiywo. Mũtũmwo Paulo atwĩkĩraga ngoro ‘tũige maitho maitũ harĩ maũndũ marĩa matonekaga.’ (2 Kor. 4:17, 18) Maũndũ macio matonekaga na maitho nĩ hamwe na irathimo iria tũgakenera thĩinĩ wa thĩ njerũ ya Ngai. Hihi nĩ tuonanagia ngatho citũ nĩ ũndũ wa iheo icio itonekaga na maitho? w20.05 26 ¶1-2

Maũndũ marĩa Musa aarutire Aisiraeli nĩ maamekĩrire hinya na makĩmacanjamũra o ta mbura ĩroirĩra mĩmera. Tũngĩka atĩa nĩguo ũrutani witũ ũhaane ũguo? Hĩndĩ ĩrĩa tũrahunjia nyũmba kwa nyũmba kana kũndũ kwa mũingĩ, no tũhũthĩre Bibilia gũteithia andũ kũmenya atĩ Ngai etagwo Jehova. No tũmahe mabuku maitũ, tũmonie video citũ, na tũmonie maũndũ marĩa makoragwo thĩinĩ wa website itũ tondũ nĩ magoocithagia Jehova. Ningĩ no twethe mĩeke ya kwĩra andũ ũhoro wĩgiĩ Jehova na ũrĩa atariĩ twĩ wĩra-inĩ, cukuru, na rĩrĩa twĩ thabarĩ-inĩ. Rĩrĩa tũrera andũ arĩa twacemania nao ũrĩa Jehova arĩ muoroto mwega harĩ andũ na harĩ thĩ, tũkoragwo tũkĩmateithia kũmenya Jehova na njĩra amwe ao matarĩ meciria. Rĩrĩa tũrera andũ ũhoro wa ma wĩgiĩ Jehova Ithe witũ ũtwendete, tũkoragwo tũgĩteithĩrĩria harĩ gũtheria rĩĩtwa rĩake. Nĩ tũteithagia andũ kũmenya atĩ maũndũ mamwe marutĩtwo megiĩ Ngai nĩ ma maheeni. Maũndũ marĩa tũrutaga andũ nĩ mamekĩraga hinya na makamacanjamũra.—Isa. 65:13, 14. w20.06 10 ¶8-9

Nĩ ngumo irĩkũ arĩ o mũhaka tũkorũo nacio nĩguo tũhote gũteithia andũ arĩa marenda gũcokerera Jehova? Rekei tuone maũndũ marĩa tũngĩĩruta kuumana na ngerekano ya Jesu ya mwanake ũrĩa worire mũciĩ. (Luk. 15:17-24) Mwanake ũcio nĩ oonire atĩ nĩ aahĩtĩtie na agĩtua itua rĩa gũcoka mũciĩ. Ithe aatengʼerire gũthiĩ gũtũnga mũrũwe na akĩmũhĩmbĩria, kũmuonia atĩ nĩ aamwendete. Mwanake ũcio nĩ aathumbũragwo nĩ thamiri na oonaga atagĩrĩire gwĩtwo mũriũ wake. Mũriũ ũcio nĩ aaitũrũrĩire ithe maũndũ marĩa maarĩ ngoro-inĩ yake, na ithe akĩmũcaĩra. Ithe agĩcoka agĩka ũndũ watũmire mũriũ ũcio one atĩ nĩ aanyitĩtwo ũgeni mũciĩ arĩ ũmwe wa famĩlĩ ĩyo. Nĩguo ithe onanie atĩ nĩ eendete mũriũ na nĩ aamwamũkĩrĩte nĩ aahaarĩirie iruga na akĩhe mũriũ ũcio werirĩte nguo njega. Jehova atariĩ ta mũthuri ũcio ũgwetetwo ngerekano-inĩ ĩyo. Nĩ endete aarĩ na ariũ a Ithe witũ arĩa matigĩte kũnyitanĩra na kĩũngano na nĩ endaga mamũcokerere. Tũngĩĩgerekania na Jehova no tũmateithie mamũcokerere. Ũndũ ũcio nĩ ũbataraga tũkorũo na wetereri, ũcayanĩri, na wendo. w20.06 25-26 ¶8-9

Jesu ooigire atĩ nĩ kũrĩ andũ mangĩkamũkĩra ũhoro wa ma ‘makenete,’ no wĩtĩkio wao nĩ ũngĩagire hinya macemania na magerio. (Mat. 13:3-6, 20, 21) No gũkorũo hihi matiataũkĩirũo atĩ kũrũmĩrĩra Jesu nĩ kũngĩgaakorũo na moritũ. (Mat. 16:24) Ningĩ no gũkorũo meeciragia atĩ matuĩka Akristiano, ũtũũro wao ndũrĩkoragwo na moritũ no ũrĩkoragwo na irathimo theri. No thĩinĩ wa thĩ ĩno no mũhaka tũgacemania na moritũ. Maũndũ no macenjie, na ũndũ ũcio no ũtũme twage gĩkeno kwa ihinda. (Thab. 6:6; Koh. 9:11) Aarĩ na ariũ a Ithe witũ aingĩ, nĩ monanagia atĩ marĩ na ma biũ atĩ maũndũ marĩa metĩkĩtie nĩ ma ma. Na njĩra ĩrĩkũ? Wĩtĩkio wao ndwenyenyaga o na Mũkristiano ũngĩ angĩmatuurithia kana aingĩre mehia-inĩ maritũ. (Thab. 119:165) Hĩndĩ ciothe magerera moritũ, wĩtĩkio wao ũgĩaga na hinya makĩria handũ ha kũnyiha. (Jak. 1:2-4) Nĩ twagĩrĩirũo gũkorũo na wĩtĩkio ta ũcio ũrĩ na hinya. w20.07 8 ¶1; 9 ¶4-5

