Janũarĩ

Jesu arĩ na ũmĩrĩru nĩ ooimbũranagia atongoria a ndini arĩa maarutanaga morutani mahĩtanu matukũ-inĩ make. Kwa ngerekano, nĩ aaguũririe ũhinga wa Afarisai arĩa meekagĩrĩra mũno ũhoro wĩgiĩ gwĩthamba moko gũkĩra ũrĩa maarũmbũyagia aciari ao. (Mat. 15:1-11) O na akorũo atongoria acio a ndini nĩ maarakarire nĩ ũndũ wa maũndũ marĩa ooigire, Jesu ndaarekire ũndũ ũcio ũmũgirie gũthiĩ na mbere kwaria ũhoro wa ma. Jesu ningĩ nĩ ooimbũranirie morutani ma maheeni ma ndini. Ndoigire atĩ mawĩtĩkio mothe ma ndini nĩ metĩkĩrĩku harĩ Ngai. Handũ ha ũguo, ooigire atĩ andũ aingĩ mangĩkaagera njĩra njariĩ ĩrĩa ĩkinyagia andũ harĩ kũniinwo, no arĩa mangĩkaagera njĩra ngunderu ya muoyo mangĩgakorũo marĩ anini. (Mat. 7:13, 14) Ooigire wega atĩ andũ amwe mangĩkoneka ta arĩ Ngai maratungatĩra, no ũrĩa kũrĩ nĩ atĩ tiwe mangĩgakorũo magĩtungatĩra. Ooigire ũũ: “Mwĩhũgagei anabii a maheeni arĩa mokaga kũrĩ inyuĩ mehumbĩte rũũa rwa ngʼondu, no thĩinĩ nĩ njũi ndĩani. Nĩ mũrĩmamenyaga kũgerera maciaro mao.”—Mat. 7:15-20. w21.05 9 ¶7-8

Hana aahikĩtio nĩ Mũlawii wetagwo Elikana, na Elikana nĩ aamwendete mũno. No Elikana aarĩ na mũtumia ũngĩ wetagwo Penina. Elikana eendete Hana gũkĩra ũrĩa eendete Penina. O na kũrĩ ũguo, “Penina nĩ aarĩ na ciana, no Hana ndaarĩ na ciana.” Ũndũ ũcio watũmaga Penina ‘aikare akĩnyũrũragia Hana nĩguo amũtuurithie.’ Hana nĩ aarakaraga mũno “nginya akarĩra na akaga kũrĩa irio.” No hatirĩ ũndũ wonanagia atĩ Hana nĩ aageririe kwĩrĩhĩria. Handũ ha ũguo, aaitũrũrĩire Jehova ngoro yake na akĩhoka atĩ nĩ ekũrũnga maũndũ. (1 Sam. 1:2, 6, 7, 10) Tũreruta atĩa kuumana na kĩonereria kĩa Hana? Twagĩrĩirũo kũririkanaga atĩ mũndũ angĩgeria gũcindana na ithuĩ ũndũ-inĩ mũna, ithuĩ nĩ ithuĩ tũgũtua ũrĩa tũkwenda maũndũ maikare. Nĩ twagĩrĩirũo gwĩthema kwambĩrĩria gũcindana nake. Handũ ha kũrĩha ũũru na ũũru, geria gũthondeka thayũ hamwe nake. (Rom. 12:17-21) O na mũndũ ũcio angĩaga gũcenjia, wee nĩ ũgũkorũo na thayũ waku wa meciria. w21.07 17 ¶13-14

Mũkoroko watũmire Judasi Mũisikariota atuĩke mũkunyanĩri. No Judasi ndaarĩ mũkunyanĩri kuuma o kĩambĩrĩria. (Luk. 6:13, 16) No kũhoteke Judasi aarĩ na ũhoti mũnene na aarĩ mũndũ wa kwĩhokeka tondũ nĩwe wehokeirũo ithandũkũ rĩa mũhothi. Na o na gũtuĩka Judasi nĩ aaiguĩte Jesu agĩkaanania maita maingĩ ũhoro wĩgiĩ mũkoroko, thutha wa ihinda nĩ aambĩrĩirie kũiya. (Mar. 7:22, 23; Luk. 11:39) Mũkoroko wa Judasi nĩ woonekire wega ihinda inini mbere ya Jesu kũũragwo. Jesu na arutwo ake, o hamwe na Mariamu na mwarĩ wa nyina Maritha, maanyitĩtwo ũgeni gwa Simeoni ũrĩa warĩ na mangũ. Hĩndĩ ĩyo maarĩanagĩra hamwe, Mariamu nĩ aaitĩrĩirie Jesu maguta manungi wega marĩa mooimĩte mbeca nyingĩ mũno. Judasi na arutwo acio angĩ nĩ maarakarire mũno. No gũkorũo arutwo acio angĩ moonaga atĩ mbeca icio nĩ cingĩahũthĩrirũo wĩra-inĩ wa kũhunjia. No Judasi aarĩ na muoroto ũngĩ ngũrani. “Aarĩ mũici” na eendaga kũiya mbeca kuuma ithandũkũ-inĩ rĩa mũhothi.—Joh. 12:2-6; Mat. 26:6-16; Luk. 22:3-6. w21.06 18 ¶12-13

Hihi nĩ kũrĩ hĩndĩ wonaga ũrĩ na maũndũ maingĩ ma gwĩka na ũkona ta ũtangĩhota kũmahingia mothe? Angĩkorũo nĩ wonaga ũguo, no ũhote gũtaũkĩrũo nĩ Paulo. Aaiguaga agĩtangĩka, to ũndũ wa kĩũngano kĩmwe, no “nĩ ũndũ wa ciũngano ciothe.” (2 Kor. 11:23-28) Hihi ũrĩ na mũrimũ mũnene ũtũmaga wage gĩkeno? Paulo nĩ aathumbũragwo nĩ “mũigua thĩinĩ wa mwĩrĩ,” ũrĩa no kũhoteke warĩ thĩna mũna wa mwĩrĩ, na nĩ eeriragĩria mũno kwehererio thĩna ũcio. (2 Kor. 12:7-10) Hihi rĩmwe nĩ ũiguaga ũkuĩte ngoro nĩ ũndũ wa mawathe maku? Rĩmwe Paulo nĩ aaiguaga ũguo. Ooigire atĩ ‘aarĩ na thĩna,’ tondũ hingo ciothe aakoragwo akĩrũa na mawathe make. (Rom. 7:21-24) O na Paulo agĩcemanagia na magerio matiganĩte na maũndũ ma kũmũũraga ngoro, aathiire na mbere gũtungatĩra Jehova. Aarutire kũ hinya wa gwĩka ũguo? O na gũtuĩka nĩ aamenyaga wega mawathe marĩa aarĩ namo, aarĩ na wĩtĩkio mũnene harĩ ũkũũri. w21.04 22 ¶7-8

