Dicemba

Hihi Mũethiopia ũrĩa warĩ mũnene kwa mũthamaki nĩ eehaarĩirie biũ kũbatithio? Ta wĩcirie ũndũ ũyũ: Mũethiopia ũcio “aathiĩte Jerusalemu gũthathaiya.” (Atũm. 8:27) Kwoguo no mũhaka akorũo nĩ aagarũrũkĩte agatuĩka Mũyahudi. Hatarĩ nganja, nĩ eerutĩte ũhoro wĩgiĩ Jehova kuuma Maandĩko-inĩ ma Kĩhibirania. Ĩndĩ no eendaga kwĩruta makĩria. Rĩrĩa Filipu aacemanirie na Mũethiopia ũcio njĩra-inĩ, aamũkorire agĩthoma gĩkũnjo kĩa mũnabii Isaia. (Atũm. 8:28) Nĩ eendaga gũthiĩ na mbere kwĩruta. Aathiire thabarĩ ndaihu mũno kuuma Ethiopia nĩguo agathathaiye Jehova hekarũ-inĩ ĩrĩa yarĩ Jerusalemu. Mũethiopia ũcio nĩ eerutire ma cia bata kuuma kũrĩ Filipu, ta kũmenya Mesia nũũ. (Atũm. 8:​34, 35) Wendo wake harĩ Jehova na harĩ Mũrũwe nĩ wakũrire. Nĩ aatindĩkirũo gũtua itua rĩa bata mũno rĩa kũbatithio atuĩke mũrũmĩrĩri wa Jesu Kristo. Thutha wa Filipu kuona atĩ mũndũ ũcio nĩ eehaarĩirie, nĩ aamũbatithirie. w23.03 8-9 ¶3-6

Tũtingĩkenia Jehova angĩkorũo tũtiaragia ma. (Thim. 6:​16, 17) O na gũtuĩka andũ aingĩ meciragia atĩ kwaria maheeni nĩ ũndũ mwĩtĩkĩrĩku, ithuĩ twĩthemaga kwaria maheeni tondũ nĩ ũndũ mũũru maitho-inĩ ma Jehova. (Thab. 15:​1, 2) Hatarĩ nganja, nĩ twĩthemaga kwaria maheeni ma ĩmwe kwa ĩmwe, na ningĩ tũgethema kũhithĩrĩra maũndũ mamwe nĩguo tũhĩngĩce andũ arĩa angĩ. Ningĩ nĩ twagĩrĩirũo gwĩthema kwaragia ndeto njũru ciĩgiĩ andũ arĩa angĩ. (Thim. 25:23; 2 Thes. 3:11) Ũngĩona ndeereti yambĩrĩria gũkorũo na ndeto njũru cia arĩa angĩ, garũrĩra na warĩrĩrie ũndũ ũngĩ wa gwaka. Tondũ tũratũũra thĩ ĩrĩ na andũ aingĩ maragia mĩario mĩũru, nĩ twagĩrĩirũo kwĩrutanĩria gũtigĩrĩra atĩ mĩario itũ nĩ ĩrakenia Jehova. Nĩ arĩtũrathimaga rĩrĩa twerutanĩria kwaria mĩario mĩega tũrĩ ũtungata-inĩ, mĩcemanio-inĩ, na tũkĩaranĩria na andũ arĩa angĩ. Rĩrĩa Jehova akaaniina thĩ ĩno njũru nĩ ũgaakorũo ũrĩ ũndũ mũhũthũ kũmũgoocithia kũgerera mĩario itũ.—Jud. 15. w22.04 9 ¶18-20

Rĩrĩa twecũrania ũrĩa Jehova na Jesu matwendete, nĩ tũtindĩkagwo kũmenda. (1 Joh. 4:10) Nĩ tũmendaga o na makĩria, rĩrĩa twamenya atĩ Jesu aakuire nĩ ũndũ wa o ũmwe witũ. Mũtũmwo Paulo nĩ aamenyaga ũndũ ũcio, na akĩonania ngatho ciake na ciugo ici aandĩkĩire Agalatia akiuga: ‘Mũrũ wa Ngai nĩ aanyendire na akĩĩneana we mwene nĩ ũndũ wakwa.’ (Gal. 2:20) Tondũ Jesu nĩ aakuire nĩ ũndũ witũ, Jehova no akũgucĩrĩrie kũrĩ we ũtuĩke mũrata wake. (Joh. 6:44) Na githĩ ndũkenaga mũno kũmenya atĩ Jehova nĩ onete kĩndũ kĩega thĩinĩ waku, na nĩ aarutire irĩhi rĩa goro mũno nĩgetha ũtuĩke mũrata wake? No mũhaka akorũo ũndũ ũcio nĩ wĩkĩraga hinya wendo waku harĩ Jehova na Jesu. Kwoguo nĩ twagĩrĩirũo kwĩyũria, ‘Wendo ũcio ũkũndindĩka gwĩka atĩa?’ Wendo witũ harĩ Ngai na Kristo nĩ ũtũtindĩkaga kuonia arĩa angĩ wendo.—2 Kor. 5:​14, 15; 6:​1, 2. w23.01 28 ¶6-7

Bibilia nĩ ĩhingagia itemi rĩa bata muoroto-inĩ wa Jehova wa gũteithia ndungata ciake “[kũmũtungatĩra] irĩ na ũrũmwe.” Jehova andĩkithirie icunjĩ nyingĩ cia Maandĩko na njĩra ingĩtaũkĩka o kũrĩ athomi arĩa enyihia tu. (Luk. 10:21) Andũ kũndũ guothe nĩ mathomaga Bibilia. No andũ arĩa enyihia no o tu mataũkagĩrũo nĩyo wega, na makahũthĩra maũndũ marĩa ĩrutanaga. (2 Kor. 3:​15, 16) Bibilia nĩ yonanagia ũũgĩ wa Jehova. Jehova ndahũthagĩra Maandĩko o gũtũruta tũrĩ gĩkundi tu, no ningĩ nĩ amahũthagĩra gũtũruta na gũtũũmĩrĩria tũrĩ mũndũ ũmwe ũmwe. Rĩrĩa tũrathoma Kiugo gĩake, nĩ tuonaga ũrĩa Jehova atwĩciragia. (Isa. 30:21) Nĩ maita maigana wanathiĩ gũthoma Maandĩko na ũgathoma mũhari ũroneka ta wandĩkĩtwo no ũndũ waku? No ma nĩ atĩ Bibilia ĩhutagia ngoro cia andũ milioni nyingĩ. Ĩhotaga atĩa gũkorũo na ũhoro ũratwarana na mahinda na ũratwarana na mabataro maku? Ũndũ ũcio ũhotekaga tondũ Mũtungi wa Bibilia nĩwe Ũrĩa mũũgĩ mũno igũrũ na thĩ.—2 Tim. 3:​16, 17. w23.02 4-5 ¶8-10