Ũtanambĩrĩria gũthoma Bibilia, hoya Jehova agũteithie kuona ũrĩa ũngĩgunĩka kuumana na maũndũ marĩa ũgũthoma. Kwa ngerekano, angĩkorũo ũretha ũtaaro ũngĩgũteithia kũhiũrania na thĩna mũna, hoya Jehova agũteithie kuona motaaro Kiugo-inĩ gĩake marĩa mangĩgũteithia gũtua matua mega. (Afil. 4:6, 7) Jehova nĩ atũheete ũhoti wa magegania wa kũhũũra mbica meciria-inĩ. Nĩguo ũtaũkĩrũo nĩ ũhoro mũna thĩinĩ wa Bibilia, geria kũhũũra mbica ũrĩa kũngĩkorũo kwahaanaga, na ũgerie kwĩĩkĩra iratũ-inĩ cia mũndũ ũrĩa ũgwetetwo ũhoro-inĩ ũcio. Geria kuona indo iria angĩkorũo oonaga, na ũgerie kũigua ngoro-inĩ yaku ũrĩa angĩkorũo aaiguaga. Ningĩ wĩcũranagie. Gwĩcũrania nĩ gwĩciria na kinyi igũrũ rĩgiĩ maũndũ marĩa ũrathoma na gwĩciria ũrĩa ũhoro ũcio ũrakũhutia wee mwene. Nĩ gũteithagia mũndũ kũnyitithania maũndũ matiganĩte marĩa arathoma na gũtaũkĩrũo wega nĩ ũhoro ũrĩa arathoma. Mũndũ angĩthoma Bibilia na age gwĩcũrania, angĩkorũo ahaana ta bundi wa nguo ũtinangĩtie itambaya cia gũtuma nguo no ndacinyitithanĩtie. Gwĩcũrania nĩ gũtũteithagia kũhũũra mbica ĩrĩ yothe. w21.03 15 ¶3-5

Mũtũmwo Paulo nĩ aangĩambĩrĩirie kwĩrira nĩ ũndũ wa matua marĩa aatuĩte, eĩre atĩ korũo ndaatuĩkĩte Mũkristiano ndangĩanyitirũo. Nĩ angĩarakarire nĩ ũndũ wa andũ a gĩcigo kĩa Asia arĩa maamũtiganĩirie, na ambĩrĩrie gũkũria mawoni matagĩrĩire megiĩ arata acio angĩ ake. No ũguo tiguo Paulo eekire. O na Paulo akĩmenyaga atĩ nĩ egũkua, ndariganĩirũo atĩ ũndũ ũrĩa warĩ wa bata nĩ kũgoocithia Jehova. Aathiire na mbere gwĩciria ũrĩa angĩekĩrire andũ arĩa angĩ ngoro. Nĩ eehokaga Jehova na njĩra ya kũmũhoya kaingĩ. Handũ ha gwĩciria mũno ũhoro wĩgiĩ ariũ a Ithe witũ arĩa maamũtiganĩirie, nĩ aacokagia ngatho nĩ ũndũ wa arata ake ehokeku arĩa maathiaga na mbere kũmũteithĩrĩria. Makĩria ma ũguo, Paulo no aathiire na mbere kwĩruta Kiugo kĩa Ngai. (2 Tim. 3:16, 17; 4:13) Na ũndũ wa bata makĩria, aarĩ na ma biũ atĩ Jehova na Jesu nĩ maamwendete. w21.03 18 ¶17-18

Ihinda rĩna thutha wa mwaka wa 100 M.M., Akristiano a maheeni nĩ maathiire na mbere kũingĩha thĩinĩ wa kĩũngano gĩa Gĩkristiano, na makĩambĩrĩria kũrutana morutani ma maheeni marĩa maahithanagia ũhoro wa ma ũrĩa ũrĩ Kiugo-inĩ kĩa Ngai. Kuuma hĩndĩ ĩyo nginya mũthia-inĩ wa karine ya 19, gũtiarĩ na gĩkundi kĩbangĩtwo wega kĩa ndungata cia Ngai gũkũ thĩ. Akristiano a maheeni nĩ maaingĩhire o ta itindiĩ na magĩtũma ũkorũo ũrĩ ũndũ mũritũ kũmenya Akristiano a ma. (Mat. 13:36-43) Kũmenya ũndũ ũcio nĩ kwa bata nĩkĩ? Ũndũ ũcio ũronania atĩ, ũhoro ũrĩa ũrĩ thĩinĩ wa ibuku rĩa Danieli mũrango wa 11 wĩgiĩ mũthamaki wa mwena wa rũgongo na wa mũthamaki wa mwena wa mũhuro, ndũngĩhũthĩka harĩ athamaki kana thirikari iria ciarĩ na ũnene kuuma kĩndũ mwaka wa 100 nginya kĩndũ mwaka wa 1870. Ihinda-inĩ rĩu, gũtiarĩ na gĩkundi kĩbangĩtwo wega kĩa andũ a Ngai kĩrĩa kĩngĩatharĩkĩirũo. No kuuma kĩndũ mwaka wa 1870 nĩ kũngĩakorirũo na mũthamaki wa mwena wa rũgongo na mũthamaki wa mwena wa mũhuro. w20.05 3 ¶5