Rĩrĩa Adamu eehirie, oorirũo nĩ mweke wa gũtũũra tene na tene, na agĩtũma nginya njiarũa ciake ciũrũo nĩ mweke ũcio. Adamu ndaarĩ na kĩĩgwatio kĩa mehia marĩa eekire, tondũ eehirie akĩendaga. Ĩ ũhoro wĩgiĩ ciana ciake? Itiarĩ na itemi harĩ mehia ma Adamu. (Rom. 5:12, 14) Adamu nĩ aagĩrĩire gũkua nĩ ũndũ wa mehia macio eekire, no hihi nĩ harĩ ũndũ Jehova aangĩekire nĩguo njiarũa ciake igaatũũra tene na tene? Ĩĩ nĩ harĩ. Thutha wa Adamu kwĩhia, Jehova nĩ aaguũririe o kahora ũrĩa angĩahonokirie njiarũa cia Adamu kuumana na mehia na gĩkuũ. (Kĩam. 3:15) O na gũtuĩka tũtirĩ akinyanĩru, ũkũũri nĩ ũtũteithagia gũkorũo na ũrata wa hakuhĩ hamwe na Jehova. Kũgerera ũkũũri, mawĩra mothe ma Mũcukani nĩ makaanangwo kaimana. (1 Joh. 3:8) Nĩ ũndũ wa ũkũũri, muoroto ũrĩa Jehova aarĩ naguo kĩambĩrĩria-inĩ wĩgiĩ thĩ nĩ ũkaahinga. Thĩ yothe nĩ ĩgaatuĩka paradiso. w21.04 14 ¶1; 19 ¶17

Kĩrĩndĩ kĩnene kĩa athuri na atumia nĩ gĩathiĩte Jerusalemu. Mooimĩte mabũrũri-inĩ matiganĩte na maaragia thiomi ngũrani. Gũgĩcoka gũgĩkĩka ũndũ wa magegania mũthenya ũcio. Ayahudi amwe nĩ maambĩrĩirie kwaria thiomi cia andũ arĩa mooimĩte kũndũ na kũndũ. Ũndũ ũcio nĩ wagegirie andũ, no ũhoro ũrĩa Ayahudi acio maameerire na ũhoro ũrĩa mũtũmwo Petero eerire andũ othe, nĩguo wamagegirie o na makĩria. Andũ acio moonganĩte nĩ meerutire atĩ nĩ mangĩahonokirio na njĩra ya kuonania wĩtĩkio harĩ Jesu Kristo. Ũhoro ũcio nĩ wahutirie andũ acio ngoro mũno nginya makĩũria ũũ: “Twagĩrĩirũo gwĩka atĩa?” Nake Petero akĩmeera: “O mũndũ abatithio.” (Atũm. 2:37, 38) Gwacokire gũgĩkĩka ũndũ ũngĩ wa kũgegania mũno. Andũ ta 3,000 nĩ maabatithirio mũthenya ũcio magĩtuĩka arutwo a Kristo. Ũndũ ũcio warĩ kĩambĩrĩria kĩa wĩra mũnene wa gũtua andũ arutwo ũrĩa Jesu aathĩte arũmĩrĩri ake marutage. Wĩra ũcio no ũrathiĩ na mbere nginya ũmũthĩ. w21.06 2 ¶1-2

No gũkorũo gĩcigo kĩrĩa tũhunjagia ti ũndũ mũhũthũ kwambĩrĩria kwĩruta na mũndũ Bibilia. Andũ no makorũo matiendaga gũthikĩrĩria ndũmĩrĩri itũ kana o na nĩ mamĩkararagia. Tũngĩhota atĩa gũtũũria mwerekera ũrĩa wagĩrĩire angĩkorũo gĩcigo gitũ kĩhaana ũguo? Ririkanaga atĩ, thĩinĩ wa thĩ ĩno ĩiyũire mathĩna, maũndũ ma andũ no macenjie o rĩmwe na andũ arĩa matakenagio nĩ ũhoro mambĩrĩrie kuona atĩ nĩ marabatara ũtongoria wa Ngai. (Mat. 5:3) Kũrĩ andũ amwe manarega kuoya mabuku maitũ, no thutha-inĩ magetĩkĩra kwĩruta Bibilia. Ningĩ nĩ tũtaũkagĩrũo atĩ Jehova nĩwe Mwene magetha. (Mat. 9:38) Endaga tũthiĩ na mbere kũhanda na gũitĩrĩria maĩ nake agakũria. Na nĩ ũndũ wa gwĩkĩra ngoro kũririkana atĩ o na angĩkorũo ihinda-inĩ rĩrĩ tũtirĩ na mũrutwo wa Bibilia, nĩ twamũkagĩra irathimo cia Jehova ti tondũ wa maumĩrĩra ma wĩra witũ no nĩ tondũ wa kĩyo gitũ. w21.07 6 ¶14

Jehova nĩ aheete andũ ũhoti wa kũgĩa ciana, na akamahe wĩra wa gũciteithia kũmwenda na kũmũtungatĩra. O na gũtuĩka Jehova nĩ aheete araika ũhoti mũnene, ndamaheete ũhoti wa kũgĩa ciana. Nĩ ũndũ ũcio, andũ arĩa mararera ciana nĩ magĩrĩirũo kuona wĩra ũcio ũrĩ mweke wa mwanya. Aciari nĩ mehokeirũo wĩra wa bata na mũtheru wa kũrera ciana ciao ‘magĩcirũngaga na magĩcitaaraga na njĩra ya Jehova.’ (Ef. 6:4; Gũcok. 6:5-7) Ithondeka rĩa Jehova nĩ rĩrutĩte indo nyingĩ ciarĩrĩirie Bibilia nĩguo iteithĩrĩrie aciari ta mabuku, video, nyĩmbo, na indo ingĩ irĩ Intaneti-inĩ. Ithe witũ wa igũrũ na Mũrũ wake hatarĩ nganja nĩ makenagio nĩ ciana. (Luk. 18:15-17) Jehova nĩ akenaga rĩrĩa aciari mamwĩhoka, na meka ũrĩa wothe mangĩhota nĩguo marere ciana ciao. Na aciari ta acio nĩ matũmaga ciana ciao igĩe na kĩĩrĩgĩrĩro gĩa gũgaatuĩka a famĩlĩ ya Jehova tene na tene. w21.08 5 ¶9