Tondũ tũrĩ Akristiano a ma, nĩ twendete Jehova mũno. Tũngĩenda kũhe Jehova kĩrĩa kĩega biũ rĩrĩa tũramũtungatĩra. Nĩguo tũhote gwĩka ũguo, nĩ tũrabatara kwĩigĩra mĩoroto ya kĩĩroho ta gũkũria ngumo cia Gĩkristiano, kwĩruta maũndũ matiganĩte, na gũcaria njĩra cia gũtungatagĩra andũ arĩa angĩ. Nĩ kĩĩ gĩtũmaga twende gũthiĩ na mbere gũkũra kĩĩroho? Gĩtũmi kĩnene nĩ tondũ nĩ twendete gũkenia Ithe witũ wa igũrũ. Jehova nĩ akenaga rĩrĩa ona tũkĩhũthĩra iheo na ũhoti witũ o ũrĩa wothe twahota ũtungata-inĩ wake. Makĩria ma ũguo, twendaga gũkũra kĩĩroho nĩguo tũhotage gũteithĩrĩria aarĩ na ariũ a Ithe witũ na njĩra nene makĩria. (1 Thes. 4:​9, 10) Gũtekũmakania ihinda rĩrĩa tũkoretwo ũhoro-inĩ wa ma, ithuothe no tũhote gũthiĩ na mbere gũkũra kĩĩroho. w22.04 22 ¶1-2

Ica ikuhĩ thirikari cia thĩ nĩ igũtharĩkĩra Babuloni Ũrĩa Mũnene, nĩwe ndini ciothe cia maheeni gũkũ thĩ. Ũndũ ũcio ũgaakorũo ũrĩ kĩambĩrĩria gĩa thĩna ũrĩa mũnene. Hihi thĩna ũcio nĩ ũgaatũma andũ aingĩ moke ũthathaiya-inĩ wa Jehova? Aca. Ngũrani na ũguo, Kũguũrĩrio mũrango wa 6 yonanagia atĩ ihinda-inĩ rĩu, andũ arĩa matagaakorũo magĩtungatĩra Jehova magaacaria ũgitĩri kuuma kũrĩ mathondeka ma gĩũteti na ma kĩbiacara ma thĩ ĩno marĩa maringithanĩtio na irĩma. Tondũ andũ acio matigaakorũo makĩnyita mbaru Ũthamaki wa Ngai, Jehova akaamona marĩ aregani. (Luk. 11:23; Kũg. 6:15-17) Ihinda-inĩ rĩu iritũ rĩa thĩna ũrĩa mũnene, andũ a Jehova ehokeku nĩ magaakorũo marĩ ngũrani na andũ arĩa angĩ. No o tu thĩinĩ wa thĩ magaakorũo magĩtungatĩra Jehova Ngai na makarega kũnyita mbaru “nyamũ ya gĩthaka.”—Kũg. 13:14-17. w22.05 16-17 ¶8-9

To “ũhoro [ũrĩa] mwega wa Ũthamaki” tu andũ a Ngai marabatara kũhunjia. (Mat. 24:14) Nĩ marabatara nginya gũteithĩrĩria wĩra-inĩ ũrĩa ũrarutwo nĩ araika arĩa mataarĩirio thĩinĩ wa Kũguũrĩrio mũrango wa 8 nginya wa 10. Araika acio managĩrĩra ũhoro wĩgiĩ mahũũra marĩa magaakora andũ arĩa mareganaga na Ũthamaki wa Ngai. Nĩ ũndũ ũcio, Aira a Jehova nĩ makoretwo makĩhunjia ndũmĩrĩri ya ituĩro ĩrĩa ĩhaanainio na “mbura ya mbembe na mwaki,” na yonanagia matuĩro ma Ngai igũrũ rĩgiĩ thĩ ĩno ya Shaitani. (Kũg. 8:7, 13) Andũ nĩ marabatara kũmenya atĩ mũico nĩ ũkuhĩrĩirie nĩguo meke mogarũrũku mĩtũũrĩre-inĩ yao, nĩgetha makaahonoka mũthenya wa marakara ma Jehova. (Zef. 2:2, 3) No ndũmĩrĩri ĩyo ndĩendetwo nĩ andũ aingĩ. Nĩ tũbataraga gũkorũo na ũmĩrĩru nĩguo tũmĩheane. Hĩndĩ ya thĩna ũrĩa mũnene, ndũmĩrĩri ya mũico ya ituĩro nĩ ĩkaarakaria andũ o na makĩria.—Kũg. 16:21. w22.05 6-7 ¶18-19

Ta wĩcirie ũhoro wa mũthuri na mũtumia wake rĩrĩa marĩ hakuhĩ kũgĩa mwana. Kwa ihinda rĩa mĩaka mĩingĩ, no makorũo mathikĩrĩirie mĩario mĩingĩ ya Bibilia ĩgiĩ ũhoro wa kũrera ciana. No rĩu tondũ nĩ mekwambĩrĩria kũrera mwana, motaaro macio marĩkoragwo marĩ ma bata mũno harĩ o. Marĩ na ũigĩrĩrĩki mũnene! Kwoguo rĩrĩa maũndũ maitũ macenjia ũtũũro-inĩ, maandĩko mamwe nĩ matuĩkaga ma bata mũno harĩ ithuĩ. Ũcio nĩ ũndũ ũmwe ũtũmaga athathaiya a Jehova mathome Maandĩko na mamecũũranie “matukũ-inĩ mothe” ma ũtũũro wao, o ta ũrĩa athamaki a Isiraeli meerĩtwo mekage. (Gũcok. 17:19) Aciari, mũrĩ na mweke wa mwanya mũno wa kũruta ciana cianyu igũrũ rĩgiĩ Jehova. No nĩ mũrabatara gwĩka makĩria ma kũruta ciana cianyu igũrũ rĩgiĩ Ngai. Nĩ mwagĩrĩirũo kũruta ciana cianyu kwenda Jehova biũ. w22.05 26 ¶2-3