Joeli aarathĩte atĩ ngigĩ nĩ ingĩgaatharĩkĩra bũrũri wa Isiraeli na atĩ ingĩgaatharĩkĩra mĩmera yothe bũrũri-inĩ wa Isiraeli! (Joel 1:4) Kwa ihinda rĩa mĩaka mĩingĩ, tũkoretwo tũtaũkĩirũo atĩ ũrathi ũcio wonanagia ũrĩa ndungata cia Jehova ingĩkaaruta wĩra wa kũhunjia itegũtiga, o ta ngigĩ icio itangĩgirĩrĩrio. Tũkoretwo tũtaũkĩirũo atĩ wĩra ũcio wa kũhunjia nĩ ũngĩkaahutia “bũrũri” ũcio na njĩra nene, na ũguo nĩ kuuga andũ arĩa matongoragio nĩ atongoria a ndini. O na kũrĩ ũguo, tũngĩthuthuria ũrathi ũcio ũrĩ wothe, nĩ tũkuona atĩ ũtaũku mwerũ nĩ ũrabatarania. Ta rora wone ũrĩa Jehova eeranĩire ũhoro-inĩ wĩgiĩ tharĩkĩro ĩyo ya ngigĩ: “Nĩ ngaaingata mũndũ wa mwena wa rũgongo [ngigĩ icio] athiĩ kũraihu mũno na inyuĩ.” (Joel 2:20) Korũo ngigĩ icio irarũgamĩrĩra Aira a Jehova arĩa mathĩkagĩra watho wa Jesu wa kũhunjia na gũtua andũ arutwo-rĩ, Jehova angĩkĩmaingata nĩkĩ? (Ezek. 33:7-9; Mat. 28:19, 20) Ũndũ ũcio ũronania atĩ Jehova ti ndungata ciake njĩhokeku angĩkaingata, no nĩ kĩndũ kana mũndũ ũrahinyĩrĩria andũ ake. w20.04 3 ¶3-5

Twagĩrĩirũo gwĩka atĩa tũngĩona ta Jehova ataracokia mahoya maitũ na ihenya? Jakubu oigĩte atĩ twagĩrĩirũo ‘gũthiĩ na mbere kũhoya’ Ngai. Jehova ndangĩrakara tũngĩthiĩ na mbere kũmũhoya atũhe ũũgĩ. Ningĩ ndangĩtũkũũma. Tũngĩhoya Ithe witũ wa igũrũ atũhe ũũgĩ nĩguo tũhote gũkirĩrĩria magerio, no atũhe ũũgĩ ũcio “arĩ na ũtaana.” (Thab. 25:12, 13) Nĩ onaga magerio marĩa tũragerera, agatũcaĩra, na nĩ eriragĩria mũno gũtũteithia. Hatarĩ nganja, ũndũ ũcio nĩ ũtũmaga tũkorũo na gĩkeno! No rĩrĩ, Jehova atũheaga ũũgĩ na njĩra ĩrĩkũ? Atũheaga ũũgĩ kũgerera Kiugo gĩake. (Thim. 2:6) Nĩguo tũgĩe na ũũgĩ ũcio, nĩ twagĩrĩirũo gũthomaga Kiugo kĩa Ngai o hamwe na mabuku maitũ. No gũthoma kuo gwiki ti kũiganu. Nĩ twagĩrĩirũo kũhũthĩra ũũgĩ wa Ngai ũtũũro-inĩ witũ na njĩra ya kũhũthĩra ũtaaro wake. Jakubu aandĩkire ũũ: “Tuĩkai a kũhingagia kiugo no to kũigua tu.” (Jak. 1:22) Rĩrĩa twahũthĩra ũtaaro wa Ngai, nĩ tũhotaga gũkorũo na thayũ na andũ arĩa angĩ, tũgakorũo na ũigananĩru, na tũkamaiguĩra tha. (Jak. 3:17) Ngumo icio nĩ irĩtũteithagia gũkirĩrĩria magerio o mothe tũtekũũrũo nĩ gĩkeno. w21.02 29 ¶10-11

Mũrutwo wa Bibilia no akũre kĩĩroho na ihenya nginya akinyĩrĩre kũbatithio, angĩteithĩrĩrio nĩ andũ arĩa angĩ kĩũngano-inĩ. Ahunjia othe kĩũngano-inĩ no mateithĩrĩrie arutwo a Bibilia gũkũra kĩĩroho. Mwarĩ wa Ithe witũ ũmwe painia ooigire ũũ: “Kwĩragwo mwana areragwo nĩ itũũra rĩothe. Ũguo noguo gũthiaga harĩ gũtua andũ arutwo. Kĩũngano gĩothe nĩ kĩnyitanagĩra harĩ gũteithia mũndũ gũka ũhoro-inĩ wa ma.” Andũ a famĩlĩ, arata, na arutani, othe nĩ manyitaga itemi harĩ gũteithĩrĩria mwana nĩguo akũre. Mekaga ũguo na njĩra ya gwĩkĩra mwana ũcio ngoro na kũmũruta maũndũ ma bata. Na njĩra o ta ĩyo, ahunjia no mahe arutwo a Bibilia ũtaaro, mamekĩre ngoro, na mamaigĩre kĩonereria kĩega, na ũndũ ũcio ũmateithie makinyĩrĩre kũbatithio. (Thim. 15:22) Mũhunjia ũrĩ na mũrutwo wa Bibilia agĩrĩirũo gũkena nĩkĩ hĩndĩ ĩrĩa ahunjia arĩa angĩ marateithĩrĩria mũrutwo ũcio? Nĩ tondũ no mateithĩrĩrie mũrutwo ũcio gũkũra kĩĩroho. w21.03 8 ¶1-3