Andũ amwe meciragia atĩ gũkorũo na wĩtĩkio nĩ gwĩtĩkia ũndũ o na ũtarĩ na ũira waguo. Ĩndĩ kũringana na Bibilia, wĩtĩkio ta ũcio ndwagĩrĩire. Bibilia ĩtaaragĩria atĩ wĩtĩkio wĩhocetie harĩ ũira mũrũmu. Kwoguo o na gũtuĩka tũtingĩona Jehova, Jesu, na Ũthamaki, tũrĩ na ũira ũngĩtũma twĩtĩkie maũndũ macio. (Ahib. 11:3) Mũthomi ũmwe wa maũndũ ma sayansi watuĩkire Mũira wa Jehova aaugire: “Aira a Jehova nĩ makoragwo na mũthingi wa maũndũ marĩa metĩkĩtie. Nĩ maheaga gĩtĩo maũndũ marĩa andũ a sayansi mathundũrĩte.” Mũndũ no eyũrie atĩrĩ, ‘Angĩkorũo kũrĩ na ũira mũrũmu atĩ nĩ kũrĩ Mũũmbi-rĩ, nĩ kĩĩ gĩtũmaga andũ aingĩ mage gwĩtĩkia atĩ Ngai nĩwe Mũũmbi wa indo ciothe?’ Ũndũ ũmwe nĩ atĩ andũ amwe matirĩ methuthurĩria o ene mamenye ũhoro wa ma nĩ ũrĩkũ. Mũira ũmwe wa Jehova wĩtagwo Robert aaugire ũũ: “Ndietĩkĩtie ũhoro wĩgiĩ ũũmbi tondũ ũũmbi ndwarutanagwo tũrĩ cukuru. No rĩrĩa ndaakinyirie mĩaka mĩrongo ĩĩrĩ na kĩndũ, nĩ nderutire atĩ Bibilia nĩ ĩkoragwo na itũmi njega cia gũtũma mũndũ etĩkie atĩ Ngai nĩwe wombire indo ciothe.” w21.08 15 ¶4-5

No tũmenye atĩ Jehova nĩ mwega na njĩra ya gũthoma Bibilia, o hamwe na gũthikĩrĩria andũ angĩ magĩtaarĩria irathimo iria mamũkĩrĩte. No nĩgetha tũtaũkĩrũo nĩ wega wa Jehova, no mũhaka ‘tũcame’ ithuĩ ene. Kwa ngerekano, ta nĩ tũtue atĩ nĩ tũrenda kũingĩra ũtungata-inĩ wa mahinda mothe, no nĩgetha tũhote gũkinyĩra muoroto ũcio nĩ tũrabatara kũhũthahũthia ũtũũro witũ. Nĩ tũĩ kĩĩranĩro kĩa Jesu atĩ tũngĩiga Ũthamaki mbere, Jehova nĩ arĩtigagĩrĩra atĩ nĩ tuona kĩrĩa tũrabatara, no tũtirĩ tweyonera ũndũ ũcio ithuĩ ene. (Mat. 6:33) No tondũ twĩ na wĩtĩkio harĩ kĩĩranĩro kĩu kĩa Jesu, tũkanyihanyihia mahũthĩro maitũ na mathaa marĩa tũhũthagĩra wĩra-inĩ, na tũkahũthĩra mathaa maingĩ ũtungata-inĩ. Rĩrĩa tweka ũguo, tũkeyonera ithuĩ ene atĩ Jehova nĩ arũmbũyagia mabataro maitũ. Na njĩra ĩyo ‘tũgacama’ ithuĩ ene tũkeyonera atĩ Jehova nĩ mwega. w21.08 26 ¶2

Hihi mahinda maya nĩ twĩyonagĩra ũndũ ta ũcio? Ĩĩ nĩ tuonaga. Atongoria aingĩ a ndini nĩ makenaga rĩrĩa andũ marĩ igweta, andũ atongu, na andũ arĩa monagwo marĩ ogĩ thĩinĩ wa thĩ manyitanĩra na ndini ciao. Atongoria acio nĩ metĩkagĩria andũ ta acio ndini-inĩ ciao, o na angĩkorũo mĩtugo na mĩtũũrĩre yao ndĩratwarana na ithimi cia Ngai. No atongoria acio a ndini nĩ manyararaga andũ a Jehova arĩa makoragwo na kĩyo na mĩthiĩre mĩega, atĩ tondũ mationekaga marĩ a bata kũringana na ithimi cia thĩ. Paulo ooigire atĩ Ngai aathuurire andũ arĩa ‘monagwo matarĩ a bata.’ (1 Kor. 1:26-29) O na kũrĩ ũguo, Jehova onaga ndungata ciake ciothe irĩ cia bata. Tũngĩka atĩa nĩguo tũtikahĩtithio nĩ mwĩcirĩrie wa andũ a thĩ ĩno? (Mat. 11:25, 26) Wĩtheme gũkorũo na muonere ta wao kwerekera andũ a Ngai. Ririkanaga atĩ Jehova ahũthagĩra o andũ arĩa enyihia kũhingia wendi wake. (Thab. 138:6) Ningĩ wĩcirie maũndũ marĩa arahingia akĩhũthĩra andũ arĩa monagwo matarĩ ogĩ nĩ thĩ ĩno. w21.05 8 ¶1; 9 ¶5-6

Mũtũmwo Paulo nĩ aacokagia ngatho nĩ ũndũ wa ũteithio ũrĩa aaheagwo. Nĩ oonanagia wĩnyihia na agetĩkĩra ũteithio ũrĩa aaheagwo nĩ aarĩ na ariũ a Ithe witũ. (Afil. 2:19-22) Inyuĩ andũ akũrũ, no muonanie ngatho cianyu harĩ andũ ethĩ thĩinĩ wa kĩũngano na njĩra nyingĩ. Rĩrĩa andũ ethĩ merutĩra kũmũtwara handũ, gũthiĩ kũmũgũrĩra indo, kana kũmũhe ũteithio ũngĩ o wothe, ĩtĩkagĩrai ũteithio wao. Ririkanagai atĩ ũteithio wao nĩ njĩra ĩmwe ya kuonania atĩ Jehova nĩ amwendete. Gwĩtĩkĩra ũteithio wao no kũmũteithie kũgĩa na ũrata wa hakuhĩ hamwe nao. Hingo ciothe teithagiai andũ ethĩ gũkorũo marĩ arata a Jehova, na mũmeerage ũrĩa mũkenagio nĩ kuona andũ ethĩ makĩĩrutanĩria gũkinyĩra mĩeke ya ũtungata thĩinĩ wa kĩũngano. Ningĩ hũthagĩrai mahinda na andũ ethĩ na mũmeerage maũndũ mega marĩa mwĩyoneire ũtũũro-inĩ. Mweka ũguo, nĩ ‘mũrĩonanagia atĩ mũrĩ na ngatho’ kũrĩ Jehova nĩ ũndũ wa andũ ethĩ arĩa etĩkĩrĩtie makorũo thĩinĩ wa kĩũngano.—Kol. 3:15; Joh. 6:44; 1 Thes. 5:18. w21.09 12 ¶12-13