Kũigua ũũru nĩ ũndũ wa mĩthiĩre mĩũru kana nĩ ũndũ wa mehia marĩa twĩkĩte ti kũiganu. No mũhaka tũkorũo twĩhaarĩirie kuoya ikinya. Ũndũ ũmwe wa bata Jehova aroraga agĩtua kana nĩ ekuohera mũndũ nĩ kana nĩ agarũrũkĩte. Kũgarũrũka nĩ kuuga mũndũ no mũhaka atigane na maũndũ moru marĩa arekaga na ambĩrĩrie gũtũũra kũringana na wendi wa Jehova. (Isa. 55:7) No mũhaka mũndũ agarũrĩre mwĩcirĩrie wake, nĩguo atongoragio nĩ mwĩcirĩrie wa Jehova. (Rom. 12:2; Ef. 4:23) No mũhaka akorũo atuĩte itua rĩa gũtigana na mwĩcirĩrie mũũru na mĩthiĩre mĩũru ya hau kabere. (Kol. 3:7-9) O na kũrĩ ũguo, Jehova atuohagĩra na agatũtheria mehia maitũ kũgerera mũthingi wa wĩtĩkio witũ harĩ igongona rĩa Kristo. Jehova atuohagĩra kũgerera mũthingi wa igongona rĩu rĩrĩa ona atĩ nĩ tũrerutanĩria kũgarũrĩra mĩthiĩre itũ.—1 Joh. 1:7. w22.06 6 ¶16-17

Kuuma o tene, andũ nĩ mekaga andũ arĩa angĩ maũndũ moru. (Koh. 8:9) Kwa ngerekano, anene nĩ mahũthagĩra ũnene wao ũũru, eki-naĩ nao mageka maũndũ moru ma wĩki-naĩ, ciana iria nemi cukuru ikanyũrũria na ikehĩtĩra ciana iria ingĩ, na andũ amwe mageka andũ a famĩlĩ ciao maũndũ matarĩ ma tha. Nĩkĩo andũ metigagĩra arĩa angĩ. Shaitani ahũthagĩra atĩa guoya ũcio wa gwĩtigĩra andũ? Shaitani no atũme tũtige kũhunjia kana gwathĩkĩra Jehova nĩ ũndũ wa gwĩtigĩra andũ. Thirikari nĩ ihũũraga wĩra witũ marubuku na igatũnyarira igĩtongorio nĩ Shaitani. (Luk. 21:12) Ningĩ thĩinĩ wa thĩ ĩno ya Shaitani andũ aingĩ nĩ matheremagia ndeto njũru na cia maheeni ciĩgiĩ Aira a Jehova. Andũ arĩa metĩkagia maheeni macio no matũnyũrũrie, o na kana matũtharĩkĩre. (Mat. 10:36) No tũtigegagio nĩ njĩra icio Shaitani ahũthagĩra gũtũũkĩrĩra, tondũ no tacio aahũthagĩra hĩndĩ ya karine ya mbere.—Atũm. 5:27, 28, 40. w22.06 16 ¶10-11

“Andũ aingĩ” arĩa makaarehwo harĩ ũthingu nĩa? Nĩ arĩa makaariũkio na arĩa makaahonoka hĩndĩ ya Hari–Magedoni o hamwe na ciana iria hihi igaaciarũo thĩinĩ wa thĩ njerũ. Gũkinyĩria mũthia wa mĩaka ĩrĩa 1,000, arĩa othe magaakorũo thĩinĩ wa thĩ magaakorũo marĩ akinyanĩru. No mũhaka tũririkanage atĩ gũkorũo mũndũ arĩ mũkinyanĩru ti kuuga atĩ no mũhaka akoona muoyo wa tene na tene. Ta wĩcirie ũhoro wa Adamu na Hawa. Maarĩ akinyanĩru, no nĩ maabataraga kuonania wathĩki wao harĩ Jehova Ngai mbere ya maheetwo muoyo wa tene na tene. Na ũndũ wa kĩeha nĩ atĩ nĩ maagire kũmwathĩkĩra. (Rom. 5:12) Tondũ andũ othe arĩa magaakorũo thĩinĩ wa thĩ mũthia-inĩ wa mĩaka ĩrĩa 1,000 magaakorũo matuĩkĩte akinyanĩru-rĩ, hihi andũ acio othe akinyanĩru nĩ makaanyita mbaru biũ wathani wa Jehova tene na tene? Kana amwe mageeka o ta Adamu na Hawa, arĩa maagire gwathĩka o na gũtuĩka maarĩ akinyanĩru? Ciũria icio nĩ ikaabatara gũcokio. w22.09 22-23 ¶12-14

Hihi nĩ ũritũhagĩrũo gwĩtĩkia atĩ maũndũ nĩ marĩagĩra warora ũrĩa thĩ ĩhaana ũmũthĩ? Famĩlĩ nĩ igayũkanĩte. Andũ marathiĩ o na mbere gũkorũo marĩ andũ a ngũĩ na andũ meyendete. Na andũ aingĩ nĩ maritũhagĩrũo kwĩhoka anene. No maũndũ macio no magũteithie gwĩtĩkia atĩ maũndũ nĩ marĩagĩra. Nĩkĩ? Tondũ andũ marĩ na mĩtugo o ta ĩrĩa yarathĩtwo ũrathi-inĩ wĩgiĩ ‘matukũ ma kũrigĩrĩria.’ (2 Tim. 3:​1-5) Gũtirĩ mũndũ ũngĩkararia atĩ ũrathi ũcio nĩ ũrahinga, na kũhinga kũu nĩ kũronania na ma biũ atĩ Jesu Kristo nĩ ambĩrĩirie gwathana arĩ Mũthamaki wa Ũthamaki wa Ngai. No ũcio no ũrathi ũmwe tu harĩ morathi maingĩ marĩa maragĩrĩria Ũthamaki wa Ngai. Morathi macio mothe maingĩranaga wega o ta tũcunjĩ tũharũkanĩtio wega nĩguo tũthondeke mbica ngʼima, magatũteithia gũtaũkĩrũo harĩa tũrĩ mũtaratara-inĩ wa Jehova wa maũndũ. w22.07 2 ¶1-2