Akristiano othe, ethĩ na akũrũ, nĩ marabatara kwĩmenyerera kwaga gwĩtua atĩ nĩ Jehova maratungatĩra na o hĩndĩ o ĩyo nĩ mareka maũndũ matagĩrĩire. Mũtũmwo Johana ooigire atĩ tũtingĩkorũo tũkĩrũmĩrĩra ũhoro ũrĩa wa ma na o hĩndĩ ĩyo tũrĩ na mĩthiĩre ĩtarĩ mĩega. (1 Joh. 1:6) Angĩkorũo nĩ tũrenda gwĩtĩkĩrĩka nĩ Jehova mahinda-inĩ maya na mahinda marĩa maroka, nĩ tũrabatara kũririkanaga atĩ Jehova nĩ onaga maũndũ marĩa mothe twĩkaga. Ũguo nĩ kuuga, o na tũngĩka maũndũ twĩhithĩte nĩguo tũtikonwo nĩ andũ, Jehova nĩ arona. (Ahib. 4:13) Nĩ twagĩrĩirũo gwĩthema muonere wa andũ a thĩ wĩgiĩ mehia. Matukũ-inĩ ma Johana, aregenyũki mooigaga atĩ mũndũ nĩ angĩekire maũndũ marĩa matagĩrĩire na athiĩ na mbere gũkorũo na ũrata hamwe na Ngai. Ũmũthĩ tũratũũra gatagatĩ-inĩ ka andũ marĩ na muonere ta ũcio. Andũ aingĩ moigaga atĩ nĩ metĩkĩtie Ngai no matikoragwo na mawoni ta ma Jehova megiĩ mehia, ta ũhoro-inĩ wĩgiĩ ngomanio. Maũndũ marĩa Jehova onaga marĩ mehia, andũ acio monaga marĩ metĩkĩrĩku, na atĩ mũndũ no athuure kũmeka angĩkorũo no ende. w20.07 21-22 ¶7-8

Hihi nĩ ũtetagĩra aarĩ a Ithe witũ rĩrĩa marabatara gũteterũo? Ta wĩcirie ũndũ ũyũ. Ahunjia amwe kĩũngano-inĩ nĩ makoretwo makĩona atĩ mwarĩ wa Ithe witũ ũmwe ũkoragwo na mũthuri ũtarĩ mwĩtĩkia okaga mĩcemanio acereirũo na mĩcemanio yathira akoima o rĩo. Ningĩ nĩ monaga atĩ kaingĩ ndokaga na ciana ciake. Kwoguo makamũmenereria tondũ mareciria atĩ nĩ agĩrĩire gũtindĩkĩrĩria mũthuri wake nĩguo amwĩtĩkĩrie gũkaga na ciana mĩcemanio-inĩ. No ũrĩa kũrĩ nĩ atĩ, mwarĩ wa Ithe witũ ũcio akoretwo akĩĩrutanĩria ũrĩa wothe angĩhota. Ndangĩhota kumagara o hĩndĩ ĩrĩa yothe angĩenda, na ningĩ ndarĩ na uuge mũnene ũhoro-inĩ wĩgiĩ matua megiĩ ciana ciao. Ũngĩgaathĩrĩria mwarĩ wa Ithe witũ ũcio na ũgwetere andũ arĩa angĩ maũndũ mega marĩa ahingagia, no ũtũme matige kũmũmenereria. Athuri a kĩũngano nĩ mamenyaga atĩ Jehova nĩ endaga aarĩ a Ithe witũ marũmbũiyo na njĩra njega. (Jak. 1:27) Nĩ ũndũ ũcio nĩ megerekanagia na Jesu harĩ kuonania ũigananĩru, na njĩra ya kwaga kũiga mawatho rĩrĩa atarĩ o mũhaka, no handũ ha ũguo makonania ũtugi na ũtaũku. (Mat. 15:22-28) Rĩrĩa athuri merutanĩria gũteithia, nĩ matũmaga aarĩ a Ithe witũ maigue atĩ nĩ mararũmbũiyo. w20.09 24-25 ¶17-19