Jehova nĩ endete aarĩ na ariũ a Ithe witũ. No ti hingo ciothe ũngĩkorũo ũrĩ ũndũ mũhũthũ harĩ ithuĩ kwenda aarĩ na ariũ a Ithe witũ na kũmonia atĩ nĩ tũmendete. Ũndũ ũmwe ũngĩtũma gũthiĩ ũguo nĩ tondũ tuumĩte ũndũire-inĩ na mĩrerere-inĩ ngũrani. Ningĩ ithuothe nĩ twĩkaga tũmaũndũ tũngĩrakaria andũ arĩa angĩ. O na kũrĩ ũguo, nĩ twagĩrĩirũo kwĩrutanĩria nĩguo twende aarĩ na ariũ a Ithe witũ. Na njĩra ĩrĩkũ? Na njĩra ya kwĩgerekania na Ithe witũ harĩ kuonia aarĩ na ariũ a Ithe witũ wendo. (Ef. 5:1, 2; 1 Joh. 4:19) Mũndũ mũcayanĩri nĩ ethaga ũrĩa angĩka nĩguo omĩrĩrie andũ na amateithie. Kũgerera ũrĩa Jesu aarũmbũyanirie na andũ, nĩ oonanirie ũrĩa Jehova aaiguaga kũmerekera. (Joh. 5:19) Kwa ngerekano, hĩndĩ ĩmwe rĩrĩa Jesu oonire kĩrĩndĩ nĩ “[aakĩiguĩrĩire] tha tondũ kĩarĩ kĩnyamarie na gĩkahurunjwo ta ngʼondu itarĩ na mũrĩithi.” (Mat. 9:36) Jesu ndaacayagĩra andũ o ngoro-inĩ tu, no nĩ aamateithagia. Nĩ aahonagia andũ arĩa arwaru na agacanjamũra andũ arĩa ‘maanogete na magatitika mĩrigo.’—Mat. 11:28-30; 14:14. w21.09 22 ¶10-11

Jehova nĩ endete kuonania tha. Mũtũmwo Paulo aatongoririo nĩ roho kwandĩka atĩ Ngai “arĩ tha nyingĩ.” Paulo akiuga ũguo, aaragia ũhoro wĩgiĩ ũrĩa Ngai onanĩtie tha na njĩra ya kũhe andũ matarĩ akinyanĩru kĩĩrĩgĩrĩro gĩa gũgaatũũra muoyo kũrĩa igũrũ. (Ef. 2:4-7) No Jehova ndonanĩtie tha o kũrĩ aitĩrĩrie maguta tu. Daudi mwandĩki wa Thaburi aandĩkire ũũ: “Jehova nĩ mwega harĩ andũ othe, na tha ciake nĩ cionekaga mawĩra-inĩ make mothe.” (Thab. 145:9) Tondũ Jehova nĩ endete andũ, nĩ amonagia tha hĩndĩ ĩrĩa yothe kũngĩbatarania. Jesu nĩwe ũũĩ wega biũ ũrĩa Jehova endete kuonia andũ tha. Jehova na Jesu maarĩ hamwe kwa ihinda rĩa mĩaka ngiri nyingĩ kũrĩa igũrũ Jesu atanoka gũkũ thĩ. (Thim. 8:30, 31) Jesu nĩ oonaga ũrĩa Jehova oonagia andũ matarĩ akinyanĩru tha maita maingĩ. (Thab. 78:37-42) O na Jesu akĩrutana, nĩ aagwetaga maita maingĩ ũhoro wĩgiĩ ngumo ĩyo njega ya Jehova. w21.10 8-9 ¶4-5

Jehova nĩ aacokirie mahoya macio na mũgambo mũnene kuuma igũrũ akiuga atĩ nĩ ekũgoocithia rĩĩtwa rĩake. Mahinda-inĩ mothe ũtungata-inĩ wake, Jesu nĩ aagoocithagia rĩĩtwa rĩa Ithe. (Joh. 17:26) Kwoguo Akristiano a ma nĩ monaga arĩ gĩtĩo kĩnene kũhũthĩra rĩĩtwa rĩa Ngai na kũrĩmenyithia kũrĩ andũ angĩ. Kahinda kanini thutha wa kĩũngano gĩa Gĩkristiano kwambĩrĩrio thĩinĩ wa karine ya mbere M.M., Jehova nĩ eerekeirie “meciria make kũrĩ ndũrĩrĩ nĩguo egĩĩre na andũ kuuma kũrĩ cio metanĩtio na rĩĩtwa rĩake.” (Atũm. 15:14) Akristiano acio nĩ maakenagĩra kũhũthĩra rĩĩtwa rĩa Ngai na kũrĩmenyithia andũ arĩa angĩ. Nĩ maahũthagĩra rĩĩtwa rĩu rĩrĩa marahunjia, o na rĩrĩa maandĩkaga mabuku ma Bibilia. Na njĩra ĩyo makĩonania wega atĩ no o tu maamenyithanagia rĩĩtwa rĩa Ngai. (Atũm. 2:14, 21) O na ũmũthĩ, Aira a Jehova nĩ mamenyithanagia rĩĩtwa rĩa Ngai. w21.10 20 ¶8-10

Wendo mwĩhokeku wa Jehova ũtũũraga tene na tene. Ũndũ ũcio wa bata wĩgiĩ wendo mwĩhokeku ũgwetetwo maita 26 thĩinĩ wa Thaburi 136. Mũhari wa mbere uugaga ũũ: “Cokeriai Jehova ngatho, tondũ nĩ mwega; wendo wake mwĩhokeku ũtũũraga tene na tene.” (Thab. 136:1) Kuuma mũhari wa 2 nginya wa 26, ciugo “wendo wake mwĩhokeku ũtũũraga tene na tene” icokeretwo mĩhari-inĩ ĩyo yothe. Tũgĩthoma mĩhari ĩyo ya thaburi ĩno, nĩ tũgucagĩrĩrio kuona njĩra nyingĩ iria Jehova onanagia wendo wake mwĩhokeku ategũtigithĩria. Gũkorũo atĩ ciugo “wendo wake mwĩhokeku ũtũũraga tene na tene” iraikara igĩcokagĩrũo kũronania atĩ wendo wa Ngai kũrĩ andũ ake ndũcenjagia. Na githĩ tũtiũmagĩrĩrio mũno nĩ kũmenya atĩ Jehova ndahiũhaga kũnogio nĩ ndungata ciake? Handũ ha ũguo, nĩ onagia wendo andũ arĩa mamũtungatagĩra na ndangĩmatiganĩria, makĩria rĩrĩa maragerera moritũ. Kũmenya atĩ Jehova ndangĩtũtiganĩria, nĩ gũtũmaga tũkorũo na gĩkeno na tũgĩe na hinya ũrĩa tũrabatara wa kũhiũrania na moritũ na gũthiĩ na mbere kũgerera njĩra-inĩ ya muoyo.—Thab. 31:7. w21.11 4 ¶9-10