Hĩndĩ ya kĩngʼũki gĩa COVID-19, nĩ twaamũkĩrire ũtongoria wĩgiĩ ũrĩa tũngĩthiĩ na mbere gwĩka mĩcemanio ya kĩũngano na kũhunjia. O na ihenya, tũkĩambĩrĩria kũhũthĩra Intaneti gwĩka mĩcemanio itũ ya Gĩkristiano na igomano. Ningĩ tũkĩambĩrĩria kũhunjia na gĩkĩro kĩnene kũgerera marũa na thimũ. Na Jehova nĩ arathimĩte kĩyo gitũ. Wabici nyingĩ cia honge ciaugire atĩ nĩ cionire wongerereku mũnene harĩ mũigana wa ahunjia. O na ahunjia aingĩ nĩ meeyoneire maũndũ maingĩ ma gwĩkĩra ngoro ihinda-inĩ rĩu. No kũhoteke andũ amwe nĩ moonaga ta ithondeka rĩrakĩria njano harĩ motaaro marĩa rĩraheana megiĩ kwĩmenyerera mũrimũ wa Korona. No hingo ciothe nĩ kuoonekaga atĩ motaaro marĩa rĩaheanaga maakoragwo marĩ ma ũũgĩ. O ũrĩa tũrecũrania ũrĩa Jesu akoretwo agĩtongoria andũ ake na njĩra ya wendo, noguo tũrĩkoragwo na ma atĩ o na maũndũ mangĩcenjia ihinda rĩũkĩte, Jehova na Mũrũwe Jesu nĩ marĩkoragwo hamwe na ithuĩ.—Ahib. 13:5, 6. w22.07 13 ¶15-16

Makĩria ma kũgooca Jehova mahoya-inĩ maitũ, nĩ wega kũmũcokeria ngatho nĩ ũndũ wa indo njega iria atũheaga. Kwa ngerekano, no tũmũcokerie ngatho nĩ ũndũ wa marangi mathaka marĩa tuonaga mahũa-inĩ, irio nyingĩ cia mĩthemba ĩtiganĩte, na arata ega. Ithe witũ ũrĩ wendo atũheaga indo icio na ingĩ nyingĩ nĩguo tũkenagĩre. (Thab. 104:​12-15, 24) Na ũndũ wa bata o na makĩria, nĩ tũcokagĩria Jehova ngatho nĩ ũndũ wa irio nyingĩ cia kĩĩroho iria atũheaga na nĩ ũndũ wa kĩĩrĩgĩrĩro kĩega kĩa ihinda rĩũkĩte. Nĩ ũhũthũ kũriganĩrũo gũcokia ngatho nĩ ũndũ wa maũndũ mothe marĩa Jehova atwĩkĩire. Nĩ kĩĩ kĩngĩgũteithia kũririkanaga? No wandĩke maũndũ marĩa ũhoete na ũgaikara ũkĩroraga ũrĩa Jehova acoketie mahoya maku. Ũcoke ũmũcokerie ngatho kũgerera mahoya nĩ ũndũ wa gũgũteithia.—Kol. 3:15. w22.07 22 ¶8-9

Nĩ tũũĩ atĩ kwĩruta ũhoro wa ma ti kũiganu. Nĩguo tũgunĩke biũ no mũhaka tũtũũre kũringana na ũhoro ũrĩa wa ma, na ũguo nĩ kuuga kũhũthĩra maũndũ marĩa tũreruta ũtũũro-inĩ witũ. Tũngĩka ũguo, norĩo tu ũhoro ũrĩa wa ma ũngĩtũrehera gĩkeno kĩa ma. (Jak. 1:25) Tũngĩka atĩa nĩguo tũtigĩrĩre atĩ nĩ tũratũũra kũringana na ũhoro ũrĩa wa ma? Mũrũ wa Ithe witũ ũmwe augaga atĩ nĩ wega mũndũ gwĩthuthuria one nĩ maũndũ marĩkũ ahotete kũhũthĩra na nĩ marĩkũ arabatara kũrutĩra wĩra. Mũtũmwo Paulo aaugire ũũ ũndũ-inĩ ũcio: “Harĩa tũrĩkĩtie gũkinya-rĩ, nĩ tũthiĩi na mbere na mĩthiĩre ĩrĩa yagĩrĩire na njĩra o ĩyo.” (Afil. 3:16) Ta wĩcirie ũrĩa tũgunĩkaga na njĩra nene rĩrĩa tweka ũrĩa wothe tũngĩhota “[gũthiĩ] na mbere kũrũmĩrĩra ũhoro ũrĩa wa ma.” Gwĩka ũguo nĩ kwagĩragia ũtũũro witũ, na ũndũ wa bata o na makĩria nĩ gũkenagia Jehova o hamwe na Akristiano arĩa angĩ. (Thim. 27:11; 3 Joh. 4) Icio nĩcio itũmi iria nene cia gũtũma twende ũhoro ũrĩa wa ma na tũtũũre kũringana naguo. w22.08 18-19 ¶16-18

Athuri a kĩũngano mangĩonania atĩa atĩ nĩ mendete Jehova na Jesu? Njĩra ĩmwe ya bata mũno mangĩka ũguo nayo nĩ kũrũmbũiya mabataro ma ngʼondu cia Jesu. (1 Pet. 5:​1, 2) Jesu nĩ oonanirie bata wa ũndũ ũcio rĩrĩa aaragia na mũtũmwo Petero. Thutha wa gũkaana Jesu maita matatũ, no kũhoteke Petero nĩ aarĩ na wendi mũnene wa kuonia Jesu atĩ nĩ amwendete. Thutha wa Jesu kũriũkio, nĩ ooririe Petero ũũ: “Simoni mũrũ wa Johana, nĩ ũnyendete?” No tũkorũo na ma atĩ Petero nĩ angĩekire ũndũ o wothe kuonania wendo wake harĩ Mwathi wake. Jesu aamwĩrire ũũ: “Rĩithagia tũgondu twakwa.” (Joh. 21:​15-17) Ũtũũro-inĩ wake wothe, Petero nĩ aarũmbũirie ngʼondu cia Mwathani na njĩra ya wororo, na kwoguo akĩonania wendo wake harĩ Jesu. Athuri a kĩũngano, hihi mũngĩonania atĩa atĩ ciugo cia Jesu kũrĩ Petero nĩ cia bata harĩ inyuĩ? No muonanie wendo wanyu harĩ Jehova na Jesu na njĩra ya gwetha mahinda hingo ciothe kũũmĩrĩria aarĩ na ariũ a Ithe witũ, na kwĩrutanĩria gũteithia arĩa mahwererekeire kĩĩroho macokerere Jehova.—Ezek. 34:​11, 12. w23.01 29 ¶10-11