Mũnabii Danieli hingo ciothe nĩ aacaragia ũtongoria kuuma kũrĩ Jehova arĩ na wĩnyihia. Kwa ngerekano, rĩrĩa Jehova aamũhũthĩrire gũtaũra kĩroto kĩa Nebukadineza, Danieli ndonanirie atĩ ũtaũri ũcio woimanĩte nake. Handũ ha ũguo, arĩ na wĩnyihia eerekeirie ngumo harĩ Jehova. (Dan. 2:26-28) Tũreruta atĩa? Angĩkorũo aarĩ na ariũ a Ithe witũ nĩ marakenio nĩ ũrutani witũ, kana tũgakorũo na moimĩrĩro mega ũtungata-inĩ, twagĩrĩirũo kwerekeria ngumo ciothe kũrĩ Jehova. Nĩ twagĩrĩirũo kũririkana atĩ, tũtingĩhota kũhingia maũndũ macio tũtarĩ na ũteithio wa Jehova. (Afil. 4:13) Ningĩ rĩrĩa tweka ũguo, tũkoragwo tũkĩĩgerekania na kĩonereria kĩega kĩa Jesu. Nĩ eehokaga Jehova. (Joh. 5:19, 30) Ndeciririe o na hanini gũtunya Ithe ũnene. Afilipi 2:6 yonanagia atĩ Jesu “ndeciririe kwĩhurĩria ũnene, atĩ aiganane na Ngai.” Jesu aarĩ mwĩnyihia, nĩ aamenyaga mĩhaka yake, na nĩ aatĩĩte ũnene wa Ithe. w20.08 11 ¶12-13

Andũ amwe arĩa matengʼeraga njĩra-inĩ ya muoyo nĩ macemanagia na mathĩna matangĩonwo nĩ andũ angĩ. Angĩkorũo nĩ ũrĩ na mathĩna ma mwĩrĩ na nĩ ũiguaga ta andũ arĩa angĩ matarataũkĩrũo nĩwe, no wĩkĩrũo hinya nĩ kĩonereria kĩa Mefiboshethu. (2 Sam. 4:4) Nĩ aarĩ na mathĩna ma mwĩrĩ na nĩ aatuĩrĩirũo ũrĩa gũtarĩ nĩ Mũthamaki Daudi. Handũ ha gũtoorio nĩ marakara nĩ ũndũ wa maũndũ macio, we aakenagĩra maũndũ mega marĩa aacemanagia namo. Nĩ aacokagia ngatho nĩ ũndũ wa ũtugi ũrĩa Daudi aamuonetie mbere ĩyo. (2 Sam. 9:6-10) Kwoguo rĩrĩa Daudi aamũtuĩrĩire ũrĩa gũtarĩ, Mefiboshethu ndaarorire o ũndũ ũcio no aarorire maũndũ mothe marĩa maathiũrũrũkĩirie ũndũ ũcio. Ndaarekire mahĩtia ma Daudi matũme akorũo na marũrũ. Na ndaacokereirie Jehova mahĩtia nĩ ũndũ wa ũguo Daudi aamwĩkire. Mefiboshethu aaigire meciria make harĩ ũrĩa angĩka nĩguo anyite mbaru mũthamaki mũitĩrĩrie maguta wa Jehova. (2 Sam. 16:1-4; 19:24-30) Jehova nĩ aandĩkithirie kĩonereria kĩega kĩa Mefiboshethu Kiugo-inĩ gĩake nĩguo twĩrute kuumana nake.—Rom. 15:4. w20.04 26 ¶3; 30 ¶18-19

Andũ amwe thĩinĩ wa kĩũngano no makorũo mamũrĩtwo gũtungata marĩ amishonarĩ, mapainia a mwanya, kana a hĩndĩ ciothe. Nĩ matuĩte itua rĩa kũhunjagia na gũtua andũ arutwo mahinda mothe. O na gũtuĩka ndungata icio cia mahinda mothe itikoragwo na indo nyingĩ cia kĩĩmwĩrĩ, Jehova nĩ acirathimaga na njĩra nyingĩ. (Mar. 10:29, 30) Nĩ twendete aarĩ na ariũ a Ithe witũ acio, na nĩ tũkenaga nĩ ũndũ wao gũkorũo thĩinĩ wa kĩũngano! Hihi ariũ a Ithe witũ arĩa mamũrĩtwo na arĩa marĩ ũtungata-inĩ wa mahinda mothe no o tu makoragwo na itemi rĩa bata kĩũngano-inĩ? Aca! Mũhunjia o wothe wa ũhoro ũrĩa mwega nĩ wa bata harĩ Jehova na thĩinĩ wa kĩũngano. (Rom. 10:15; 1 Kor. 3:6-8) Gĩtũmi nĩ tondũ ũndũ ũrĩa wa bata mũno kĩũngano kĩhingagia nĩ gũtua andũ arutwo a Mwathani witũ Jesu Kristo. (Mat. 28:19, 20; 1 Tim. 2:4) Arĩa othe manyitanagĩra na kĩũngano, makorũo marĩ abatithie kana matarĩ abatithie, nĩ merutanagĩria kũiga mbere wĩra ũcio ũtũũro-inĩ wao.—Mat. 24:14. w20.08 21 ¶7-8