Hihi rĩmwe na rĩmwe nĩ ũiguaga watangĩka hĩndĩ ĩrĩa weciria maũndũ marĩa marĩ mbere, ta kwanangwo kwa ndini cia maheeni, tharĩkĩro ya Gogu wa Magogu, na mbaara ya Hari–Magedoni? Hihi rĩmwe nĩ wĩyũragia atĩrĩrĩ, ‘Rĩrĩa ihinda rĩu rĩgaakinya-rĩ, hihi nĩ ngaahota gũkirĩrĩria maũndũ macio ma kũguoyohia na ndũũrie wĩkindĩru wakwa?’ Angĩkorũo rĩmwe nĩ wĩciragia maũndũ ta macio, ciugo cia Jesu iria irĩ rĩandĩko-inĩ rĩa ũmũthĩ no ikorũo irĩ na ũguni mũnene harĩ wee. Jesu eerire arutwo ake ũũ: “Mũtikareke ngoro cianyu itangĩke. Onaniai wĩtĩkio.” Wĩtĩkio ũrĩ na hinya nĩ ũgaatũteithia kũngʼethanĩra na maũndũ marĩa mokĩte tũrĩ na ũmĩrĩru. No twĩkĩre hinya wĩtĩkio witũ nĩguo tũkaahota gwĩtiiria magerio marĩa mokĩte, na njĩra ya gũthuthuria ũrĩa tũhiũranagia na magerio marĩa tũracemania namo ũmũthĩ. Tũcoke tũmenye harĩa tũrabatara kũrutĩra wĩra nĩguo twĩkĩre wĩtĩkio witũ hinya. Hingo ciothe rĩrĩa twakirĩrĩria igerio rĩna, wĩtĩkio witũ nĩ ũgĩaga na hinya makĩria. Ũndũ ũcio nĩ ũgaatũteithia gwĩtiiria magerio marĩa magooka. w21.11 20 ¶1-2

Mũtũmwo Paulo eekĩrire Timotheo ngoro ahingie ũtungata wake biũ, na Akristiano othe no mahũthĩre ũtaaro ũcio. (2 Tim. 4:5) O na kũrĩ ũguo, nĩ tũcemanagia na moritũ. Kwa ngerekano, ta wĩcirie ũhoro wa ariũ a Ithe witũ arĩa maikaraga mabũrũri-inĩ wĩra witũ wĩkĩrĩirũo mĩkaana kana ũhũũrĩtwo marubuku. Ndungata cia Jehova nĩ ihiũranagia na moritũ maingĩ mangĩtũma ikue ngoro. Kwa ngerekano, aingĩ ao nĩ mabataraga kũruta wĩra mathaa maingĩ nĩguo mone mabataro ma o mũhaka ma famĩlĩ ciao. O na gũtuĩka no mende gũkorũo na itemi inene wĩra-inĩ wa kũhunjia, mũthia wa kiumia ũgĩkinya makoragwo marĩ anogu. Angĩ nao matingĩhota kũhingia maũndũ maingĩ nĩ ũndũ wa gũkorũo na mũrimũ wa ihinda iraihu, ũkũrũ, kana matingĩhota kuuma mũciĩ. Nao angĩ meiguaga matagĩrĩire maitho-inĩ ma Jehova. Gũtekũmakania ũrĩa maũndũ maitũ mahaana, Jehova no atũteithie kũhiũrania na moritũ maitũ na tũthiĩ na mbere kũmũtungatĩra kũringana na ũhoti witũ. w21.05 20 ¶1-3

Rĩmwe na rĩmwe andũ no matũtindĩkĩrĩrie gwĩka maũndũ marĩa mangĩtũma twage gũthathaiya Jehova na njĩra ĩrĩa we endaga. Ũndũ ta ũcio ũngĩkĩka, no tũbatare gũtua itua rĩa bata. Ta wĩcirie ũtaaro ũyũ ũrĩ thĩinĩ wa Maũndũ ma Alawii 19:19, ũrĩa ugaga: “Ndũkanekĩre nguo ĩtumĩtwo na mĩthemba ĩĩrĩ ya ndigi itukanĩtio hamwe.” Watho ũcio nĩ watũmaga Aisiraeli makorũo marĩ ngũrani na ndũrĩrĩ iria ciamathiũrũrũkĩirie. Ũmũthĩ tũtiregaga gwĩkĩra nguo itumĩtwo na ngora cia mĩthemba ngũrani. No nĩ tũregaga gũkorũo tũhaana ta andũ arĩa makoragwo na mawĩtĩkio na mĩtugo ĩtaratwarana na Bibilia. Ũrĩa kũrĩ nĩ atĩ, nĩ twendete andũ aitũ a famĩlĩ o hamwe na andũ arĩa angĩ. No matua marĩa tũtuaga ũtũũro-inĩ nĩ monanagia atĩ nĩ twathĩkagĩra Jehova, o na akorũo matua macio nĩ matũmaga tuoneke tũrĩ ngũrani na andũ arĩa angĩ. Ũndũ ũcio nĩ wa bata mũno, angĩkorũo nĩ tũrenda gũkorũo tũrĩ atheru.—2 Kor. 6:14-16; 1 Pet. 4:3, 4. w21.12 5 ¶14; 6 ¶16

Njĩra ya muoyo no yoneke. Jesu aaugire ũũ: “Mũngĩtũũra kiugo-inĩ gĩakwa, mũgũkorũo mũrĩ arutwo akwa kũna, na nĩ mũkũmenya ũhoro ũrĩa wa ma, naguo ũhoro ũrĩa wa ma ũmũkũũre ũkombo-inĩ.” (Joh. 8:31, 32) Nĩ ũrabatara kũgaathĩrĩrio tondũ ndwarũmanĩrĩire na kĩrĩndĩ, ĩndĩ nĩ wacaririe ũhoro ũrĩa wa ma. Nĩ werutire Kiugo kĩa Ngai na kĩyo, ũkĩĩruta maũndũ marĩa endaga twĩke na nĩ wathikĩrĩirie morutani ma Jesu. Nĩ werutire atĩ Jehova endaga tũregane na morutani ma ndini cia maheeni, na tũtige kũnyitanĩra ikũngũĩro-inĩ iria ciumanĩte na ndini icio. Ningĩ nĩ werutire atĩ gwĩka ũrĩa Jehova endaga, na gũtigana na mĩtugo ĩrĩa ĩtamũkenagia nĩguo wĩtĩkĩrĩke nĩwe no ũkorũo ũtarĩ ũndũ mũhũthũ. (Mat. 10:34-36) No gũkorũo ndwarĩ ũndũ mũhũthũ gwĩka mogarũrũku marĩa maabataranagia. O na kũrĩ ũguo, nĩ wathiire na mbere kwĩrutanĩria tondũ nĩ wendete Ithe witũ wa igũrũ. No mũhaka akorũo nĩ akenagio mũno nĩwe.—Thim. 27:11. w21.12 22 ¶3; 23 ¶5