Wĩtheme ũgwati wa gwĩciria atĩ gũtirĩ mũndũ ũngĩ ũngĩtaũkĩrũo nĩ igerio rĩrĩa ũragerera. Gwĩciria na njĩra ĩyo no gũtũme ũigue ta ũkinyĩte mũico, na ũigue ta ũtarĩ na hinya wa kũrũa na merirĩria matagĩrĩire. Bibilia yonanagia ũndũ ngũrani na ũcio. Yugaga ũũ: “Hĩndĩ ya igerio nĩ arĩmũheaga njĩra ya kuumĩrĩra nĩguo mũkahota kũrĩkirĩrĩria.” Kwoguo o na rĩrĩa merirĩria matarĩ mega makorũo na hinya, no tũhote kũmatooria na tũikare tũrĩ ehokeku harĩ Jehova. Kũgerera ũteithio wa Jehova, no tũhote gwĩthema gwĩka kũringana na merirĩria macio moru. Hingo ciothe ririkanaga ũndũ ũyũ: Tondũ ndũrĩ mũkinyanĩru, ndũngĩhota kũgirĩrĩria merirĩria moru gũka meciria-inĩ. No rĩrĩa moka, no ũhote kũregana namo o na ihenya o ta ũrĩa Jusufu eekire rĩrĩa oorĩire mũtumia wa Potifa. (Kĩam. 39:12) To mũhaka wathĩkĩre merirĩria macio moru. w23.01 12-13 ¶16-17

Jehova nĩ arĩ kĩhooto. (Gũcok. 32:4) Kĩhooto nĩ kĩhutanĩtie na kwaga mũthutũkanio, na Jehova ndarĩ mũthutũkanio. (Atũm. 10:​34, 35) Nĩ oonanirie atĩ ndarĩ mũthutũkanio kũgerera thiomi iria ciahũthĩrirũo kwandĩka Bibilia. Jehova eeranĩire atĩ ihinda-inĩ rĩa mũthia “ũmenyo ũrĩa wa ma” ũrĩ thĩinĩ wa Bibilia ‘nĩ ũngĩkaaingĩha.’ Andũ aingĩ nĩ mangĩgataũkĩrũo nĩguo. (Dan. 12:4) Ũndũ ũmwe ũteithĩtie ũmenyo ũcio wa ma kũingĩha nĩ atĩ Bibilia na mabuku megiĩ Bibilia nĩ mataũrĩtwo, magacabwo, na magakinyĩrio andũ aingĩ. Andũ a Jehova nĩ mataũrĩte Bibilia ĩrĩ yothe kana icunjĩ ciayo na thiomi makĩria ma 240, na mũndũ o wothe no agĩe nayo hatarĩ marĩhi. Nĩ ũndũ ũcio, andũ kuuma ndũrĩrĩ-inĩ ciothe nĩ mareruta ‘ũhoro mwega wa Ũthamaki’ mũico ũtanakinya. (Mat. 24:14) Ngai witũ ũrĩ kĩhooto endaga andũ aingĩ o ũrĩa kwahoteka magĩe na mweke wa kũmũmenya kũgerera gũthoma Kiugo gĩake. Endaga ũguo tondũ nĩ atwendete mũno ithuothe. w23.02 5 ¶11-12

Hihi wee nĩ wendete ũthingu? Hatarĩ nganja nĩ ũwendete. No ithuothe tũtirĩ akinyanĩru, na tũngĩaga kwĩmenyerera, muonere wa thĩ ĩno wĩgiĩ ũthingu no ũtũhutie na njĩra hũthũ. (Isa. 5:20) Rĩrĩa andũ aingĩ maigua ũhoro wa mũndũ mũthingu, no mecirie nĩ mũndũ mwĩtĩi, ũroraga mahĩtia ma andũ arĩa angĩ, na wĩyonaga atĩ we nĩ mwega gũkĩra andũ arĩa angĩ. No Jehova ndendete ngumo ta icio o na hanini. Rĩrĩa Jesu aarĩ gũkũ thĩ, nĩ aamenereirie atongoria a ndini a hĩndĩ ĩyo, nĩ ũndũ wa kwĩigĩra ithimi ciao ene cia ũthingu. (Koh. 7:16; Luk. 16:15) Mũndũ mũthingu ndeyonaga arĩ mwega gũkĩra andũ arĩa angĩ. Ũthingu nĩ ngumo njega mũno. Na njĩra nguhĩ, ũthingu nĩ gwĩka ũndũ ũrĩa Jehova onaga wagĩrĩire. Thĩinĩ wa Bibilia, ciugo iria cionanagia “ũthingu,” irehaga rĩciria rĩa mũndũ ũratũũra kũringana na ithimi cia gĩkĩro kĩa igũrũ cia Jehova. w22.08 27 ¶3-5

Jesu nĩ eehokaga arutwo ake o na akorũo nĩ maahĩtagia. (Joh. 15:16) Rĩrĩa Jakubu na Johana mooririe Jesu amahe gaturũa ka mwanya Ũthamaki-inĩ, Jesu ndeekĩrĩire nganja muoroto wao wa gũtungatĩra Jehova, o na kana akĩmatigithia gũtuĩka atũmwo. (Mar. 10:​35-40) Thutha-inĩ, arutwo othe a Jesu nĩ maamũtiganĩirie ũtukũ ũrĩa aanyitirũo. (Mat. 26:56) No Jesu ndaatigire kũmehoka. Nĩ aamenyaga ũhoro wa mawathe mao, ĩndĩ “[aamendire] o nginya mũthia.” (Joh. 13:1) Thutha wa kũriũkio, Jesu o na nĩ aaheire atũmwo ake 11 ehokeku mweke wa bata wa gũtongoria wĩra wa kũhunjia na kũrũmbũiya ngʼondu ciake. (Mat. 28:​19, 20; Joh. 21:​15-17) Nĩ aarĩ na itũmi njega cia kwĩhoka arũme acio mataarĩ akinyanĩru. Othe maatungatire marĩ ehokeku nginya mũthia wa ũtũũro wao gũkũ thĩ. Hatarĩ nganja, Jesu nĩ atũigĩire kĩonereria kĩega gĩa kwĩhoka andũ matarĩ akinyanĩru. w22.09 6 ¶12