O ta ũrĩa ciugo cia rĩandĩko rĩa ũmũthĩ ironania, rĩrĩa twacemania na moritũ Jesu nĩ arĩtũteithagia. Ciugo icio cia Jesu nĩ itwĩkĩraga hinya. Nĩkĩ? Tondũ rĩmwe na rĩmwe nĩ tũcemanagia na maũndũ maritũ mũno. Kwa ngerekano, rĩrĩa twakuĩrũo nĩ mũndũ wa hakuhĩ na ithuĩ, nĩ tũiguaga kĩeha kĩingĩ, na kĩeha kĩu no gĩikare kwa ihinda rĩa mĩaka mĩingĩ. Kũrĩ angĩ nao mahiũranagia na moritũ marĩa moimanaga na ũkũrũ. Angĩ nao kũrĩ hĩndĩ maiguaga marĩ thĩ mũno nĩ ũndũ wa gũthuthĩka ngoro. O na kũrĩ ũguo, no tũiguaga tũrĩ na hinya wa gũthiĩ na mbere, tondũ wa kũmenya atĩ Jesu arĩ hamwe na ithuĩ “mĩthenya yothe,” o na rĩrĩa maũndũ marĩ maritũ mũno. (Mat. 11:28-30) Kiugo kĩa Ngai nĩ gĩtũheaga ũũma atĩ Jehova nĩ atũteithagia kũgerera harĩ araika ake. (Ahib. 1:7, 14) Kwa ngerekano, araika nĩ matũteithagia na magatũtongoria rĩrĩa tũrahunjia ‘ũhoro mwega wa Ũthamaki’ kũrĩ “ndũrĩrĩ ciothe na mĩhĩrĩga na thiomi.”—Mat. 24:13, 14; Kũg. 14:6. w20.11 13-14 ¶6-7

Nĩ twagĩrĩirũo gũteithia mũrutwo witũ ataũkĩrũo atĩ maũndũ marĩa areruta moimĩte Kiugo-inĩ kĩa Ngai kĩrĩa gĩtongoretio nĩ roho. (1 Thes. 2:13) Tũngĩka ũguo atĩa? Ĩkĩra mũrutwo waku ngoro kwĩraga andũ arĩa angĩ maũndũ marĩa areruta. Handũ ha gũtaaragĩria mũrutwo maandĩko ma Bibilia hingo ciothe, mwĩrage o nake agagũtaarĩria mamwe. Mũteithie one ũrĩa maũndũ marĩa areruta Kiugo-inĩ kĩa Ngai maramũhutia we mwene. Mũragie ciũria igũtũma eyarie, ciĩgiĩ ũrĩa areciria igũrũ rĩgiĩ maandĩko marĩa arathoma. (Luk. 10:25-28) Kwa ngerekano, no ũmũũrie ũũ: “Rĩandĩko rĩrĩ rĩagũteithia kuona ngumo ĩrĩkũ ya Jehova?” “Ũhoro ũyũ twathoma ũngĩgũteithia atĩa?” “Mawoni maku nĩ marĩkũ megiĩ ũndũ ũyũ tweruta?” Ũndũ ũrĩa wa bata makĩria ti maũndũ marĩa mũrutwo oĩ, no nĩ kana nĩ endete na akahũthĩra maũndũ marĩa oĩ. Hũthagĩra Bibilia kũrutana. Nĩ ũrabatara wĩnyihia nĩguo ũhote kwagagĩria ũhoti waku wa kũrutana. w20.10 15 ¶5-6

Tũrĩ na ma atĩ, wĩra wa kũhunjia ndũmĩrĩri ya Ũthamaki ũgaathira ihinda rĩrĩa rĩagĩrĩire. Ta wĩcirie ũrĩa gwathiire matukũ-inĩ ma Nuhu. Hingo ĩyo, Jehova nĩ oonanirie atĩ ekaga maũndũ ihinda rĩrĩa rĩagĩrĩire. Mĩaka ta 120 mbere ĩyo, Jehova nĩ aatuĩte mũthenya ũrĩa Mũiyũro ũkaambĩrĩria. Mĩaka mĩingĩ thutha ũcio Jehova akĩra Nuhu ake thabina. Nuhu nĩ aathiire na mbere kũruta wĩra ũcio na kĩyo kwa ihinda rĩa mĩaka 40 kana 50 mbere ya Mũiyũro kwambĩrĩria. Nuhu aathiire na mbere kũhe andũ mũkaana o na gũtuĩka matiathikagĩrĩria nginya rĩrĩa Jehova aamwĩrire maingĩre thabina. Ihinda rĩrĩa rĩaagĩrĩire rĩakinya, “Jehova akĩhinga mũrango.” (Kĩam. 6:3; 7:1, 2, 16) Ica ikuhĩ Jehova nĩ arĩrũgamia wĩra wa kũhunjia ũhoro wa Ũthamaki, na ‘ahinge mũrango’ wa mũtabarĩre ũyũ wa Shaitani arehe thĩ njerũ ĩrĩ na ũthingu. Kamũira hĩndĩ ĩyo ĩkinye, rekei tũthiĩ na mbere kwĩgerekania na Nuhu na andũ angĩ arĩa matarareka guoko kwao kũhurũke. Rekei tũthiĩ na mbere kũiga wĩra wa kũhunjia mbere, tũkoragwo na wetereri, na tũtũũrie wĩtĩkio mũrũmu harĩ Jehova na ciĩranĩro ciake. w20.09 13 ¶18-19