Musa nĩ aaigire kĩonereria kĩega tondũ nĩ eetĩkĩrire kũrũngwo rĩrĩa eekire mehia maritũ. Kũrĩ hĩndĩ ĩmwe aarakarire na akĩaga gũtĩithia Jehova. Ũndũ ũcio nĩ watũmire orũo nĩ mweke wa kũingĩra Bũrũri wa Kĩĩranĩro. (Ndar. 20:1-13) Rĩrĩa Musa aathaithire Jehova agarũrĩre meciria make igũrũ rĩgiĩ ũndũ ũcio, Jehova aamwĩrire ũũ: “Ndũkananjĩre ũhoro ũcio rĩngĩ.” (Gũcok. 3:23-27) Ũndũ ũcio ndwatũmire Musa arakare. Handũ ha ũguo, nĩ eetĩkĩrire itua rĩa Jehova, na Jehova agĩthiĩ na mbere kũmũhũthĩra gũtongoria Aisiraeli. (Gũcok. 4:1) Nĩ twagĩrĩirũo kwĩgerekania na Musa tondũ nĩ aatũigĩire kĩonereria kĩega harĩ gwĩtĩkĩra ũtaaro. Musa nĩ oonanirie atĩ nĩ eetĩkĩrire ũtaaro wa Jehova tondũ nĩ aathiire na mbere gũkorũo arĩ mwĩhokeku o na thutha wa kũũrũo nĩ mweke warĩ wa bata mũno harĩ we. Nĩ tũgunĩkaga rĩrĩa twegerekania na cionereria cia andũ maarĩ ehokeku ta Musa. (Thim. 4:11-13) Aarĩ na ariũ a Ithe witũ aingĩ nĩ megerekanĩtie nao. w22.02 11 ¶9-10

Mwaka wa 32 M.M., mũrata wa Jesu wetagwo Lazaro nĩ aarwarire na agĩkua. (Joh. 11:3, 14) Lazaro aarĩ na aarĩ a nyina erĩ, Mariamu na Maritha, na Jesu nĩ eendete famĩlĩ yao mũno. Rĩrĩa Maritha aaiguire atĩ Jesu nĩ aroka, agĩtengʼera kũmũtũnga. Ta hũũra mbica kĩeha kĩrĩa aarĩ nakĩo akĩra Jesu ũũ: “Mwathani, korũo ũrarĩ gũkũ, mũrũ wa maitũ ndangĩrakuire.” (Joh. 11:21, 32, 33) Jesu nĩ aarĩrire thutha wa kuona ũrĩa Mariamu na Maritha maahutĩtio nĩ gĩkuũ kĩa mũrũ wa nyina. Angĩkorũo wanakuĩrũo nĩ mũndũ wendete, Jehova nĩ ataũkagĩrũo nĩ ũrĩa ũraigua. Jesu nĩwe “mũhianĩre mũkinyanĩru” wa ũrĩa Ithe atariĩ. (Ahib. 1:3) Rĩrĩa Jesu aarĩrire, nĩ oonanirie ũrĩa Ithe aiguaga rĩrĩa mũndũ akuĩrũo nĩ mũndũ endete. (Joh. 14:9) Angĩkorũo nĩ ũkuĩrĩirũo nĩ mũndũ wendete, no ũkorũo na ma atĩ Jehova nĩ onaga kĩeha gĩaku, na nĩ akũiguagĩra tha. Nĩ ehaarĩirie gũkũhonia ruo rwa ngoro.—Thab. 34:18; 147:3. w22.01 15 ¶5-7

Ũngĩhũthagĩra mahinda kwaria na Jehova, kũmũthikĩrĩria, na gwĩciria ũhoro wake, nĩ ũrĩgunĩkaga mũno. Wa mbere, nĩ ũrĩhotaga gũtua matua mega. Bibilia yugaga atĩ “mũndũ ũrĩa ũtwaranaga na andũ arĩa ogĩ nĩ arĩũhĩgaga.” (Thim. 13:20) Wa kerĩ, nĩ ũgũtuĩka mũrutani mwega. Rĩrĩa tũreruta na mũndũ Bibilia, muoroto witũ ũrĩa mũnene nĩ kũmũteithia gũkuhĩrĩria Jehova. O ũrĩa tũrĩaranagĩria kaingĩ na Ithe witũ wa matu-inĩ, noguo wendo witũ harĩ we ũrĩkũraga na noguo tũrĩkoragwo twĩhaarĩirie gũteithia arutwo aitũ kũmwenda. Ta wĩcirie ũhoro wa kĩonereria kĩa Jesu. Aaragia ũhoro wa Ithe akĩhũthĩra ciugo njega ironania wendo, na ũndũ ũcio nĩ wateithirie arũmĩrĩri ake ehokeku kwenda Jehova o nao. (Joh. 17:25, 26) Wa gatatũ, wĩtĩkio waku nĩ ũrĩgĩaga na hinya makĩria. Gũthiaga atĩa rĩrĩa wahoya Ngai agũtongorie, akũũmĩrĩrie, kana agũteithie? Hĩndĩ ciothe rĩrĩa Jehova acokia mahoya maku, wĩtĩkio waku nĩ wongererekaga.—1 Joh. 5:15. w22.01 30 ¶15-17

Jehova atwĩraga tweherie biũ mwĩcirĩrie mũũru na mĩtugo mĩũru tondũ nĩ atwendete mũno na nĩ endaga tũkenere ũtũũro. (Isa. 48:17, 18) Nĩ amenyaga atĩ arĩa matethemaga merirĩria moru nĩ metuurithagia na magatuurithia arĩa angĩ. Nĩ aiguaga ũũru ona tũgĩĩtuurithia ithuĩ ene na tũgĩtuurithia arĩa angĩ. Arata amwe aitũ na andũ a famĩlĩ kĩambĩrĩria-inĩ no matũnyũrũrie mona tũkĩgeria gũcenjia ũmũndũ witũ. (1 Pet. 4:3, 4) No mauge atĩ twĩna kĩhooto gĩa gwĩka ũrĩa wothe tũrenda na atĩ tũtiagĩrĩirũo kũreka andũ angĩ matwĩre ũrĩa twagĩrĩirũo gwĩka. No andũ arĩa maregaga kũrũmĩrĩra ithimi cia Jehova matikoragwo na wĩyathi wa ma. Ma nĩ atĩ, marekaga mwĩcirĩrie wa thĩ ĩno ĩrĩ rungu rwa Shaitani ũmatongorie. (Rom. 12:1, 2) Ithuothe nĩ twagĩrĩirũo gũtua kana tũgũtũũria ũmũndũ wa tene ũrĩa ũtongoragio nĩ mehia na thĩ ya Shaitani, kana nĩ tũgwĩtĩkĩria Jehova atũthondeke tũtuĩke andũ ega o ũrĩa kũngĩhoteka ihinda-inĩ rĩrĩ.—Isa. 64:8. w22.03 3 ¶6-7