Tũngĩkoragwo na ma atĩ Jehova nĩ atwendete na nĩ arĩkoragwo mwena witũ, nĩ tũrĩhotaga gwĩtiiria rĩrĩa Shaitani arageria gũtũma twĩtigĩre. Kwa ngerekano, mwandĩki wa Thaburi ya 118 nĩ aacemanirie na maũndũ maritũ mũno. Aarĩ na thũ nyingĩ, nginya andũ maarĩ na tũturũa twa ũnene (mũhari wa 9, 10). Rĩmwe na rĩmwe nĩ aaiguaga ahatĩkĩtwo mũno (mũhari wa 13). Ningĩ kũrĩ hĩndĩ aarũngirũo na njĩra nditũ nĩ Jehova (mũhari wa 18). O na kũrĩ ũguo, mwandĩki ũcio wa Thaburi aaugire ũũ: “Ndigwĩtigĩra.” Nĩ aamenyaga atĩ Jehova no aamwendete, o na gũtuĩka nĩ aamũrũngĩte. Mwandĩki ũcio wa Thaburi aarĩ na ma atĩ tondũ Ngai nĩ aamwendete, nĩ angĩamũteithirie ũndũ-inĩ o wothe angĩacemanirie naguo. (Thab. 118:29) Tũrabatara gũkorũo na ma atĩ Jehova nĩ atwendete. Gũkorũo na ũũma ũcio no gũtũteithie gũtooria guoya maũndũ-inĩ maya matatũ, (1) gwĩtigĩra atĩ tũtikũhota kũhingia mabataro ma famĩlĩ, (2) gwĩtigĩra andũ, na (3) gwĩtigĩra gĩkuũ. w22.06 15 ¶3-4

No mũhaka tũtigagĩrĩre atĩ ũthathaiya wa Jehova nĩguo tũigĩte mbere ũtũũro-inĩ witũ. Tondũ Jehova nĩwe Mũũmbi witũ, nĩ twagĩrĩirũo kũmũthathaiya. (Kũg. 4:11; 14:​6, 7) Kwoguo ũndũ ũrĩa wa bata mũno ũtũũro-inĩ witũ wagĩrĩirũo gũkorũo ũrĩ gũthathaiya Jehova na njĩra ĩrĩa endaga tũmũthathaiye nayo, na ũguo nĩ kuuga tũmũthathaiye “na roho na ma.” (Joh. 4:​23, 24) Tũngĩenda gũtongoragio nĩ roho mũtheru wa Ngai ũthathaiya-inĩ witũ, nĩguo ũthathaiya witũ ũgatwaranaga na ma iria irĩ Kiugo-inĩ gĩake. Twagĩrĩirũo kũiga ũthathaiya wa Jehova mbere ũtũũro-inĩ witũ, o na angĩkorũo tũikaraga kũndũ wĩra witũ wĩkĩrĩirũo mĩkaana kana ũhũũrĩtwo marubuku. Ihinda-inĩ rĩrĩ, makĩria ma aarĩ na ariũ a Ithe witũ 100 nĩ mohetwo njera no ũndũ tu wa gũkorũo marĩ Aira a Jehova. O na kũrĩ ũguo, nĩ makoragwo na gĩkeno tondũ nĩ merutanagĩria ũrĩa wothe mangĩhota kũhoya, kwĩruta, na kwĩra andũ arĩa angĩ ũhoro wĩgiĩ Ngai na Ũthamaki wake. Rĩrĩa andũ matũnyũrũria kana matũnyarira, no tũkorũo na gĩkeno nĩ kũmenya atĩ Jehova arĩ hamwe na ithuĩ na atĩ nĩ agaatũhe ngerenwa.—1 Pet. 4:14. w22.10 9 ¶13

Thĩinĩ wa ibuku rĩa Thimo, Jehova nĩ atũheete motaaro mega mangĩagagĩria ũtũũro witũ tũngĩmahũthĩra. Ta wĩcirie ngerekano igĩrĩ cia motaaro ta macio. Wa mbere, iganagĩra na kĩrĩa ũrĩ nakĩo. Thimo 23:​4, 5 ĩtũheaga ũtaaro ũyũ: “Ndũkenogagie ũgĩetha ũtonga. . . . Tondũ hatarĩ nganja nĩ ũkũmera mathagu o ta nderi na ũmbũke ũthiĩ rĩera-inĩ.” O na kũrĩ ũguo, andũ atongu na andũ athĩni ũmũthĩ nĩ mekagĩrĩra mũno gũcaria mbeca. Ũndũ ũcio kaingĩ nĩ ũtũmaga meke maũndũ mangĩthũkia rĩĩtwa rĩao, ũrata wao na andũ arĩa angĩ, o na nginya ũgima wao wa mwĩrĩ. (Thim. 28:20; 1 Tim. 6:​9, 10) Wa kerĩ, wĩciragie mbere ya kwaria. Tũngĩaga kwĩmenyerera, ciugo citũ no ikorũo na maumĩrĩro moru mũno. Thimo 12:18 yugaga ũũ: “Ciugo itecirĩtio nĩ ta gũthecanga na rũhiũ rwa njora, no rũrĩmĩ rwa andũ arĩa ogĩ nĩ rũhonagia.” Nĩ tũteithagĩrĩria harĩ gũtũũria thayũ rĩrĩa twethema gũtheremia mũcene wĩgiĩ mahĩtia ma andũ arĩa angĩ.—Thim. 20:19. w22.10 21 ¶14; 22 ¶16-17

Ezekieli nĩ aabataraga gũtaũkĩrũo biũ nĩ ndũmĩrĩri ĩrĩa angĩahunjirie. Nĩ aabataraga gwĩtĩkia ndũmĩrĩri ĩyo nĩguo ĩmũtindĩke kũhunjia. No harĩ ũndũ wa magegania wekĩkire. Ezekieli aaiguire gĩkũnjo kĩu “[kĩrĩ] na cama ta ũũkĩ.” (Ezek. 3:3) Nĩkĩ hihi? Tondũ harĩ Ezekieli, gũkorũo na gĩtĩo gĩa kũheana ndũmĩrĩri ya Jehova, kwarĩ ũndũ mwega kana ũrĩ cama. (Thab. 19:​8-11) Aarĩ na ngatho nĩ ũndũ wa Jehova kũmũhe mweke wa gũtungata arĩ mũnabii wake. Thutha ũcio, Jehova eerire Ezekieli ũũ: “Thikĩrĩria ciugo ciakwa ciothe iria ngũkwĩra, na ũciige ngoro-inĩ yaku.” (Ezek. 3:10) Kũgerera ciugo icio, Jehova eeraga Ezekieli agerie kũririkanaga maũndũ marĩa mandĩkĩtwo gĩkũnjo-inĩ kĩu na kũmecũranagia. Gwĩka ũguo nĩ gwatũmire wĩtĩkio wa Ezekieli ũgĩe na hinya. Ningĩ gĩkũnjo kĩu nĩ kĩamũhotithirie kũmenya ndũmĩrĩri nditũ ĩrĩa aagĩrĩirũo kũmenyithia andũ acio. (Ezek. 3:11) Thutha wa Ezekieli gũtaũkĩrũo nĩ ndũmĩrĩri ya Ngai biũ na kũmĩtĩkia, rĩu nĩ eehaarĩirie kwambĩrĩria ũtungata wake na kũũhingia. w22.11 6 ¶12-14