Korũo gũtikoragwo na mũbango mwega wa ũtongoria, andũ a Jehova mangĩkoragwo matarĩ na mĩbango na matarĩ na gĩkeno. Kwa ngerekano, andũ a Jehova matingĩmenyaga nũũ wagĩrĩirũo gũtua matua na nũũ wagĩrĩirũo kuonereria arĩa angĩ ũrĩa mangĩrũmĩrĩra matua macio. Angĩkorũo mũbango ũcio wa Ngai wa mũthuri akorũo arĩ we mũtwe wa famĩlĩ nĩ mwega-rĩ, nĩ kĩĩ gĩtũmaga atumia aingĩ maigue mahinyĩrĩirio nĩguo? Nĩ tondũ athuri aingĩ matirũmagĩrĩra ũtongoria wa Jehova wĩgiĩ famĩlĩ, no handũ ha ũguo marũmagĩrĩra ũndũire wa kwao. Ningĩ amwe nĩ mekaga atumia ao maũndũ moru nĩ ũndũ wa mwĩyendo. Kwa ngerekano, mũthuri no ahinyĩrĩrie mũtumia wake nĩguo eyonanie atĩ nĩ mũndũ wa bata kana onie andũ arĩa angĩ atĩ we nĩ mũndũrũme. No eĩre atĩ ndangĩhota gũtũma mũtumia wake amwende kĩa hinya no no eke ũndũ ũngĩtũma amwĩtigĩre. Mũtumia agĩa guoya na njĩra ĩyo, mũthuri ũcio no ahũthĩre ũndũ ũcio kũgariũra mũtumia wake ũrĩa arenda. Mwĩcirĩrie ta ũcio nĩ ũtũmaga atumia mage kũheo gĩtĩo kĩrĩa kĩmagĩrĩire, na ũndũ ũcio nĩ mũgarũ mũno na ũrĩa Jehova endaga.—Ef. 5:25, 28. w21.02 3 ¶6-7

Akristiano arĩa maracemania na ũndũ ũratũma matangĩke no mahoe Jehova amateithie. Jehova no acokie mahoya maku na njĩra ya gũkũhe “thayũ wa Ngai ũrĩa ũkĩrĩte ũtaũku wothe” wa andũ. (Afil. 4:6, 7) Jehova nĩ atũheaga thayũ ũcio kũgerera roho wake mũtheru ũrĩa ũrĩ hinya. (Gal. 5:22) Rĩrĩa ũrahoya Jehova, mũhingũrĩre ngoro yaku. Mwĩre maũndũ ĩmwe kwa ĩmwe. Mwĩre ũndũ ũrĩa ũragerera na ũmwĩre ũrĩa ũraigua. Mũhoe akũhe ũũgĩ wa kũhiũrania na ũndũ ũcio na akũhe hinya wa gwĩka ũguo. Angĩkorũo hatirĩ ũndũ ũngĩka nĩguo weherie thĩna ũcio, hoya Jehova agũteithie kũnyihanyihia mĩtangĩko. Ũngĩgwetera Jehova maũndũ ĩmwe kwa ĩmwe, thutha wa ihinda nĩ ũhotaga kuona wega ũrĩa Jehova acoketie mahoya maku. Mahoya maku mangĩoya ihinda matacoketio, ndũgakue ngoro. Makĩria ma gũkorũo atĩ Jehova nĩ endaga ũmwĩre maũndũ ĩmwe kwa ĩmwe, nĩ endaga ũmũhoe kaingĩ.—Luk. 11:8-10. w21.01 3 ¶6-7

Thĩinĩ wa kĩũngano, nĩ gũkoragwo na andũ marĩ thĩinĩ wa kĩhiko na marĩ na famĩlĩ. No ningĩ nĩ gũkoragwo na aarĩ na ariũ a Ithe witũ aingĩ matarĩ kĩhiko-inĩ. Twagĩrĩirũo gũkorũo na mawoni marĩkũ kwerekera andũ arĩa matarĩ kĩhiko-inĩ? Twagĩrĩirũo kwĩgerekania na ũrĩa Jesu aamonaga. Hĩndĩ ya ũtungata wake arĩ gũkũ thĩ, Jesu ndaahikanirie. Aaigire meciria make harĩ ũtungata wake. Jesu ndoigire no mũhaka Akristiano maingĩre kĩhiko-inĩ kana mage kũingĩra kĩhiko-inĩ. O na kũrĩ ũguo, nĩ ooigire atĩ Akristiano amwe no mathuure kwaga kũingĩra kĩhiko-inĩ. (Mat. 19:12) Jesu nĩ aatĩĩte andũ arĩa mataarĩ kĩhiko-inĩ. Ndoonaga andũ arĩa matarĩ kĩhiko-inĩ ta matarĩ andũ a bata kana ta kũrĩ kĩndũ magĩte. Mũtũmwo Paulo o nake ndaarĩ kĩhiko-inĩ hĩndĩ ya ũtungata wake. Paulo ndooigire atĩ nĩ ũũru Mũkristiano kũingĩra kĩhiko-inĩ. Nĩ aamenyaga atĩ rĩu nĩ itua rĩa mũndũ. w20.08 28 ¶7-8