Rĩrĩa twecũrania maũndũ marĩa marĩ Kiugo-inĩ kĩa Ngai, nĩ tũgĩaga na mwerekera ũrĩa wagĩrĩire kwerekera mathĩna maitũ. Ta wĩcirie ũrĩa Bibilia yateithirie mwarĩ wa Ithe witũ ũmwe wakuĩrĩirũo nĩ mũthuri wake. Mũthuri ũmwe wa kĩũngano nĩ aamwĩkĩrire ngoro athome ibuku rĩa Ayubu, rĩrĩa rĩngĩamũteithirie kwĩruta maũndũ ma bata. Athoma, ũndũ wa mbere eekire nĩ kũmenereria mwĩcirĩrie mũũru wa Ayubu. Eeyũragia: “Nĩ kĩĩ gĩatũmaga Ayubu akorũo na mwĩcirĩrie mũũru ũguo?” No nĩ aacokire akĩona atĩ o nake aarĩ na mwerekera o ta ũcio wa Ayubu. Ũndũ ũcio nĩ wamũteithirie kũgarũrĩra mwĩcirĩrie wake, na ũkĩmũhe hinya wa kũhiũrania na ruo rwa gũkuĩrũo nĩ mũthuri wake. Njĩra ĩngĩ Jehova ahũthagĩra gũtũhe hinya nĩ kũgerera Akristiano arĩa angĩ. Paulo aandĩkire atĩ nĩ eeriragĩria mũno ‘gwĩkĩrana ngoro’ na aarĩ na ariũ a Ithe witũ arĩa angĩ.—Rom. 1:11, 12. w21.05 22 ¶10-11; 24 ¶12

Aisiraeli meerĩtwo ũũ: “Maita matatũ o mwaka, arũme anyu othe no mũhaka mathiage mbere ya Jehova Ngai waku handũ harĩa agaathuura.” (Gũcok. 16:16) Mathiĩ, mangĩatigire mĩciĩ yao na mĩgũnda yao hatarĩ mũndũ wa gũcigitĩra. No Jehova aameerĩire ũũ: “Gũtirĩ mũndũ ũrĩĩriragĩria bũrũri wanyu hĩndĩ ĩyo mũrĩkoragwo mũgĩthiĩ mbere ya Jehova Ngai wanyu.” (Tham. 34:24) Tondũ Aisiraeli nĩ meehokete Jehova biũ, matiatĩraga ciathĩ icio cia o mwaka. Gwĩka ũguo nĩ gwatũmaga magunĩke na njĩra nyingĩ. Kwa ngerekano, nĩ moongagĩrĩra ũmenyo wĩgiĩ Watho wa Ngai, magecũrania igũrũ rĩgiĩ maũndũ mega marĩa Jehova amekĩire, na magakenera gũkorũo hamwe na athathaiya arĩa angĩ a Jehova. O na ithuĩ nĩ tũgunĩkaga na njĩra o ta icio rĩrĩa tweka ũrĩa wothe tũngĩhota nĩguo tũthiĩ mĩcemanio ya Gĩkristiano. Ningĩ hatarĩ nganja Jehova nĩ akenaga rĩrĩa twathiĩ tũhaarĩirie macokio makuhĩ ma gwaka andũ arĩa angĩ. w22.03 22 ¶9

Jehova aamenyeragia Jesu nĩ ũndũ wa wĩra ũrĩa angĩkehokerũo arĩ Mũthĩnjĩri-Ngai Mũnene. Jesu nĩ oonire ũrĩa arĩ ũndũ mũritũ harĩ mũndũ gwathĩkĩra Ngai rĩrĩa arĩ hatĩka-inĩ. Ũndũ ũcio nĩ watũmaga atangĩke mũno nginya akĩhoya “arĩ na kĩrĩro kĩnene na maithori.” Nĩ ũndũ wa kũgerera maũndũ macio maritũ, hatarĩ nganja Jesu nĩ ataũkagĩrũo nĩ mabataro maitũ na no ahote ‘gũtũteithia rĩrĩa tũragerio.’ Na githĩ tũticokagĩria Jehova ngatho nĩ ũndũ wa kwamũra Mũthĩnjĩri-Ngai Mũnene ũngĩhota “gũtũiguĩra tha maũndũ-inĩ marĩa twagĩte hinya”! (Ahib. 2:17; 4:14-16; 5:7-10) Jehova eetĩkĩririe Jesu anyarirũo na njĩra nene nĩgetha acokie kĩũria gĩkĩ kĩa bata: Hihi andũ no mahote gũtũũria wĩhokeku wao harĩ Jehova o na hĩndĩ ĩrĩa maragerera magerio maritũ? Shaitani ooigire gũtirĩ mũndũ ũngĩhota gwĩka ũguo. Oigaga atĩ andũ matungatagĩra Ngai nĩ ũndũ wa indo iria Ngai amaheaga na atĩ matiendete Jehova. (Ayub. 1:9-11; 2:4, 5) Jesu ndaatiganĩirie wĩkindĩru wake, na kwoguo akĩonania atĩ Shaitani nĩ mũheenania. w21.04 17 ¶7-8