Rĩrĩa mogarũrũku thĩinĩ wa ithondeka rĩa Jehova mageria wĩhokeku waku-rĩ, wagĩrĩirũo gwĩka atĩa? Nyitaga mogarũrũku macio mbaru biũ. Hĩndĩ ciothe Aisiraeli makiuma kambĩ ĩmwe gũthiĩ ĩrĩa ĩngĩ, Akohathu nĩo maakuuaga ithandũkũ rĩa kĩrĩkanĩro maumĩtwo thutha nĩ andũ acio angĩ othe. (Ndar. 3:​29, 31; 10:33; Josh. 3:​2-4) Ũcio warĩ mweke wa mwanya. No maũndũ nĩ maacenjirie rĩrĩa Aisiraeli maaingĩrire Bũrũri wa Kĩĩranĩro. Ithandũkũ rĩa Kĩrĩkanĩro rĩtiabataraga gũikara rĩgĩthamagio. Kwoguo Akohathu maaheirũo mawĩra mangĩ. (1 Maũ. 6:​31-33; 26:​1, 24) Hatirĩ handũ tũthomaga atĩ Akohathu nĩ maatetire kana makiuga maheo wĩra ũngĩ atĩ tondũ nĩ meehokeirũo wĩra wa mwanya mbere ĩyo. Tũreruta atĩa? Nyitaga mbaru mogarũrũku ma ithondeka rĩa Jehova na ngoro yaku yothe, o na marĩa marahutia wĩra ũrĩa wĩhokeirũo. Kenagĩra mweke o wothe wa ũtungata waheo. Ririkanaga atĩ mweke ũrĩa ũrĩ naguo wa ũtungata tiguo ũtũmaga ũkorũo ũrĩ wa bata maitho-inĩ ma Jehova. Jehova akenagio mũno nĩ wathĩki waku gũkĩra mweke o wothe wa ũtungata ũngĩkorũo naguo. w22.11 23 ¶10-11

Onesiforo nĩ aacaririe mũtũmwo Paulo, na rĩrĩa aamuonire nĩ eerutanĩirie kũmũhe ũteithio ũrĩa aabataraga. Onesiforo eekire ũguo o na gũtuĩka ũndũ ũcio nĩ ũngĩaingĩririe muoyo wake ũgwati-inĩ. Tũreruta atĩa? Tũtiagĩrĩirũo kũreka guoya wa andũ ũtũgirĩrĩrie gũteithĩrĩria ariũ a Ithe witũ arĩa maranyarirũo. Handũ ha ũguo, rekei twĩkage ũrĩa wothe tũngĩhota kũmateithia. (Thim. 17:17) Nĩ mabataraga kuonio wendo na gũteithĩrĩrio. Ta wĩcirie ũrĩa aarĩ na ariũ a Ithe witũ bũrũri-inĩ wa Russia mateithagĩrĩria Akristiano arĩa maikĩtio njera. Rĩrĩa amwe maraciirithio, aarĩ na ariũ a Ithe witũ aingĩ nĩ mathiaga igooti-inĩ nĩguo makorũo hamwe nao. Tũreruta atĩa? Ndũgetigĩrage rĩrĩa ariũ a Ithe witũ arĩa maratongoria maũndũ macambio, manyitwo, kana manyarirũo. Mahoyagĩre, ũkarũmbũiya andũ a famĩlĩ ciao, na ũgacaragia njĩra ingĩ cia kũmateithia.—Atũm. 12:5; 2 Kor. 1:​10, 11. w22.11 17 ¶11-12

Athuri nĩo makoragwo na itemi rĩa gũteithia aarĩ na ariũ a Ithe witũ rĩrĩa maratangĩka, na kũmekĩra ngoro kũregera Bibilia. (1 Pet. 5:2) Rĩrĩa kwoimĩra gĩcanjama, athuri a kĩũngano magĩrĩirũo kwamba gũtigĩrĩra atĩ gũtirĩ mũrũ kana mwarĩ wa Ithe witũ ũrĩ ũgwati-inĩ, na othe marĩ na irio, nguo, na ha gũikara. No mĩeri mĩingĩ thutha ũcio, andũ arĩa mahĩtũkĩire gĩcanjama nĩ mabataraga gwĩkĩrũo ngoro kũgerera Maandĩko na kũũmĩrĩrio. (Joh. 21:15) Mũrũ wa Ithe witũ Harold, ũrĩa ũtungataga Kamĩtĩ-inĩ ĩmwe ya Wabici ya Rũhonge na wanaranĩria na aarĩ na ariũ a Ithe witũ aingĩ arĩa manahutio nĩ gĩcanjama, aaugire ũũ: “Andũ acio nĩ moyaga ihinda mangĩgatiga gũtangĩka meciria. No mambĩrĩrie gũcokereria ũtũũro wao, ĩndĩ makorũo magĩtangĩka maririkana ũrĩa moorirũo nĩ mũndũ meendete, kĩndũ meendete, o na kana ũrĩa moonete gĩkuũ na maitho. Kũririkana maũndũ macio no gũtũme macokererũo nĩ kĩeha rĩngĩ. Ũcio nĩ ũndũ wa ndũire, na ti kuonania atĩ matirĩ na wĩtĩkio.” Athuri a kĩũngano nĩ marũmagĩrĩra ũtaaro wa ‘kũrĩraga hamwe na arĩa mararĩra.’—Rom. 12:15. w22.12 22 ¶1; 24-25 ¶10-11

Jehova nĩ atũheaga na ũtaana roho wake mũtheru nĩguo tũhote gũtooria mbaara ya gwĩka ũrĩa kwagĩrĩire. Rĩrĩa tweruta Kiugo kĩa Ngai nĩ twĩtĩkagĩria roho wa Ngai ũtũtongorie. Ningĩ nĩ twamũkagĩra roho mũtheru rĩrĩa twathiĩ mĩcemanio. Rĩrĩa tũrĩ mĩcemanio-inĩ ya Gĩkristiano nĩ tũhũthagĩra mahinda hamwe na aarĩ na ariũ a Ithe witũ, arĩa o ta ithuĩ merutanagĩria gwĩka ũrĩa kwagĩrĩire, na ũndũ ũcio nĩ ũtwĩkagĩra ngoro. (Ahib. 10:​24, 25; 13:7) Na rĩrĩa twahoya Jehova na kĩyo atũteithie kũrũa na ũndũ mũna, nĩ arĩtũheaga roho wake mũtheru ũgatũhe hinya wa gũthiĩ na mbere kũrũa. O na gũtuĩka gwĩka maũndũ macio gũtingĩtwehereria merirĩria moru o rĩo, no gũtũteithie kwaga gwĩka kũringana na merirĩria macio. Thutha wa kũgĩa na mũtaratara mwega wa maũndũ ma kĩĩroho, nĩ ũndũ wa bata gũtũũria mũtaratara ũcio na gũthiĩ na mbere gũkũria merirĩria marĩa magĩrĩire. w23.01 11 ¶13-14