Mũtũmwo Johana nĩ aatũũrire mĩaka mĩingĩ na akĩyonera maũndũ maingĩ. Nĩ aacemanirie na moritũ maingĩ marĩa mangĩatũmire wĩtĩkio wake wage hinya. Na hingo ciothe nĩ eerutanagĩria ũrĩa wothe angĩhota gwathĩkĩra maathani ma Jesu, ta rĩathani rĩa kwenda aarĩ na ariũ a Ithe witũ. Ũndũ ũcio nĩ watũmaga Johana akorũo na ma atĩ Jehova na Jesu nĩ maamwendete na atĩ nĩ mangĩamũheire hinya ũrĩa aabataraga nĩguo ahote gũkirĩrĩria igerio o rĩothe. (Joh. 14:15-17; 15:10) Johana nĩ oonanirie wendo harĩ aarĩ na ariũ a Ithe witũ kũgerera maũndũ marĩa ooigire na agĩka, na Shaitani na thĩ yake matiahotire kũmũgirĩrĩria gwĩka ũguo. O ta Johana, tũratũũra thĩinĩ wa thĩ ĩno ĩtongoragio nĩ Shaitani, ũrĩa nĩwe ngai ya gũkũ thĩ na ndakoragwo na wendo o na hanini. (1 Joh. 3:1, 10) Endaga tũtige kwenda aarĩ na ariũ a Ithe witũ, no ndarĩ na ũhoti wa gũtũma twĩke ũguo o tiga tũmwĩtĩkĩririe. Rekei tũtue itua rĩa kwendaga aarĩ na ariũ a Ithe witũ, na tuonanagie wendo ũcio kũgerera maũndũ marĩa tũroiga, na makĩria maũndũ marĩa tũreka. Tweka ũguo, nĩ tũrĩkenaga gũkorũo tũrĩ gĩcunjĩ gĩa famĩlĩ ya Jehova, na ũtũũro witũ nĩ ũrĩkoragwo na gĩkeno.—1 Joh. 4:7. w21.01 13 ¶18-19

Ũtũũro thĩinĩ wa thĩ ĩno ĩratongorio nĩ Shaitani no ũkorũo ũrĩ mũritũ mũno, na rĩmwe tũrigwo o na nĩ ũrĩa tũgwĩka. (2 Tim. 3:1) No tũtiagĩrĩirũo gũtangĩka kana gwĩtigĩra. Jehova nĩ oĩ maũndũ marĩa tũragerera. Hĩndĩ ĩrĩa tũrabatara ũteithio, atwĩrĩire atĩ nĩ arĩtũnyitagĩrĩra na guoko gwake kwa ũrĩo kũrĩa kũrĩ hinya. (Isa. 41:10, 13) Tũrĩ na ma atĩ Jehova nĩ arĩtũteithagia, na Bibilia nĩ ĩrĩtũheaga hinya ũrĩa tũrabatara gũkirĩrĩria igerio o rĩothe. Video citũ, ũthomi wa Bibilia wongereirũo mĩgambo, na icunjĩ cia “Wĩgerekanie na Wĩtĩkio Wao,” nĩ iteithagia mũndũ gũtaũkĩrũo nĩ maũndũ marĩa meekĩkire Bibilia-inĩ. Ũtanerorera, gũthikĩrĩria, kana gũthoma indo icio ihaarĩrĩirio, hoya Jehova agũteithie kuona maũndũ ma bata marĩa ũngĩhũthĩra. Wĩĩkĩre iratũ-inĩ cia mũndũ ũrĩa ũrarĩrĩrio. Wĩcũranie maũndũ marĩa ndungata icio njĩhokeku cia Jehova ciekire na ũrĩa aaciteithirie kũhiũrania na moritũ. Ũcoke ũhũthĩre maũndũ marĩa ũreruta ũndũ-inĩ ũrĩa ũragerera. Cokagĩria Jehova ngatho nĩ ũndũ wa ũteithio ũrĩa arakũhe. Na wonanie ngatho ciaku na njĩra ya gũcaria mĩeke ya gwĩkĩra arĩa angĩ ngoro na kũmateithia. w21.03 19 ¶22-23

Angĩkorũo mũrĩ thĩinĩ wa kĩhiko, na nĩ mwendaga kũgĩa ciana, mwĩyũrie ũũ: ‘Hihi tũrĩ andũ enyihia mendete Jehova na Kiugo gĩake? Jehova hihi no one tũrĩ agĩrĩru a kũrũmbũiya ciana iria tũkũgĩa?’ (Thab. 127:4) Angĩkorũo ũrĩ mũciari, wĩyũrie ũũ: ‘Hihi nĩ ndutaga ciana ciakwa bata wa kũruta wĩra na kĩyo?’ (Koh. 3:12, 13) ‘Hihi nĩ njĩkaga ũrĩa wothe ingĩhota nĩguo ngitĩre ciana ciakwa kuumana na mogwati ma kĩĩmwĩrĩ na ma kĩĩmĩtugo, marĩa cingĩcemania namo?’ (Thim. 22:3) Ndũngĩhota kũgitĩra ciana ciaku kuumana na moritũ mothe. Ĩndĩ no ũmahaarĩrie nĩ ũndũ wa moritũ marĩa mangĩcemania namo ũtũũro-inĩ, na njĩra ya gũthiĩ na mbere kũmaruta ũrĩa mangĩetha ũtaaro Kiugo-inĩ kĩa Ngai. (Thim. 2:1-6) Kwa ngerekano, mũndũ ũmwe wa famĩlĩ angĩtiga gũtungatĩra Jehova, hũthĩra Kiugo kĩa Ngai gũteithia ciana ciaku kũmenya nĩkĩ nĩ ũndũ wa bata mũno gũtũũra tũrĩ ehokeku harĩ Jehova. (Thab. 31:23) Ningĩ, mũndũ mwendete angĩkua, teithia ciana ciaku kuona ũrĩa Kiugo kĩa Ngai kĩngĩmateithia kũhiũrania na kĩeha nĩguo icokwo nĩ thayũ.—2 Kor. 1:3, 4; 2 Tim. 3:16. w20.10 27 ¶7