Mũrutwo atanabatithio, nĩ agĩrĩire gũkorũo akĩhũthĩra maũndũ marĩa Bibilia ĩrutanaga. Rĩrĩa mũrutwo ahũthĩra maũndũ marĩa areruta, akoragwo atariĩ ta “mũndũ mũũgĩ” ũrĩa Jesu aagwetire ngerekano-inĩ yake, ũrĩa weenjire thĩ akĩrikia nĩguo ake nyũmba yake igũrũ rĩa rwaro rwa ihiga. (Mat. 7:24, 25; Luk. 6:47, 48) Teithia mũrutwo waku eke mogarũrũku ũtũũro-inĩ. (Mar. 10:17-22) Jesu nĩ aamenyaga atĩ nĩ ũngĩarĩ ũndũ mũritũ harĩ mũndũ ũmwe warĩ mũtongu kwendia indo ciake ciothe. (Mar. 10:23) O na kũrĩ ũguo, Jesu ndaagire kwĩra mũndũ ũcio eke ũgarũrũku ũcio mũnene ũtũũro-inĩ wake. Jesu eekire ũguo tondũ nĩ eendete mũndũ ũcio. Rĩmwe na rĩmwe no twĩtigĩre kwĩra mũrutwo ahũthĩre maũndũ marĩa areruta nĩ ũndũ wa kuona ta atehaarĩirie gwĩka mogarũrũku marĩa marabatarania. (Kol. 3:9, 10) Ĩndĩ o ũrĩa ũkwaria na ihenya na mũrutwo igũrũ rĩgiĩ ũgarũrũku ũrĩa arabatara gwĩka, noguo ekwambĩrĩria o na ihenya gũcenjia. Kwarĩrĩria nake ũhoro ũcio nĩ kuonanagia atĩ nĩ ũramũrũmbũiya.—Thab. 141:5; Thim. 27:17. w21.06 2 ¶3; 3 ¶5

Mũtũmwo Petero aaragia ũhoro wĩgiĩ kĩonereria kĩrĩa Jesu aaigire ũhoro-inĩ wĩgiĩ gũkirĩrĩria mĩnyamaro. O na kũrĩ ũguo, nĩ harĩ njĩra ingĩ nyingĩ tũngĩĩgerekania na kĩonereria kĩa Jesu nacio. (1 Pet. 2:18-25) Hatarĩ nganja, no twĩgerekanie na mũtũũrĩre wothe wa Jesu, na ũguo nĩ kuuga maũndũ mothe marĩa ooigire na agĩka. Tondũ tũrĩ andũ matarĩ akinyanĩru-rĩ, hihi no tũhote kũrũmĩrĩra kĩonereria kĩa Jesu? Ĩĩ no tũhote. Petero ndoigire tũrũmagĩrĩre makinya ma Jesu na njĩra nginyanĩru, no handũ ha ũguo aatwĩrire ‘twĩrutanagĩrie biũ kũrũmĩrĩra makinya’ ma Jesu. Tũngĩĩrutanagĩria biũ kũrũmagĩrĩra kĩonereria gĩake o na tũtarĩ akinyanĩru, tũrĩkoragwo tũgĩathĩkĩra ũtaaro wa mũtũmwo Johana ũrĩa ooigire: ‘Thiagai o ta ũrĩa Jesu aathiaga.’ (1 Joh. 2:6) Kũrũmĩrĩra makinya ma Jesu nĩ kũrĩtũteithagia gũkuhĩrĩria Jehova makĩria. Nĩ kĩĩ kĩngĩtũma tuuge ũguo? Jesu nĩ aatũigĩire kĩonereria kĩega biũ kĩa ũrĩa twagĩrĩirũo gwĩka nĩguo tũkenie Ngai. (Joh. 8:29) Kwoguo rĩrĩa twarũmĩrĩra makinya ma Jesu nĩ tũkenagia Jehova. Na twĩ na ma atĩ Ithe witũ wa igũrũ nĩ akuhagĩrĩria andũ arĩa merutanagĩria gũtuĩka arata ake.—Jak. 4:8. w21.04 3 ¶4-6

Jehova nĩ onaga ngumo citũ njega, akona atĩ no tũtuĩke andũ ega o na makĩria na kwoguo agatũgucĩrĩria harĩ we. Tũngĩtũũra tũrĩ ehokeku harĩ we, o nake egũtũũra arĩ hakuhĩ na ithuĩ tene na tene! (Joh. 6:44) Rĩrĩa twakorũo na ma atĩ Jehova nĩ atwendete, nĩ tũiguaga tũkĩenda gwĩka ũrĩa wothe tũngĩhota kũmũtungatĩra, o na rĩrĩa tũracemania na moritũ. No rĩrĩa twakorũo na nganja kana Ngai nĩ atũrũmbũyagia, ‘hinya witũ ũrĩkoragwo ũrĩ mũnini.’ (Thim. 24:10) Na rĩrĩa twakua ngoro na twaga gwĩtĩkia atĩ Ngai nĩ atwendete, nĩ tũrĩtooragio nĩ tharĩkĩro cia Shaitani. (Ef. 6:16) Gũkorũo na nganja nĩ gũtũmĩte wĩtĩkio wa Akristiano amwe ehokeku mahinda-inĩ maya wage hinya. Twagĩrĩirũo gwĩka atĩa tũngĩambĩrĩria gwĩciria atĩ Ngai ndatwendete? Twagĩrĩirũo kũregana na mwĩcirĩrie ũcio o na ihenya. Thaitha Jehova akwehererie “mĩtangĩko ya meciria” na akũhe ‘thayũ wa Ngai, ũrĩa ũgitagĩra ngoro yaku na ũhoti waku wa gwĩciria.’ (Thab. 139:23; Afil. 4:6, 7) Ningĩ ririkanaga atĩ ndũrĩ wiki. w21.04 20 ¶1; 21 ¶4-6

Hihi watuĩkire Mũira wa Jehova atĩa? Waambire ũkĩigua “ũhoro ũrĩa mwega,” hihi kuuma kũrĩ aciari aku, mũndũ mwarutithanagia wĩra nake kana mwathomaga nake, kana hihi kũgerera mahunjio ma nyũmba kwa nyũmba. (Mar. 13:10) Thutha ũcio harĩ mũndũ wekĩrire kĩyo kĩingĩ na akĩhũthĩra mahinda maingĩ hamwe nawe agĩkũruta Bibilia. Kũgerera wĩruti ũcio nĩ weendire Jehova na ũkĩmenya atĩ nĩ akwendete. Jehova nĩ aakũgucĩrĩirie ũhoro-inĩ wa ma, na rĩu tondũ ũrĩ mũrutwo wa Jesu Kristo, ũrĩ na kĩĩrĩgĩrĩro gĩa gũgaatũũra tene na tene. (Joh. 6:44) No mũhaka akorũo nĩ ũcokagĩria Jehova ngatho tondũ nĩ aahũthĩrire mũndũ gũkũruta ũhoro wa ma na agĩgwĩtĩkĩra ũtuĩke ndungata yake. Tondũ nĩ tũmenyete ũhoro wa ma, tũrĩ na mweke wa gũteithia andũ arĩa angĩ kũgerera njĩra-inĩ ya muoyo hamwe na ithuĩ. No ũkorũo ũrĩ ũndũ mũhũthũ harĩ ithuĩ kũhunjia nyũmba kwa nyũmba, ĩndĩ tũigue tũkĩritũhĩrũo kwambĩrĩria kwĩruta Bibilia na mũndũ. w21.07 2 ¶1-2