O na gũtuĩka Bibilia ti ibuku rĩa gũtũtaarĩria ũrĩa tũngĩrũmbũiya ũgima witũ wa mwĩrĩ kana kĩrĩa twagĩrĩirũo kũrĩa, nĩ yonanagia mawoni ma Jehova megiĩ maũndũ macio. Kwa ngerekano, atwĩrĩte “[tweherie] maũndũ moru” marĩa mangĩthũkia mĩĩrĩ itũ. (Koh. 11:10) Ũkoroku na ũrĩĩu nĩ mĩtugo ĩkoragwo ĩrĩ ũgwati harĩ muoyo wa mũndũ, na nĩ ĩkaananĩtio thĩinĩ wa Bibilia. (Thim. 23:20) Jehova erĩgagĩrĩra tuonanie ngumo ya kwĩgirĩrĩria rĩrĩa tũratua kĩrĩa tũkũrĩa, kĩrĩa tũkũnyua, na mũigana wakĩo. (1 Kor. 9:25) No tũtue matua marĩonanagia atĩ nĩ tũtĩĩte kĩheo kĩa Ngai kĩa muoyo na njĩra ya kũhũthĩra ũhoti witũ wa gwĩciria. (Thab. 119:​99, 100; Thim. 2:11) Kwa ngerekano, nĩ tũrĩhũthagĩra ũũgĩ tũgĩtua matua megiĩ kĩrĩa tũkũrĩa. Angĩkorũo twarĩa irio cia mũthemba mũna nĩ itũthũkagĩra, nĩ twagĩrĩirũo gũciĩthema o na angĩkorũo nĩ tũciendete. Ningĩ nĩ tuonanagia atĩ nĩ tũrahũthĩra ũhoti witũ wa gwĩciria rĩrĩa twerutanĩria gũkoma toro wa kũigana, kũmenyeria mwĩrĩ, na kũiga mĩĩrĩ itũ na mĩciĩ itũ ĩrĩ mĩtheru. w23.02 21 ¶6-7

Ũngĩka atĩa nĩguo wone maũndũ ma bata rĩrĩa ũrathoma Bibilia? Ta wĩcirie ũrĩa 2 Timotheo 3:​16, 17 yugaga. Mĩhari ĩyo yugaga atĩ “Rĩandĩko o rĩothe . . . rĩrĩ ũguni” (1) harĩ kũrutana, (2) harĩ gũkaanania, (3) harĩ kũrũnga maũndũ, na (4) harĩ kũherithia kana kũrũnga mwĩcirĩrie ũtagĩrĩire. No ũgunĩke na njĩra icio inya o na ũgĩthoma mabuku ma Bibilia marĩa ũtahũthagĩra kaingĩ. Thuthuria ũhoro ũcio makĩria nĩguo wone ũrakũruta atĩa igũrũ rĩgiĩ Jehova, muoroto wake, kana motaaro make. Wĩcũranie ũrĩa ũhoro ũcio ũngĩteithia harĩ gũkaanania. No wĩke ũguo na njĩra ya gwĩciria ũrĩa mũhari ũcio ũragũteithia gũkũũrana na kũregana na methugunda kana mĩerekera mĩũru, nĩguo ũthiĩ na mbere gũkorũo ũrĩ mwĩhokeku harĩ Jehova. Thuthuria ũrĩa ũhoro ũcio ũngĩgũteithia kũrũnga maũndũ kana kũrũnga mawoni moru, hihi ta rĩrĩa ũrĩ ũtungata-inĩ. Ningĩ roraga ũtaaro o wothe ũrĩ mũhari-inĩ ũcio ũngĩgũteithia kũrũnga mwĩcirĩrie waku ũtwarane na mwĩcirĩrie wa Jehova. Ũngĩĩciragia ũrĩa ũngĩgunĩka na njĩra icio inya, nĩ ũrĩonaga maũndũ ma bata marĩa mangĩgũteithia rĩrĩa ũrathoma Bibilia. w23.02 11 ¶11

Ũrathi ũngĩ ũrĩ ibuku-inĩ rĩa Danieli warathĩte atĩ Jesu angĩkambĩrĩria gwathana Ũthamaki-inĩ ũcio mũthia-inĩ wa ihinda rĩĩtĩtwo mahinda mũgwanja. Hihi no tũhote kũmenya rĩrĩa Jesu aatuĩkire mũthamaki? (Dan. 4:10-17) ‘Mahinda macio mũgwanja,’ marũgamĩrĩire ihinda rĩa mĩaka 2,520. Ihinda rĩu rĩambĩrĩirie mwaka wa 607 Mbere ya Mahinda Maitũ (M.M.M), rĩrĩa Ababuloni meeheririe mũthamaki wa mũico kuuma gĩtĩ-inĩ kĩa ũthamaki kĩa Jehova thĩinĩ wa Jerusalemu. Rĩathirire mwaka wa 1914 Mahinda Maitũ (M.M.) rĩrĩa Jehova aatuire Jesu Mũthamaki wa Ũthamaki wa Ngai, tondũ nĩwe “ũrĩa ũrĩ na kĩhooto gĩa kĩĩwatho.” (Ezek. 21:25-27) Tũngĩgunĩka atĩa kuumana na ũrathi ũcio? Kũmenya ũhoro wĩgiĩ ‘mahinda macio mũgwanja’ nĩ gũtũheaga ũũma atĩ Jehova ahingagia ciĩranĩro ciake ihinda rĩrĩa rĩagĩrĩire. O ta ũrĩa aabangĩte ihinda rĩrĩa Ũthamaki wake ũkaahandwo, no taguo agaatigĩrĩra atĩ morathi macio mangĩ mothe mahinga kũringana na ihinda rĩrĩa abangĩte. Mũthenya wa Jehova ‘ndũgaacererũo.’—Hab. 2:3. w22.07 3 ¶3-5